ایمزٹی وی(انٹرٹینمنٹ) بالی ووڈ کے مسٹر پرفیکشنسٹ عامر خان کی نئی آنے والی فلم ’’دنگل‘‘ کا ٹریلیر جاری کردیا گیا جسے سوشل میڈیا پر بے حد پسند کیا جارہا ہے۔

بھارتی میڈیا رپورٹس کے مطابق بالی ووڈ اسٹار عامر خان کی فلم ’’دنگل‘‘ کا ٹریلیر جاری کردیا گیا جس نے دیکھتے ہی دیکھتے مقبولیت حاصل کرلی ہے جب کہ مداحوں کی جانب سے فلم کے ٹریلیرکو بے حد پسند کیا جاریا ہے جسے چند گھنٹوں میں ہی یو ٹیوب پر 30 لاکھ سے زائد افراد دیکھ چکے ہیں۔
جانب فلم نگری کے بڑے بڑے ستارے بھی عامر خان کی فلم کے ٹریلیر سے متاثر ہوئے بغیر نہ رہ سکے اور سماجی رابطے کی ویب سائٹ ٹوئٹر پر فلم کے ٹریلیر کی تعریفوں کے پل باندھ دیئے ہیں جب کہ معروف ہدایتکار کرن جوہر کا اپنی ٹوئٹ میں کہنا تھا کہ فلم ’’دنگل‘‘بہترین فلم جو کہ تاریخ رقم کردے گی۔

بالی ووڈ اسٹار عامر خان اپنے کردار میں ڈھل جانے کے حوالے سے شہرت رکھتے ہیں جس کی وجہ سے ان کی فلموں کا بڑی بے صبری سے انتظار کیا جاتاہے جب کہ سلو میاں کی فلم ’’سلطان‘‘ کے بعد مسٹر پرفیکشنسٹ کی فلم کا شدت سے انتظار کیا جارہا ہے لیکن فلم نے ٹریلیر اپنی ریلیز کے ساتھ ہی مقبولیت کی انتہا کو پہنچ چکا ہے۔

ایمزٹی وی (لاہور)پنجاب فوڈ اتھارٹی میں ڈائریکٹر آپریشن کو عہدے سے ہٹانے کی خبر کے بعدعائشہ ممتاز بھی میدان میں آگئیں ،ان کا کہنا ہے کہ مجھے عہدے سے نہیں ہٹا یا گیا ،کسی سے کوئی اختلاف نہیں ہے ،نجی مصروفیات کے باعث چھٹی لی ہے ۔
تفصیلات کے مطابق ڈائریکٹر آپریشن پنجاب فوڈ اتھارٹی عائشہ ممتاز نے کہا ہے کہ کسی سے کوئی اختلاف نہیں ،نجی مصروفیات کے باعث 104دن کے لیے رخصت لی ہے۔

ذرائع کا کہنا ہے کہ عائشہ ممتاز نے مبینہ طور پر غیر معیاری دود ھ بنانے والی دو فیکٹر یاں سیل کی تھیں جس کے بعد ڈی جی فوڈ اتھارٹی اور عائشہ ممتاز میں مبینہ طور پر سرد جنگ جاری تھی ،عائشہ ممتاز پر اعلیٰ افسران کے ساتھ ناروا سلوک کا بھی الزام تھا۔
ذرائع کے مطابق ڈی جی فوڈ اتھارٹی نے گریڈ 17کی افسر رافعہ حیدر کو گریڈ 19کا چارج دے دیا ہے

ایمزٹی وی (اسلام آباد)پشاور روانگی سے قبل اسلام آباد میں میڈیا سے بات کرتے ہوئے چیرمین تحریک انصاف کا کہنا تھا کہ وزیراعظم نواز شریف کی ذاتی کرپشن پکڑی گئی ہے اور کوئی جواز نہیں کہ ان کا مقدمہ سرکاری وکیل لڑے وہ اپنے ذاتی وکیل کے ذریعے پاناما لیکس کا کیس لڑیں۔ اٹارنی جنرل شریف خاندان کی کرپشن کو بچانے کی کوشش نہ کرے۔ وہ کس منہ سے عوام کے پیسے سے کرپٹ وزیراعظم کا کیس لڑرہے ہیں شریف خاندان ارب پتی جبکہ ان کے بچے کھرب پتی ہیں۔

عمران خان نے کہا کہ نواز شریف اپنی کرپشن بچانے کے لئے پاکستان کو تباہ کررہے ہیں اور ان کے پیچھے بھارتی لابی کام کررہی ہے، جمہوریت میں وزیراعظم جوابدہ ہوتا ہے نوازشریف 7 ماہ سے کوئی جواب نہیں دے رہے لیکن اب ان کو حساب دینا ہوگا،اب بھی وقت ہے کہ نواز شریف احتساب کے لئے خود کوپیش کردیں۔

عمران خان نے کہا کہ اسلام آباد دھرنے کو ناکام بنانے کےلئے حکمرانوں کی جانب سے اوچھے ہتھکنڈے استعمال کئے جارہے ہیں اور یہ تاثر قائم کیا جارہا ہے کہ 2 نومبر کا دھرنا فوج کرارہی ہے اور فوج امن نہیں چاہتی، اب حکمرانوں نے 2 نومبر کے حوالے سے کالعدم تنظیموں کی اسلام آباد آمد کا نیا شوشا چھوڑا ہے کبھی ہمیں مذاکرات کے لئے کہا جاتا ہے لیکن اب مذاکرات 2 نومبرکو اسلام آباد میں ہی ہوں گے اور عوام کا سمندر ہمارے ساتھ ہوگا۔

دوسری جانب اٹارنی جنرل آفس کی جانب سے عمران خان کے بیان کی تردید کرتے ہوئے کہا گیا ہے کہ عمران خان کا بیان ان کی ذاتی سوچ ہے، اٹارنی جنرل آفس کسی کا نمائندہ نہیں ، یہ ایک آئینی عہدہ ہے اور صرف قانونی کردار ادا کرتے ہوئے صرف عدالت کی معاونت کرتا ہے۔

ایمزٹی وی(پشاور) پشاور ہائیکورٹ نے این اے 46فاٹا پر الیکشن ٹربیونل کا فیصلہ منسوخ کر دیا ۔

ذرائع کےمطابق پشاور ہائیکورٹ نے الیکشن ٹربیونل کے فیصلے کے خلاف دائر درخواست پر سماعت کرتے ہوئے ٹربیونل کے فیصلے کو منسوخ کردیا اور آزاد حیثیت میں ایم این اے منتخب ہونے والے ناصر خان آفریدی کی رکنیت بحال کرنے کے احکامات جاری کر دیے ۔

ناصر خان آفریدی 2013 ءکے عام انتخابات میں 4ہزار 135ووٹ لیکر کامیاب ہوئے تھے تاہم بعدمیں انکے مخالف امیدوار حمید اللہ جان آفریدی نے دھاندلی کے الزاما ت عائد کر کے الیکشن ٹربیونل میں درخواست دائر کی تھی جس پر ٹربیونل نے ان انتخابات کو کالعدم قرار دیتے ہوئے الیکشن کمیشن کو دوبارہ انتخابات کرانے کی ہدایت کی تھی ۔

ایمزٹی وی(آزاد کشمیر)حکومت پاکستان نے سکوک بانڈز کے اجراء کیلئے موٹروے گروی رکھی تو آزادکشمیر حکومت نے بھی مالی بحران سے نمٹنے کیلئے انوکھاحل ڈھونڈ نکالا۔

تفصیلات کے مطابق آزاد کشمیر حکومت نے مالی بحران سے نکلنے کیلئے وزیراعظم ہاؤس کو کرائے پردینے کافیصلہ کیا ہے.

قانون ساز اسمبلی نے بھی منظوری دے دی ہے جس بعد کرائے دار کی تلاش ہے تاہم ابھی تک یہ واضح نہیں کہ آزاد کشمیر کا وزیراعظم ہاؤس کتنی مدت کے لئے کرائے پر دیا جائے گا اور کرایہ کتنا ہوگا۔

ایمزٹی وی(اسلام آباد) سپریم کورٹ نے پاناما لیکس پر درخواستوں کی سماعت یکم نومبر مقرر کر کے وزیراعظم سمیت تمام فریقین کو جواب جمع کرانے کی ہدایت کردی۔
ذرائع کے مطابق سپریم کورٹ نے پاناما لیکس پر درخواستوں کی سماعت 2 نومبر تک ملتوی کی تھی تاہم اب سپریم کورٹ نے پاناما لیکس پر درخواستوں کی سماعت یکم نومبر کو مقرر کر دی ہے۔

سپریم کورٹ نے وزیراعظم نواز شریف، وزیر خزانہ اسحاق ڈار، مریم نواز، کیپٹن صفدر، حسن اور حسین نواز سمیت تمام فریقین کو نوٹسز جاری کرتے ہوئے یکم نومبر سے قبل جواب جمع کرانے کی ہدایت کی ہے اور اس حوالے سے نوٹسز بھی جاری کر دیئے گئے ہیں۔

اس کے علاوہ سپریم کورٹ نے وفاقی حکومت، سیکرٹری داخلہ، پیمرا، نیب، الیکشن کمیشن، ایف بی آر، سیکرٹری اسٹیبلشمنٹ اور وزارت پارلیمانی امور کو بھی نوٹس جاری کرتے ہوئے کہا کہ 30 اکتوبر تک جواب جمع کرائیں تاکہ پاناما لیکس پر کارروائی کو آگے بڑھایا جائے۔
واضح رہے کہ پاناما لیکس پر تحریک انصاف کے چیرمین عمران خان، عوامی مسلم لیگ کے سربراہ شیخ رشید اور امیر جماعت اسلامی سراج الحق نے علیحدہ علیحدہ درخواستیں دائر کر رکھی ہیں۔

ایمز ٹی وی ( انٹر ٹینمنٹ )بھارتی سپریم کورٹ کے سابق جج اورپریس کونسل آف انڈیا کے سابق چیئرمین جسٹس ریٹائرڈ مارکنڈے کاٹجو نےپاکستانی فنکاروں کے حق میں آواز اٹھادی۔

فواد خان کی فلم’اے دل ہے مشکل ‘ کی ریلیز روکنے پر جسٹس کاٹجونےانتہا پسند تنظیم مہاراشٹرنونرمان سینا کوان ہی کی زبان میں چیلنج دے دیا۔ایم این ایس کے کارکنوں کو غنڈہ قرار دیتے ہوئے بولے

انہوں نے تو بحیرہ عرب کا کھاراپانی پیا ہےلیکن میں الہ آبادی غنڈا ہوں ،میں نے سنگم کا پانی پیا ہے، کمزور فنکاروں کو اپنی بہادری دکھانے کےبجائے آؤ مجھ سے مقابلہ کرو،تاکہ دنیا دیکھے کون بڑا غنڈا ہے۔جسٹس کاٹجواس سے پہلے بھی گائے کا گوشت کھانے پر کھل کر اپنی رائے کا اظہار کر چکے ہیں جس پر انتہا پسندوں نےانہیں جان سے مارنے کی دھمکیاں دی تھیں۔ دوسری جانب فلم’اےدل ہے مشکل‘ کی ریلیز روکنےپرسابق بھارتی کرکٹر سنجے منجریکر نےبھی ایم این ایس پر شدید تنقید کی ہے،بولے،اس پارٹی کا اسمبلی میں صرف ایک رکن ہے،انہوں نے اب تک سبق نہیں سیکھا،اگران کی طرف سے دھمکیوں کا یہ ہی سلسلہ جاری رہا تو اگلے انتخابات کے بعد اسمبلی میں ان کا ایک ممبر بھی نہیں ہو گا۔