ایمزٹی وی (راولپنڈی)بھارت مقبوضہ کشمیر میں برہان وانی کی شہادت کے بعد جذبہ آزادی کی لہر کو دبانے میں ناکام ہوا تو اس نے لائن آف کنٹرول پر اشتعال انگیزی شروع کردی تھی جس کے نتیجے میں کئی بے گناہ شہری شہید ہوئے اور اب اس نے ورکنگ باؤنڈری پر بھی فائرنگ کا سلسلہ شروع کردیا ہے تاہم یہاں بھی پاکستان نے انہیں منہ توڑ جواب دیا ہے۔

پاک فوج کے شعبہ تعلقات عامہ آئی ایس پی آر کے مطابق بھارتی فوج نے ورکنگ باؤنڈری کے شکر گڑھ سیکٹر پر چک امرو گاؤں کے شمال میں صبح 9 بجے بلااشتعال فائرنگ کا سلسلہ شروع کیا جو کہ آدھے گھنٹے تک جاری رہا۔

آئی ایس پی آر کے مطابق پنجاب رینجرز کی جانب سے بھی منہ توڑ جوابی کارروائی کی گئی جس کی وجہ سے بھارتی بندوقیں خاموش ہو گئیں۔ فائرنگ کے تبادلے میں کوئی جانی و مالی نقصان نہیں ہوا

واضح رہے کہ بھارتی فوج نے چند روز قبل لائن آف کنٹرول کے نکیال سیکٹر میں بلااشتعال فائرنگ کرتے ہوئے بے گناہ خواتین اور بچوں کو نشانہ بنایا تھا جب کہ بھارتی فوج کی اس اشتعال انگیزی کے نتیجے میں 28 سالہ نوجوان شہید اور خواتین اور بچوں سمیت 5 افراد زخمی ہوگئے تھے۔

ایمز ٹی وی (تعلیم / جامشورو) آرکیٹیکچر شعبے میں پڑھنے والے ذہین اور ضرورتمند طالب علم کواسکالرشپ کی فراہمی کا اعلان کر دیا گیا۔

مہران یونیورسٹی آف انجینئرنگ اینڈ ٹیکنالوجی جامشورو کے اسٹوڈنٹس فنانشل ایڈ آفس کی اسکالرشپ میں مزید اضافہ کر دیا گیا۔ اسکالر شپ ڈاکٹر سلیمان قاضی کی جانب سے اپنے بیٹے زاہد سلیمان کے نام سے مہران یونیورسٹی کے آرکیٹیکچر شعبے میں پڑھنے والے ذہین اور ضرورتمند طالب علم کو دی گئی ہے ۔

جس میں طالب علم کی مکمل پانچ سالوں کی پڑھائی کے اخراجات کے لئےدیا جانے والا چیک وائس چانسلر پروفیسر ڈاکٹر محمد اسلم عقیلی کے حوالے کر دیا گیا ہے ۔

ایمزٹی وی(بزنس) بینک نے مالیاتی نتائج کے ساتھ تیسری سہ ماہی کے لیے 3.5روپے فی حصص (35فیصد) ڈیویڈنڈ کا بھی اعلان کیا ہے، ایچ بی ایل کی بیلنس شیٹ دسمبر 2015 کے مقابلے میں 7 فیصد کے اضافے سے 2.4ٹریلین روپے پر پہنچ گئی، مقامی ڈپازٹ مکس میں بہتری کاعمل جاری رہا اور اب کرنٹ اکاؤنٹس ڈپازٹس کا 35.6فیصد ہوگئے۔

ایچ بی ایل کو سال 2016کے پہلے 9ماہ میں 25.8ارب روپے کا بعد از ٹیکس منافع ہوا جبکہ فی حصص آمدن 17.47 روپے رہی۔

مذکورہ 9ماہ میں کرنٹ اکاؤنٹس میں اوسطاً 19 فیصد کا سال بہ سال اضافہ ہوا جس سے ایچ بی ایل کو مقامی ڈپازٹس کی لاگت میں کمی لانے میں مدد ملی، تمام سیگمنٹس میں اوسط مقامی قرضے بڑھنے کے ساتھ بینک خالص سودی آمدنی 7 فیصد بڑھا کر 62.2ارب روپے تک لے جانے کے قابل ہوا، فیس اور کمیشنز 18 فیصد کے اضافے سے 13.7ارب روپے پر پہنچ گئے، اس دوران انتظامی اخراجات میں اضافہ 10 فیصد تک محدود رہا، این پی ایل کوریج ریشو بہتری کے ساتھ 30ستمبر 2016 کو 90فیصد تک پہنچ گیا۔

ایمزٹی وی(نیوزڈیسک) ٹائم میگزین نے 2016 میں دنیا کے 30 بااثر نوجوانوں کی فہرست جاری کردی جس میں سب سے کم عمر میں نوبل امن انعام حاصل کرنے والی پاکستان کی ملالہ یوسف زئی اور کراچی کے گیمر سمیل حسن نام شامل کروانے میں کامیاب ہوگئےہیں

رپورٹس کے مطابق سمیل حسن وہ واحد نوجوان ہے جس نے سب سے کم عمر میں گیم کھیلنے پر بطور انعام 10لاکھ ڈالر سے زائد حاصل کیے،7سالہ سمیل حسن گزشتہ سال چین میں ایشین چیمپئن شپ جیتنے میں کامیاب ہوئے تھے جہاں ان کی ٹیم نے 12 لاکھ ڈالر کا انعام حاصل کیا تھا۔
ٹائم میگزین کے مطابق طویل عرصے سے لڑکیوں کی تعلیم کیلیے جدوجہد کرنے والی 19سالہ ملالہ یوسف زئی بھی اس فہرست میں شامل ہے۔

ملالہ کی تنظیم دی ملالہ فنڈ کو دنیا بھر سے نامور شخصیات کی امداد حاصل ہے، اس وقت ملالہ عالمی رہنماؤں پر زور دے رہی ہیں کہ وہ رواں برس ایک ارب 40کروڑ ڈالر نوجوان مہاجرین کی تعلیم کیلیے مختص کریں۔

ایمزٹی وی(تعلیم/اسلام آباد)علامہ اقبال اوپن یونیورسٹی نے طلبا کو تعلیمی سرگرمیوں سے باخبر رکھنے کے لئے اے آئی او یو، ویب ٹی وی اور 21 شہروں میں ایف ایم 91.6پر ریڈیو نشریات کا آغاز کردیا ہے۔

اوپن یونیورسٹی نے طلبا کو تعلیمی سرگرمیوں سے باخبر رکھنے کے لئے اے آئی او یو، ویب ٹی وی اور 21 شہروں میں ایف ایم 91.6پر ریڈیو نشریات کا آغاز کردیا ہے۔

جبکہ یونیورسٹی کے پراسپکٹس اور داخلہ فارم کو پہلی بار آن لائن کردیاگیا ہے ۔ان خیالات کا اظہار یونیورسٹی کے وائس چانسلر پروفیسر ڈاکٹر شاہد صدیقی نے ایک تربیتی ورکشاپ کے افتتاحی اجلاس سے خطاب کرتے ہوئے کیا

ایمزٹی وی(آزاد کشمیر)وزیراعظم راجہ فاروق حیدرخان کی زیر صدارت یوم تاسیس اور یوم سیاہ کے انتظامات کے حوالے سے اعلیٰ سطح کا اجلاس گزشتہ روز منعقد ہوا۔ اجلاس میں وزیر صنعت وسماجی بہبود نورین عارف، وزیر تعلیم بیرسٹر افتخار گیلانی،ممبران اسمبلی راجہ عبدالقیوم خان،چوہدری شہزادمحمود، مصطفی بشیر عباسی ،انسپکٹر جنرل پولیس بشیر میمن، سینئر ممبر بورڈ آف ریونیو احسان خالد کیانی سمیت دیگر نے شرکت کی اس موقع پر ایڈیشنل چیف سیکرٹری جنرل فرحت علی میرنے یوم تاسیس اور یوم سیاہ کے انتظامات کے بارے میں وزیر اعظم کو تفصیلی بریفنگ دی۔

وزیر اعظم راجہ فاروق حید رخان نے خطاب کرتے ہوئے کہا کہ کشمیر ایشو آر پار کی قیادت کا ون پوائنٹ ایجنڈا ہے ، کشمیریوں کو تنہائی کا احساس نہیں ہونے دینگے ، تحریک آزاد ی کشمیر کے بیس کیمپ کی حکومت اور عوام مقبوضہ کشمیر کے عوام کے ساتھ کھڑے ہیں وزیر اعظم آزاد کشمیر نے مقبوضہ کشمیر میں انسانی حقوق کی سنگین پامالیوں کی شدید مذمت کرتے ہوئے کہا کہ بیس کیمپ کی حکومت ہر بین الاقوامی فورم کا دروازہ کھٹکھٹائے گی ، بھارتی مظالم کو بے نقاب کرتے رہیں گے ۔جموں وکشمیر لبریشن سیل کو مزید متحرک وفعال بنایا جائے گا۔

جموں وکشمیر لبریشن سیل مسئلہ کشمیر کو بین الاقوامی سطح پر اجاگر کرنے کے لئے کاوشیں کرے ، مقبوضہ کشمیر کے عوام کی قربانیوں نے مسئلہ کشمیر کو دنیا کا فلیش پوائنٹ بنا دیا ہے ۔ بھارت پر پریشر بڑھتا جارہا ہے اب بھارت کے اندر سے بھی کشمیریوں کی حمایت کے لیے آوازیں اٹھ رہی ہیں ۔ کشمیری شہداء کا لہو رنگ لا کر رہے گا۔

وزیر اعظم پاکستان میاں محمد نواز شریف کے شکر گزار ہیں جنہوں نے کشمیر ایشو کے حوالے سے اقوام متحدہ کی جنرل اسمبلی میں جرات مندانہ خطاب کیا ۔ جس سے مقبوضہ کشمیر کے عوام کی تحریک کو نیا جوش و ولولہ ملا ۔ راجہ فاروق حیدر نے کہا کہ بھارتی حکمران پاکستان کے عدم استحکام کی سازشوں میں ملوث ہیں ۔مگر بھارتی حکمرانوں کے مذموم عزائم کبھی کامیاب نہیں ہونگے ۔ وزیر اعظم پاکستان کے ویژن کے مطابق پاکستان ترقی کی منازل طے کر ے گا۔

ایمزٹی وی(کراچی)پاک سرزمین پارٹی کے چیرمین مصطفیٰ کمال نے سانحہ 12 مئی اور بلدیہ ٹاؤن کی ازسرنو تحقیقات کا مطالبہ کرتے ہوئے کہا کہ دونوں واقعات میں گورنر سندھ ملوث ہیں جب کہ عشرت العباد کا نام ای سی ایل میں ڈال کر انہیں فوری گرفتار کیا جائے۔
کراچی میں پریس کانفرنس کرتے ہوئے پاک سرزمین پارٹی کے چیرمین مصطفیٰ کمال نے گورنرسندھ کی جانب سے لگائے گئے الزامات کو مسترد کرتے ہوئے کہا کہ مجھ پر لگائے گئے الزامات پر جے آئی ٹی بنائی جائے جب کہ سانحہ 12 مئی اور بلدیہ ٹاؤن سانحے کی ازسر نوتحقیقات کرائی جائیں اور میں دعوے سے کہتا ہوں کہ سانحہ بلدیہ ٹاؤن کا سب سے بڑا مجرم عشرت العباد ہی نکلے گا جب کہ 12 مئی کے واقعے میں بھی گورنر سندھ ہی ملوث ہیں۔

انہوں نے کہا کہ 12 مئی 2007 کو کمانڈ اینڈ کنٹرول روم گورنر ہاؤس میں قائم تھا اور گورنر صاحب کراچی کی تمام انتظامیہ کو خود ڈیل کررہے تھے، رینجرز اور پولیس سمیت سب عشرت العباد کے ماتحت تھے اور اس وقت ہوم ڈپارٹمنٹ کے ایڈوائزر وسیم اختر تھے جب کہ وسیم اختر نے خود کہا 12 مئی سے متعلق تمام اجلاس گورنر ہاؤس میں ہوتے تھے۔
چیرمین پی ایس پی کا کہنا تھا کہ ڈاؤ یونیورسٹی میں عشرت العباد نے اپنے پرسنل سیکرٹری کو وائس چانسلر لگایا اور ان کے ساتھ ملکر اربوں روپے کی کرپشن کررکھی ہے، مسعود حمید کی بیوی کو پی ایچ ڈی کرایا جارہا ہے تاکہ وہ اگلی وائس چانسلر لگیں جب کہ عشرت العباد گورنر بننے کے بعد 5 سال تک برطانوی حکومت سے1 ہزار پاونڈ ماہانہ لیتے تھے اور گورنر سندھ عشرت العباد پرقتل سمیت 30 مقدمات بھی ہیں۔

انہوں نے وزیراعظم اور وزیرداخلہ سے مطالبہ کیا کہ عشرت العباد کی جائیدادوں کی تفصیلات حاصل کرکے اس کی انکوئری کی جائے اور ان دہری شہریت پرفوری کارروائی کی جائے جب کہ گورنرسندھ کا نام ای سی ایل میں ڈال کرانہیں گرفتار کیا جائے تاکہ وہ ملک سے فرار نہ ہونے پائیں۔
مصطفیٰ کمال کا کہنا تھا کہ سانحہ12 مئی کو 53 افراد مارے گئے لیکن عشرت العباد پھر بھی گورنرشپ کے عہدے پر رہے اور انہیں 5 سال بعد کیوں سانحہ بلدیہ کے مجرم پکڑنے کا خیال آیا، عشرت العباد بانی ایم کیو ایم سے رابطے میں ہیں اورا نہیں محسن قرار دیتے ہیں۔ انہوں نے کہا کہ گورنر نے ایک طرف کہا میں اسٹیبلشمنٹ ہو ، دوسری طرف کہا کہ مجھ سے ڈرو لیکن ہم اللہ کے علاوہ کسی سے نہیں ڈرتے جب کہ میں نے کبھی نعمت اللہ خان کی برائی نہیں کی ،وہ میرے لیے محترم ہیں لیکن عشرت العباد ان کے پیچھے چھپننے کی کوشش نہ کریں، ہم انہیں چھپنے نہیں دیں گے۔

ایمزٹی وی(مانٹرنگ ڈیسک) پاک فوج نے برطانیہ میں کیمبرین پٹرول مقابلوں میں شاندار کارکردگی دکھا کر دوسری مرتبہ گولڈ میڈل حاصل کرلیا۔
پاک فوج نےعالمی سطح پراپنی برتری ثابت کرتے ہوئے برطانیہ میں ویلز آرمی کا سالانہ کیمبرین پٹرول مقابلہ ایک مرتبہ پھرجیت کر گولڈ میڈل حاصل کرلیا۔ دنیا بھر میں سب سے مشکل سمجھی جانے والی مشقوں میں پاک فوج کےجوانوں نے فولادی قوت برداشت کا مظاہرہ کیا اور سب کو پیچھے چھوڑ دیا۔

واضح رہے کہ کیمبرین پٹرول فوجی مشقیں ہر سال منعقد کی جاتی ہیں جس میں 140 ملکوں کے فوجی شریک ہوتے ہیں جب کہ پاک فوج نے2010 میں بھی گولڈ میڈل جیتا تھا۔

ایمزٹی وی(تعلیم/ کراچی) وفاقی اردویونیورسٹی شعبہ حیاتیاتی کیمیاءکے تحت Biochemisry" "Essential Physiologycal کے موضوع پرہونے والی سائنسی نمائش کے دورے کے موقع پر اپنے خیالات کا اظہار کرتے ہوئے رئیس کلیہ سائنس پروفیسر ڈاکٹر روبینہ مشتاق نے کہا کہ طلبہ ہمارے ملک کا مستقبل ہیں اس لحاظ سے ان کی ہمہ جہتی تیاری اور ترقی اردو یونیورسٹی کا مشن ہے۔

انہوں نے کہا کہ سائنسی نمائش کے انعقاد سے طلبہ و طالبات کوجدید معلومات حاصل ہوںگی۔ اس نمائش کے انعقاد پر اساتذہ کا کردار بھی کلیدی حیثیت رکھتا ہے ۔اس موقع پر صدر شعبہ حیاتی کیمیاءڈاکٹر ثمینہ خالق،ڈاکٹر حنا مدثر اورپروگرام کوآرڈینیٹر سمیرا رئیس ان کے ہمراہ تھیں۔

انہوں نے طلباءاور اساتذہ کی کاوشوں پر انہیں مبارک باد پیش کی اور انہیں سراہتے ہوئے کہا کہ طلباءکو غیر نصابی اور تخلیقی سرگرمیوں کو جاری رکھنے کا بھرپور عزم کرنا چاہیے ۔پروگرام میں دیگر شعبہ جات کے طلبہ و طالبات نے بھی کثیر تعداد میں شرکت کی اور اپنی پسندیدگی کا اظہار کیا۔

طلبہ کا کہنا تھا کہ اس نمائش کے باعث جہاں انہیں مختلف مضا مین میں اپنی تخلیقی صلا حیتوں کو پروان چڑھانے کا موقع ملا وہیں ان کی دیگر صلاحیتیں جن میں خود اعتما دی بھی شامل ہے۔پروگرام کے اختتام پر پہلی ، دوسری اور تیسری پوزیشن حاصل کرنے طلباءو طالبات کو سرٹیفکیٹ دیئے گئے۔

ایمزٹی وی (تعلیم/ کراچی)وفاقی اردو یونیورسٹی گلشن اقبال کیمپس کی انجمن اساتذہ کی صدر اور سابق رکن سینیٹ سیما ناز صدیقی اور جنرل سیکریٹری پروفیسر ڈاکٹر محمد زاہد نے اپنے مشترکہ بیان میں تمام متعلقہ اداروں اور اربابِ اختیار سے درخواست کی ہے کہ براہِ کرم وفاقی جامعہ اردو جو اپنی نوعیت اور پاکستان کی قومی زبان کے حوالے سے واحد اور منفرد جامعہ ہے اور اپنی ابتداءہی سے ایک تسلسل کے ساتھ انحطاط و زوال کا شکار ہوتی چلی آئی ہے اب پہلی مرتبہ موجودہ وائس چانسلر پروفیسر ڈاکٹر سلیمان ڈی محمد کی سرپرستی میں ترقی کی جانب گامزن نظر آرہی ہے۔

جامعہ کی تاریخ میں پہلی بار چانسلر صدر مملکت محترم ممنون حسین نے بذاتِ خود اس کے معاملات میں دلچسپی لے کر جامعہ کی سینٹ کے تجویز کردہ اور ہائیر ایجوکیشن کی مشاورت سے جامعہ اردو ہی کے ایک سینئر، قابل ترین باصلاحیت اور بے داغ ماضی کے حامل استاد پروفیسر ڈاکٹر سلیمان ڈی محمد کو نگراں وائس چانسلر مقررکیا اور ڈاکٹر سلیمان نے بھی انتہائی محدود مدت اور محدود وسائل میں رہتے ہوئے جامعہ اردو کو نہ صرف تعلیمی و تحقیقی بلکہ ہم نصابی، سماجی اور تعمیراتی حوالے سے ترقی کی شاہراہ پر گامزن کردیا، جس کا ماضی میں اساتذہ اور طلباءصرف خواب ہی دیکھا کرتے تھے۔

جامعہ اردو کی یہ ترقی دراصل جامعہ کے وہ لمبے ہاتھوں والے کرپٹ زدہ چند عناصر ہضم نہیں کرپارہے ہیں جو اس جامعہ کے وجود ہی کو برداشت نہیں کرسکتے ہیں۔ یہ عناصر ایک سوچی سمجھی سازش کے تحت مسلسل شیخ الجامعہ کی کردار کشی میں اس طرح لگے ہوئے ہیں جیسے دنیا میں اس کے علاوہ انہیں کوئی دوسرا کام ہی نہ ہو۔ دوسری جانب ڈاکٹر صاحب کی مسلسل صبر آزما خاموشی ان تمام امور کو مسلسل ہوا دے رہی ہے وہ تو کام کو عبادت سمجھ کر انجام دے رہے ہیں مگر ان کی کردار کشی ہمیں جامعہ اردو اور یہاں تدریس کے فرائض سرانجام دینے والے اساتذہ کی توہین محسوس ہونے لگی ہے کیونکہ یہ گھناﺅنا طرزِ عمل دراصل جامعہ اردو کو سازش کے تحت بدنام کرنے کا حصہ معلوم ہورہا ہے۔

براہِ کرم جامعہ اردو کے اساتذہ، طلباءاور عمال کو اس کرب ناک اذیت سے نجات دلانے میں ہماری مدد فرمائیں تاکہ ہم سب ایک اچھے اور پرسکون ماحول میں ڈاکٹر صاحب کی سرپرستی میں جامعہ اردو کو بامِ عروج پر پہنچانے کے لئے مل کر اور یکسوئی سے کام کرسکیں۔