ایمزٹی وی(اسلام آباد)پاکستانی دفتر خارجہ میں بھارتی ڈپٹی ہائی کمشنر کو طلب کر کے سیز فائر کی خلاف ورزیوں پر شدید احتجاج کیا گیا ہے ۔

ذرائع کے مطابق کنٹرول لائن پر سیز فائر کی خلاف ورزیوں پر بھارتی ڈپٹی ہائی کمشنر کو دفتر خارجہ طلب کر کے احتجاج ریکارڈ کرایا اور احتجاجی مراسلہ بھی انکے حوالے کر دیا گیا ہے۔

ترجمان کے مطابق بھارتی ڈپٹی ہائی کمشنر سے کہا گیا ہے کہ اڑی واقعے کے بعد بھارت متعدد بار کنٹرول لائن پر سیز فائر کی خلاف ورزی کر چکا ہے ۔

دفتر خارجہ کے ترجمان کا کہنا ہے کہ پاکستان کی جانب سے بھارت سے مطالبہ کیا گیا ہے کہ کنٹرول لائن پر سیز فائر کی خلاف ورزی بند کی جائے۔

”بھارت کنڑول لائن پر مسلسل سیز فائر کی خلاف ورزیاں کر رہا ہے “ ، تاہم پاکستان کے صبر کو کمزوری نہ سمجھا جائے۔

ایمزٹی وی (لاس ویگاس)لاس ویگاس میں ہونے والے تیسرے اور آخری مباحثے کے آغاز میں بھی دونوں امیدواروں نے ایک دوسرے سے ہاتھ نہیں ملایا۔ اس موقع پر ڈونلڈ ٹرمپ کا کہنا تھا کہ غلط پالیسیوں کی وجہ سے دوسری اقوام کے لوگ کاروبار لے اڑتے ہیں، آج امریکی معاشی شرح نموصرف ایک فیصد رہ گئی ہے جو 1950 کے امریکا کا نقشہ پیش کرتی ہے، امریکی معیشت میں 5 سے 6 فیصد بہتری لائی جا سکتی ہے۔ ہیلری کلنٹن کا کہنا تھا ڈونلڈ ٹرمپ صدر بن گئے تو امریکا کا ستیا ناس ہو جائے گا، امریکا میں غیرقانونی مقیم آبادی بھی فیڈرل ٹیکس دیتی ہے مگر ڈونلڈ ٹرمپ نے ارب پتی ہونے کے باوجود آج تک فیڈرل ٹیکس کی مد میں ایک دھیلہ بھی نہیں دیا، ڈونلڈ ٹرمپ چین پر بہت تنقید کرتے ہیں لیکن لوہا بھی چین سے ہی خریدتے ہیں۔

ہلیری کلنٹن نے کہا کہ ڈونلڈ ٹرمپ جوہری ہتھیاروں کے حوالے سے غیرذمہ دارانہ بیان دے چکے ہیں، جوہری ہتھیاروں کے کوڈ ٹرمپ جیسے شخص کے ہاتھ نہیں لگنے چاہئیں، ٹرمپ کے ہاتھ جوہری بٹن دینے کا خطرہ نہیں لیا جا سکتا۔ ٹرمپ نےعراق اور شام کےحوالے سے اوباما کی پالیسیوں کو بھی نشانہ بنایا۔ انہوں نے کہا یہ ہلیری کلنٹن کی ناکامی ہے کہ آج داعش بڑا خطرہ بن چکی ہے۔ ان کا کہنا تھا کہ امریکی جنرل کو جھوٹ بولنے پر 5 سال کی سزا ہوئی جب کہ ہیلری سینکڑوں جھوٹ بول چکی ہیں انہیں بھی جیل میں ہونا چاہیئے۔

ڈونلڈ ٹرمپ نے کہا کہ ہلیری کلنٹن ان کی انتخابی ریلیوں میں غنڈے بھجواتی ہیں اور انہوں نے انتخابی دھاندلی کا منصوبہ بھی تیار کر رکھا ہے جب کہ ان پر الزام لگانے والی تمام خواتین سستی شہرت چاہتی تھیں، یہ سب مجھے بدنام کرنے کے لئے ہلیری کلنٹن کی چالیں ہیں۔ ہلیری نے جوابی وار میں کہا کہ انتخابی دھاندلی کی بات کر کے ڈونلڈ ٹرمپ نے امریکی جمہوریت اور شفافیت پر ضرب لگائی ہے لیکن مگر مچھ کے آنسو بہانے سے کچھ نہیں ہوگا۔ ڈونلڈ ٹرمپ نے جن خواتین کے بارے میں بیہودہ گفتگو کی، آج تک ان سے معافی نہیں مانگی، وہ خود کو معافی سے بالاتر سمجھتے ہیں، ایسا شخص امریکا جیسے عظیم ملک کا سربراہ کیسے ہو سکتا ہے؟

ڈونلڈ ٹرمپ نے کہا ہلیری کلنٹن صرف باتیں کرتی ہیں، عملی طور پر کچھ نہیں کرتیں، جب وہ وزیر خارجہ تھیں تو اس وقت وزارت خارجہ سے 6 ارب روپے غائب ہوئے، اگر وہ تجربہ کارہیں توان کا تجربہ براتجربہ کہلائے گا، ہلیری صدربن گئیں تو امریکا تباہ ہو جائے گا۔ ہلیری کلنٹن نے ڈونلڈٹرمپ سے کہا جب وہ پبلک سروس میں تھیں تو اس وقت ٹرمپ کاروبار کر رہے تھے اور خواتین سے بدتمیزی کر رہے تھے، جب وہ اسامہ بن لادن کی کھوج لگارہی تھیں تو اس وقت ٹرمپ ایک ٹی وی شو کی میزبانی کر رہے تھے۔

ہلیری کلنٹن نے کہا کہ روس امریکی صدارتی انتخابات پر سائبر حملے کر رہا ہے جس پر ٹرمپ کا کہنا تھا کہ ہلیری روسی صدر ولاد میر پیوٹن کو اس لیے نہیں پسند کرتیں کیوں کہ انہوں نے ہرموقع پر ہلیری کلنٹن کو نیچا دکھایا ہے۔

مباحثے کے دوران ری پبلکن امیدوار ڈونلڈٹرمپ سے سوال کیا گیا کہ اگر روس نے امریکی انتخابات پر اثرانداز ہونے کی کوشش کی تو کیا وہ اس کی مذمت کریں گے جس پر ٹرمپ نے کہا اگر ایسا ہوا تووہ یقیناً مذمت کریں گے۔ مباحثے کے اختتام پر ہلیری کلنٹن کو 52 فیصد پوائٹس ملے جب کہ ڈونلڈ ٹرمپ 39 فیصد پوائنٹس حاصل کر سکے۔

واضح رہے کہ نومبر میں ہونے والے امریکی صدارتی امیدواروں کے درمیان ہونے والے پہلے دونوں مباحثوں میں بھی ہلیری کلنٹن کامیاب قرار پائی تھیں۔

ایمزٹی وی(قطر)تاشقند میں اسلامی تعاون تنظیم کے وزارئے خارجہ کی کونسل کا 43 واں اجلاس ہوا۔ اجلاس میں وزارئے خارجہ کی کونسل نے مقبوضہ کشمیر میں ہونے والے بھارتی مظالم اور انسانی حقوق کی سنگین خلاف ورزیوں کی شدید مذمت کرتے ہوئے کہا کہ نوجوان حریت رہنما برہان وانی کے ماورائے عدالت قتل کے بعد ہونے مظاہرے بھارت کے خلاف ریفرنڈم ہیں بھارتی قابض افواج نے ان مظاہروں کو روکنے کے لئے ظلم بربریت کا بازار گرم کررکھا ہے۔

اسلامی تعاون تنظیم کی وزارئے خارجہ کونسل نے مقبوضہ کشمیر میں بھارتی ظلم بربریت کی مذمت کرتے ہوئے کہا ہے کہ قابض فوجیوں کی جانب سے مسلسل کرفیوکے باوجود کشمیری عوام کے مظاہرے بھارت کے خلاف کھلا ریفرنڈم ہے۔

اسلامی تعاون تنظیم کی وزرائے خارجہ کونسل کا کہنا تھاکہ کرفیو کے بہانے کشمیری عوام کا بہیمانہ قتل، غیر قانونی طور پر حراست میں رکھنے، کشمیری رہنماؤں کی گرفتاریاں ، پیلٹ گن کے ذریعے نہتے عوام کو زخمی اور تاعمر بینائی سے محروم کیا جارہا ہے جس کی جتنی بھی مذمت کی جائے کم ہے۔

وزارئے خارجہ کی کونسل نے کشمیریوں کی تحریک آزادی کو دہشت گردی قرار دینے کی بھارتی کوشش کو مسترد کرتے ہوئے ایک قرارداد بھی منظور کی جس میں او آئی سی کے رکن ممالک کی جانب سے حق خود ارادیت کےلئے کشمیریوں کی غیر متزلزل حمایت کا اعادہ کیا گیا اور بھارت کی جانب سے انسانی حقوق کی سنگین خلاف ورزیوں کی مذمت بھی کی گئی۔

ایمزٹی وی(تعلیم/ کراچی)وفاقی اردو یونیورسٹی کے رجسٹرار کے مطابق بی اے ،بی کام اور مدارس کے رجسٹریشن فارمز جمع کرانے کی تاریخ میں 28 اکتوبر 2016تک توسیع کی جاتی ہے۔

جبکہ دوسری جانب ایم اے سال اول/ اےم اے سال دوم(پرائیویٹ)کے امتحانی فارم جمع کرانے کی تاریخ میں Rs1200/روپے لیٹ فیس کے ساتھ 20 اکتوبر 2016 کو الائیڈ بنک گلشن اقبال برانچ میں جمع کرائے جاسکتے ہیں۔

ایمزٹی وی (تعلیم/کراچی)ثانوی تعلیمی بورڈ کراچی میں بورڈ آف گورنرز کی ایک مخصوص نشست کیلئے ہونے والے انتخابات میں غلام عباس بلوچ آئیڈیل گرامر ہائی اسکول سپارکو 802ووٹ لے کر کامیاب قرار پائے جبکہ دوسرے نمبرمحمد انوراقرا فاﺅنڈیشن ہائی اسکول زمان ٹاﺅن کورنگی نے 727ووٹ حاصل کئے۔

میٹرک بورڈ کے چیئرمین ڈاکٹر سعید الدین، سیکرٹری بورڈ سید محمد علی شائق اور ناظم امتحانات خالد احسان نے کامیاب امیدوار کو مبارکباد پیش کی۔تفصیلات کے مطابق سندھ بورڈ آف انٹرمیڈیٹ اینڈ سیکنڈری ایجوکیشن آرڈیننس نمبر VI مجریہ 1972کی شق 4(1)(VII)کے تحت کراچی ریجن کے منظور شدہ اسکولوں کے سربراہان کے حلقہ انتخاب کیلئے بورڈ آف گورنرز کی ایک مخصوص نشست کیلئے بورڈ آفس میں آئندہ دو سال کیلئے انتخابات2016بدھ 19اکتوبر کو منعقد ہوئے جو صبح 10بجے سے سہ پہر 4:30بجے تک بغیر کسی وقفے کے جاری رہے جس میں 8 امیدواروں نے حصہ لیا ۔

علاوہ ازیں رجسٹرڈ ووٹرزکی کل تعداد3957تھی جس میں گورنمنٹ اسکول کے 735اور پرائیویٹ اسکولوں کے 3222رجسٹرڈ ووٹرز تھے۔ علاوہ ازیں 1569ووٹرز نے اپنا حق رائے دہی استعمال کیا۔

اس موقع پر چیئرمین میٹرک بورڈ ڈاکٹر سعید الدین نے نتائج کا اعلان کرتے ہوئے تمام گورنمنٹ اور پرائیویٹ اسکولز ایسوسی ایشن کو پر امن ماحول میں انتخابات کے انعقاد پر اور بورڈ افسران اور ملازمین کو بھی مبارکباد دی اور انہوں نے کہا کہ ہم باہمی مشاورت سے طلباءو طالبات اور اسکولوں کے مسائل حل کریں گے۔کامیاب امیدوار غلام عباس بلوچ نے میٹرک بورڈ کے چیئرمین سے کہا کہ ہم بورڈ کے وقار کو بلند کرنے کیلئے اور اسکولوں کے مسائل کے حل کیلئے آپ کے شانہ بشانہ ساتھ رہیں گے۔

ایمزٹی وی (اسلام آباد) وزیردفاع خواجہ آصف کا کہنا ہے کہ احتساب مسلم لیگ (ن) کا بنیادی ستون ہے اور نوازشریف ہرسوال کا جواب دینے کو تیار ہیں لیکن زکوۃ کے پیسوں کا حساب کون دے گا۔

اسلام آباد میں میڈیا سے بات کرتے ہوئے وزیر دفاع خواجہ محمد آصف کا کہنا تھا کہ جس دن سے پاناما لیکس کا معاملہ بحث بنا وزیراعظم نوازشریف نے ابتدائی دنوں میں ہی خود کواحتساب کے لئے پیش کردیا تھا، سپریم کورٹ کو بھی جوڈیشل کمیشن بنانے کے لئے تحریر بھیجی ،پارلیمنٹ میں گئے اور آج بھی پاکستان کی سب سے بڑی عدالت کے سامنے اپنے قائد کی جگہ ہم موجود ہیں۔

نوازشریف ہر سوال کا جواب دینے کے لئے تیار ہیں کیوں کہ مسلم لیگ (ن) کا بنیادی ستون احتساب ہےخواجہ آصف کا کہنا تھا کہ ہم کبھی بھی احتساب سے نہیں گھبرائے اور وزیراعظم نے بھی کبھی راہ فرار اختیارکرنے کی کوشش نہیں کی آئینی اداروں کی طرح عدالت کے سامنے موجود ہیں سپریم کورٹ نے فریقین کو نوٹس جاری کیے اور 2 ہفتے بعد آئینی طور پر جواب بھی دیں گے عوام کی عدالت بھی لگائی جائے گی اور وہاں بھی سرخرو ہوں گے لیکن زکوۃ کے پیسے کھانے والے بھی تو اپنا احتساب دیں۔

وفاقی وزیر نے کہا کہ 2012 سے پوچھ رہا ہوں کہ خیرات اور زکوۃ کے پیسے کہاں گئے عمران خان نے 3600 گھربنانے کا وعدہ کیا تھا وہ ایک گھر بھی دکھا دیں کہاں بنایا ہے، سیلاب زدگان کے گھر کون بنائے گا سیلاب زدگان کے نام پر خیرات اور زکوۃ کے پیسوں اور شوکت خانم اسپتال کے 70 لاکھ ڈالرز کا حساب کیوں نہیں دیا جارہا ہے۔

ایمزٹی وی(سبی) بلوچستان میں مسافر وین بارودی سرنگ سے ٹکرا گئی جس سے دھماکے کے نتیجے میں دو افراد جاں بحق اور 9زخمی ہو گئے ۔
زرائع کے مطابق بلوچستان میں مسافر وین سنگان کے علاقے سے سبی جا رہی تھی کہ راستے میں بابر کچھ کے مقام پر بارودی سرنگ سے ٹکرا گئی جس کے نتیجے میں دو افراد موقع پر ہی جاں بحق ہو گئے جبکہ 9افراد شدید زخمی ہوگئے ۔

ریسکیو ذرائع کے مطابق زخمی افراد کو ہیلی کاپٹر وں کے ذریعے کوئٹہ منتقل کیا گیا ہے جہاں انہیں طبی امداد دی جا رہی ہے ،زخمی افراد میں سے دو کی حالت تشویشناک ہے ۔سیکیورٹی اداروں نے علاقے کو گھیرے میں لے کر سرچ آپریشن شروع کردیا ہے ۔

ایمزٹی وی(کراچی) وزیراعلی سندھ مراد علی شاہ کی زیرِصدارت ملیر میں ترقیاتی کاموں کا جائزہ اجلاس ہوا۔ اجلاس میں چیف سیکرٹری اورایڈیشنل چیف سیکرٹری شریک ہوئے۔ اجلاس کے دوران وزیر اعلی کو بریفنگ دی گئی ہے کہ ملیر میں 113 اسکولوں کی عمارت کی تعمیرمکمل نہیں، مراد میمن گوٹھ پرصرف 5 ڈاکٹر ڈیوٹی پر آتے ہیں۔

اجلاس کے دوران وزیر اعلی سندھ مراد علی شاہ نے کہا کہ ہرضلع کے ترقیاتی کاموں پر توجہ دی جائے گی، کمشنر کراچی ہر ضلع میں جاکر میٹنگ کریں، ملیر کےعوام کو اکیلا نہیں چھوڑیں گے جب کہ سڑک، تعلیم اوردیگرشعبوں میں ملیرکے عوام کو آگے لائیں گے۔کمشنرکراچی زمینوں پر ناجائز قبضے ختم کروا کر قبضہ مافیا کو جیل بھیجیں۔

صوبائی محکموں میں خالی اسامیوں پر بھرتیوں کے حوالے سے مراد علی شاہ نے کہا کہ سندھ حکومت نے بھرتیوں پراجازت دی ہے لیکن جتنی خالی اسامیاں ہوں گی اتنی ہی بھرتیاں ہوں گی اوراب زائد بھرتیاں برداشت نہیں کی جائیں گی۔

مراد علی شاہ کا کہنا تھا کہ جو کام نہیں کرے گا وہ ہم میں سے نہیں ہوگا جب کہ اجلاس میں وزیراعلی نے وزیرِ صحت کو ہدایت کرتے ہوئے کہا کہ صحت کے مراکزسے قبضے ختم کراکررپورٹ دی جائے اورجوڈاکٹرزڈیوٹی نہیں کرتے انہیں فارغ کریں

ایمزٹی وی(اسلام آباد)عوامی مسلم لیگ کے سربراہ شیخ رشید کا کہنا ہے کہ 2 نومبر کو پورا راولپنڈی اور اسلام آباد بند کر کے ثابت کریں گے کہ عوام وزیراعظم نواز شریف سے جلد از جلد چھٹکارا حاصل کرنا چاہتے ہیں۔

سپریم کورٹ کے باہر میڈیا سے بات کرتے ہوئے شیخ رشید کا کہنا تھا کہ وزیراعظم نوازشریف نے اپنے اثاثے غلط ظاہر کئے جس پر وہ آرٹیکل 62 اور 63 کے تحت نا اہل ہوتے ہیں، انہوں نے سپریم کورٹ میں موقف اختیار کیا کہ یا تو ان 9 افراد کی قومی اسمبلی کی رکنیت بحال کی جائے یا پھر وزیراعظم کو بھی نا اہل قرار دیا جائے، جس پر عدالت نے کہا کہ ہم نے وزیراعظم کو نوٹس جاری کردیا ہے، جس پر میں نے موقف اختیار کیا کہ وزیراعظم رنگے ہاتھوں پکڑے گئے ہیں، ان کا جرم انتا بڑا ہے کہ وہ شوکاز نوٹس کے مستحق ہیں۔

شیخ رشید کا کہنا تھا کہ ہم نے 28 تاریخ کو راولپنڈی میں وارم اپ ریلی رکھی ہے جس میں عمران خان بھی شریک ہوں گے، اگر ہماری گرفتاری ہوتی ہے تو جیل تو ہماری سسرال ہے، جیلیں تو نواز شریف کو معافی نامے پر مجبور کرتی ہیں، ہماری گردن کٹ سکتی ہے لیکن ہم 2 نومبر کو راولپنڈی کی سڑکیں، ایئرپورٹس، ریلوے اسٹیشن اور ٹرانسپورٹ کو بند کر کے دکھائیں گے اور ثٓابت کریں گے کہ موجودہ حکومت کرپٹ ہے۔

انہوں نے کہا کہ ہم جہاں بھی بھاگیں گے پاکستان میں ہی جائیں گے لیکن نواز شریف کے لئے اب سعودی عرب میں بھی جگہ نہیں ہے، ترکی انہیں جگہ دے دے تو کچھ کہہ نہیں سکتا، لوگوں کی خواہش ہے کہ جلد سے جلد وزیراعظم نواز شریف سے جان چھڑائی جائے

ایمزٹی وی(اسلام آباد)گورنر سندھ ڈاکٹر عشرت العباد نے پاک سرزمین پارٹی کے سربراہ مصطفی کمال کو شدید تنقید کا نشانہ بناتے ہوئے کہا ہے کہ ایساشخص بکواس کیوں کررہا ہے جس کی کوئی اوقات ہی نہ ہو، مجھے یہ گوارانہیں کہ کوئی ٹھیکیدارلیول کاآدمی میرے بار ے میں بات کرے، مصطفی کمال ایجنسیوں کو بدنام کررہا ہے،ا سٹیبلشمنٹ میں اوپرسے نیچے تک مصطفی کمال کوکوئی سپورٹ نہیں کررہا، ماضی میں مصطفی کمال کی تعریف میں کہے گئے جملے رسمی تھے،حقیقت آج بیان کی،سرفرازمرچنٹ جیسے لوگ گڈمارننگ جیسے پیغامات بھیجتے ہیں، بھٹوصاحب اوربے نظیرصاحبہ آج بھی لوگوں کے دلوں میں زندہ ہیں، وزیر اعظم نواز شریف نے کراچی آپریشن میں جان ڈالی ،ایم کیو ایم کی اتنی کٹائی ہو گئی اب ان میں کوئی کریمنل نہیں لگتا۔

اس حوالے سے سندھ ڈاکٹر عشرت العباد نے کہا کہ صدرمملکت کا نمائندہ اوراسٹیبلشمنٹ کا حصہ ہوں، نعمت اللہ خان کے بعد سٹی گورنمنٹ نے مایوس کیا۔ انہوں نے کہا کہ مصطفی کمال نظامت میں مزید توسیع کے لیے بچوں کی طرح رونے لگتا تھا،مصطفی کمال نے ضدکی توصدرسے بات کی کہ سائیں بچہ ہے ضدکررہا ہے، مصطفی کمال اپنی نظامت سے چپکے رہنا چاہتا تھا۔انہوں نے کہا کہ مصطفی کمال گورنربنناچاہتاتھا، ماضی میں مصطفی کمال کی تعریف میں کہے گئے جملے رسمی تھے،حقیقت آج بیان کی۔

انہوں نے کہا کہ مصطفی کمال ایجنسیوں کو بدنام کررہا ہے، اگرکوئی کرمنل کمال کے گھربیٹھاہوگا تواس کو گرفتارکریں گے، اسٹیبلشمنٹ میں اوپرسے نیچے تک مصطفی کمال کوکوئی سپورٹ نہیں کررہا، مصطفی کمال کا آغاسراج سے جھگڑا ٹھیکوں کی وجہ سے ہوا۔

گورنر سند ھ نے کہا کہ کراچی میں بڑے کیسز میں ملوث عناصر کو پکڑنے کا فیصلہ ہوا ہے ،بڑے کیسز میں ملوث عناصر کو پکڑیں گے اور سزا دی جائے گی ،جرائم پیشہ جہاں ہوں گے پکڑیں گے ، مستحکم امن تب آسکتا ہے جب بڑے کیسز میں ملوث عناصرپکڑے جائیں۔

گورنر سندھ ڈاکٹر عشرت العباد نے کہا کہ سرفرازمرچنٹ جیسے لوگ گڈمارننگ جیسے پیغامات بھی بھیجتے ہیں،میرے پاس اتنا ٹائم نہیں کہ سرفرازمرچنٹ جیسے لوگوں کے پیغامات دیکھوں۔

انہوں نے کہا کہ وزیر اعظم نواز شریف نے کراچی آپریشن میں جان ڈالی ، کراچی آپریشن کی وجہ سے شہر کے 80 فیصد حالات بہتر ہو گئے ہیں جن کو سو فیصد تک بہتر کرینگے ، مجرموں کو لٹکایا جائے گا تو آئندہ کوئی جرم نہیں کرے گا ۔

انہوں نے کہا کہ میرا نیوٹرل رہنا ہی میری طاقت ہے، اصول کے تحت قومی مفاد کی
خاطر چل رہا ہوں ، میرے خلاف کچھ غلط باتیں ہوئیں جنہیں کلیئر کردیا ہے ۔ انہوں نے کہا کہ ایم کیو ایم کی اتنی کٹائی ہو گئی اب ان میں کوئی کریمنل نہیں لگتا ، کراچی آپریشن سے پہلے طے ہوا تھا کہ کوئی سیاسی مداخلت نہیں ہو گی ، جہاں غلط کارروائی ہو گی وہاں وزیر اعلیٰ سندھ ایکشن لیں گے ۔