ایمزٹی وی(اسلام آباد)ایوان بالا میں بانی ایم کیو ایم الطاف حسین کے خلاف قرار داد متفقہ طور پر منظور کر لی گئی جس میں مطالبہ کیا گیا ہے کہ بانی ایم کیو ایم کے خلاف ملکی قوانین کی خلاف ورزی پر کارروائی کی جائے۔

اسلام آباد میں چیئر مین سینیٹ رضا ربانی کی زیر صدارت اجلاس ہوا جس میں مسلم لیگ ق کے سینیٹر سعید مندو خیل نے بانی ایم کیو ایم کے خلاف قرار داد پیش کی ۔قرار داد کے متن میں کہا گیا کہ ایوان بانی ایم کیو ایم کے کلمات ،نعروں اور کارکنان کو میڈ یا ہاوسز پر حملے کے لیے اکسانے کی مذمت کرتا ہے ۔قرار داد میں کہا گیا کہ میڈ یا ہاوسز پر حملے اور امن و امان خراب کرنے پر بھی سخت کارروائی کی جائے ،دیگر افراد کیخلاف بھی ملکی قوانین کی خلاف ورزی پر سخت کارروائی کی جائے۔

ایمزٹی وی(اسلام آباد)عدالت نے لال مسجد کے سابق خطیب مولانا عبدالعزیز کو دھمکیوں اور شرانگیز تقاریر کے مقدمات میں بری کرتے ہوئے مدعی کو نوٹس جاری کر دیا ہے۔
ذرائع کے مطابق جوڈیشل مجسٹریٹ محمد نصیرالدین نے لال مسجد کے سابق خطیب مولانا عبدالعزیز کے خلاف دھمکیوں اور شرانگیز تقاریر کے مقدمات کی سماعت کی۔ دوران سماعت وکیل صفائی نے عدالت کو بتایا کہ پولیس نے مولانا عبدالعزیز کو چالان میں بے گناہ قرار دیا ہے جبکہ ان کے خلاف دھمکیوں کا مقدمہ جھوٹا درج کیا گیا ہے۔
عدالت مولانا عبدالعزیز کو ان مقدمات سے بری کر کے دھمکیوں کے مقدمے میں مدعی کو نوٹس جاری کر دیا ہے۔ واضح رہے کہ مولانا عبدالعزیز کے خلاف تھانہ آبپارہ میں 2 مختلف مقدمات درج ہیں۔

ایمز ٹی وی (کھیل) جاپان کو ایک اور انٹرنیشنل ایونٹ کی میزبانی مل گئی، اتوار کو ایچی پریفیکچر اور دارالحکومت ناگویا کے2026ایشین گیمز کے میزبان ہونے کی اولمپک کونسل آف ایشیا (او سی اے) نے تصدیق کردی۔
ایچی پریفیکچر کے گورنر ہائیڈیاکی اوہمرا اور ناگویا سٹی کے میئرتاکاشی کاوامورا کی جانب سے او سی اے کی جنرل اسمبلی میں مشترکہ طور پرمیزبانی کی آفر پیش کرنے کے بعد ایشین کونسل نے رسمی طور پر میزبانی پر مہر تصدیق ثبت کردی۔
جنرل اسمبلی کا اجلاس حالیہ طور پر 5ویں ایشین بیچ گیمز کی میزبانی کرنے والے دانانگ میں ہوا، ایشیائی ادارے کو 2026گیمز کے انعقاد کے سلسلے میں فیصلہ2018میں لینا تھا تاہم اگلے8 برسوں میں اس خطے میں3اولمپکس ایونٹ کے انعقاد کے باعث جلدی فیصلہ کرلیا گیا،اس کی وجہ پرہجوم ایونٹس کے پیش نظرمیزبان کو پہلے سے تیاری کا موقع فراہم کرنا بھی ہے، جنوبی کوریا پہلے ہی ونٹراولمپکس کیلیے بطور میزبان اپنی خدمات فراہم کرنے کیلیے تیار ہےجو2018میں پائیون چانگ میں منعقد ہوگا، ٹوکیو 2020میں سمر اولمپکس کیلیے اپنے دروازے کھولے گا جبکہ اس کے بعد 2022 میں ونٹر گیمز کا بیجنگ میں انعقاد طے ہے۔

ہر چار سال بعد کھیلے جانے والے ایشین گیمز کے 2018 ایڈیشن کی میزبانی پہلے ہی انڈونیشیا کے شہروں جکارتا اور پالیمبینگ کو مشترکہ طور پر سونپی گئی ہے، مذکورہ ایونٹ کے2022ایڈیشن کا انعقاد چین کے شہر ہوانگزو میں ہونا ہے، ٹوکیو میں بھی اولمپک گیمز 2020میں دنیا بھر سے ایتھلیٹس شریک ہوں گے، جبکہ 2019 میں ملک رگبی ورلڈکپ کی میزبانی کریگا، اس کے علاوہ ایشین ونٹر گیمز 2017اور ورلڈ سوئمنگ چیمپئن شپ 2021بھی اسی کی سرزمین پر منعقد ہونگے، جاپان اس سے قبل دو بار 1958 ٹوکیو اور 1994ہیروشیما میں ایشین گیمز کی میزبانی کرچکا ہے،2026ایشین گیمز کے20ویں ایونٹ کی میزبانی ملک کے سپرد ہونے سے اگلی دہائی کے دوران جاپان ایک اور اہم ایونٹ کی میزبانی پانے میں کامیاب ہوا ہے، دریں اثنا ناگویا کے میئر تاکاشی کاوامورانے وعدہ کیا ہے کہ گیمز تفریح سے بھرپور ہونگے۔

انھوں نے اپنی بات کی تصدیق کیلیے جوش جذبات میں ایشین کونسل کی اسمبلی کو مشہور گلوکار ایلوس پریسلے کے گانے کے بول بھی سنا دیے، گیمز کے کامیاب انعقاد کے حوالے سے گورنر اور میئر دنوں نے جاپان کی مستحکم اکانومی اور جدید ٹیکنالوجی کا بھی حوالہ دیا جبکہ ملک کی جانب سے اہم اسپورٹس ایونٹس کے کامیابی سے انعقاد کو بھی یاد دلایا، جاپان کی طرف سے میزبانی کی پیشکش پر اسمبلی کے ربر اسٹیمپ کے بعد بولی دینے والے وفد اور او سی اے کے درمیان معاہدے پر دستخط ہوئے، او سی اے کے صدر احمد ال فہد الصباح نے ویتنام میں ہونے والے اجلاس کے دوان اسمبلی کو بتایا کہ ہمارے اہم ایونٹ کا روڈ میپ اور اسپورٹس کلینڈر کافی مستحکم ہے، انھوں نے کہا کہ ایشیا کو بہت سارے انٹرنیشنل فیڈریشنزکیلیے بہت سارے انٹرنیشنل ایونٹس کی میزبانی کرنی ہے، اس لیے ہم اپنے مختلف ایونٹس کیلیے ایک مستحکم پروگرام کا انعقاد کرنا چاہتے ہیں۔

ایمز ٹی وی (انٹرٹینمنٹ) پاکستانی نژاد برطانوی اداکار مارک انور کو مقبوضہ کشمیر میں جاری بھارتی ظلم و ستم پر آواز اٹھانا مہنگا پڑگیا جس کے بعد انہیں ڈرامے سے نکال دیا گیا۔

مقبوضہ کشمیر میں جاری بھارتی غاصب فوج کے مظالم کے خلاف دنیا بھر میں آواز اٹھائی جارہی ہے جس میں اداکار بھی پیش پیش ہیں جب کہ گزشتہ دنوں ہالی ووڈ اداکارہ ایریکا ڈیرکسن نے بھارتی ظلم و بربریت کا آنکھوں دیکھا حال بتا کر دنیا کو حیران کردیا تھا اور اب برطانوی اداکار مارک انور کو بھارتی مظالم کے خلاف آواز اٹھانا مہنگا پڑ گیا ہے۔

پاکستانی نژاد برطانوی اداکار مارک انور کو سماجی رابطے کی ویب سائٹ ٹوئٹر پر مقبوضہ کشمیر میں بھارتی مظالم کے خلاف آواز اٹھانا مہنگا پڑگیا جس کے بعد انہیں بغیر کسی نوٹس کے ڈرامے کی کاسٹ سے فی الفور نکال دیا گیا ہے جب کہ ٹی وی چینل کی جانب سے اداکار سے ٹوئٹ کے حوالے سے باز پرس بھی کی گئی۔

ایمز ٹی وی (انٹرٹینمنٹ) کوک اسٹوڈیو کے سیزن 9 سے شہرت حاصل کرنے والی خوبصورت اوردلکش گلوکارہ مومنہ مستحسن نے منگنی کرلی ہے جس کے بعد اس تقریب کی تصاویر سوشل میڈیا پر تیزی سے وائرل ہورہی ہیں۔

گزشتہ دنوں گلوکارہ مومنہ مستحسن نے امریکا کے رہائشی بینکر علی نقوی سے منگنی کرلی ہے جب کہ دونوں کی منگنی کی تقریب انتہائی سادگی کے ساتھ انجام پائی جس میں رشتے داروں اور قریبی دوستوں نے شرکت کی۔

دوسری جانب گلوکارہ کی منگنی کی تصاویر سوشل میڈیا پر تیزی سے وائرل ہورہی ہیں جسے مداحوں کی جانب سے انہیں مبارک باد کے پیغٖامات دیئے جارہے ہیں اور سماجی رابطے کی وب سائٹ ٹوئٹر پر گلوکارہ کی شادی ٹاپ ٹرینڈ بن گئی ہے۔

واضح رہے کہ مومنہ مستحسن اور گلوکار علی ظفر کے بھائی دانیال ظفر کے درمیان قریبی تعلقات کی خبریں بھی گردش کرتی رہی ہیں۔

ایمزٹی وی(تعلیم/ پشاور) پشاور یونیورسٹی ٹیچر ایسوسی ایشن کی کال پر یونیورسٹیز ایکٹ کے خلاف اساتذہ نے ہڑتال کردی ہے، اساتذہ کا مؤقف ہے کہ یونیورسٹیز ایکٹ میں ان سے مشاورت نہیں کی گئی۔

جنرل سیکرٹری پیوٹا ڈاکٹر اقبال کا کہنا ہے کہ اساتذہ نے کلاسوں کا بائیکاٹ کر رکھا ہے۔ ایکٹ میں اساتذہ سے مشاورت نہیں کی گئی، اور اس ایکٹ میں بار بار ترامیم بھی کی گئیں۔

جنرل سیکرٹری کا مزید کہنا کہ اساتذہ کی مشاورت سے ایک ہی ایکٹ بنایا جائے، ایکٹ واپس نہیں لیا گیا تو احتجاج کا دائرہ دیگر یونیورسٹیوں تک بڑھایا جائےگا

ایمزٹی وی(بلوچستان)کوئٹہ میں وکلاء نے سانحہ سول اسپتال کےخلاف جاری عدالتی کارروائی کا بائیکاٹ ختم کردیا ہے جبکہ بائیکاٹ کےخاتمےکےبعد عدالتوں میں رونقیں بحال ہوگی ہیں۔

وکلاء8 اگست کے سانحہ کےخلاف ہڑتال پر تھے ، ڈیڑھ ماہ بعد عدالتی کارروائی کا بائیکاٹ ختم کر نے کے بعدوکلاء مقدمات کی پیروی کےلئےعدالتوں میں پہنچ گئے ہیں۔

سائلین بھی بڑی تعداد میں عدالتوں کا رخ کررہے ہیں، گزشتہ روز وکلاء تنظیموں نےعدالتی کارروائی کا مکمل بائیکاٹ ختم کرکےہفتہ میں صرف2 روز ہڑتال کا فیصلہ کیاتھا۔

بلوچستان ہائی کورٹ بار کے صدر عبدالغنی خلجی کے مطابق ہفتے میں منگل اور جمعرات کو عدالتی کارروائی کا بائیکاٹ کیاجائےگا،اس دوران احتجاج بھی کیا جائے گا اور احتجاج کا سلسلہ سانحہ کوئٹہ کےملزمان اوروکلاء کو تحفظ کی فراہمی تک جاری رہےگا۔

ایمزٹی وی(نئی دہلی)بھارتی وزیر اعظم نریندر مودی کی زیر صدارت سندھ طاس معاہدے کو ختم کرنے سے متعلق اجلاس ہوا ہے جس میں اس معاہدے کے مختلف پہلووں کا جائزہ لیا گیا تاہم اس دوران سند ھ طاس معاہد ے سے متعلق کوئی حتمی فیصلہ نہیں ہو سکا ۔
بھارتی میڈیا کے مطابق بھارتی وزیر اعظم کی زیر صدارت ہونے والے اجلاس میں پرنسپل سیکریٹری نریندرہ مشرہ ،نیشنل سیکیورٹی ایڈوائزر اجیت ڈول اور سیکریٹری خارجہ جے شنکر نے شرکت کی جس میں سندھ طاس معاہدے کے قانونی ،سیاسی اور سفارتی پہلووں کا جائزہ لیا گیا ۔

اجلاس میں اڑی حملے کے بعد سندھ طاس معاہدے کوختم کرنے کے حوالے سے تبادلہ خیال بھی کیا گیا ۔بھارتی میڈیا رپورٹ کے مطابق بھارت کے سابق سیکریٹری خارجہ کنول سبل نے کہا ہے کہ سندھ طاس بین الاقوامی معاہدہ ہے اور بھارت ذمہ دار ملک ہے اس لیے ہمیں بین الاقوامی سطح پر ذمہ داری کا مظاہر ہ کرنا ہو گا۔

واضح رہے کہ 1960میں پاکستانی صدر ایوب خان اور بھارتی وزیر اعظم جواہر لعل نہرو کے درمیان سند ھ طاس معاہدہ طے پایا تھا جس کے مطابق دریائے بیاس،راوی اور ستلج کا کنٹرول بھارت کے پاس جبکہ پاکستان کا کنٹرول ذدریائے سندھ ،جہلم اور چناب پر رکھا گیا تھا ۔

ایمزٹی وی(تعلیم/کراچی)ڈاؤیونیورسٹی آف ہیلتھ سائنسز کا ساتواں سالانہ کانو وکیشن گزشتہ روز اوجھا کیمپس میں منعقد ہوا۔جس میں 1500 سے زائد طلبا وطالبات میں ڈگریاں تقسیم کی گئیں۔یہ ڈگریاں ایم بی ڈی ایس، نرسنگ، فزیکل میڈیسن،میڈیکل ٹیکنالوجی،پی ایچ ڈی میں گریجویشن مکمل کرنے والے طلباو طالبات کو دی گئیں۔ کانووکیشن کا آغاز قومی ترانے سے کیا گیا۔

کانووکیشن میں وائس چانسلر پروفیسر مسعود حمید خان ،پرو وائس چانسلر پروفیسر محمد مسرو پروفیسر خاور جمالی، رجسٹرار پروفیسر شیخ ندیم احمدسمیت معززین، اکیڈمی کونسل اراکین، پروفیسرز، ایچ او ڈیز، لیکچررز، طلبااور ان کے والدین بھی موجود تھے ۔
تقریب سےخطاب کرتے ہوئے پروفیسر مسعود حمید خان نے کہا کہ ڈ اؤ یونیورسٹی کو چھ کامیاب جگر کی پیوندکاری پر پہلی سرکاری یونیورسٹی ہونے کا اعزاز حاصل ہوا ہے اور اب جلد ہی یونیورسٹی رینل اور بون میرو ٹراسپلانٹ شروع کریگی۔

پروفیسر مسعود حمید خان نے کہا کہ 2003ء میں اس کے آغاز کے وقت صرف تین انسٹی ٹیوٹ تھے جو اب87انسٹی ٹیوٹ تک ہوگئے ہیں۔ یونیورسٹی اپنے آغاز سے اب تک کمیونٹی کو بہترین طبی خدمات فراہم کرنے کیلئے مسلسل کوشاں ہے ۔ انہوں نے طلباء و طالبات ملک و قوم کی ترقی کیلئے کام کرنے کی تلقین کرتے ہوئے کہا کہ یہ کانووکیشن کا دن ان طالب علموں کیلئے کامیابی کا دن ہے۔ -

ایمزٹی وی(تعلیم)ٹیچرایسوسی ایشن نے تنخواہوں کی عدم ادائیگی کے خلاف گزشتہ روز کراچی پریس کلب کے باہراحتجاجی مظاہرہ کیا جس میں کراچی اور سندھ کے دیگر اضلاع سے تعلق رکھنے والے اساتذہ نے شرکت کی۔

مظاہرے کی قیادت نعمان میمن،سرفرازعلی چنا، نصرت ارشاد اوردیگر کررہے تھے ۔مظاہرین نے ہاتھوں میں بینرزاورپلے کارڈزاٹھارکھے تھے۔ اساتذہ نے بلاول بھٹوزرداری اور وزیراعلیٰ سندھ سے اپیل کی کہ کراچی کے اساتذہ کوتنخواہیں جاری کی جائیں ،بصورت دیگرایک ہفتے بعدوزیراعلیٰ ہاؤس کے باہردھرنا دیں گے۔