ایمزٹی وی(گلگت بلتستان)وزیراعلیٰ گلگت بلتستان حافظ حفیظ الرحمن نے کہا ہے کہ سابقہ حکومت کی نا اہلی اور مجرمانہ غفلت کی وجہ سے وفاقی حکومت کے منصوبوں کے اخراجات کا بوجھ صوبے کو اٹھانا پڑا جس کی وجہ سے صوبے کا بجٹ وفاقی منصوبوں پر استعمال ہوا اورصوبے کے ترقیاتی منصوبے مکمل نہیں ہوئے اور وفاقی حکومت کے منصوبے بھی التوء کا شکار رہے ۔

انہوں نے یہ بات سیکرٹری پلاننگ کی طرف سے دی گئی بریفنگ کے موقع پر کہی انہوں نے کہا کہ پولیٹیکل انسٹالیشن ، اسپیشل ایجوکیشن سمیت دیگر منصوبوں کو مکمل کرنے کے لیے تقریباً 14 ارب روپے کا بوجھ صوبے کے بجٹ پر پڑ گیا۔ اٹھارویں ترمیم کا اطلاق گلگت بلتستان پر نہیں ہو تا لیکن سابقہ حکومت کی نا اہلی کی وجہ سے یہ منصوبے مالی وسائل کے بغیر صوبے کو منتقل کیے گئے ۔

وزیراعلیٰ نے صوبائی سیکرٹری پلاننگ کو ہدایت کی ہے کہ اٹھارویں ترمیم کے نام پر جن محکموں کے منصوبے مالی وسائل کے بغیر گلگت بلتستان کو دیئے گئے ہیں ان منصوبوں کی رقم وفاقی حکومت سے لینے کی سفارش کی جائیگی۔ اس سلسلے میں وزیراعظم پاکستان محمد نواز شریف کو بھیجنے کیلئے سمری تیار کی جائے کیونکہ تقریباً 14 ارب روپے کی رقم صوبے کے بجٹ سے ادا کرنا ممکن نہیں ۔

وزیر اعظم پاکستان و قائد عوام محمد نواز شریف گلگت بلتستان کی تعمیر و ترقی میں خصوصی دلچسپی لے رہے ہیں اور وفاقی حکومت بھی صوبائی حکومت کے ساتھ بھر پور تعاون کر رہی ہے ۔ وزیراعلیٰ نے کہا کہ صوبائی وزراءکو ہدایت کی ہے کہ متعلقہ محکموں کا ماہانہ اجلاس طلب کر کے ترقیاتی منصوبوں اور بجٹ کے استعمال کا جائزہ لیں تا کہ محکموں کی کارکردگی کو بہتر بنایا جا سکے ۔ وزیراعلیٰ نے کہا کہ وسائل اور اختیارات کی نچلی سطح تک منتقلی سے عوام کو ریلیف ملے گا اور منصوبے بروقت مکمل کیے جاسکیں گے ۔ منصوبوں کی مانیٹرنگ اور بروقت تکمیل کو یقینی بنانے کے لیے ڈویژنل سطح پر پلاننگ کے دفاتر قائم کیے جائیں۔

۔ وزیراعلیٰ نے کہاکہ حکومت کی انتہاپسند ی اور جرائم کے خلاف زیرو ٹالرنس کی پالیسی ہے جس پر سختی سے عمل درآمد یقینی بنایا جائے۔ سرکاری ملازمین تما م تر وابستگیوں سے بالا تر ہوکر اپنے فرائض کی انجام دہی یقینی بنائیں ۔ ماضی میں تعصبات کی وجہ سے گلگت بلتستان کی ترقی جمود کا شکار رہی ۔ ہم نے علاقے اور عوام کے مفاد میں تمام فیصلے اپنی ذات اور خواہشات سے بالاتر ہو کر میرٹ اور قا نون کے مطابق کیے جس کی وجہ سے گلگت بلتستان کے گورننس کے نظام میں بہتری آئی ہے کرپشن کا خاتمہ اور میر ٹ کی بالادستی ممکن ہوئی ہے ۔ وزیراعلیٰ نے کہا کہ مالی وسائل نہ رکھنے والوں کو مفت قانونی معاونت یقینی بنائینگے تاکہ انصاف کے تقاضوں کو پورا کیا جاسکے ۔ بار کونسل کی مشاورت سے شفاف نظام قائم کر کے وکلاءکی بہتری کے لیے بھرپور اقدامات کیے جائینگے وکلاءکی ہیلتھ انشورنس کے حوالے سے بھی غور کیا جا رہا ہے

ایمزٹی وی(تعلیم)نیشنل یونیورسٹی آف ماڈرن لینگوئجز اسلام آباد میں ''نظریہ تنقید کے معاصر خدوخال'' کے موضوع پر ایک روزہ سیمینار کا اہتمام کیا گیا۔ مقررین نے مختلف تاریخی اور ثقافتی رجحانات جو نظریہ تنقید کا پیش خیمہ بنے ان کے ارتقا پر سیر حاصل گفتگو کی ،ضیا الدین نجم، ڈاکٹر سفیر اعوان اور ڈاکٹر حسن الامین نے بھی خطاب کیا۔

اس موقع پر عمر شوکت، اسسٹنٹ پروفیسر آئی بی اے کراچی مہمان مقرر تھے ۔ ریکٹر نمل میجر جنرل(ر) ضیا الدین نجم ، ڈائریکٹر جنرل نمل بریگیڈئر ریاض احمد گوندل کے علاوہ اساتذہ، ماہرین تعلیم اور طلبہ کی کثیر تعداد بھی موجود تھی۔

ایمزٹی وی(اسلام آباد)چیف جسٹس پاکستان انور ظہیر جمالی نے پاناما لیکس کی تحقیقات کے لیے دائر درخواستوں پر رجسٹرار کے اعتراضات سے متعلق سماعت کی۔ چیف جسٹس نے فریقین کے وکلا کے دلائل سننے کے بعد تحریک انصاف سمیت دیگر 4 درخواستوں پر رجسٹرار کی جانب سے لگائے گئے اعتراضات کو ختم کرتے ہوئے درخواستوں کی سماعت کھلی عدالت میں لگانے اور درخواستوں کو سماعت کے لیے مقرر کرنے کا حکم دیا۔ ان درخواستوں کی سماعت 3 رکنی بینچ کرے گا۔

واضح رہے جماعت اسلامی اور تحریک انصاف سمیت 4 جماعتوں نے پاناما لیکس کی تحقیقات کے لیے سپریم کورٹ میں آئینی درخواست دائر کی تھی جس پر رجسٹرار آفس سپریم کورٹ نے اعتراضات لگا کر واپس کردی تھی تاہم بعد میں تحریک انصاف نے درخواست پر رجسٹرار کے اعتراضات کے خلاف سپریم کورٹ میں اپیل دائر کردی تھی۔

ایمزٹی وی (اسلام آباد)دفترخارجہ کے ترجمان نے بھارتی وزیرخارجہ کی جنرل اسمبلی میں تقریر پر رد عمل دیتے ہوئے کہا کہ مسئلہ کشمیر اقوام متحدہ کے ایجنڈے پر موجود ہونے کے باوجود بھارت کا اقوام متحدہ کی قراردادوں سے انحراف حیران کن ہے اور اگر کشمیر بھارت کا لازمی حصہ ہے توسلامتی کونسل کے ایجنڈے پرکیوں ہے۔

ترجمان کا کہنا تھا کہ مسئلہ کشمیر اقوام متحدہ کی قراردادوں سے طے ہونا ہے اور مسئلہ کشمیر کے حل میں کشمیریوں کی مرضی شامل ہوگی۔

ایمزٹی وی(تعلیم)آل پرائیویٹ سکولز ایسوسی ایشن نے رائیونڈ مارچ کے دوران سکول بند رکھنے کا اعلان کر دیا ۔

ذرائع کے مطابق آل پرائیویٹ اسکولز ایسوسی ایشن نے رائیونڈمارچ کے حوالے سے 30ستمبر کو رائیونڈ روڈ اور اڈا پلاٹ پر 150سکول بند رکھنے کا اعلان کردیا ۔
ذرائع کا کہنا ہے کہ پاکستان تحریک انصاف کے رائیونڈ مارچ کے سلسلے میں ٹرانسپورٹ جیسے مسائل کے پیش نظر آل پرائیویٹ اسکولز ایسوسی ایشن نے یہ فیصلہ کیا ہے کہ 30ستمبر کے روز تمام سکول بند رکھئے جائیں جبکہ 6یونیورسٹیاں بھی بند رکھی جائیں گی

ایمزٹی وی(پشاور) ڈی جی آئی ایس پی آر لیفٹیننٹ جنرل عاصم سلیم باجوہ نے کہا ہے کہ ضرب عضب کے تمام اہم آپریشن مکمل ہوچکے ہیں ، اب افغانستان سے پاکستان کی طرف آنے کا بھی راستہ باقی نہیں، راجگال کی پہاڑیوں پر پاک فوج کے جوان مورچہ زن ہیں، تمام علاقے کو کلیئر بھی کروایا جاچکا ہے جبکہ بارڈر مینجمنٹ سسٹم کے تحت 20 فیصد پوسٹیں بھی مکمل ہوچکی ہیں۔مشرقی بارڈر پر مکمل نظر ہے،ہر قسم کے حالات سے نمٹنے کے لئے بھی مکمل طور پر تیار ہیں۔

پشاور میں میڈیا کو بریفنگ دیتے ہوئے ڈی جی آئی ایس پی آر لیفٹیننٹ جنرل عاصم سلیم باجوہ نے بتایا کہ یکم جولائی کے بعد سے ایک ہزار چار سو ستر کومبنگ آپریشن کئے گئے جس کے بعد صورتحال خاصی بہتر ہوئی ہے۔

لیفٹیننٹ جنرل عاصم سلیم باجوہ نے بتایا کہ وارسک کرسچن کالونی پر حملے کی منصوبہ بندی افغانستان میں ہوئی تھی، حملے کے چار سہولت کاروں کو پکڑ لیا گیا ہے، سہولت کاروں سے تین خود کش جیکٹیں بھی برآمد کرلی گئی ہیں۔ پکڑے گئے سہولت کاروں میں کچھ خواتین بھی شامل ہیں۔مردان حملے کے تین سہولت کار بھی پکڑے جاچکے ہیں، جنہوں نے نیشنل بینک مردان اور پولیس لائنز مردان کو بھی نشانہ بنانا تھا۔ لیفٹیننٹ جنرل عاصم سلیم باجوہ کا کہنا تھا کہ امن کے لئے گھر بار چھوڑنے والوں کی بحالی کے اقدامات جاری ہیں، تمام متاثرین کی اپنے گھروں کو باعزت واپسی تک سلسلہ جاری رہے گا۔ڈی جی آئی ایس پی آر کا کہنا تھا کہ بارڈر مینجمنٹ سسٹم کے تحت پوسٹوں کے قیام سے سرحد پار سے دہشتگردوں کی آمد روکنے میں مدد ملے گی تاہم یہ سسٹم مکمل طور پر اسی وقت موثر ثابت ہوسکتا ہے جب بارڈر پار سے بھی مناسب اقدامات کئے جائیں اس حوالے سے افغان حکومت سے مکمل رابطے میں ہیں۔

پاک بھارت کشیدگی کے حوالے سے ڈی جی آئی ایس پی آر کاکہنا تھا کہ اُڑی حملے کے حوالے سے بھارتی الزامات بے بنیاد اور قابل افسوس ہیں، پاکستان اپنے مشرقی بارڈر پر مکمل نظر رکھے ہوئے ہے، افواج پاکستان ہر قسم کے حالات سے نمٹنے کے لئے بھی مکمل طور پر تیار ہیں۔لیفٹیننٹ جنرل عاصم سلیم باجوہ کی میڈیا بریفنگ کے دوران وارسک حملے کے سہولت کاروں کو میڈیا کے سامنے بھی پیش کردیا گیا۔

ایمز ٹی وی ( صحت)ماہرین کے مطابق جدید ٹیکنالوجی کی دین ان اشیا کی جلتی بجھتی اسکرین ہماری صحت کے لیے بے حد نقصان دہ ہیں اس کے باوجود ہم ان چیزوں کے ساتھ ہم بے تحاشہ وقت گزار رہے ہیں جو آگے چل کر بے شمار مسائل پیدا کرسکتا ہےایک رپورٹ کے مطابق امریکی نوجوان 11 گھنٹوں سے زائد وقت اپنے موبائل اسکرین کے ساتھ گزارتے ہیں۔ برطانیہ میں 12 سال سے کم عمر بچوں کا 6 سے ساڑھے 6 گھنٹے کا وقت مختلف اسکرینز جن میں موبائل اور کمپیوٹر وغیرہ شامل ہیں کے ساتھ گزرتا ہےمستقل روشن یہ اسکرین ہماری آنکھوں پر نہایت خطرناک اثر ڈالتی ہیں اور یہ نظر کی دھندلاہٹ، آنکھوں کا خشک ہونا، گردن اور کمر میں درد اور سر درد کا سبب بنتی ہیں۔ ان بیماریوں کو ماہرین نے ڈیجیٹل بیماریوں کا نام دیا ہے جو آج کے ڈیجیٹل دور کی پیداوار ہیں ماہرین کا کہنا ہے کہ موبائل کی اسکرین نیلے رنگ کی ہوتی ہیں اور یہ دیگر تمام رنگوں سے زیادہ توانائی کی حامل ہوتی ہے۔ یہ نیلی اسکرینز زیادہ شدت سے ہماری آنکھوں پر اثر انداز ہوتی ہیں۔ یہ ہماری آنکھ کے پردے کو نقصان پہنچا سکتی ہے اور ہمیں ہمیشہ کے لیے نابینا کر سکتی ہے۔

اس اسکرین کے ساتھ زیادہ وقت گزارنا دماغی کارکردگی کو بتدریج کم کردیتا ہے جبکہ یہ آپ کی نیند پر بھی منفی اثرات ڈالتا ہے۔ آپ رات میں ایک پرسکون نیند سونے سے محروم ہوجاتے ہیں اور سونے کے دوران بار بار آپ کی آنکھ کھل جاتی ہے۔ ماہرین کے مطابق امریکی نوجوانوں کی 65 فیصد تعداد ان تمام مسائل کا شکار ہے۔ یاد رہے کہ ہمارے جسم کی بناوٹ فطرت سے مطابقت رکھنے والی ہے اور یہ ہرگز ایسی نہیں جو جدید دور کی آسائشوں سے مطابقت کر سکے۔

ایمز ٹی وی (کھیل) انٹرنیشنل کرکٹ کونسل نے کھلاڑیوں کی نئی ٹیسٹ رینکنگ جاری کردی ہے قومی ٹیسٹ ٹیم کے کپتان ایک درجہ ترقی کے بعد دوبارہ ٹاپ ٹین کی فہرست میں شامل ہوگئے ہیں۔

انٹرنیشنل کرکٹ کونسل (آئی سی سی) نے کھلاڑیوں کی ٹیسٹ رینکنگ جاری کردی ہے جس کے مطابق بہترین بلے بازوں میں 906 پوائنٹس کے ساتھ پہلے نمبر پر آسٹریلیا کے اسٹیو استھ ہی براجمان ہیں۔ دوسرے نمبر پر نیوزی لینڈ کے کین ولیمسن کے 879 پوائنٹس ہیں۔ ٹیسٹ بلے بازوں میں 878 پوائنٹس لے کر تیسری پوزیشن پر انگلینڈ کے جوروٹ جبکہ جنوبی افریقہ کے ہاشم آملہ 847 پوائنٹس کے ساتھ چوتھے نمبر پرہیں۔

پاکستان کے یونس خان پانچویں پوزیشن پر ہیں اوران کے پوائنٹس 845 ہیں۔ چھٹے نمبر پر جنوبی افریقہ کے اے بی ڈویلیئرز ہیں۔ آسٹریلیا کے اے سی ووگز ساتویں اور ان کے ہم وطن ڈیوڈ وانر آٹھویں نمبر پرہیں۔ انگلینڈ کے کک نویں جبکہ پاکستان کی ٹیسٹ ٹیم کے کپتان مصباح الحق ایک درجہ ترقی پا کر دسویں نمبر پر آگئے ہیں۔

آئی سی سی کی بالر کی ٹیسٹ رینکنگ میں جنوبی افریقہ کے اسٹین گن کے نام سے مشہور ڈیل اسٹین ہیں اور ان کے پوائنٹس 878 ہیں۔ بھارت کے ایشون 871 پوائنٹس کے ساتھ دوسرے ، انگینڈ کے جیمز اینڈرسن 870 پوائنٹس کے ساتھ تیسرے جبکہ انہی کے ہم وطن اسٹیورٹ براڈ 836 پوائنٹس کے ساتھ چوتھے نمبر پرہیں۔ پانچویں نمبر پر سری لنکا کے جادوگراسپنر ہیرانگا ہیراتھ ہیں جن کے پوائنٹس 831 ہیں جبکہ پاکستان کے مایہ ناز اسپنر یاسر شاہ 806 پوائنٹس کے ساتھ چھٹے نمبر پرہیں۔ ساتویں نمبر پر بھارت کے جدیجا، آٹھویں پوزیشن پر آسٹریلیا کے مچل اسٹارس، نویں نمبر پر نیوزی لیند کے ویگنر اور ان کے ہم وطن بولٹ دسویں پوزیشن پر ہیں۔

آل راؤنڈرز کی کیٹیگری میں کوئی بھی پاکستان کھلاڑی ٹاپ ٹین میں جگہ نہیں بناسکا۔ بھارت کے ایشون بدستور پہلے، بنگلا دیش کے شکیب الحسن دوسرے، بھارت کے رویندرا جدیجا تیسرے، انگلینڈ کے معین علی چوتھے اور پانچویں نمبر پر آسٹریلیا کے مچل اسٹارک ہیں

ایمز ٹی وی ( صحت)حسین اور اس کی بیوی کو اپنے بیٹے مفیض کی پیدائش کے فوری بعد اس بات کا اندازہ ہوگیا تھا کہ ان کا نونہال بچہ سننے کی صلاحیت سے محروم ہے، کچھ ماہ میں ڈاکٹروں سے رجوع کرنے کے بعد اس جوڑے کو اس حقیقت کا علم ہوا کہ ان کا بیٹا دونوں کانوں سے سن نہیں سکتا۔

ان دونوں نے کراچی کے کئی نجی ہسپتالوں کا دورہ کیا تاہم انہیں صرف یہی بتایا گیا کہ اس مرض کا موجودہ علاج بے حد مہنگا ہے۔Cochlear Implantation نامی سرجری کے بعد ہی یہ بچہ اپنے دونوں کانوں سے سن سکتا تھا، تاہم سول ہسپتال میں کان، ناک اور حلق کے علاج کے ماہر ڈاکٹر عمر فاروق کے مطابق نجی ہسپتالوں میں اس سرجری کی لاگت 25 لاکھ سے 32 لاکھ تک ہے۔جب حسین کے پاس کوئی اور راستہ نہ رہا تو اس نے سرجری کے لیے پبلک ہسپتالوں کا رُخ کیا۔ڈاکٹر فاروق اور ان کی ٹیم نے ایک سالہ مفیض کی سرجری کی۔ڈاکٹر فاروق کے مطابق یہ پاکستان کی تاریخ میں کسی بھی سرکاری ہسپتال میں مقامی ڈاکٹروں کی جانب سے کی گئی اپنی نوعیت کی پہلی سرجری ہے۔ڈاکٹروں نے مفیض کی مفت سرجری کی اور انہیں امید ہے کہ وہ ایک سے ڈیڑھ ماہ میں آہستہ آہستہ سماعت کی صلاحیت حاصل کرلے گا۔اس سرجری پر مفیض کے والد حسین کا کہنا تھا کہ ’میں بے حد خوش ہوں، میں ان ڈاکٹروں کی ٹیم کا بے حد شکر گزار ہوں جنہوں نے میرے بیٹے کا آپریشن کیا‘۔

ایمز ٹی وی (کھیل) سابق قومی کپتان جاوید میانداد نے صدر بھارتی بورڈ انوراگ ٹھاکر کو اینٹ کا جواب پتھرسے دے دیا، انھوں نے کہاکہ پاکستان بھارت کو بھول کر دیگر ملکوں کے ساتھ کرکٹ پر توجہ دے، بھارت ہمیشہ دھوکا دیتا اور پاکستان سے ڈرتا ہے۔

اس لیے جب بھی دونوں ملکوں میں کرکٹ کھیلنے کا موقع آئے وہ پیچھے ہٹ جاتا ہے، سرکاری خبر رساں ادارے سے بات چیت میں جاوید میانداد نے کہاکہ بی سی سی آئی کے صدر کا بیان بچکانہ اور اس کی کوئی اہمیت نہیں، یاد رہے کہ بی سی سی آئی کے صدر انوراگ ٹھاکر بھارتی حکومتی جماعت بی جے پی کے لیڈر بھی ہیں، انھوں نے چند روز قبل بیان دیا تھا کہ پاکستان کے ساتھ کھیلنے کا سوال ہی پیدا نہیں ہوتا، جاوید میانداد نے کہا کہ رواں برس بھارت میں شیڈول ورلڈ ٹوئنٹی20 سے قبل پاکستانی ٹیم کو بہت زیادہ دھمکیاں موصول ہو رہی تھیں۔

اس کے باوجود پلیئرز بھارت گئے کیونکہ ہم اسپورٹسمین ہیں، نامساعد حالات دیکھ کر پچھلے دروازوں سے نکل جانے کی کوشش نہیں کرتے، سابق کپتان نے کہا کہ بھارتی کرکٹ بورڈ ان لوگوں سے بھرا پڑا ہے جن کے اپنے مفادات ہیں، موقع آنے پر یہ قدموں میں گر جاتے ہیں لیکن جب ان کے مقاصد پورے ہو جائیں تو اس طرح شو کرنے کوشش کرتے ہیں جیسے آپ کو جانتے ہی نہ ہوں، ماضی کے عظیم بیٹسمین نے ویسٹ انڈیز کے خلاف یواے ای میں جاری سیریز میں ٹوئنٹی20ٹیم اورکپتان سرفراز احمد کی کارکردگی کو سراہتے ہوئے کہا کہ ہماری ٹیم عالمی چیمپئن سے کئی گنا بہتر ہے،گرین شرٹس کو سیریز میں کلین سویپ کرنا چاہیے۔

ایک سوال پر انھوں نے کہاکہ قومی ایک روزہ ٹیم میں بہتری لانے کیلیے بہت کچھ کرنے کی ضرورت ہے، ہمیں اپنے ڈومیسٹک اسٹرکچر کو بہتر کرنا ہوگا، انگلینڈ کے خلاف ایک روزہ سیریز میں مایوس کن کارکردگی کا قصور وار صرف کپتان اظہر علی کو ٹھہرانا ٹھیک نہیں، ویسٹ انڈیز سے سیریز کے دوران ٹیم کے ہر کھلاڑی کو اپنی ذمہ داری کا احساس کرتے ہوئے غیرمعمولی کھیل پیش کرنا ہوگا۔