Reporter SS
کراچی: جامعہ کرا چی کے ناظم امتحانات پروفیسر ڈاکٹر محمد ارشد اعظمی کے مطابق بی کام پرائیوٹ کے سالانہ امتحانات برائے 2019 ءکے رجسٹریشن اور امتحانی فارم جمع کرانے کی تاریخ میں 07 فروری 2020 تک توسیع کردی گئی ہے۔بی کام پرائیوٹ کے رجسٹریشن فارم 3800 روپے فیس کے ساتھ جبکہ بی کام پرائیوٹ سال اول ودوئم کے امتحانی فارم5600روپے فیس کے ساتھ جمع کروائے جا سکتے ہیں جبکہ بی کام سال اول ودوئم باہم کے امتحانی فارم روپے9400 فیس کے ساتھ جمع کرائے جاسکتے ہیں۔
رجسٹریشن،امتحانی فارم اور بینک واؤچر جامعہ کراچی کی ویب سائٹ سے حاصل کئے جاسکتے ہیں۔
طلبہ اپنے رجسٹریشن،امتحانی فارم متعلقہ دستاویزات اور فیس واؤچرکے ساتھ جامعہ کراچی کے سلور جوبلی گیٹ پر واقع ایکسٹرنل یونٹ کاؤنٹرزپر جمع کراسکتے ہیں۔واضح رہے کہ طلبہ اپنی فیس ایچ بی ایل،یوبی ایل،نیشنل بینک آف پاکستان ،ایم سی بی اور سندھ بینک کی کسی بھی برانچ میں جمع کراسکتے ہیں اور مذکورہ تاریخ کےگزرنے کے بعدامتحانی فارم جمع کرانے کی تاریخ میں توسیع کی جائے گی۔
اسلام آباد: پاکستان میں تعینات چین کے سفیر یاؤژنگ کا کہنا ہے ۔ ہم کرونا وائرس پر قابو پانے کی صلاحیت رکھتے ہیں
اسلام آباد میں معاون خصوصی برائے صحت ظفر مرزا نے چینی سفیر یاؤژنگ کے ہمراہ پریس کانفرنس کے دوران کہا کہ ملک میں کورونا وائرس کا ایک بھی کیس نہیں، وائرس کے مشتبہ 7 لوگوں کے نمونے منفی آنا خوش آئند ہے، کورونا وائرس سے متعلق حکومت روزانہ کی بنیاد پر انتظامات کا جائزہ لیتی ہے، کوئی بھی پاکستانی یا چینی اس وقت تک چین نہیں چھوڑ سکتا جب تک ان کا معائنہ نہ کیا جائے،چین سے آنے والوں میں کوئی مشتبہ مسافر نہیں ملا، چین سے آنے والا کوئی مسافر ایسا نہیں جسے آبزرویشن کی ضرورت ہو۔
پریس کانفرنس کے دوران چینی سفیر یاؤژنگ کا کہنا تھا کہ کورونا وائرس سے 371 افراد ہلاک ہو چکے ہیں، اس سے نمٹنے کے لیے ہر ممکن کوشش کررہے ہیں، چین میں تمام تقریبات منسوخ کر دی گئی ہیں، ہم عالمی ادارہ صحت اور دیگر حکام سے مسلسل رابطے میں ہیں۔ عالمی ادارہ صحت نے ہمارے اقدامات کو سراہا ہے، ہم پرامید ہیں اس وبا سے نمٹ لیں گے۔ ہم کرونا وائرس پر قابو پانے کی صلاحیت رکھتے ہیں، وائرس کی ویکسین بنانے کیلئے بھی تحقیق جاری ہے، کرونا وائرس میں مبتلا 500 سے زائد مریض صحت یاب ہوچکے ہیں، دنیا کو اپنے اقدامات سے آگاہ کررہے ہیں۔
یاؤژنگ نے کہا کہ چین میں پاکستانیوں کی کثیر تعداد ہے اور چین میں پاکستانی شہریوں کو اپنا ہم وطن سمجھتے ہیں، ہم تمام پاکستانیوں کے ساتھ رابطے میں ہیں پاکستان کی حمایت کو سراہتے ہیں، ووہان کے علاوہ چین کے دیگر شہروں سے پاکستانیوں کوواپس بھیجا جائے گا۔
دبئی: ٹی ٹوئنٹی رینکنگ میں بابراعظم کی حکمرانی برقرار ہے اور بھارتی کھلاڑی لوکیش راہول 4 درجے چھلانگ کیساتھ دوسرے نمبر پر آگئے۔
آئی سی سی کی جانب سے جاری کی جانے والی عالمی ٹی ٹوئنٹی رینکنگ میں قومی ٹیم کے کپتان بابراعظم بدستور نمبر ون ہیں، نیوزی لینڈ کے خلاف سیریز میں عمدہ کارکردگی کی بدولت لوکیش راہول 4 درجے ترقی پاتے ہوئے دوسرے نمبر پر آگئے ہیں، ایرون فنچ ،ایک قدم پیچھے ہٹتے ہوئے تیسری پوزیشن پر ہیں۔
اس کے بعد ٹاپ 10 میں کولن منرو، ڈیوڈ میلان، گلین میکسویل، ایون لیوس، حضرت اللہ زازئی، ویرات کوہلی اور روہت شرما شامل ہیں، شرما 3 درجے ترقی پاتے ہوئے ٹاپ 10 میں شامل ہوئے ہیں۔
بولرز کی فہرست میں پاکستان کے عماد وسیم پانچویں شاداب خان آٹھویں نمبر پر ہیں، ٹاپ ٹین میں بالترتیب راشدخان، مجیب الرحمن، مچل سینٹنر، ایڈم زمپا، عماد وسیم، اینڈل فیلکوائیو، عادل راشد، شاداب خان، ایشٹن اگار اور کرس جورڈن شامل ہیں۔ ٹاپ ٹین آل راؤنڈرز میں کوئی پاکستانی شامل نہیں، افغانستان کے محمد نبی سرفہرست ہیں
کراچی: جامعہ اردومیں بیچلرزاورماسٹرایوننگ پروگرامزمیں آن لائن داخلہ کاآغاز ہوگیا ہے۔ وفاقی اردو یونیورسٹی کے ڈائریکٹر ایڈمیشن پروفیسر ڈاکٹر محمد زاہد کے مطابق جامعہ اردو کراچی کیمپسز میں داخلہ برائے بیچلرز اور ماسٹر ایوننگ پروگرامز سال 2020 کے فارم آج3 فروری بروز پیر سے آن لائن جمع کرائے جا سکتے ہیں۔
داخلے کے خواہشمند امیدوار جامعہ اردو کی ویب سائٹ www.fuuast.edu.pk سے آن لائن فارم پر کریں اور اس کی دو عدد کاپیاں پرنٹ کر کے داخلہ فارم پروسیسنگ فیس واچر 1500/- روپے کے ساتھ ، جبکہ جن شعبہ جات میں انٹری ٹیسٹ لازمی ہے وہ امیدوار 2500/- روپے کا فیس واچر کے ساتھ عسکری بینک گلشن اقبال اور عبدالحق کیمپس کے عسکری بینک بوہرہ پیر برانچز میں جمع کرا سکتے ہیں۔ بعدازاں مطلوبہ دستاویزات داخلہ فارم کے ساتھ متعلقہ شعبہ جات میں جمع کرائیں اور جمع شدہ فیس واچر بھی لازمی اس کے ساتھ منسلک کریں۔
کراچی: محکمہ کھیل نے سندھ گیمز 2020 کی تیاریاں شروع کردیں، گیمز میں حصہ لینے کے خواہشمند کھلاڑیوں اور ایسوسی ایشنز کے لیے پروفارما جاری کردیا ہے۔ سندھ گیمز کے نام سے ویب سائٹ بھی بنالی گئی اور اس کا انعقاد پورے صوبے میں کرانے پر غورکیا جا رہا ہے۔ اس سلسلے میں محکمہ کھیل نے اپنی ویب سائٹ www.sportsandyouth.sindh.gov.pk کو فعال کردیا ہے جبکہ سندھ گیمز کے لئے ایک سب سائٹ www.sindhgames.com بھی جاری کردی گئی ہے، جس پر فوری طور پر دو اقسام کے شراکتی فارم بھی رکھ دیئے گئے ہیں، جہاں کھلاڑی اور اسپورٹس آرگنائزیشنز اپنے کوائف پُر کرسکیں گی ۔
سندھ گیمز کو مکمل شفاف اور غیر جانبدار بنانے کے لئے اپلائی کرنے والے کھلاڑیوں کے اوپن ٹرائلز کرائے جائیں گے اس کے بعد کامیاب کھلاڑی سندھ گیمز میں حصہ لینے کے اہل ہونگے۔ محکمہ اسپورٹس اینڈ یوتھ افیئرز سندھ کے سیکریٹری سید امتیاز علی شاہ کا کہنا ہے کہ ہم سندھ کے نوجوانوں کو ٹیلنٹ دکھانے کا بھرپور موقع فراہم کرنا چاہتے ہیں، سندھ گیمز کا انعقاد پورے صوبے میں کرائیں گےاور اسے مثالی بنائیں گے۔