کراچی:  ہمدرد یونیورسٹی کی جانب سے جامعہ کراچی کے ساتھ سال 2020کایونی -کارپ کیریئر کنیکٹ کراچی میں بروز ہفتے یکم فروری کو ایکسپو سینٹر کے ہال نمبر ۲ میں منعقد کیا جائے گا۔ جو صبح دس بجے سے شام چھ بجے تک جار ی رہے گا۔یہ کیریئر فیئر ہمدرد یونیورسٹی کی جانب سے منعقد کیا جا رہا ہے۔

اس فیئر کا مقصد مختلف یونیورسٹیز کو کارپوریٹ کمپنی سے ملوانا ہے اور طلبہ کے لئے مواقع فراہم کرنا ہے۔ اسکے ذریعہ طلبہ کیلئے1000سے زائد انٹرنشپ اور جاب کےمواقع، اعلیٰ تعلیم کے لئے اسکولرشپ مہیا کی جائیں گی۔

طلبہ اپنے پروجیکٹ کی نمائش کر سکیں گے۔اس فیئرمیں 100 سے زائد کمپنیز شرکت کریں گیں جو طلبہ کو اپنے ادارے کے بارے میں معلومات فراہم کریں گی اور طلبہ کے انٹرویوز کریں گی۔ یہ موجودہ اور سابق طلبہ اوران سب کے لئے منعقد کیاجا رہا ہےجوجاب کی تلاش میں ہیں ۔

کراچی: محکمہ موسمیات نے کراچی والوں کو سردی کے حوالے سے نئی نوید سنادی۔

محکمہ موسمیات نے پیشگوئی کی ہےکہ کراچی میں اس بار سردی کا دورانیہ طویل ہوگا اور فروری کے آخرتک موسم سرد رہنے کا امکان ہے۔

ترجمان کا کہنا تھا کہ کراچی میں اس سال سردی کا دورانیہ طویل رہا ہے اور  2014 کے بعد اس سال اچھی سردی پڑی ہے۔

ترجمان محکمہ موسمیات کے مطابق 29 جنوری سے یکم فروری تک درجہ حرارت 9 سے 11 ڈگری سینٹی گریڈ رہنے کاامکان ہے۔

اسلام آباد : پاکستان کے ایوان بالا ( سینیٹ) میں 27 جنوری بروز پیر بچے کی پیدائش پر ماں اور باپ کو کام سے رخصت دینے کا بل منظور کیا گیا ہے۔ اس بل کے مطابق وفاقی دارالحکومت کے ماتحت کام کرنے والے تمام اداروں میں بچے کی پیدائش کے موقعے پر ماں کو تنخواہ کے ساتھ چھ ماہ کی جبکہ والد کوبھی مکمل تنخواہ کے ساتھ ایک ماہ تک کی رخصت دی جائے گی۔ اس قانون کی خلاف ورزی کرنے اور چھٹی سے انکار کرنے والے والدین کے خلاف قانونی کارروائی کی جائے گی اور سزا کے طور پرکم از کم چھ ماہ قید اور ایک لاکھ روپے جرمانہ یا دونوں عائد ہوں گے۔

پاکستان کی سینیٹ میں یہ بل پیپلز پارٹی کی سینیٹر قرۃ العین مری کی جانب سے پیش کیا گیا ۔اس بل کے مطابق کوئی بھی ملازم خاتون اپنے پہلے بچے کی پیدائش پر چھ، دوسرے بچے کی پیدائش پر چار جبکہ تیسرے بچے کی پیدائش پر تین ماہ تک تنخواہ کے ساتھ چھٹی حاصل کر سکے گی۔

تاہم سینیٹ میں اس بل کی مخالفت بھی کی گئی۔ حکومتی سینیٹرز نے کہا کہ قانون میں پہلے سے ہی میٹرنٹی رخصت کے حوالے سے دفعات موجود ہیں، اس لیے نیا بل پیش کرنے کی ضرورت ہی نہیں تھی۔وزیر برائے معاشی امور حماد اظہر نے بل کی مخالفت کرتے ہوئے کہا کہ خاتون ملازمین کو 90 دن کی چھٹی کا حق پہلے ہی حاصل ہے جبکہ مرد بھی سالانہ 48 چھٹیاں لے سکتا ہے۔ انہوں نے بل کے حوالے سے یہ تجویز بھی دی کہ باپ کے لیے چھٹیاں کم کر کے پندرہ دن کا جانی چاہیئیں۔



مانیٹرنگ ڈیسک : سیگا کمپنی نے اپنی شکنجہ مشین ایپ کے ذریعے ایک ایسا آن لائن نظام تیار کیا ہے جس سے دنیا بھر کے افراد گھر بیٹھے ٹوکیو میں رکھی مشین سے تحفے یا کھلونے پکڑکرانہیں جیت سکتے ہیں اور انعام بغیر کسی معاوضے کے آپ کے گھر بھجوادیا جائے گا۔ اس ایپ کو سیگا کیچر کا نام دیا گیا ہے۔ دو ڈالر فیس ادا کرکے ٹوکیو کی اس مشین کو ایک مرتبہ استعمال کیا جاسکتا ہے، جس کی لائیو ویڈیو نشرہوتی رہتی ہے۔

اسکرین پر نمودار بٹن سے شکنجے کو دائیں بائیں، اوپر نیچے حرکت دی جاتی ہے۔ اس طرح پوری مشین فون کے ذریعے کنٹرول کی جاسکتی ہے۔ انعامات جیتنے کی صورت میں کمپنی بغیر کسی معاوضے کے انعام آپ تک پہنچاتی ہے، لیکن اس میں ایک ہفتہ لگ جاتا ہے۔ مگرو اضح رہے کہ صرف ایک انعام مفت میں پہنچایا جائے گا اور زائد انعامات کی صورت میںرقم ادا کرنا ہوگی۔

صارفین کو ایپ میں کچھ ڈالر کے بدلے ’سیگا پوائنٹس‘ خریدنے ہوں گے جس کی بنا پروہ گیم استعمال کرسکیں گے یا پھر ایک سے زائد انعام جیتنے پر سیگا پوائنٹس سے ہی اس کا معاوضہ ادا کرسکیں گے۔ ایک گیم کھیلنے کے لیے صارف کو 100 سے 200 سیگا پوائنٹس درکار ہوں گے جن کی قیمت دو ڈالر ہے۔

لاہور: پاکستان اور بنگلادیش کی کرکٹ ٹیموں کے درمیان سیریز کا تیسرا اور آخری ٹی ٹوئنٹی میچ لاہور کے قذافی اسٹیڈیم میں کھیلا جانا تھا تاہم بارش کے باعث ٹاس بھی نہ ہوسکااور میچ بغیرکوئی گیند ہوئے منسوخ کردیا گیا۔3 میچوں پر مشتمل ٹی ٹوئنٹی سیریز 0-2 سے پاکستان کے نام رہی۔سیریز کے بہترین کھلاڑی بابر اعظم نامزد ہوئے۔

واضح رہے کہ پاکستان بمقابلہ بنگلہ دیش کا دوسرا ٹی ٹوئنٹی ہفتے کو کھیلا گیا تھاجس میں بنگلادیش کے 136 رنز کے ہدف کے تعاقب میں محمد حفیظ اور بابراعظم نے 131رنز کی شاندار پارٹنرشپ قائم کرتے ہوئے نصف سنچری اسکور کیں اور پاکستان کو جیت سے ہمکنار کروایا اور سیریز اپنے نام کی۔

جبکہ پاکستان نے جمعہ کو بنگلہ دیش کے خلاف سیریز کے پہلے میچ میں بنگلہ دیش کو 5وکٹوں سے شکست دی تھی، جس میں بنگلہ دیش کے 142 ہدف کے تعاقب میں پاکستان نے19.3 اوور زمیں کامیابی حاصل کی اورمیچ کے بہترین کھلاڑی شعیب ملک نامزد ہوئے تھے۔

میچ کے بعد پریس کانفرنس میں مہمان ٹیم کے کپتان محمود اللہ نے کہا کہ عامر اور وہاب کی عدم موجودگی میں بھی پاکستان کی فاسٹ بولنگ کےشعبہ نے بہت اچھی کارکردگی کا مظاہرہ کیا جبکہ ان کا مزید کہنا تھا کہ ہم توقعات کے مطابق کھیل پیش نہیں کرسکے تاہم واپس جاکر اپنی خامیوں کو دور کرنے کی کوشش کریں گے۔

پریس کانفرنس کرتے ہوئے ہیڈ کوچ مصباح الحق کا کہنا تھا کہ ٹیم کو اس وقت کامیابی کی ضرورت تھی انہوں نے مزید کہا کہ جب شعیب ملک اور محمد حفیظ ٹیم میں نہیں تھے تو اس وقت بھی کہا تھا کہ ان کا کیرئیر ختم نہں ہوا، جب تک کوئی کھلاڑی فٹ اور فارم میں ہو تو اس کو کھلانا چاہیئے۔انہوں نےمزید کہا کہ ورلڈکپ ابھی بہت دور ہے پہلے کافی کرکٹ ہے، ابھی بہت سی چیزوں کو دیکھ رہے ہیں۔

واضح رہے کہ پاکستان کوعالمی ٹی ٹوئنٹی رینکنگ میں اپنی پہلی پوزیشن برقرار رکھنے کے لیے تیسرا میچ جیتنا ضروری تھاتاہم میچ کے برابر ہونے کی صورت میں بھی پاکستان کی ٹاپ رینکنگ برقرار رہی۔


اسلام آباد:وزارت انفارمیشن ٹیکنالوجی (آئی ٹی) کی طرف سے خواتین کے لیئے بیٹی ایپ متعارف کرانے کا اعلان ہوگیا

خواتین کو ترقی کے مواقع اور تحفظ فراہم کرنے کے لیئے جلد ہی بیٹی ایپ متعارف کرائی جائے گی ۔ جہاں ان کے لیئے ملازمتیں، اسکالر شپ ، کاروباری مواقعوں سے متعلق اہم معلومات موجود ہوگی،

بیٹی ایپ متعارف کرانے کا مقصد خواتین کو بااختیار بنانا اور ان کے حقوق کو تحفظ فراہم کرنا ہے اس ایپ کے ذریعے خواتین کو ہر ممکن تعاون فراہم کیا جائے گا۔ یہ ایپ ڈیجٹیل پاکستان پروگرام میں شامل ہے