Reporter SS
کراچی: اقرا یونیورسٹی کے زیر اہتمام سوشل انٹرپرینیورشپ پر سیشن بروز جمعرات 21 نومبر 2019 کو سہ پہر 3:30 بجے مرکزی سماعت گاہ ،اقرا یونیورسٹی ای ڈی سی کیمپس میں منعقد ہوگا۔
سیمینار میں معروف سماجی رہنما اور باکستان کی سب سے بڑی مائیکرو فنانس آرگنائزیشن ’’اخوت‘‘ کے بانی و سربراہ ڈاکٹر محمد امجد ثاقب کلیدی خطاب کرینگے۔
وائس چانسلر شہید ذوالفقار علی بھٹو میڈیکل یونیورسٹی پروفیسر تنویر خالق نے کہا ہے کہ یونیورسٹی کی زمین کاحصول ترجیح ہے جس کی منظوری کیلئے آئندہ ہفتے صدر پاکستان سے ملاقات کروں گا۔
یونیورسٹی میں پروفیسر ز سمیت فیکلٹی کی 25 اسامیاں خالی ہیں۔ چار سال بعد یونیورسٹی سے پی ایچ ڈی ڈگری کااجرا کیا جائے گا ۔
یونیورسٹی میں تحقیق کے شعبہ میں بہتری کیلئے نئے شعبے قائم کررہے ہیں، تحقیقی کام کیلئے صنعت کاروں کو اعتماد میں لے رہے ہیں۔
ان خیالات کااظہار انہوںنے گزشتہ روز پریس کانفر نس سے خطاب کرتے ہوئے کیا۔
اسلام آباد: چیف جسٹس آصف سعید کھوسہ کا کہنا ہے کہ وزیراعظم عمران خان نے خود نوازشریف کو باہر جانے کی اجازت دی تھی، ہائی کورٹ نے صرف جزویات طے کیں۔
چیف جسٹس آصف سعید کھوسہ نے وزیراعظم کا عدلیہ سے متعلق بیان پر جواب دیتے ہوئے کہا کہ وزیراعظم نے جس کیس کا طعنہ دیا اس پر بات نہیں کرنا چاہتا، ججز پر تنقید اور طاقتور کا طعنہ ہمیں نہ دیں، ججز پر اعتراض کرنے والے تھوڑی احتیاط کریں، وزیراعظم نے خود نوازشریف کو باہر جانے کی اجازت دی تھی، ہائی کورٹ نے صرف جزویات طے کیں۔
وزیراعظم نے جس کیس کی بات کی وہ ابھی زیرالتواء ہے اس لیے اس پر بات نہیں کروں گا، وزیراعظم نے طاقتور اور کمزور کی بھی بات کی، اب ہمیں وسائل کی کمی محسوس ہو رہی تھی، وزیراعظم جب وسائل دیں گے تو مزید اچھے نتائج بھی سامنے آئیں گے، محترم وزیراعظم نے دو دن پہلے خوش آئند اعلان کیا کہ عدلیہ کو وسائل دیں گے۔
کراچی:کراچی کے قریب غیر ملکی طیارہ پاکستان کی فضائی حدود میں بغیر اجازت داخل ہو گیا، سول ایوی ایشن اتھارٹی نے بروقت کارروائی کرتے ہوئے طیارے کو واپس جانے پر مجبور کر دیا۔
بتایا گیا ہے کہ پاکستانی ایئر ٹریفک کنٹرول حکام نے طیارے سے پاکستان میں داخلے کا اجازت نامہ اور کوڈ طلب کیا جس پر غیر ملکی پائلٹ نے اجازت نامہ اور کوڈ بتانے سے انکار کر دیا۔
طیارہ مسقط سے ہوتا ہوا کراچی ریجن میں داخل ہوا تھا، ایئر ٹریفک کنٹرولر نے وارننگ دی جس پر طیارے کو واپس جانا پڑا، سول ایوی ایشن نے بغیر اجازت داخل ہونے کی فوری اطلاع اعلیٰ حکام کو دے دی
کراچی: ملکی تاریخ میں پہلی مرتبہ زرعی قرضے ایک ہزار ارب روپے سے تجاوز کرگئے ہیں۔
رواں مالی سال زرعی قرضوں کی فراہمی کے لیے بینکوں کو 1350 ارب روپے کا ہدف دیا گیا ہے۔ گورنر بینک دولت پاکستان ڈاکٹر رضا باقر نے زراعت کے شعبے کو قرضوں کی فراہمی میں اضافے کیلیے کوششیں کرنے پر بینکوں کی تعریف کی، جو مالی سال 19کے اختتام تک تاریخی لحاظ سے بلند ترین سطح تک پہنچ گئے ہیں۔
کراچی: پاکستان نے انگلینڈ میں منعقدہ جونیئرورلڈ اسکریبل چیمپئن شپ جیت لی۔
سید عماد علی کم عمرجونیئرورلڈ چیمپئن بن گئے، انھوں نے 20 میں سے17 میچزمیں کامیابی سمیٹی،طحہ مرزا انڈر18، صائم وقارانڈر14، مونس خان انڈر12جبکہ مصباح الرحمان انڈر10کے عالمی چیمپئن بنے۔
کراچی: اردو کے عہد ساز اور انقلابی شاعر فیض احمد فیض کو دنیا سے رخصت ہوئے 35 برس بیت گئے لیکن وہ آج بھی اپنے مداحوں کے دلوں میں زندہ ہیں۔
انقلابی شاعری کی تاریخ فیض کے تذکرے کے بغیرمکمل ہی نہیں ہوسکتی۔ فیض احمد فیض نے اپنی انقلابی فکراورعاشقانہ لہجے کو ملا کرایک ایسا لہجہ اپنایا جس سے اردو شاعری میں ایک نئی جمالیاتی شان پیدا ہوگئی۔ ان کے سیاسی خیالات وافکارآفاقی ہیں۔ اسی لیے ان کی شاعری آج کی شاعری نظرآتی ہے۔
فیض کی فلمی انڈسٹری کے لیے خدمات بھی ناقابل فراموش ہیں ان کا کلام محمد رفیع، ملکہ ترنم نور جہاں، مہدی حسن، آشا بھوسلے اورجگجیت سنگھ جیسے گلوکاروں کی آوازوں میں ریکارڈ کیا گیا جب کہ انہوں نے درجنوں فلموں کے لئے غزلیں، گیت اورمکالمے بھی لکھے۔ فیض نے ثابت کیا کہ حق گوئی کسی ایک کے لیے نہیں بلکہ ہر خطے اور زمانے کے لیے ہوتی ہے۔ انقلابی شاعر فیض احمد فیض 20 نومبر 1984 کو 73 برس کی عمر میں اپنے خالق حقیقی سے جاملے۔
لاہور: ثنا میر نے بھی انٹرنیشنل کرکٹ سے آرام لینے کا اعلان کردیا ہے، وہ آئندہ ماہ انگلینڈ کے خلاف ہونے والی سیریز میں شرکت نہیں کریں گی۔
پاکستان اور انگلینڈ کے درمیان ہونے والی اس سیریز کے تین ون ڈے میچز آئی سی سی ویمنز چیمپئن شپ کا حصہ ہیں۔ اس دورے میں قومی ٹیم انگلینڈ کے خلاف تین ٹی ٹوئنٹی میچز بھی کھیلے گی۔