اسلام آباد:وزارت قانون نے بھی ملازمین کے لیے اسمارٹ فون کے استعمال پر پابندی عائد کردی ہے۔

وزارت قانون نے اسمارٹ فون کے استعمال پر پابندی سے متعلق نوٹی فیکشن جاری کردیا ہے جس کے مطابق دوران ڈیوٹی گریڈ ایک سے 15 تک کے ملازمین اسمارٹ فون استعمال نہیں کرسکیں گے، نوٹی فیکشن میں کہا گیا ہے کہ سکیورٹی وجوہات کی بنا پر پابندی عائد کی گئی ہے۔

اس کے علاوہ گریڈ 16 اور اس سے نچلے گریڈ کے ملازمین کے مہمانوں کا بھی وزارت قانون و انصاف میں داخلہ بند کردیا گیا ہے، ذرائع کے مطابق پابندی کا مقصد حکومت کی جانب سے قانون سازی اور دیگر حساس دستاویزات کی چوری کو روکنا ہے، وزارت کے احکامات کی خلاف ورزی کرنے والوں کے خلاف ایکشن لیا جائےگا۔

کراچی: سرفراز احمد نے  بابر اعظم کو نائب کپتان بنانے کی حمایت کر دی، انھوں نے اسے اچھا اقدام قرار دیا۔

کراچی میں میڈیا سے گفتگو کرتے ہوئے انھوں نے کہاکہ ورلڈ کپ کے دوران میرے پی سی بی سے اچھے تعلقات رہے،اس وقت تمام تر توجہ سری لنکا کے خلاف ہوم سیریزپرہے، پوری کوشش ہوگی کہ اچھا کھیل پیش کریں۔

انھوں نے کہا کہ ہیڈکوچ اورچیف سلیکٹر مصباح الحق کے ساتھ میرے اچھے تعلقات ہیں، میں ان کی کپتانی میں بھی کھیل چکا،ہم قومی ٹیم کی بہتری کے لیے مل جل کرکام کریں گے۔

انھوں نے کہا کہ بابر اعظم کو نائب کپتان بنانا اچھا اقدام ہے، وہ اس طرح کپتانی کے لیے بھی تیار ہوجائیں گے،بابر کے ساتھ بھی میرے اچھے تعلقات ہیں، وہ سلپ کی فیلڈ پرمیرے ساتھ ہی ہوتے ہیں۔

سرفراز احمد نے کہا  کہ اچھے وقت میں توسب ہی ساتھ ہوتے ہیں، میں ان تمام لوگوں کا شکریہ ادا کرتا ہوں جنھوں نے بُرے وقت میں مجھے سپورٹ کیا،انھوں نے کہا کہ پاکستان ٹیسٹ چیمپئن شپ میں آگے جا سکتا ہے لیکن جن کھلاڑیوں نے ریٹائرمنٹ لی ان کا متبادل تلاش کرنا ہوگا۔

 لندن:چیئرمین جوائنٹ چیفس آف اسٹاف کمیٹی جنرل زبیرحیات نے کہاہے کہ ہٹلرنے جو جرمنی میں کیا وہ بھارت کشمیر میں کررہاہے جب کہ کلبھوشن یادیوصرف جاسوس نہیں بلکہ ٹیرر ونگ لیڈر تھا۔

لندن میں اوورسیز کمیونٹی کی طرف سے دیے گئے عشائیے سے خطاب میں جنرل زبیرمحمود حیات نے کہا کہ ہٹلر نے جو جرمنی میں کیا وہ بھارت کشمیر میں کر رہا ہے، بی جے پی اورآر ایس ایس نے حد پارکرلی ہے۔

انھوں نے کہاکہ ہندوتوا نے بھارت میں پنجے گاڑ رکھے ہیں، پاکستان کی سرزمین سے گرفتار کیے جانے والاکلبھوشن یادیو صرف جاسوس نہیں بلکہ دہشت گردی ونگ کا لیڈر تھا جو دہشت گردوں کو اسلحہ اور رقم فراہم کرتا تھا۔

پشاور: خیبرپختونخوا میں ڈینگی سے متاثرہ افراد کی تعداد 1189تک جا پہنچی ہے۔

خیبر پختونخوا کے مختلف اضلاع میں ڈینگی وائرس نے وبائی صورت حال اختیار کرلی ہے تاہم انتظامیہ کی جانب سے تمام تر اقدامات کے باوجود اس پر قابو نہیں پایا جاسکا۔

محکمہ صحت خیبر پختونخوا کے جاری کردہ اعداد و شمار کے مطابق گزشتہ 24 گھنٹوں کے دوران 98 نئے ڈینگی کیسز رپورٹ ہوئے ہیں، پشاور میں مزید 55 افراد میں ڈینگی وائرس کی تصدیق ہوئی ہے۔

اس کے علاوہ سوات، شانگلہ اور بٹگرام میں 9،9، مانسہرہ 6 ، صوابی سے 5 جب کہ مردانم لوئردیر اور بونیر میں 4،4 مریضوں میں ڈینگی وائرس کی تصدیق ہوئی ہے۔ اس طرح رواں برس صوبے بھر میں ڈینگی وائرس سے متاثرہ افراد کی تعداد 1189تک جا پہنچی ہے۔

کراچی: کراچی سمیت سندھ کے سرکاری وپرائیویٹ میڈیکل وڈینٹل کالجوں میں سال برائے 2019-20 میں داخلوں کے لیےانٹری ٹیسٹ آج ہوگا۔

انٹری ٹیسٹ نیشنل ٹیسٹنگ سروسزکے تحت کراچی میں این ای ڈی یونیورسٹی میں منعقدکیاجائے گا جبکہ صوبے بھرمیں انٹری ٹیسٹ کےلیے6 مرکزبنائے گئے ہیں ان میں حیدرآباد، نوابشاہ، لاڑکانہ، میرپورخاص  اور سکھر شامل ہیں۔

سابقہ کمیٹی پاکستان میڈیکل اینڈ ڈینٹل کونسل کے نوٹیفکیشن کے مطابق امسال داخلہ ٹیسٹ میں انٹر سائنس میں 70فیصد مارکس حاصل کرنے والے امیدواروں کو انٹری ٹیسٹ میں شرکت کریں گے، اس سے قبل انٹری ٹیسٹ میں60فیصد نمبر حاصل کرنے والے امیدواروں کو شرکت کی اجازت دیدی جاتی تھی تاہم امسال سے70فیصد مارکس حاصل کرنے والے امیدوار آج ہونے والے انٹری ٹیسٹ میں شرکت کرسکیں گے، امسال صوبے سندھ کے میڈیکل کالجوں میں داخلوں کا عمل جامشورو میں واقع لیاقت میڈیکل یونیورسٹی کو ذمہ داری سونپی گئی ہے۔

واضح رہے کہ 9 ستمبر کو پاکستان میڈیکل اینڈ ڈینٹل کونسل کے آرڈیننس کی مدت ختم ہوچکی ہے اب امسال دوبارہ نیا صدراتی ترمیمی آرڈیننس جاری کیاجائیگا جس کے بعد کونسل فعال ہوسکے گی۔

اسلام آباد: پاکستانی باکسر محمد وسیم دبئی میں منعقدہ پروفیشنل باؤٹ میں کامیابی حاصل کرنے کے بعد وطن واپس پہنچے تو شاندار استقبال کے بجائے انہیں ٹیکسی پر روانہ ہونا پڑ گیا۔

محمد وسیم نے دبئی میں منعقدہ پروفیشنل باؤٹ میں فلپائن کے باکسر کو پہلے ہی راؤنڈ میں ناک آؤٹ کرکے کامیابی حاصل کی تھی ۔ انہوں نے اپنی کامیابی مقبوضہ کشمیر کے عوام کے نام کی تھی۔

محمد وسیم کامیابی کے بعد وطن واپس آئے تو اسلام آباد ایئرپورٹ پر ان کے استقبال کے لیےکوئی حکومتی نمائندہ ہی نہیں پہنچا اور محمد وسیم نجی کمپنی کی ٹیکسی سروس پر روانہ ہوگئے۔

کولمبو: انڈر19 ایشیا کپ کے فائنل میں دفاعی چیمپیئن بھارت نے 106 رنز پر ڈھیر ہونے کے باوجود بنگلہ دیش کو سنسنی خیز مقابلے کے بعد 5 رنز سے شکست دے کر چیمپیئن بننے کا اعزاز حاصل کر لیا۔ سری لنکن دارالحکومت کولمبو میں کھیلے گئے فائنل میں باؤلرز کا راج رہا اور ابرآلود موسم میں دونوں ٹیموں کے بلے باز مجموعی طور پر صرف 207رنز بنا سکے۔ بھارت کی ٹیم نے فائنل میچ میں ٹاس جیت کر پہلے بیٹنگ کا فیصلہ کیا جو تباہ کن ثابت ہوا اور صرف 8 رنز پر اس کے تین ابتدائی بلے باز پویلین لوٹ چکے تھے۔ اس موقع پر کپتان دھروو جوریل نے ششوات راوت کے ساتھ مل کر میچ کی سب سے بڑی 45رنز کی شراکت قائم کی لیکن اس شراکت کے اختتام کے ساتھ ہی ایک مرتبہ پھر بھارتی ٹیم کی وکٹیں گرنے کا سلسلہ شروع ہو گیا۔ دھروو 33 اور ششوات 19 رنز بنا کر آؤٹ ہوئے اور ایک موقع پر بھارتی ٹیم 62 رنز پر 7 وکٹیں گنوا چکی تھی لیکن اس مرحلے پر کرن لال ڈٹ گئے۔ انہوں نے 43 گیندوں پر 37 رنز کی جارحانہ اننگز کھیل کر اپنی ٹیم کی سنچری مکمل کرائی لیکن اس کے باوجود بھارتی ٹیم 33ویں اوور میں 106رنز پر ڈھیر ہو گئی۔ بنگلہ دیش کی جانب سے شمیم حسین اور مریتن جوئے چوہدری نے تین، تین وکٹیں لیں۔ بھارتی ٹیم کے 8 کھلاڑی ڈبل فیگر میں بھی داخل نہ ہو سکے۔ ہدف کے تعاقب میں بنگلہ دیشی ٹیم بھی صرف 16رنز پر 4 وکٹیں گنوا بیٹھی جس کے بعد اکبر علی اور شہادت حسین نے مل کر اسکور 40 تک پہنچایا لیکن پھر شہادت حسین کے بعد شمیم حسین بھی پویلین لوٹ گئے۔ مریتن جوئے چوہدری اور کپتان اکبر علی نے 27رنز کی شراکت قائم کر کے اسکور کو 78 تک پہنچایا ہی تھا کہ دونوں بلے باز تین گیندوں کے فرق سے پویلین لوٹ گئے۔ لو اسکورنگ میچ میں تنظیم حسن ساکب اور راکب الحسن نے نویں وکٹ کے لیے 23 رنز جوڑ کر اپنی ٹیم کو فتح کی دہلیز پر پہنچا دیا لیکن انکولیکر نے ایک ہی اوور میں دو وکٹیں لے کر اپنی ٹیم کو فتح سے ہمکنار کراتے ہوئے انڈر19 چیمپیئن بنوا دیا۔ بنگلہ دیش کی پوری ٹیم 101 رنز بنا کر آؤٹ ہو گئی، کپتان اکبر 21 اور کریتن جوئے 21 رنز کے ساتھ سب سے نمایاں بلے باز رہے۔ بھارت کی جانب سے اتھروا انکولیکر نے پانچ وکٹیں لیں اور میچ کے بہترین کھلاڑی کا اعزاز لے اڑے۔

لاس انجلس: دنیا میں اس وقت ایک ارب سے زائد افراد بجلی کی نعمت سے محروم ہیں۔ اسی کے پیشِ نظر ایک نیا نظام بنایا گیا ہے جو رات کے وقت زمین سے خارج ہونے والی حرارت کو بجلی میں بدلتا ہے اور یوں پہلے مرحلے میں اس سے موبائل فون کے علاوہ ایل ای ڈی لائٹس کو روشن رکھنے والی بیٹریاں چارج کی جاسکتی ہیں۔ یہ آلہ رات کے وقت زمین سے خارج ہونے والی گرمی یا حرارت سے بجلی بناتا ہے۔ اسے یونیورسٹی آف کیلی فورنیا لاس اینجلس کے سائنسداں ڈاکٹر آسوتھ رامن نےاور ان کے ساتھیوں نے بنایا ہے۔ اس ٹیکنالوجی میں تھرمو الیکٹرک اثر سے برق پیدا کی جاتی ہے۔ یہ آلہ تھرمو الیکٹرک اثر استعمال کرتے ہوئے بجلی بناتا ہے۔ عین اسی طرح کارخانوں کے بوائلر، حرارتی پلانٹ اور کاروں کے ایگزاسٹ سے نکلنے والی گرمی کو بجلی میں بدلنے والے آلات اب عام استعمال ہو رہے ہیں۔ ڈاکٹر آسوتھ رامن نے جو نیا طریقہ اختیار کیا ہے اسے ریڈی ایٹو اسکائی کولنگ کا نام دیا گیا ہے۔ اس کے لیے پولی اسٹائرین ڈبے پر ایک سیاہ ڈسک رکھی گئی ہے جس کا رخ آسمان کی جانب ہے اور اس میں المونیم سے بنی ایک رکاوٹ یا بلاک رکھا گیا ہے۔ سیاہ ڈسک زمینی حرارت کو ٹھنڈا کرتی ہے اور المونیم بلاک رات کی ٹھنڈی ہوا کو گرم کرتا ہے۔ اس فرق سے تھرمو الیکٹرک فرق بنتا ہے اور اس سے بجلی کی بڑی مقدار بنتی ہے۔ ابتدائی تجربے میں ایک مربع میٹر سے 25 ملی واٹ بجلی بنتی ہے جو ایک ایل ای ڈی روشن کرنے کے لیے کافی ہے لیکن گرم علاقوں میں بجلی کی پیداوار 20 گنا بڑھ سکتی ہے جہاں درجہ حرارت میں بہت فرق پایا جاتا ہے۔ اس طرح ایک ایل ای ڈی بلب یا موبائل فون آسانی سے چارج کیا جاسکتا ہے۔ اس پورے نظام کی قیمت صرف 30 ڈالر ہے اور یہ غریب ممالک کے لیے کسی نعمت سے کم نہیں ہوگا لیکن اب بھی اس کی کمرشل منزل بہت دور ہے۔