ایمز ٹی وی(کراچی ) میئر کراچی وسیم اختر نے کہا ہے کہ کراچی ملک کا سب سے بڑا شہر ہے اور دنیا کے بڑے شہروں میں اس کا شمار ہوتا ہے مگر یہاں آگ بجھانے کا ڈپارٹمنٹ فعال نہیں اوراسے وسائل کی کمی کا سامنا ہے، فائر بریگیڈ کی کارکردگی کو بہتر بنانے کے لئے مزید آلات، گاڑیوں اور فائر ٹینڈرز کی ضرورت ہے، اسلام آباد میں جو لوگ بیٹھے ہیں اور اس ملک کو چلارہے ہیں وہ خود سوچیں کہ ملک کے سب سے بڑے شہر کے فائر ڈپارٹمنٹ کا یہ حال ہے ،

فیکٹری مالکان کو چاہئے کہ وہ خود بھی اپنی ذمہ داری کو محسوس کرتے ہوئے کاغذ یا گتے جیسا حساس سامان ذخیرہ کرتے وقت وہاں شارٹ سرکٹ کے امکان کو ذہن میں رکھیں اور فیکٹری کی تعمیر میں اس بات کا خیال رکھیں کہ حادثات کی صورت میں امدادی کاموں میں کوئی رکاوٹ حائل نہ ہو، حفاظتی اقدامات پہلے سے مکمل کرلئے جائیں تو ایسے حادثات سے محفوظ رہا جاسکتا ہے.

شفیق موڑ نارتھ کراچی پر گتہ فیکٹری میں لگنے والی آگ پر قابو پالیا گیا ہے اگرچہ اس میں کچھ تاخیر ہوئی تاہم یہ کہنا درست نہیں کہ فائر بریگیڈ بہت دیر سے پہنچا یہ بات انہوں نے اتوار اور پیر کی درمیانی شب شفیق موڑ نارتھ کراچی میں گتہ فیکٹری میں لگنے والی آگ بجھانے کے معائنے کے دوران میڈیا کے نمائندوں سے بات چیت کرتے ہوئے کہی۔

اس موقع پر بلدیہ وسطی کراچی کے چیئرمین ریحان ہاشمی ، چیف فائر آفیسر تحسین صدیقی اور دیگر افسران و منتخب نمائندے بھی موجود تھے،میئر کراچی نے کہا کہ کراچی ملک کا سب سے بڑا شہر ہے دو بندرگاہیں یہاں ہیں مگر کسی کو بھی فرصت نہیں کہ کراچی پر توجہ دیں۔ ہم نے شہر کے مسائل کے لئے ہرسطح پر آواز اٹھائی ہے اپنی کونسل میں بھی احتجاج کر رہے ہیں،سندھ گورنمنٹ تک ہمارا پیغام جا رہا ہے اگر ضرورت پڑی تو کراچی کے مسائل پر عوام کے ساتھ مل کر احتجاج کریں گے

ایمز ٹی وی (اسلام آباد)احتساب عدالت میں نوازشریف کے خلاف نیب ریفرنسز میں فرد جرم عائد کرنے کے لیے 2 اکتوبر کی تاریخ مقرر کر دی گئی ہے جبکہ حسن، حسین، مریم نواز اور کیپٹن صفدر کے قابل ضمانت وارنٹ جاری کر دیے گئے۔ آج احتساب عدالت میں ریفرنس 18 ، 19 اور 20 کی کاپیانواز شریف کے وکیل خواجہ حارث کو فراہم کردی گئیں۔خواجہ حارث نےنوازشریف کی عدالت میں حاضری سےاستثنیٰ کی درخواست دی جس کی نیب نے مخالفت کر دی۔ نواز شریف کی عدالت میں حاضری سے استثنیٰ کی درخواست پر عدالت نے کہا کہ اس پر فیصلہ فردجرم عائد ہونے کے بعد کیا جائے گا۔ نیب کے پراسیکیوٹر سردار مظفر عباس نے عدالت میں شکایت کی کہ آج اسلام آباد پولیس نے ہمیں نیب عدالتوں میں پیش ہونے سے جگہ جگہ پرروکا۔ جاتی امرا پر سیکیورٹی اہلکار نے حسن، حسین نواز کے سمن لینے سے انکار کر دیا۔ جج محمد بشیر نے نیب پراسیکیوٹر کو تحریری درخواست دینے کی ہدایت کی ۔

پراسیکیوٹر نیب نے کہا کہ پاکستانی سفارتخانےکےسیکنڈسیکرٹری نےحسن نوازکوسمن وصول کروائے،حسن نواز شریف فیملی کے عاقل بالغ رکن ہیں۔سیکیورٹی اہلکارنےکہاکہ حسن،حسین نوازبیرون ملک رہتےہیں سمن وہاں بھیجیں،حسن نواز سمن وصول کرنےکےبعدحاضر نہیں ہوئے، یہ توہین عدالت ہے۔ احتساب عدالت نے مزید سماعت 2اکتوبر تک ملتوی کردی۔ اس سے قبل سابق وزیر اعظم نواز شریف ایون فیلڈ پراپرٹیز، العزیزیہ اسٹیل ملز جدہ اور آف شور کمپنیوں کی ملکیت سے متعلق فلیگ شپ انوسٹمنٹ ریفرنس میں احتساب عدالت میں پیش ہوئے، تاہم عدالت نے انہیں مختصر پیشی کے بعد جانے کی اجازت دے دی۔ نواز شریف کی پیشی کے موقع پر جوڈیشل کمپلیکس کے اطراف سیکورٹی کے سخت انتظامات کیے گئےتھے، رینجرز اور حساس اداروں کے اہلکاروں کی بڑی تعداد تعینات تھی۔ نواز شریف کے وکیل خواجہ حارث نے 3ریفرنسز میں وکالت نامے جمع کرائے، جن پرنواز شریف نے عدالت کے روبرو دستخط کیے۔

ن لیگ کے رہنما آصف کرمانی نے عدالت کو بتایا کہ والدہ کی تیماری داری کے باعث بچے نہیں آسکے، عدالت نےنواز شریف کومطلع کرنےکی جو ذمے داری لگائی تھی وہ پوری کردی۔مریم نواز،کیپٹن(ر)صفدر،حسن اورحسین اپنی والدہ کی تیمارداری کررہے ہیں۔ اس پر عدالت نے ریمارکس دیے کہ یہ وکلابتائیں گے آپ رہنے دیں۔