ایمزٹی وی (اسپورٹس) نجم سیٹھی کا انتخاب تقریباً یقینی ہو چکا، گزشتہ روز نئے گورننگ بورڈ ارکان کے نام ارسال کرنے کیلیے ڈپارٹمنٹس کو خطوط بھیج دیے گئے، شہریارخان8 تاریخ کو ذمہ داریوں سے سبکدوش ہو جائینگے، اس کے بعد الیکشن کمشنر افضال حیدر قائم مقام چیرمین بنیں گے، انہیں ایک ماہ میں انتخابات کرانے ہیں مگر ذرائع کے مطابق وہ اگلے روز ہی خصوصی اجلاس طلب کر کے ایسا کرینگے
گورننگ بورڈ میں نجم سیٹھی اور عارف اعجاز کی تقرری کیخلاف 10اگست کو ایک کیس کی اسلام آباد ہائی کورٹ میں ابتدائی سماعت بھی ہونی ہے، بعض حلقے اس عجلت کی وجہ اسی کو قرار دے رہے ہیں، دلچسپ بات یہ ہے کہ فاٹا ریجن میں ایڈہاک لگی ہوئی ہے،اگر وہاں الیکشن یا ڈپارٹمنٹل گورننگ بورڈ ارکان کے نام آنے میں تاخیر ہوئی تو پھر چیرمین کا انتخاب مؤخر بھی کرنا پڑ سکتا ہے۔ چیرمین پاکستان کرکٹ بورڈ شہریارخان کے 3سالہ عہدے کی میعاد 8 اگست کو مکمل ہو رہی ہے
ان کی جگہ سنبھالنے کیلیے ایگزیکٹیو کمیٹی کے سربراہ نجم سیٹھی مضبوط امیدوار ہیں، انہیں چند روز قبل سابق وزیر اعظم اور پی سی بی کے سرپرست اعلیٰ نواز شریف نے دوبارہ گورننگ بورڈ میں نامزد کیا تھا، ان کے ساتھ اس بار عارف اعجاز کو شامل کیا گیا، گزشتہ بار شہریارخان کا نام آیا تھا، حال ہی میں جسٹس (ر) افضال حیدرکو الیکشن کمشنر مقرر کیا گیا جنہوں نے پی سی بی کے دفاتر میں اپنی ذمہ داریاں بھی سنبھال لی ہیں۔
ایمزٹی وی (اسپورٹس) بنگلادیش کے سابق کپتان خالد محمود دماغ کی رگ پھٹنے سے کومے میں چلے گئے تاہم انھیں فوری طور پرعلاج کیلیے سنگاپور منتقل کیا جا رہا ہے۔ اتوار کی شام کو اسٹروک کی وجہ سے انھیں ڈھاکا کے ایک اسپتال میں انتہائی نگہداشت کے یونٹ منتقل کیا گیا، مگر فیملی نے انھیں سنگاپور منتقل کرنے کا فیصلہ کیا، جس کیلیے آخری اطلاعات آنے تک انتظامات مکمل کرلیے گئے تھے۔ واضح رہے کہ خالد محمود بورڈ ڈائریکٹر ہونے کے ساتھ ٹیم منیجر بھی ہیں
محمود بنگلادیش کے تیسرے ٹیسٹ کپتان ہیں، ان کی قیادت میں 2003 میں بنگال ٹائیگرز نے 9 ٹیسٹ اور 15 ون ڈے میچز کھیلے، وہ 2006 میں کرکٹ سے ریٹائر ہوئے اور فوراً ہی کوچنگ اور ایڈمنسٹریشن سے منسلک ہوگئے تھے۔
ایمزٹی وی (اسپورٹس) ایک طرف انٹرنیشنل کرکٹ کونسل کھیل کو اولمپکس کا حصہ بنانے کیلیے کوشاں ہے تو دوسری جانب بھارتی بورڈ نے اس میں بھی روڑے اٹکانے شروع کردیے ہیں، 2024 کے اولمپک گیمز میں کرکٹ کو شامل کرانے کیلیے ستمبر تک لازمی بڈ دینا ہوگی مگر بھارتی بورڈ باربار کی یاددہانیوں کے باوجود اس بارے میں کوئی بھی فیصلہ نہیں کررہا۔
انٹرنیشنل اولمپک کمیٹی کی جانب سے یہ واضح شرط موجود ہے کہ کسی بھی کھیل کی گیمز میں شمولیت کیلیے بڈ دینے کیلیے ایونٹ میں تمام بڑی ٹیموں اور اس کے ٹاپ پلیئرز کی شمولیت کی یقین دہانی ضروری ہے، اسی لیے بھارتی حمایت حاصل کیے بغیر آئی سی سی کوئی قدم نہیں اٹھا سکتا،نہ صرف بھارتی ٹیم کی پرفارمنس شاندار بلکہ وہ اس کھیل کی سب سے بڑی مارکیٹ بھی ہے۔
بی سی سی آئی کی جانب سے کرکٹ کو اولمپکس کا حصہ بنانے میں عدم دلچسپی ہے ایک ممبر کا یہ بھی کہنا تھا کہ پہلے ہی آئی سی سی نے ہمیں ریونیو میں حصہ کم دیا، اب ہم ان کو کوئی بھی فیصلہ خود پر مسلط نہیں کرنے دیں گے، اس بارے میں خود ہی سوچ بچار کرکے جلد ہی حتمی فیصلہ کیا جائے گا۔
ایمزٹی وی (اسپورٹس) انگلینڈ کے کھلاڑی معین علی نے ہیٹ ٹرک مکمل کرلی وہ اوول میں پہلی بار اور 79 برس بعد کارنامہ انجام دینے والے پہلے انگلش اسپنر بنے ہیں۔ انگلش اسپنر معین علی نے اوول میں منعقدہ 100ویں ٹیسٹ کو اپنی شاندار بولنگ سے یادگار بنالیا، وہ اس گراؤنڈ پر ٹیسٹ کرکٹ کی تاریخ میں پہلی ہیٹ ٹرک بنانیو الے بولر بھی بنے ہیں۔
ایمزٹی وی (اسپورٹس) پرتگال کے مایہ ناز فٹ بالرکرسٹیانو رونالڈو بھی ٹیکس چوری کے الزام میں اسپین کی عدالت کے روبرو پیش ہوئے، ان پرایک کروڑ47 لاکھ یورو ٹیکس بچانے کا الزام ہے۔ میڈیا نمائندے اس خبر کی کوریج کے لیے عدالت کے باہرتھے اورامید کی جا رہی تھی کہ اسٹار فٹ بالرپیشی کے بعد میڈِیا سے بات کریں گے لیکن انہوں نے میڈیا سے بات نہ کی۔ امیرترین فٹ بالررونالڈو نے اپنے اوپر لگے الزامات کی تردید کی ہے جبکہ استغاثہ کا الزام ہے کہ رونالڈو نے 2010 سے ایک کروڑ 47 لاکھ یورو ٹیکس بچایا ہے۔
اس سے قبل ارجنٹیا کے لیونل میسی کو بھی ٹیکس چوری کے الزامات کا سامنا تھا جب کہ جرم ثابت ہونے پر انھیں 21 ماہ قید کی سزا سنائی گئی تھی تاہم رواں ماہ کے آغاز میں عدالت نے ان کی جیل کی سزا 252000 یورو ادائیگی کے بدلے ختم کردی تھی۔
