ایمزٹی وی (اسلام آباد)پارلیمنٹ ہاؤس کے باہر مسلم لیگ (ن) کے کارکنوں نے عوامی مسلم لیگ کے سربراہ شیخ رشید پر حملے کی کوشش کی جسے سیکیورٹی عملے نے ناکام بنادیا۔
میڈیا ذرائع کے مطابق پارلیمنٹ ہاؤس کے باہر مسلم لیگ (ن) کے کارکنوں کی بڑی تعداد نے عوامی مسلم لیگ کے سربراہ شیخ رشید پر حملے کی کوشش کی تاہم سیکیورٹی پر مامور اہلکاروں نے شیخ رشید کو اپنے حصار میں لے کر انہیں بحفاظت گاڑی میں بٹھادیا۔ اس دوران (ن)لیگ کے کارکن شیخ رشید اور چیرمین تحریک انصاف عمران خان کے خلاف نعرے بازی بھی کرتے رہے۔
اس سے قبل اسمبلی میں اظہارخیال کرتے ہوئے شیخ رشید نے مریم نواز کا نام لے کر کچھ کہنا چاہا تو عابد شیر علی اور کیپٹن صفدر نے سخت احتجاج کیا، مریم نواز کے شوہر کیپٹن صفدر کا کہنا تھا کہ ہماری خواتین کا نام نہ لیں جس پر شیخ رشید نے کہا کہ میں نے مریم بی بی کہا ہے وہ میری بیٹیوں جیسی ہیں جب کہ اگر میں مارا گیا تو قتل کے مجرم نواز شریف، شہباز شریف اور ان کا خاندان ہو گا جب کہ نومنتخب وزیراعظم کے خلاف بات کرنے پر پی ٹی وی نے شیخ رشید کی تقریر روک دی۔
دوسری جانب ایکسپریس نیوز سے خصوصی بات کرتے ہوئے شیخ رشید کا کہنا تھا کہ (ن) لیگ نے مجھ پر حملہ کرنے کے لیے غنڈوں کو بلایا ہوا تھا اور انہوں نے مجھے گالیاں بھی دیں جب کہ سارا شریف خاندان جیل جائے گا۔
ایمزٹی وی (سرینگر)مقبوضہ کشمیر میں بھارتی فوج نے درندگی کا مظاہرہ کرتے ہوئے 3 نوجوانوں کو شہید کردیا۔
کشمیر میڈیا سروس کے مطابق بھارتی فوج نے ضلع پلوامہ کے علاقے ہاکری پورا میں کیمیائی مواد کا استعمال کرتے ہوئے دو گھروں کو تباہ کردیا جس کے نتیجے میں وہاں سے دو کشمیری نوجوانوں کی سوختہ لاشیں ملیں۔
بھارت کی ریاستی دہشت گردی کے خلاف احتجاج کرتے ہوئے بڑی تعداد میں کشمیری عوام گھروں سے نکل آئے، لیکن قابض فوج نے نہتے مظاہرین پر گولی چلادی جس کے نتیجے میں ایک کشمیری شہید اور 15 زخمی ہوگئے۔ شہید نوجوان کی شناخت فردوس احمد خان کے نام سے ہوئی جن کے سینے میں گولی لگی۔
دوسری جانب بھارتی فوج نے دعویٰ کیا کہ ہاکری پورا میں شہید نوجوانوں کا تعلق لشکر طیبہ سے تھا جن میں اعلیٰ کمانڈر ابو دجانہ بھی شامل تھے۔ بھارتی میڈیا کے مطابق ابودجانہ بھارتی فوج پر درجنوں حملوں میں مطلوب تھے جن کے سر پر 15 لاکھ روپے انعام تھا، وہ اپنی اہلیہ سے ملنے ہاکری پورا گاؤں گئے تھے کہ مخبری پر فوج نے گھیراؤ کرلیا جس کے دوران دو طرفہ جھڑپ ہوئی تاہم فوج نے دونوں نوجوانوں پر قابو پانے میں ناکامی پر اس گھر کو ہی کیمیائی مواد سے اڑادیا جس میں وہ موجود تھے، شہید ہونے والے دوسرے نوجوان کا نام عارف للہاری تھا۔ بھارتی انتظامیہ نے واقعے کے خلاف احتجاج کرنے والے کشمیریوں پر فائرنگ سے ایک نوجوان کی شہادت کا اعتراف بھی کرلیا۔
تینوں نوجوانوں کی شہادت کی خبر جیسے ہی دارالحکومت سری نگر پہنچی تو اسکولوں کے طلبہ کلاسوں کا بائیکاٹ کرکے سڑکوں پر نکل آئے اور بھارتی فوج و پولیس پر پتھراؤ کیا جس کے نتیجے میں افواج اور مظاہرین میں شدید جھڑپیں ہوئیں۔ بھارتی دہشت گردی کے خلاف کپواڑہ میں ہڑتال ہوگئی اور تمام دکانیں و دفاتر بند ہوگئے۔ کٹھ پتلی حکومت نے وادی بھر میں انٹرنیٹ کی سروس بھی معطل کردی۔
ادھر کشمیر میڈیا سروس کی رپورٹ کے مطابق جولائی میں بھارتی فوجی مظالم کے نتیجے میں 2 بچوں اور ایک خاتون سمیت 33 کشمیریوں نے جام شہادت نوش کیا۔
ایمزٹی وی(اسلام آباد) ایم کیو ایم پاکستان نے وزیر اعظم کے لیے مسلم لیگ (ن) کے نامزد امیدوار شاہد خاقان عباسی کوووٹ دیا۔
پارلیمنٹ ہاؤس اسلام آباد میں شاہد خاقان عباسی، خواجہ سعد رفیق اورگورنر سندھ محمد زبیر نے ایم کیو ایم کے رہنماؤں سے ملاقات کی اور ان سے حمایت کی اپیل کی، ملاقات کے دوران ایم کیو ایم پاکستان نے مسلم لیگ (ن) سے کراچی میں سیاسی جگہ دینے اور نوازشریف کا اعلان کردہ کراچی پیکیج پربھی عملدرآمد کا مطالبہ کیا، مسلم لیگ (ن) کے رہنماؤں نے ایم کیو ایم کے رہنماؤں کو پارٹی قیادت سے مشاورت کے بعد ان کے مطالبات پرعمل کرنے کی یقین دہانی کرائی۔
ملاقات کے بعد میڈیا سے مشترکہ بات کرتے ہوئے شاہد خاقان عباسی نے کہا کہ وہ فاروق ستار، وسیم اختر، عامر خان کے مشکور ہیں، کراچی مشکل میں ہوگا تو پاکستان مشکل میں ہوگا، جو فیصلہ پاکستان اور کراچی کے حق میں ہوگا وہی بہتر ہوگا۔ سندھ کی مشکلات کو دور کیا جائے گا۔
اس موقع پر فاروق ستار نے کہا کہ کوئی بھی وزیراعظم بنے گا اسے سندھ کی صورتحال دیکھنا ہوگی ،سندھ میں کرپشن اور لوٹ مار کا بازار گرم ہے، زمینوں کی بندر بانٹ کے نئے نئے ریکارڈ بنائے جارہے ہیں، ہمارے سیاسی جماعتوں سے تعلقات ہیں، ہمیں ہر علاقے کے مینڈینٹ کا احترام کرنا ہوگا لیکن ہم اور ہمارے حلقے عدم توجہ کا شکار رہے، یہ صرف ہمارے نہیں پورے ملک کے مسائل ہیں، کراچی منی پاکستان ہے،پورے ملک سے لوگ کراچی میں آرہے ہیں، 9 سال سے کراچی کو اضافی پانی نہیں دیا جارہا۔ملک کو 70 فیصد ریونیو دینے والے شہر کا بھی کوئی والی وارث ہونا چاہئے۔
ایم کیو ایم پاکستان کے سربراہ کا کہنا تھا کہ محمد زبیر کے گورنر بننے کے بعد سے کراچی کے مسائل پر توجہ دی جارہی ہے لیکن وفاق کی جانب سے ساڑھے 12 ارب کا اعلان کافی نہیں، بلدیاتی اداروں کو اختیار ملیں گے تو عوامی مسائل حل ہوں گے۔ ہم شاہد خاقان کو دعا بھی دے رہے ہیں اور دوا بھی دیں گے تاکہ وہ تگڑے ہوجائیں۔
مسلم لیگ (ن) کے رہنما خواجہ سعد رفیق نے کہا کہ نواز شریف اور مسلم لیگ (ن) کی خواہش ہے کہ ایم کیو ایم کے ساتھ تعلق کو آگے بڑھایاجائے، ہمارا ساتھ چلنے کا وعدہ صرف ووٹ لینے تک محدود نہیں، ہم اردو بولنے والی کمیونٹی کی محرومیوں کو دور کریں گے۔
ایمزٹی وی (اسلام آباد)نواز شریف کی نااہلی کے بعد مسلم لیگ (ن) نے نئے وزیر اعظم کے لیے شاہد خاقان عباسی کو نامزد کیا تھا ،ان کے مدمقابل پیپلز پارٹی کے امیدوار نوید قمر، پی ٹی آئی، عوامی مسلم لیگ اور مسلم لیگ (ق) کے شیخ رشید اور جماعت اسلامی کے صاحبزادہ طارق اللہ تھے۔ قومی اسمبلی میں ووٹنگ کے دوران 342 ارکان کے ایوان میں شاہد خاقان عباسی 221 ووٹ لے کر قائد ایوان منتخب ہوگئے ہیں جب کہ نوید قمر کو 47 ، شیخ رشید کو 33، اور طارق اللہ کو 4 ووٹ ملے۔
قائد ایوان منتخب ہونے والے شاہد خاقان عباسی کو مسلم لیگ (ن) کے علاوہ ایم کیو ایم، جے یو آئی (ف)، نیشنل پارٹی، پشتون خوا ملی عوامی پارٹی اور مسلم لیگ ضیا کے ارکان نے بھی ووٹ دیئے۔
قائد ایوان منتخب ہونے کے بعد قومی اسمبلی میں اظہار خیال کرتے ہوئے شاہد خاقان عباسی نے کہا کہ وزارت عظمیٰ سیاست کی معراج سمجھی جاتی ہے، جمہوریت کا عمل آج دوبارہ پٹڑی پر چل پڑا ہے، مسلم لیگ (ن)، حلیف جماعتوں اور عوام کے وزیر اعظم نواز شریف کا مشکور ہوں،ا س کے علاوہ ہمیں گالی گلوچ میں یادرکھنے والے عمران خان کا بھی مشکور ہوں، سپریم کورٹ کا فیصلہ ہم نے من و عن قبول کیا ہے لیکن پاکستان کے عوام نے اسے قبول نہیں کیا۔ ابھی ایک اور عدالت بھی لگے جو اس عدالت سے بڑی ہوگی اور وہاں کوئی جے آئی ٹی نہیں ہوگی۔
نو منتخب وزیر اعظم نے کہا کہ 30 سال سے پارٹی کے ساتھ ہوں نوازشریف نے کبھی کرپشن نہیں کی، پنڈی سے الیکشن لڑنے والے شیخ رشید بھی نواز شریف کے حق میں گواہی دیں گے، نوازشریف نے ملک کو ایٹمی ملک بنایا یہ اس کی غلطی ہے۔
واضح رہے کہ نواز شریف کی نااہلی کے بعد شہباز شریف کو وزیر اعظم بنانے کا فیصلہ کیا گیا ہے لیکن وہ اس وقت رکن قومی اسمبلی نہیں ۔ اس لیے ان کے رکن قومی اسمبلی منتخب ہونے تک شاہد خاقان عباسی کو عارضی طور پر وزارت عظمیٰ سونپی گئی ہے۔
ایمزٹی وی (صحت)ینگ ڈاکٹرز اپنے مطالبات کے حق میں مظاہرہ کرتے ہوئے پھر سڑکوں پر آگئے ،مظاہرین نے جی او آر ون میں داخلے کی کوشش کی تو پولیس سے تصادم ہو گیا اور پولیس اہلکاروں کی جانب سے واٹر گنوں کا استعمال کرتے ہوئے ڈاکٹرز کو پیچھے دھکیل دیدیا گیا اس کے علاوہ مظاہرین پر آنسوگیس کی شیلنگ بھی کی گئی جس سے ڈاکٹرز پیچھے ہٹنے پر مجبور ہو گئے ،بعض کی حالت خراب ہو گئی جس پر انہیں طبی امداد بھی دی جا رہی ہے ۔
واضح رہے کہ مظاہرین سیکرٹری ہیلتھ کی برطرفی کا مطالبہ کر رہے تھے ۔
ایمزٹی وی(اسلام آبد) پاکستان تحریک انصاف کی رکن قومی اسمبلی (ایم این اے) عائشہ گلالئی نے تحریک انصاف چھوڑنے کا اعلان کرتے ہوئے کہا ہے کہ پارٹی میں خواتین کی عزت نہیں ہے اور ہماری ساتھی خواتین کی عزتیں محفوظ نہیں ہیں، دو نمبر خود کو پٹھان کہتا ہے۔
میڈیا سے گفتگو کرتے ہوئے عائشہ گلالئی نے کہا کہ وہ بڑے افسوس کے ساتھ تحریک انصاف چھوڑنے کا اعلان کر رہی ہیں کیونکہ پارٹی میں خواتین کی عزت نہیں اور ساتھی خواتین کی عزتیں محفوظ نہیں ہیں۔ عمران خان کی وجہ سے ہمارے پاکستان کی مائیں اور بچوں کی عزتیں محفوظ نہیں ہیں ، دو نمبر خود کو پٹھان کہتا ہے۔ میں کافی عرصے سے اس چیز کو برداشت کر رہی تھی لیکن اب مزید برداشت نہیں کر سکتی تھی۔
انہوں نے کہا کہ پارٹی کے ورکرز کو چھوٹا کہا جاتا ہے اور ان کی عزت نہیں کی جاتی ، شیطان کو جب آدم علیہ اسلام کو سجدہ کرنے کا حکم دیا گیا تو اس نے انکار کر دیا اور کہا کہ میں آگ اور آدم علیہ اسلام مٹی سے بنے ہیں، تو غرور شیطان نے بھی کیا تھا۔ انہوں نے مزید کہا کہ اگر آرٹیکل 62 اور 63 کی وجہ سے ملک کا سربراہ چلا گیا ہے تو یہ آرٹیکل اخلاقی کرپٹ انسان پر بھی لاگو ہونا چاہئے۔
ایک سوال کے جواب میں عائشہ گلالئی نے پریس کانفرنس کرنے کا اعلان بھی کیا اور کہا کہ وہ اس میں تفصیل کے ساتھ تمام چیزیں بتائیں گی۔ اگلی منزل سے متعلق سوال کے جواب میں انہوں نے کہا کہ وہ قومی اسمبلی کی نشست نہیں چھوڑ رہیں کیونکہ یہ عوام کی امانت ہے اور وہ عوام کے مسائل اٹھاتی رہیں گی جبکہ انہوں نے ابھی کسی بھی دوسری پارٹی میں جانے سے متعلق کوئی فیصلہ نہیں کیا۔
ایمزٹی وی (انٹرٹینمنٹ)بھارتی اداکارہ اسکارلیٹ ولسن نے گانے کی شوٹنگ کے دوران بدتمیزی کرنے پر ساتھی اداکار کو تھپڑ ماردیا۔
بھارتی میڈیا کے مطابق برطانوی نژاد ماڈل و اداکارہ اسکارلیٹ ولسن نے گانے کی شوٹنگ کے دوران ساتھی اداکار کو تھپڑ ماردیا، اداکارہ اپنی نئی آنے والی فلم میں آئٹم سانگ کی شوٹنگ میں مصروف تھیں کہ اسی دوران ساتھی اداکار امکانت رائے نے اداکارہ کے ساتھ بدتمیزی کی اور ان کے بالوں کو ہاتھ لگایا جس پر اداکارہ نے تھپڑ ماردیا۔
بھارتی میڈیا کے مطابق واقعہ کے بعد اداکار کو ناصرف فلم کے سیٹ سے باہر نکال دیا گیا بلکہ فلم کی شوٹنگ بھی روک دی گئی جب کہ فلم پروڈیوسرکا کہنا ہے کہ وہ معاملے کو بھارتی فلم فیڈریشن مین بھی لے جائیں گے۔
واضح رہے کہ اسکارلیٹ ولسن بہو بلی سمیت متعدد فلموں میں اداکاری کے جوہر دکھاچکی ہیں جب کہ اداکارہ اپنی آئندہ فلم میں اکشے کمار کے ساتھ نظر آئیں گی۔
ایمزٹی وی (اسلام آباد)پاکستان تحریک انصاف کے ترجمان فواد چوہدری نے کہا ہے کہ اگر عائشہ گلالئی پارٹی چھوڑنا چاہتی ہیں تو پہلے انہیں اسمبلی کی رکنیت سے مستعفی ہونا چاہیے۔
عائشہ گلالئی کے پارٹی چھوڑنے کے معاملے پر میڈیا سے گفتگو کرتے ہوئے فواد چوہدری کا کہنا تھا کہ عائشہ گلالئی کا یہ الزام غلط ہے کہ پارٹی میں خواتین کا احترام نہیں کیا جاتا کیونکہ ہزاروں خواتین روزانہ پی ٹی آئی جوائن کر رہی ہیں اور جلسوں میں بھی خواتین کی بڑی تعداد شامل ہوتی ہے جبکہ وہ خود بھی اسلام آباد کے جلسے میں موجود تھیں، راتوں رات کیا ہوا ؟ یہ تو پوچھنا پڑے گا۔
انہوں نے کہا کہ عائشہ گلالئی ووٹ لے کر منتخب نہیں ہوئیں بلکہ پی ٹی آئی کی مخصوص نشست پر اسمبلی میں آئی ہیں اس لیے اگر انہیں پارٹی چھوڑنی ہے تو پہلے اسمبلی کی نشست چھوڑیں۔واضح رہے کہ عائشہ گلالئی نے کہا ہے کہ وہ پارٹی تو چھوڑدیں گی لیکن اسمبلی کی رکنیت نہیں چھوڑیں گی۔
ایمزٹی وی (تجارت)نواز شریف کی نا اہلی کے اثرات کے باعث ڈالر کی قیمت میں اضافہ ہوا ہے اور یہ 108 روپے 65 پیسے کا ہوگیا ہے۔ تفصیلات کے مطابق سابق وزیر اعظم نواز شریف کی نا اہلی کے بعد اسٹاک مارکیٹ پر تو کچھ خاص اثر نہیں پڑا تاہم اس کے ڈالر پر اثرات دیکھے جا سکتے ہیں۔ اوپن مارکیٹ میں ڈالر 108 روپے 65 پیسے میں فروخت کیا جا رہا ہے جبکہ اس کی قیمت خرید 108 روپے 10 پیسے پر آگئی ہے۔ نواز شریف کی نا اہلی کے روز ڈالر کی قیمت فروخت 107 روپے 65 پیسے تھی جبکہ اس کی قیمت خرید 107 روپے 10 پیسے تھی۔
ایمز ٹی وی (اسلام آباد) ایم کیو ایم پاکستان نے وزیر اعظم کے لیے مسلم لیگ (ن) کے نامزد امیدوار شاہد خاقان عباسی کی حمایت کا اعلان کردیا ہے۔ پارلیمنٹ ہاؤس اسلام آباد میں شاہد خاقان عباسی، خواجہ سعد رفیق اورگورنر سندھ محمد زبیر نے ایم کیو ایم کے رہنماؤں سے ملاقات کی اور ان سے حمایت کی اپیل کی، ملاقات کے دوران ایم کیو ایم پاکستان نے مسلم لیگ (ن) سے کراچی میں سیاسی جگہ دینے اور نوازشریف کا اعلان کردہ کراچی پیکیج پربھی عملدرآمد کا مطالبہ کردیا،
مسلم لیگ (ن) کے رہنماؤں نے ایم کیو ایم کے رہنماؤں کو پارٹی قیادت سے مشاورت کے بعد ان کے مطالبات پرعمل کرنے کی یقین دہانی کرائی۔ ملاقات کے بعد میڈیا سے مشترکہ بات کرتے ہوئے شاہد خاقان عباسی نے کہا کہ وہ فاروق ستار، وسیم اختر، عامر خان کے مشکور ہیں، کراچی مشکل میں ہوگا تو پاکستان مشکل میں ہوگا، جو فیصلہ پاکستان اور کراچی کے حق میں ہوگا وہی بہتر ہوگا۔ سندھ کی مشکلات کو دور کیا جائے گا۔