ایمز ٹی وی(اسپورٹس) سابق کپتان جاوید میانداد کا کہنا ہے کہ نئے کھلاڑیوں کے ٹیلنٹ کا درست انداز میں فائدہ اٹھانا چاہیے، سرفراز احمد کو ٹیسٹ ٹیم کی قیادت بھی سونپ دی جائے۔ سابق کپتان جاوید میانداد نے ویسٹ انڈیز کیخلاف ٹی ٹوئنٹی20 اور ون ڈے سیریز میں کارکردگی سے متاثر کرنے والے نوجوان کھلاڑیوں کو سراہا ہے، انھوں نے کہاکہ ان میں بڑا ٹیلنٹ موجود لیکن اسے مناسب طریقے سے کارآمد بنانے کی ضرورت ہے، کیریبیئن ٹیم ماضی جیسی مضبوط نہیں،اس میں کئی نئے کھلاڑی اپنی جگہ بنانے کیلیے فکر مند ہیں، پاکستان سیریز ہار جاتا تو بڑی مایوسی کی بات ہوتی۔ جاوید میانداد کا کہنا تھا کہ سرفرازاحمد نے اچھی قیادت کرتے ہوئے بطور کپتان پہلا معرکہ سر کرلیا،وہ ایک قابل بھروسہ کرکٹرہیں، تینوں فارمیٹ میں اپنی جگہ بھی بنا چکے، ون ڈے اورٹی ٹوئنٹی 20میں قائدانہ صلاحیتیں ثابت کر دیں، مصباح الحق کی رخصتی کے بعد ٹیسٹ ٹیم کی قیادت کیلیے بھی سرفراز سے زیادہ موزوں امیدوار کوئی نہیں ہے۔ دوسری جانب سابق ٹیسٹ کرکٹر عبدالقادر نے کہا کہ سرفراز احمد ایک فائٹر کھلاڑی ہیں، تمام کھلاڑی ان کی قیادت میں متحد نظر آتے ہیں،وکٹ کیپر بیٹسمین کو ٹیسٹ ٹیم کا کپتان بھی بنا دینا چاہیے،ان کو تینوں فارمیٹ کی قیادت سپرد کرنے سے ٹیم میں گروپ بندی کے خدشات بھی کم کرنے میں مدد ملے گی۔ یاد رہے کہ اس سے قبل بھی کئی سابق اسٹارز سرفراز احمد کو ٹیسٹ کپتان بنانے کی حمایت کرچکے جبکہ بعض کا کہنا ہے کہ اضافی بوجھ سے ان کی کارکردگی متاثر ہوسکتی ہے۔

ایمزٹی وی(نئی دہلی)راجیہ سبھا کی رکن اور بالی ووڈ کی اداکارہ جیا بچن نے گائے کی بجائے خواتین کو تحفظ دینے کا مطالبہ کردیا ۔ بھارتی میڈ یا رپورٹس کے مطابق راجیہ سبھا کی رکن جیا بچن نے پارلیمنٹ میں خطاب کے دوران خواتین کو تحفظ دینے کا مطالبہ کردیا ۔ان کا کہنا تھا کہ ہم گائے کی حفاظت کے لیے تو بڑے بڑے اقدامات اٹھا رہے ہیں لیکن خواتین پر مظالم میں دن بدن اضافہ ہوتا جا رہا ہے لہذا ان کے تحفظ کے لیے بڑے اقدام اٹھانے کی ضرورت ہے ۔واضح رہے کہ جیا بچن نے وزیر اعلیٰ مغربی بنگال ممتا بینرجی کے حق میں آواز اٹھائی ہے جن کے سر کی قیمت بی جے پی کے رہنماﺅں کی جانب سے رکھی گئی ۔

ایمزٹی وی(مانیٹرنگ ڈیسک) فیس بک میسنجر کو بظاہر کچھ زیادہ پسند نہں کیا جاتا مگر اسے ناپسند کرنے والے بھی اس ایپ کو استعمال ضرور کرتے ہیں۔ اور یہی وجہ ہے کہ اسے ماہانہ استعمال کرنے والوں کی تعداد 1.2 ارب سے زائد ہوگئی ہے اور اس طرح یہ واٹس ایپ کے برابر آگئی ہے۔ آسان الفاظ میں کہا جائے تو یہ غلط نہیں ہوگا کہ میسنجر نے واٹس ایپ سے دنیا کی مقبول ترین میسجنگ ایپ کا اعزاز چھین لیا ہے تاہم یہ بھی حقیقت ہے کہ دونوں ایپس فیس بک کی ہی ملکیت ہے تو کسی کا بھی آگے یا پیچھے ہونا اسی کو فائدہ پہنچاتا ہے۔ واضح رہے کہ واٹس ایپ صارفین کی تعداد بھی لگ بھگ اتنی ہی ہے۔ فیس بک نے منگل کو میسنجر استعمال کرنے والوں کی تعداد کا اعلان کیا جو کہ گزشتہ سال جولائی میں ایک ارب تھی۔ فیس بک میسنجر کے استعمال کرنے والی تعداد میں اچانک اتنے اضافے کی وجہ اس کی میسنجر لائٹ ایپ ہے جو کہ گزشتہ سال خزاں میں متعارف کرائی گئی تھی۔ یہ ایپ پرانے فونز اور سست انٹرنیٹ کنکشن پر تیز رفتاری سے کام کرتی ہے۔ اسی طرح گزشتہ چند ماہ کے دوران اس ایپ میں فیس بک ری ایکشنز، مینشنز، رئیل ٹائم لوکیشن شیئرنگ، ڈیجیٹل اسسٹنٹ ایم کی سفارشات اور اسنیپ چیٹ کی اسٹوریز کی نقل میسنجر ڈے متعارف کرائے گئے۔ اب میسنجر کے کیمرے کے ذریعے آپ دوستوں کے ساتھ ایک مخصوص وقت کے بعد تحلیل ہوجانے والی تصاویر شیئر کرسکتے ہیں۔ ویسے تو فیس بک پر کافی الزامات لگتے ہیں مگر یہ واضح ہے کہ اس کی مقبولیت کی کمی کے کوئی آثار نظر نہیں آتے کم از کم 1.2 ارب سے زائد افراد سے بحث کرنا تو مشکل ہے۔ فیس بک کی سالانہ ایف ایٹ ڈویلپر کانفرنس آئندہ ہفتے ہورہی ہے جس میں میسنجر کے حوالے سے اہم اعلانات متوقع ہیں۔

ایمز ٹی وی(مانیٹرنگ ڈیسک) ٹویوٹا نے اپنی ایک اور کانسیپٹ گاڑی ایف ٹی فور ایکس متعارف کرا دی ہے جو کہ مستقبل کی ایس یو وی قرار دی گئی ہے۔ نیویارک آٹو شو کے موقع پر جاپانی کمپنی نے اپنی اس کانسیپٹ گاڑی کو نمائش کے لیے پیش کیا۔ یہ گاڑی کم اور کسی طاقتور جیپ زیادہ لگتی ہے جس میں سب کچھ بالکل الگ اور منفرد ہے۔ اس میں سلیپنگ بیگ دیا گیا ہے، پانی کی بوتلیں ہینڈل بار میں رکھی جاسکتی ہیں، اس کا ڈیش بورڈ بوم باکس ہے، جبکہ اس کے ٹرنک ڈور میں ریفریجریٹر چھپا ہوا ہے۔ ٹویوٹا کے مطابق موجودہ کے نوجوان باہر گھومنے کے شوقین ہوتے ہیں مگر انہیں ہر وقت چار دیواری میں قید رہنا پڑتا ہے، یہ گاڑی ایسے افراد کی مہم جو طبیعت کی تسلی کے لیے تیار کی گئی ہے۔ اس کے دروازوں میں دو باکس یا ڈبے ہیں جن میں سے ایک چیزیں گرم کرنے اور ایک ٹھنڈا کرنے میں مدد دیتا ہے۔ اس میں یو ایس بی پورٹس ہیں، بجلی کے پاور آﺅٹ لیٹ، کیمرے اور دیگر ہر قسم کی ٹیکنالوجی کو رکھا گیا ہے اور یہ کسی بھی طرح بیٹ مین کی گاڑی سے کم نہیں۔ ویسے تو آج کل کمپنیاں کانسیپٹ گاڑیوں میں خودکار ڈرائیونگ پر زیادہ زور دیتی ہیں تاہم کمپنی کے مطابق یہ گاڑی ہر طرح کے سفر کے لیے موزوں ہوگی کیونکہ اس میں موجود سہولیات آپ کو کسی بھی جگہ قیام کرنے میں مدد دیں گی کیونکہ گاڑی ہی سلیپنگ بیگ ہوگی۔ ویسے ٹویوٹا نے اس کی فروخت کے حوالے سے کچھ نہیں بتایا تاہم یہ مستقبل قریب میں سڑکوں پر دوڑتی ہوئی نظر آسکتی ہے۔