ایمز ٹی وی(اسپورٹس) انٹرنیشنل کرکٹ کونسل (آئی سی سی) نے چیمپینز ٹرافی 2017ءکیلئے 8 سفیروں کا اعلان کر دیا ہے اور پاکستان کیلئے شاہد خان آفریدی کو سفیر مقرر کیا گیا ہے۔ تفصیلات کے مطابق آئی سی سی نے چیمپئنز ٹرافی 2017ءکیلئے 8 سفیروں کا اعلان کیا ہے اور پاکستان کی جانب سے یہ اعزاز اسٹار آل راﺅنڈر شاہد خان آفریدی کو ملا ہے۔ آئی سی سی نے بھارت کی جانب سے ہربھجن سنگھ، سری لنکا کی جانب سے کمار سنگاکارا، جنوبی افریقہ کیلئے گریم سمتھ، نیوزی لینڈ کے شین بونڈ، آسٹریلیا کے مائیک ہسی، بنگلہ دیش کے حبیب البشر، انگلینڈ کے این بیل کو سفیر مقرر کیا ہے۔ واضح رہے کہ چیمپینز ٹرافی کا آغاز یکم جون سے انگلینڈ میں ہو گا جس میں صرف 50 دن باقی رہ گئے ہیں۔ اس ایونٹ میں روایتی حریف پاکستان اور بھارت کا ٹاکرا 4 جون کو ہو گا۔

ایمز ٹی وی(کراچی) نیٹی جیٹی پل پر تیز رفتار ٹرالر کی گاڑی کو ٹکر سے ایک ہی خاندان کے 5 افراد جاں بحق اور 6 افراد زخمی ہو گئے۔ میڈیا زرائع کے مطابق کراچی کے علاقے کیماڑی میں نیٹی جیٹی پل پر تیز رفتار ٹرالر نے موڑ کاٹتے ہوئے سوزوکی پک اپ، ایک گاڑی اور موٹر سائیکل کو روندھ ڈالا جس کے نتیجے میں سوزوکی پک اپ مکمل طور پر تباہ ہو گئی جب کہ دیگر گاڑیوں کو جزوی نقصان پہنچا۔ حادثے میں سوزوکی پک اپ میں سوار 65 سالہ نسیم اختر، 35 سالہ فرزانہ شفیق، 12 سالہ مناب، 6 سالہ آمنہ اور گاڑی کا ڈرائیور شامل ہے۔ حادثے میں جاں بحق افراد ایک ہی روز قبل لاہور اور گجرانوالہ سے کراچی آئے تھے اورعبداللہ شاہ غازی کے مزار پر حاضری دینے کے بعد بلدیہ سعیدآباد میں واقع گھر واپس جا رہے تھے۔ حادثے کے بعد ٹرالر کا ڈرائیور موقع سے فرار ہو گیا جب کہ کلینر کو حراست میں لے لیا گیا، پولیس کے مطابق حادثے کا مقدمہ ڈاکس تھانے میں درج کر کے تحقیقات کا آغاز کر دیا گیا ہے۔

ایمز ٹی وی(تجارت) متحدہ عرب امارات (یو اے ای) نے بذریعہ سمندر پاکستان سے امارات تک حلال مصنوعات کی ترسیل کی اجازت دے دی۔ لاہور چیمبر آف کامرس اینڈ انڈسٹری (ایل سی سی آئی) میں چھٹی بین الاقوامی حلال کانفرنس میں غیر ملکی وفود اور مقامی کاروباری افراد سے خطاب کرتے ہوئے پنجاب حلال ڈویلپمنٹ ایجنسی (پی ایچ ڈی اے) کے چیئرمین جسٹس (ر) خلیل الرحمٰن کا کہنا تھا کہ ترسیل کی اجازت ملنے کے بعد مال برداری کا کرایہ ایک تہائی فیصد تک کم ہوجائے گا۔ لاہور چیمبر آف کامرس کے صدر عبدالباسط، سینئر نائب صدر امجد علی جاوا اور ایگزیکٹیو کمیٹی کے ارکان بھی اس تقریب کا حصہ تھے۔ پی ایچ ڈی اے کے چیئرمین کا کہنا تھا کہ انتظامیہ مختلف ممالک اور منتظمین کے ساتھ مفاہمت کی یادداشتوں پر دستخط کرنے میں مصروف ہے تاکہ اپنی تصدیق کے عمل پر ان کی رضامندی حاصل کرچکے۔ خلیل الرحمٰن کا کہنا تھا کہ پاکستان حلال اتھارٹی فعال ہے اور اس کے بورڈ آف ڈائریکٹرز کا پہلا اجلاس 13 اپریل کو ہوگا۔ ان کا مزید کہنا تھا کہ پی ایچ ڈی اے قصابوں کے لیے تربیتی پروگرام منعقد کررہی ہے تاکہ انہیں لائسنس جاری کرنے سے پہلے شرعی ضروریات سے متعلق آگاہی فراہم کی جاسکے۔ انہوں نے لاہور چیمبر آف کامرس پر زور دیا کہ پنجاب حلال ڈویلپمنٹ ایجنسی اور چیمبر کے درمیان قریبی رابطے کے لیے فوکل پرسن کی تقرری کی جائے۔ چیئرمین خلیل الرحمٰن کے مطابق چھٹی بین الاقوامی حلال کانفرنس کے ذریعے ملک میں حلال کاروبار میں اضافہ ہوگا۔ اس موقع پر لاہور چیمبر آف کامرس کے صدر کا کہنا تھا کہ حلال اشیاء اہم عالمی مارکیٹ کی شکل اختیار کرچکی ہیں تاہم اس میں پاکستان کا حصہ اب بھی بہت کم ہے۔ انہوں نے کہا کہ ’وقت آگیا ہے کہ پاکستان غیرملکی امداد نہیں بلکہ اپنے حلال کھانوں کے محدود کام کو وسعت دے کر خود کو آگے لائے‘۔ خلیل الرحمٰن کا مزید کہنا تھا کہ حلال عالمی معیشت میں کھانے پینے کی اشیاء سے لے کر بینکنگ اور تکافل تک کا کام شامل ہے۔

ایمز ٹی وی(اسلام آباد) مشیر برائے قومی سلامتی ریٹائرڈ لیفٹیننٹ جنرل ناصر خان جنجوعہ کا کہنا ہے کہ پاکستان اور بھارت ہمیشہ دشمن نہیں رہ سکتے اور تنازعات کے حل کے لیے دونوں ممالک کا آپس میں رابطہ ضروری ہے۔ گزشتہ روز ناصر خان جنجوعہ اور پاکستان میں کینیڈا کے ہائی کمشنر پیری جان کیلڈرووڈ کی ملاقات کے دوران خطے کی صورتحال، دوطرفہ تعلقات، دہشت گردی کے خاتمے، انسداد دہشت گردی کے لیے تعاون، نیشنل ایکشن پلان پر عملدرآمد سمیت پاک -بھارت تعلقات اور امریکی ثالثی کی پیشکش پر بات ہوئی۔ مشیر قومی سلامتی نے نیوکلیئرز سپلائرز گروپ (این ایس جی) میں پاکستان کی شمولیت پر غور کرنے کے لیے غیرامتیازی نقطہ نظر کی اہمیت پر بھی زور دیا۔ خطے میں بڑھتے ہوئے اسٹریٹیجک عدم توازن پر تشویش کا اظہار کرتے ہوئے ان کا کہنا تھا کہ بین الاقوامی برادری بھارت کے ساتھ اپنے اسٹریٹیجک مفادات کے لیے مسئلہ کشمیر کو نظرانداز کررہی ہے۔ ناصر خان جنجوعہ نے امید ظاہر کی کہ بین الاقوامی برادری اخلاقیات اور انسانی حقوق کا ساتھ دے گی۔ انہوں نے واضح کیا کہ پاکستان نے مسئلہ کشمیر کے حل کے لیے بھارت اور پاکستان کے درمیان امریکی ثالثی کی پیشکش کا خیرمقدم کیا تھا تاہم انڈیا نے یہ پیشکش مسترد کردی۔ مشیر قومی سلامتی کے مطابق ایک جانب بھارت کشمیر کو دوطرفہ مسئلہ قرار دیتا ہے مگر مذاکرات سے انکار کرکے اس کی اہمیت نظرانداز کردیتا ہے۔ ناصر جنجوعہ کا مزید کہنا تھا کہ پاکستان، کینیڈا کے ساتھ اپنے تعلقات کی قدر کرتا ہے، کئی دہائیوں کی حمایت اور ترقیاتی پروگراموں کے ذریعے کینیڈا معاونت فراہم کرتا رہا ہے اور پاکستان ان تعلقات کو مزید بہتر کرنے کا خواہاں ہے۔ پاکستان میں کینیڈا کے سفیر پیری جان کیلڈرووڈ نے بھی تعلقات مضبوط بنانے کی اہمیت پر زور دیا۔ ان کا کہنا تھا کہ ’پاکستان کینیڈا کا اہم ساتھی ہے اور ہم پاکستان کے ساتھ کثیرالجہتی تعلقات کی قدر کرتے ہیں‘۔ ہائی کمشنر نے مزید کہا کہ پاکستان کے ساتھ کینیڈا کے تعلقات تجارت اور تعلیمی مواقع کے ساتھ ساتھ امن کے فروغ، جرائم اور دہشت گردی سے مقابلے اور جمہوری اداروں کی حمایت تک پھیلے ہوئے ہیں۔