ایمز ٹی وی(مانیٹرنگ ڈیسک) امریکی کمپنی نے شمسی توانائی سے چلنے والا پہیہ نما جہاز بنایا ہے جو بندرگاہوں، جھیلوں اور دریاؤں پر تیرتے ہوئے کچرے کو نگل جاتا ہے۔ اسے ’’مسٹر ٹریش وھیل‘‘ یا کچرا پہیہ کا نام دیا گیا ہے۔ ٹریش وھیل کے اندر جب کچرا بھر جاتا ہے تو یہ اسے جلاکر اس سے بجلی تیار کرتا ہے اور اسے ہر لحاظ سے ایک ماحول دوست منصوبہ قرار دیا جاسکتا ہے۔ ٹریش وھیل آگے بڑھنے کے لیے سورج کی روشنی استعمال کرتا ہے اور دھوپ سے بھرپور ایک دن میں اس کے سولر سیل 2500 واٹ تک بجلی بناتے ہیں۔ اگر مطلع ابر آلود ہو تو یہ پہیہ سمندری لہروں کی مدد سے گھومتا ہے اور کچرا اپنے اندر داخل کرتا رہتا ہے۔ اب تک اس نے پانی پر تیرتے ہوئے سگریٹ کے اتنے ٹکڑے جمع کیے ہیں جنہیں اگر ملایا جائے تو ان کی مجموعی لمبائی 70 میل تک جاپہنچے گی۔ اب تک ایک دن میں اس سے بندرگاہ پر 38 ہزار پونڈ کچرا پکڑا گیا ہے جو ایک ریکارڈ ہے۔ اس پروجیکٹ کا مقصد بالٹی مور کے بندرگاہی علاقے کو تیراکی اور ماہی گیری کے قابل بنانا ہے تاکہ ماحول کو صاف کیا جاسکے۔ یہ ایجاد دنیا بھر کی بندرگاہوں کا کچرا صاف کرکے انہیں دوبارہ صحتمند بناسکتی ہے۔ اس کی خالق کمپنی کا لوگوں سے واحد مطالبہ یہ ہے کہ وہ سمندر اور دریاؤں میں کوڑا کرکٹ پھینکنے سے گریز کریں کیونکہ انسان ہی ماحول کو بہتر بنانے کا واحد ذمے دار ہے۔

ایمزٹی وی(تعلیم/پشاور)تحریک انصا ف کے ایم پی اے نے تاریخ رقم کر دی جنہوں نے اپنی بیٹی کوکوہاٹ کے سرکاری اسکول میں داخل کرا دیا ہے ۔ میڈیا ذرائع کے مطابق خیبر پختونخوا سے پاکستان تحریک انصاف کے رکن اسمبلی ضیااللہ بنگش نے اپنی بیٹی کو سرکاری اسکول میں داخل کرا کے نئی روایت ڈال دی ۔ ان کا کہنا ہے کہ خیبر پختونخوا میں سرکاری ا سکو لوں کا معیارتعلیم نجی اسکولوں کے معیار تعلیم سے کم نہیں ہے۔ ضیااللہ بنگش کا کہنا تھا کہ جب صوبائی حکومت تشکیل دی تو نظام تعلیم بہت خراب تھا، ان کی بیٹی کے داخلے بعد مزید 50 بچوں نے سرکاری اسکول میں داخلہ لیا ہے۔” جب تک سیاستدان اور ایوانوں میں بیٹھے لوگ اپنے بچوں کو سرکاری اسکولوں میں تعلیم نہیں دلوائیں گے تب تک عوام کا بھروسا سرکاری تعلیمی اداروں پر قائم نہیں ہوسکے گا“۔ پی ٹی آئی کی رکن اسمبلی نے مزید کہا کہ خیبرپختوانخوا میں سرکاری سکولوں کا معیار تعلیم اب کسی بھی نجی اسکولوں سے کم نہیں رہا ہے۔

ایمز ٹی وی(اسپورٹس) نوجوان فاسٹ بولرمحمد عباس نے گاؤں جیٹھی سے ویسٹ انڈیزکا سفر طے کرلیا، اب وہ ٹیسٹ سیریز میں عمدہ پرفارمنس سے پاکستانی ٹیم میں مستقل مقام حاصل کرنا چاہتے ہیں۔ 27سالہ عباس نے کے آر ایل کی جانب سے اس سیزن میں عمدہ بولنگ کرتے ہوئے قائداعظم ٹرافی میں سب سے زیادہ 71 وکٹیں حاصل کیں،گزشتہ سال بھی وہ سیزن میں سب سے زیادہ 61 پلیئرز کو آؤٹ کرنے والے بولر تھے۔ اس سے قبل سرکاری ٹی وی کی طرف سے بھی کھیلتے ہوئے انھوں نے اچھی کارکردگی کا مظاہرہ کیا تھا، ریجنل کرکٹ میں سیالکوٹ کی نمائندگی کرنے والے محمد عباس کاتعلق سمبڑیال تحصیل کے گاؤں جیٹھی سے ہے جہاں انھوں نے اسکول کرکٹ اور ٹیپ بال سے اپنے شوق کا آغاز کیا،پھرکلب کرکٹ بھی کھیلی لیکن اس دوران انھوں نے زندگی کے کئی نشیب وفراز بھی دیکھے۔ غیر ملکی میڈیا کو انٹرویو میں محمد عباس نے کہاکہ میں اپنے والدین کا سب سے بڑا بیٹا ہوں لہذا گھریلو ذمہ داریاں نبھانے کے لیے روزگار کی تلاش میں ملک سے باہر جانے کا بھی ارادہ کیا،مگردوستوں نے مشورہ دیا کہ یہیں رہو حالات اچھے ہو جائیں گے، میں نے تقریباً 8 ماہ ویلڈنگ کاکام کیا، چمڑے کی ایک فیکٹری میں ملازمت کی اور پھر تقریباً 2 سال تک کچہری میں پراپرٹی کی رجسٹری کی ملازمت بھی کرتے رہا، میں کسی صورت کرکٹ چھوڑنا نہیں چاہتا تھا، نوجوان فاسٹ بولرنے کہاکہ اسی دوران مجھے ڈسٹرکٹ انڈر19 میں کھیلنے کا موقع ملا، جب میں نے وکیل دوستوں کو بتایا تو پہلے انھوں نے اجازت دینے سے انکار کردیالیکن پھراجازت دے دی۔ محمد عباس کو آج تک یاد ہے کہ ڈسٹرکٹ انڈر19 کے اس میچ میں وہ ٹاس کی بنیاد پر ٹیم میں شامل ہوئے تھے، میں وہ لمحہ کبھی نہیں بھول سکتا جب میرا مقابلہ ایک اور لڑکے سے تھا، فیصلہ یہ کیا گیا کہ جو بھی ٹاس جیتا وہ یہ میچ کھیلے گا، میں میدان میں اترااور5 وکٹیں حاصل کیں، میری ٹیم اس سال چیمپئن بنی اور اگلے سال بھی میں سب سے زیادہ وکٹیں حاصل کرنے میں کامیاب رہا۔ محمد عباس نے مزیدکہاکہ محنت کبھی رائیگاں نہیں جاتی اور اس کا صلہ ضرور ملتا ہے،کسی بھی کھلاڑی کے لیے پرفارمنس کا اہم پلیٹ فارم فرسٹ کلاس کرکٹ ہے اور میری کارکردگی ہی مجھے آج پاکستانی ٹیم تک لے آئی ہے، انھوں نے کہا کہ میں بولنگ کرتے وقت بیٹسمین کی کمزوری و خوبی دونوں پر نظر رکھتا اور اسی مناسبت سے بولنگ کرکے آؤٹ کرنے کی کوشش کرتا ہوں، میں گلین میک گرا کو اپنا آئیڈیل بولر سمجھتا اور شان پولاک سے بھی بہت متاثر ہوں، ان دونوں کی لائن و لینتھ بہت اچھی تھی، مجھے2 سال سے سیالکوٹ ریجن کی ٹیم میں محمد آصف کے ساتھ کھیلنے کا موقع ملا،ان کے مفید مشورے میرے بہت کام آرہے ہیں۔

ایمز ٹی وی(انٹرٹینمنٹ) پاکستان کے پہلے پاپ سنگر کا اعزاز حاصل کرنے اور فلمی موسیقی پر کئی دہائیوں تک راج کرنے والے گلوکار احمد رشدی کی34ویں برسی آج منائی جارہی ہے ۔ان کے لازوال گیت آج بھی لوگوں کوازبر ہیں ۔ یوں تو احمد رشدی نے لالی ووڈکےتمام ہیروز کےلیےگیت گائے لیکن چاکلیٹی ہیرو وحید مراد پر ان کی آواز بہت سجتی تھی ،دونوں فنکاروں کے تال میل سے فلم ارمان کا گیت ’اکیلے نہ جانا‘ بھلا کون بھول سکتا ہے۔ پاکستان میں پاپ میوزک متعارف کروانے والے احمد رشدی نے اپنا فنی سفر ریڈیو پاکستان ،کراچی سے شروع کیا ،1960ء میں لالی ووڈ کا رخ کیا.1961میں فلم مہتاب کے گیت ’گول گپے والا آیا‘ سےان کو بڑا بریک ملا۔ 11اپریل 1983 کواحمد رشدی کی رسیلی آواز ہمیشہ ہمیشہ کے لیے خاموش ہوگئی مگر وہ اپنے گیتوں کے ذریعے آج بھی لوگوں کے دلوں میں زندہ ہیں۔ ان کی وفات کے بعد حکومت پاکستان کی جانب سے انہیں ستارہ امتیاز دیاگیا۔