K2 - Results from #20216

کراچی میں بھی جامعہ سندھ کے کیمپس کا قیام

ایمز ٹی وی (تعلیم /جامشورو) شیخ الجامعہ سندھ جامشورو پروفیسر ڈاکٹر فتح محمد برفت نے صوبے میں ایک فیمیل کیمپس قائم کرنے کی خواہش کا اظہار کرتے ہوئے کہا ہے کہ سندھ کے پسماندہ علاقوں کے غریب نوجوانوں کو اعلیٰ تعلیم کی سہولیات فراہم کرنے کے لیے مزید کیمپسز قائم کرنے کی ضرورت ہے۔ جبکہ کراچی میں بھی ایک کیمپس کا قیام ضروری ہے۔ موجودہ کیمپسز میں مارکیٹ اور ضرورت کے مطابق نئے تعلیمی شعبے شروع کروائے جائیں گے۔ ان خیالات کا اظہار انہوں نے وائس چانسلر آفس میں تمام کیمپسز کے پرو وائس چانسلرز کے ساتھ کیے گئے اجلاس میں خطاب کرتے ہوئے کیا۔ وائس چانسلر ڈاکٹر برفت نے کہا کہ کراچی میں مقابلے کی فضا ہے جبکہ نجی اعلیٰ تعلیمی اداروں میں تعلیم مہنگی ہے، جس کی وجہ سے کراچی میں بھی جامعہ سندھ کے کیمپس کا قیام عمل میں لانا چاہئے۔

ماڈ ل ایان علی کی درخواست خارج کر دی

ایمز ٹی وی (انٹرٹینمنٹ) کراچی کی مقامی عدالت نے ماڈ ل ایان علی کی درخواست خارج کر دی ۔

کراچی کی عدالت میں ایان علی کا نام ای سی ایل سے خارج نہ کرنے پر توہین عدالت کی درخواست کی سماعت ہوئی جہاں ایڈیشنل اٹارنی جنرل نے بتایا کہ ایان علی کا نام عدالتی حکم پر خارج کر دیا ہے اور وہ ملک سے باہر جا چکی ہیں لہذٰا انکی درخواست غیر موثر ہو چکی ہے جسے خارج کیا جائے جس پر عدالت نے ایان علی کی جانب سے دائر درخواست کو خارج کردیا ۔

یاد رہے عدالتی احکامات پر ای سی ایل سے نام خارج ہونے کے بعد ماڈل ایان علی بیرون ملک جا چکی ہیں

ایم اے (پرائیویٹ) سال اول کے نتائج کا اعلان

ایمز ٹی وی (تعلیم /کراچی)وفاقی اردو یونیورسٹی کے ناظم امتحانات غیاث الدین احمد کے مطابق کراچی، اسلام آباد اور راولا کوٹ میں ہونے والے ایم اے (پرائیویٹ) سال اول سیاسیات اور اردو کے سالانہ امتحانات2015 منعقدہ امتحان اکتوبر2016کے نتائج کا اعلان کردیا گیا ہے۔ کراچی میں ہونے والے سیاسیات کے امتحان میں44طلباء رجسٹرڈ ہوئے جن میں36طلباء نے امتحانات میں شرکت کی اور23طلباء کامیاب قرار پائے جبکہ مجموعی رزلٹ63.89فیصد رہا۔ اردو کے امتحان میں41طلباء رجسٹرڈہوئے جن میں 37طلباء نے امتحانات میں شرکت کی اور34طلباء کامیاب قرار پائے جبکہ مجموعی رزلٹ91.89فیصد رہا۔

انٹرمیڈیٹ ضمنی امتحانات کے نتائج کا اعلان

ایمز ٹی وی (تعلیم /کراچی) اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے اعلان کیا ہے کہ انٹرمیڈیٹ کامرس ریگولر، آرٹس ریگولر اور آرٹس پرائیویٹ گروپس کے ضمنی امتحانات برائے 2016ء کے نتائج کا اعلان بروز جمعہ 3مارچ 2017ء کو دوپہر 3بجے کیا جارہا ہے۔ انہوں نے مزید بتایا کہ مذکورہ نتائج بورڈ کی ویب سائٹ پر بھی دیکھے جاسکتے ہیں۔

گواہوں اور تفتیشی افسر طلب نوٹس جاری

ایمز ٹی وی(کراچی) انسداد دہشتگردی عدالت نے لیاری گینگ وار کے سرغنہ عزیر جان بلوچ اور امین بلیدی پر ترمیمی فرد جرم عائد کر دی ۔

کراچی کی انسداد دہشتگردی عدالت میں لیاری میں دھماکہ خیز مواد برآمدگی سے متعلق کیس کی سماعت ہوئی جہاں عدالت نے فریقین کے دلائل سننے کے بعد عزیر جان بلوچ اور امین بلیدی پر ترمیمی فرد جرم عائد کر دی تاہم ملزمان نے صحت جرم سے انکار کردیا ۔

عدالت نے آئندہ سماعت پر استغاثہ کے گواہوں اور تفتیشی افسر کو طلب کرتے ہوئے نوٹس جاری کر دیے اور حکم دیا کہ آئندہ سماعت پر گواہوں کو پیش کیا جائے

وائس چانسلر کے تقرر کے سلسلے میں دیے جانے والے اشتہار پر اظہار تحفظ

ایمز ٹی وی (تعلیم /کراچی ) این ای ڈی یونیورسٹی آف انجینئرنگ اینڈ ٹیکنالوجی کے وائس چانسلر کے عہدے کے لیے تلاش کمیٹی کو8 درخواستیں موصول ہوئی ہیں ۔ جن کے انٹرویوز آئندہ 15روز کے اندر ہونے کا امکان ہے جبکہ امیدواروں کی شارٹ لسٹنگ جو 3مارچ یا 4مارچ کی جائے گی۔ این ای ڈی کے موجودہ وائس چانسلر ڈاکٹر افضل حق کی چار سالہ مدت 16 مارچ کو مکمل ہو رہی ہے، ان کی مدت میں توسیع نہیں کی گئی ہے تاہم وہ دوسری مدت کے لیے بھی امیدوار ہیں اور درخواست دینے والے 8امیدواروں میں ان کا نام بھی شامل ہے جن 8امیدواروں نےجامعہ این ای ڈی کے وائس چانسلر کے لئے درخواستیں دی ہیں۔ ان میں ڈاکٹر سروش لودھی ، پروفیسر عثمان علی، نظام الدین قریشی، پروفیسر عبدالعلیم خانزادہ، پروفیسر ڈاکٹر قمر وہاب، سرفراز احمد ملک اور موجودہ وائس چانسلر ڈاکٹر افضل حق سمیت 8امیدوار شامل ہیں۔ یاد رہے کہ جامعہ این ای ڈی کے ساتھ ہی دیگر دو جامعات دائود انجینئرنگ اور لاء یونیورسٹی کے وائس چانسلرز کی چار سالہ مدت بھی ختم ہو رہی ہے تاہم ان دونوں جامعات کے وائس چانسلر کے تقرر کے لیے اشتہار نہیں دیا گیا ۔ جس کے باعث امکان ہے کہ دونوں جامعات کے وائس چانسلر کی مدت میں دوسری مرتبہ توسیع کر دی جائے گی۔ دریں اثنا جامعہ این ای ڈی کے وائس چانسلر ڈاکٹر افضل حق اور دیگر امیدواروں نے این ای ڈی کے وائس چانسلر کے تقرر کے سلسلے میں دیے جانے والے اشتہار پر تحفظات کا اظہار کیا ہے۔

قومی کھیل کاوقار بحال کرنےکے دعوے تباہ حالی کا شکار

ایمز ٹی وی(اسپورٹس) ملک کے قومی کھیل ہاکی کے کھوئے ہوئے وقار کو دوبارہ بحال کرنے کے دعوے تو بہت کیے جاتے ہیں لیکن حیدرآباد کا ہاکی اسٹیڈیم کچھ اور ہی داستان سنارہا ہے ۔

پاکستان اسپورٹس بورڈ نے 2005 میں لطیف آباد نمبر 6 میں 4 کروڑ روپے سے زائد رقم خرچ کرکے ہاکی اسٹیڈیم تعمیر کروایا مگر بدقسمتی سے سندھ اسپورٹس بورڈ اور ضلعی انتظامیہ دونوں ہی اس کی سرپرستی کرنے پر تیار نہیں جس کے سبب اسٹیڈیم میں لگی آسٹروٹرف ، گول پوسٹ ،اسپرنکلرز، حفاظتی جنگلے اور فلڈ لائٹس ٹوٹ پھوٹ کا شکار ہیں ۔

ہاکی کھیلنے والوں کے ساتھ ساتھ سکھانے والے بھی موجودہ صورت حال پر شکوہ کرتے نظر آتے ہیں۔ اسٹیڈیم میں گزشتہ دس بارہ برسوں کے دوران کوئی مرمتی کام نہ ہوا یہی وجہ ہے کہ سال 2006 میں نیشنل چیمپئین شپ کے رائونڈز کے علاوہ یہاں کوئی قومی سطح کا میچ نہ ہوسکا ۔

قومی کھیل ہاکی کے فروغ کے لیے دعوے تو بہت کئے جاتے ہیں لیکن حیدرآباد کا اسٹیڈیم ان دعوؤں کے برعکس تباہ حالی کا شکار ہے جس پر فوری طور پر توجہ دینے کی ضرورت ہے ۔

زلمی اور کنگزکا مقابلہ،ہارنے والا واپسی کا ٹکٹ کٹائے گا

ایمز ٹی وی(اسپورٹس) پاکستان سپر لیگ میں آج پشاور زلمی اور کراچی کنگز کا ٹاکرا ہوگا، جو ہارا وہ گھر واپسی کا ٹکٹ کٹائے گا جبکہ جیتنے والا اتوار کو فائنل میں کوئٹہ گلیڈی ایٹرز سے ٹکرائے گا۔

پی ایس ایل ٹو کا دبئی میں آج آخری مقابلہ ہوگا، زلمی کے کپتان ڈیرن سیمی کوبوم بوم آفریدی کا ساتھ حاصل ہے، محمد حفیظ فارم میں لوٹ آئے ہیں ،پھر کامران اکمل اور ڈیوڈ ملن تو پہلے ہی سے رنگ جما رہے ہیں ۔

دوسری جانب ہے سنگاکارا کی ٹیم کراچی کنگزمیں شامل ٹی ٹوئنٹی کنگ کرس گیل شامل ہیں جبکہ بابر اعظم کا بیٹ بھی خوب رنز اگل رہا ہے ۔ کیرن پولارڈ، عماد وسیم اور شعیب ملک اور عثمان میر بھی کمال دکھا رہے ہیں ۔

زلمی اور کنگز کا یہ دلچسپ مقابلہ آج رات نو بجے شروع ہوگا۔

کے پی کے حکومت نےجہیز پرپابندی عائد کردی

ایمزٹی وی(پشاور)خیبر پختونخوا میں جہیزپر پابندی لگانے کا بل تیار کرلیا گیا ہے اور بل آج خیبرپختونخوا اسمبلی میں پیش کئے جانے کا امکان ہے۔تفصیلات کے مطابق خیبر پختونخوا میں اب شادی پر صرف 75 ہزار روپے خرچ کیے جاسکتے ہیں جس کیلئے جماعت اسلامی کی رکن اسمبلی راشدہ رفعت کی جانب سے ایک بل اسمبلی میں پیش کیا جائے گا۔

بل میں تجویز دی گئی ہے کہ تحائف سمیت ولیمہ اوردیگراخراجات75 ہزارسے زائد نہیں ہونگے،دلہا دلہن کو 10 ہزار روپے تک کاہی تحفہ دیا جا سکے گا۔ مجوزہ بل میں کہا گیا ہے کہ نکاح اور بارات میں مہمانوں کی تواضع صرف مشروبات سے کی جائے گی ،ولیمے میں چاول،گریوی اور میٹھے کے علاوہ دیگرپکوان پر پابندی ہوگی۔

بل میں مزید تجویز دی گئی ہے کہ جہیز میں نقدرقم یادیگر لوازمات رکھنے پر قا نونی کارروائی ہو گی اورجہیز پر مجبورکرنے والوں کو 2ماہ قید اور 3لاکھ جرمانے کی سزاسنائی جاسکے گی جبکہ والدین یا دیگر رشتہ داردلہن کو صرف تحا ئف دے سکیں گے۔

سوشل میڈیا پر ہراساں کرنے کی شکایات میں اضافہ

ایمز ٹی وی(مانٹرینگ ڈیسک) پاکستان میں حکام کا کہنا ہے کہ ملک میں سوشل میڈیا پر ہراساں کیے جانے کے حوالے سے شکایات میں تیزی سے اضافہ دیکھنے میں آ رہا ہے اور ان میں سے بیشتر شکایات کنندگان خواتین ہیں۔

وفاقی تحقیقاتی ادارے کے ایک اہلکار نے نام ظاہر نہ کرنے کی شرط پر میڈیا کو بتایا کہ گذشتہ برس سائبر کرائم ایکٹ کے تحت 700 درخواستیں موصول ہوئی تھیں اور ان میں بیشتر سوشل میڈیا کے حوالے سے ہی تھیں اور اس سال ابتدائی دو ماہ میں ہی یہ تعداد 500 تک پہنچ گئی ہے۔

صوبہ خیبر پختونخوا میں درج کروائی جانے والی ایسی درخواستوں کی تعداد 120 ہے۔

حکام کا کہنا ہے کہ سوشل میڈیا کے حوالے سے موصول ہونے والی بیشتر شکایات خواتین کی جانب سے ہی سامنے آ رہی ہیں کیونکہ ایسے واقعات میں زیادہ تر خواتین ہی نشانہ بن رہی ہیں۔

وفاقی تحقیقاتی ادارے کے پاس سائبر کرائم ایکٹ کے تحت مختلف نوعیت کے مقدمات درج ہیں لیکن حکام کا کہنا ہے کہ ان میں سے 95 فیصد سے بھی زیادہ سوشل میڈیا کے حوالے سے ہیں اور ان میں سے بیشتر شکایات میں کہا گیا ہے کہ درخواست گزار کو تصویروں یا ویڈیوز کے ذریعے بلیک میل کیا جا رہا ہے۔

حکام کا کہنا ہے کہ ان درخواستوں پر قانون کے مطابق کارروائیاں کی گئی ہیں اور ان میں ملزمان گرفتار بھی ہوئے ہیں لیکن اس طرح کے بیشتر واقعات میں فریقین کے درمیان صلح ہو جاتی ہے اور کچھ لوگ عدالت میں جانے سے پہلے ہی صلح کر لیتے ہیں اور بعض عدالت میں ہی صلح کا فیصلہ کرتے ہیں.