ایمز ٹی وی ( تعلیم ) سندھ کے وزیر تعلیم جام مہتاب حسین ڈاہر نے کہا ہے کہ آئندہ سال کے لیے اس تجویز کا جائزہ لیا جا رہا ہے کہ موسم سرما میں اسکولوں کے تدریسی اوقات کو تھوڑا آگے بڑھا دیا جائے اور اسکولوں میں تدریسی عمل تھوڑی دیر سے شروع کیا جائے، اسکولوں کی تعطیلات کا کلینڈر جنوری میں بنتا ہے ۔ آئندہ حکومت سندھ کی یہ کوشش ہو گی کہ سردیوں کی تعطیلات کے لیے کوئی مخصوص تاریخ مقرر نہ کی جائے اور یہ چھٹیاں موسمی صورت حال کو دیکھتے ہوئے اس وقت دی جائیں ، جب سردی کی شدت زیادہ ہو ۔ انہوں نے یہ بات جمعرات کو سندھ اسمبلی کے اجلاس کے دوران اس وقت کہی جب قائد حزب اختلاف خواجہ اظہار الحسن نے اپنے ایک پوائنٹ آف آرڈر پر اس امر کی نشاندہی کی کہ کراچی میں اس وقت درجہ حرارت بہت گرا ہوا ہے ۔ محکمہ موسمیات نے آئندہ ہفتے پھر بارش کی پیشگوئی کی ہے ۔ اس صورت حال میں اسکول جانے والے معصوم بچوں اور ان کے والدین کو پریشانی سے بچانے کے لیے اسکولوں کی ایک ہفتے کی تعطیلات میں اضافہ کیا جائے ۔ وزیر تعلیم جام مہتاب حسین کا کہنا تھا کہ سال کے 365دنوں میں 122دن اسکولوں میں چھٹیاں ہوتی ہیں ۔ اس صورت حال میں ہم مزید چھٹیوں میں اضافہ کریں گے تو بچوں کا تعلیمی نقصان ہو گا ۔ انہوں نے بتایا کہ سندھ میں بعض ایسے علاقے بھی ہیں جہاں موسم گرما درجہ حرارت 52 ڈگری سینٹی گریڈ تک چلا جاتا ہے اگر اسی طرح شدید سردی اور گرمی کے زمانے میں تعلیمی اداروں کی چھٹیوں کو بڑھایا جاتا رہا تو گرمی کے زمانے میں شدید گرم علاقوں کے رہنے والوں کی جانب سے یہ بھی کہا جائے گا کہ بہت زیادہ گرمی ہے ۔ چھٹیوں میں اضافہ کیا جائے ۔ جام مہتاب نے کہاکہ کراچی میں اس وقت درجہ حرارت 12 سینٹی گریڈ سے کم نہیں ہے ۔ اس لیے مزید چھٹیوں کا کوئی جواز نہیں ۔ پنجاب اور شمالی علاقہ جات میں جہاں درجہ حرارت منفی سے بھی نیچے ہے اور کچھ علاقوں میں برف باری ہو رہی ۔ وہاں بھی تعلیمی اداروں میں تعلیمی سرگرمیاں جاری ہیں ۔ انہوں نے کہاکہ آئندہ سال کے لیے اس تجویز کا بھی جائزہ لیا جا رہا ہے کہ موسم سرما میں اسکولوں کے تدریسی اوقات کو تھوڑا آگے بڑھا دیا جائے ۔

ایمز ٹی وی(انٹرٹینمنت)اگر آپ نے دنگل فلم کو دیکھا ہو تو یہ تصور کرنا مشکل ہے کہ عامر خان کی جگہ مہا ویر سنگھ پھوگٹ کا کردار کسی اور اداکار کو دیا جاتا۔دنگل عامر خان کے کیرئیر کی بہترین اداکاری سے سجی فلم ہے جس میں انہوں نے ایک نئے معیار کو بھی طے کیا، یعنی پہلے اپنا جسمانی وزن بہت زیادہ بڑھایا اور بہت کم مدت میں اسے کم بھی کرکے دکھایا۔بولی وڈ میں کون سا اسٹار ایسی ہمت کا مظاہرہ کرسکتا ہے؟ ممکنہ طور پر کوئی نہیں۔ مگر دنگل بنانے والی ٹیم نے عامر خان سے ہٹ کر بھی چند آپشن ذہن میں رکھے ہوئے تھے۔فلم پروڈکشن کمپنی یو ٹی وی موشن پکچرز کے ایک اعلیٰ عہدیدار کے مطابق ٹیم نے سوچ رکھا تھا کہ اگر عامر خان نے فلم میں کام کرنے سے انکار کیا تو ساﺅتھ سے تعلق رکھنے والے کمال حسن یا موہن لال کو کاسٹ کیا جائے گا۔ یوٹی وی کی کریٹیو پروڈیوسر دیویا راﺅ نے بتایا کہ جب مہا ویر سنگھ پھوگٹ پر فلم بنانے کا فیصلہ کیا گیا تو عامر خان ہمارا پہلا انتخاب تھے ۔تاہم جب ان سے پوچھا گیا کہ اگر عامر خان فلم میں کام کرنے سے انکار کرتے تو پھر؟ تو ان کا جواب تھا ' عامر سے ہٹ کر جو اداکار ہمارے ذہن میں تھے وہ موہن لال اور کمال حسن تھے'۔دلچسپ بات یہ ہے کہ موہن لال 1977-78 میں کیرالہ اسٹیٹ کے ریسلنگ چیمپئن بھی رہ چکے ہیں۔ خیال رہے کہ دنگل گزشتہ سال 23 دسمبر کو ریلیز ہوئی تھی اور باکس آفس پر چوتھے ہفتے میں بھی کمائی کے نت نئے ریکارڈز قائم کررہی ہے۔اب تک یہ فلم 370.11 کروڑ انڈین روپے کما چکی ہے اور ابھی تک بزنس میں کمی کے کوئی آثار نظر نہیں آئے۔