ایمز ٹی وی(کراچی) سندھ اسمبلی اجلاس میں دلچسپ گفتگو اور جملوں کا تبادلہ ہوا ہے۔رکن اسمبلی نصر ت سحر عباسی نے محکمہ اینٹی کرپشن کو آنٹی کرپشن کہہ ڈالا۔ تفصیلات کے مطابق سندھ اسمبلی اجلاس میں نصرت سحر عباسی اور شہلا رضا میں تلخ جملوں کا بھی تبادلہ ہوا ہے۔ ڈپٹی اسپیکر سندھ اسمبلی نے نصرت سحر عباسی پر طنزکے تیر برساتے ہوئے کہا کہ اتنے دنوں بعد آئی ہیں پھر بھی آرام نہیں ہے۔ شہلا رضا نے مزید کہا کہ دوا کھایا کریں اور ہلا کر کھایا کریں۔ جبکہ وزیرصحت سندھ نثار کھوڑواور نصر ت سحر کے درمیان گرما گرم گفتگو ہوئی۔نصرت سحر عباسی نے کہا کہ وزیرصحت کے جوابات سے مطمئن نہیں ہوں جس پر نثار کھوڑو نے کہا کہ معزز رکن کو خامو ش کرائیں ۔ نصر ت سحر نے کہا کہ نثار کھوڑو مجھے براہ راست مخاطب نہ کریں۔

ایمز ٹی وی(تعلیم/اسلام آباد )محمودہ ممنون حسین نے کہا ہے کہ تعلیم کا مقصد صرف مادی کامیابی کا حصول نہیں بلکہ شخصیت سازی ہے۔ اس سلسلے میں نئی نسل کو قرآن و سنت سے رہنمائی حاصل کرنی چاہئے۔ بیگم محمودہ ممنون حسین نےیہ بات اسلام آباد ماڈل کالج برائے خواتین کی طالبات سے ایوان صدر میں گفتگو کے دوران کہی۔ اس موقع پر انہوں طالبات کے سوالوں کے جواب بھی دیئے۔ بیگم محمودہ ممنون حسین نے حدیث مبارکہ کا حوالہ دیتے ہوئے کہا کہ ہمیں جلوت اور خلوت ہر حالت میں اللہ تعالیٰ سے ڈرتے رہنا چاہئے۔ اگر کوئی ہم سے تعلق توڑے تب بھی ہمیں تعلق نبھانا چاہئے۔ اگر کوئی ہم سے کچھ چھینے بھی تو ہمیں اسے دینا چاہئے۔ اسی طرح اگر کوئی ہم سے ظلم کرے تو ہمیں معاف کرنا چاہئے۔ انہوں نے کہا کہ اگر ہم ان باتوں پر عمل کریں تو نہ صرف اپنے آپ کی اصلاح ہو جائے گی بلکہ ایک معاشرہ تشکیل پاسکے گا جو دوسروں کے لئے مثال بن جائے گا۔ بیگم محمودہ ممنون حسین نے کہا کہ یہ ہماری سماجی اور مذہبی ذمہ داری ہے کہ نئی نسل کی تربیت ایسے طریقے سے کی جائے جو معاشرے کے لئے مفید ہو۔ انہوں نے کہا کہ اگر ہم قرآن و سنت کی تعلیمات کی پیروی کریں تو ایسا معاشرہ تشکیل دیا جاسکتا ہے جو اقوام عالم کے لئے مثال بن جائے گا۔ خاتون اول نے مزید کہا کہ اللہ تعالیٰ نے انسان کو ایسی صلاحیتوں سے نوازا ہے جن کو بروئے کار لاتے ہوئے وہ اپنے آپ کو صحیح راستے پر گامزن کر سکتا ہے۔

ایمز ٹی وی (ٹیکنالوجی)چین کی کمپنی زی ٹی ای نے اپنا نیا اسمارٹ فون ہاک آئی پیش کیا ہے جس کے لیے وہ کراﺅڈ سورس سائٹ پر فنڈز جمع کررہی ہے۔تاہم 20 ہزار روپے کے لگ بھگ قیمت میں یہ کافی بہترین ڈیوائس لگتی ہے، کم از کم اس کے فیچرز سے تو یہی احساس ہوتا ہے۔اسنیپ ڈراگون 625 پراسیسر، تھری جی بی ریم، 32 جی بی اسٹوریج جس میں میموری کارڈ سے اضافہ ہوتا ہے جبکہ 5.5 انچ کی 1080p اسکرین جیسے فیچرز اس کا حصہ ہیں۔ مگر اس کی خاص بات بیک پر دو کیمروں کی موجودگی ہے جن میں ایک 12 میگا پکسل جبکہ دوسرا 13 میگا پکسل سنسر دیا گیا ہے جو کہ آئی فون سیون پلس جیسی تصاویر لینے میں مدد دیتے ہیں۔اس کے علاوہ اس میں فنگر پرنٹ ریڈر، این ایف سی اور آٹھ میگا پکسل کا فرنٹ کیمرہ بھی ہے۔کک اسٹارٹر سائٹ پر 199 ڈالرز کے عوض اس فون کو خریدا جاسکتا ہے جو کہ باضابطہ طور پر رواں سال کسی وقت فروخت کے لیے پیش کیا جائے گا اور اس وقت یہ قیمت زیادہ ہوگی۔کمپنی کو توقع ہے کہ وہ کک اسٹارٹر پر اسے فروخت کرکے طے کردہ ہدف کے مطابق فنڈز اکھٹا کرنے میں کامیاب رہے گی۔

ایمز ٹی وی (تجارت)چینی خبر رساں ایجنسی کے مطابق چین کے صوبے ہنان کی کاونٹنگ وانگ چینگ میں،شہری نے بینک میں اکاؤنٹ کھلوایا تاہم کلرک نے اکاؤنٹ نمبر کو رقم سمجھ کر تقریباً اٹھارہ ارب29 کروڑ روپے اکاؤنٹ میں جمع کرادیئے۔ کچھ گھنٹوں بعد غلطی کا پتا چلنے پر بینک انتظامیہ نے شہری کو بلا کر غلطی درست کی۔