ایمزٹی وی(پشاور) قومی اسمبلی میں اپوزیشن لیڈر خورشید شاہ اور پیپلزپارٹی کے دیگررہنماوں نے کہا ہے کہ دہشت گردی کے خلاف جنگ کو اب منطقی انجام تک پہنچانا چاہیے۔ پیپلزپارٹی اس مقصد کے لیے صف اول میں کھڑے ہونے کو تیار ہیں۔ پیپلزپارٹی کے خورشید شاہ، قائم علی شاہ، شیری رحمان، قمر زمان کائرہ، راجہ پرویز اشرف اور دیگر رہنماوں نے پشاور میں مشترکہ پریس کانفرنس کی۔ اس سے پہلے سانحہ پشاور کے شہداء کے لئے دعائے مغفرت کی گئی، اپوزیشن لیڈر خورشید شاہ نے کہا کہ بد ھ کو ہونے والی اے پی سی میں پہلی مرتبہ قبول کیا گیا کہ یہ ہماری جنگ ہے، اسے مزید برداشت نہیں کر سکتے، وزیر اعلیٰ سندھ قائم علی شاہ کا کہنا تھا کہ سندھ حکومت نے دو سو دہشت گرد گرفتار کئے ہیں جن میں سے صرف چار کو سزا ملی، سابق وزیراعظم راجہ پرویز اشرف نے بلاول بھٹو زرداری اورآصف زرداری کی جانب سے شہداء کے لواحقین سے تعزیت کی ۔ قمر زمان کائرہ کا کہنا تھا کہ جو دہشت گردوں کا حامی ہے، اب اسکے خلاف بھی کھڑے ہونے کا وقت ہے۔ شیری رحمان نے کہا جو دہشت گردوں کا دوست ہے، وہ ملک کا غدار ہے ۔
ایممزٹی وی(لاہور) وفاقی وزیرتجارت خرم دستگیر نے کہا ہے کہ دہشت گردوں کو پھانسی دینے سے جی ایس پی اسٹیٹس متاثر نہیں ہوگا، خرم دستگیر کا کہنا ہے کہ یورپی یونین اوردیگرممالک دہشت گردی کے خاتمے کے لئے تعاون کو تیار ہیں۔ خرم دستگیر نے اس امید کا بھی اظہار کیا کہ پاکستان جی ایس پی اسٹیٹس کے تحت برآمدات کا ہدف پورا کرے گا ۔
ایمزٹی وی(کوئٹہ) ملک میں پولیو کے 4 نئے کیسز سامنے آ گئے، متاثرہ بچوں کا تعلق نصیرآباد اور قلعہ عبداللہ، بنوں اور سانگھڑ سے ہے۔ ذرائع قومی ادارہ صحت کے مطابق ملک میں سامنے آنے والے نئے پولیو کیسز میں سے ایک کیس سندھ ، ایک خیبر پختونخوا اور دو بلوچستان سے ہیں ۔ رواں سال اب تک مجموعی پولیو کیسز کی تعداد 287 ہو گئی ہے۔ فاٹا سے 173، خیبرپختونخوا سے 64، سندھ سے 28، بلوچستان 19 اور پنجاب سے پولیو کے 3 کیسز رپورٹ ہوئے ۔
ایمزٹی وی (سیاسی) وزیراعظم کی منظوری کے بعد دہشت گردوں کی سزائے موت پر عمل درآمد ہونا باقی ہے۔ ملک بھر سے سزائے موت کے 17 قیدیوں کی اپیلیں مسترد کردی گئیں۔حکومتی ذرائع کے مطابق دس مجرموں کا تعلق پنجاب، 6 کا سندھ اورایک کا خیبر پختونخوا سے ہے۔ وزیراعظم پاکستان نے گزشتہ روز دہشت گردوں کو انجام تک پہنچانے کے لیے سزائے موت سے پابندی ہٹانے کی منظور ی دی تھی اور اس حوالے سے قانونی کارروائی کا آغاز ہوگیا ہے۔ وفاقی وزیرتجارت خرم دستگیر نے کہا ہے کہ دہشت گردوں کو پھانسی دینے سے جی ایس پی اسٹیٹس متاثر نہیں ہوگا، یورپی یونین اوردیگر ممالک دہشتگردی کےخاتمے کے لئے تعاون کو تیار ہیں۔ سزائے موت پر پابندی یورپی یونین کے دباؤ پر عائد کی گئی جسکی وجہ سے عدالتوں سے سزائے موت سنائے جانے کے باجود مجرموں کو کیفر کردار تک نہ پہنچایا جاسکا ۔
ایمز ٹی وی (فارن ڈیسک ) لندن میں برطانوی وزیراعظم ڈیوڈ کیمرون نے خبردار کیا ہے کہ جس طرح سڈنی کے کیفے میں دہشت گردی کا حملہ ہوا ہے اس طرح کا حملہ برطانیہ میں بھی ہو سکتا ہے۔ ان کا کہنا تھا کہ سیکورٹی سروسز کے لئے اس طرح کے اچانک حملوں کو ناکام بنانا مشکل ہوتا ہے۔ انہوں نے گزشتہ روز پارلیمنٹ سے خطاب کے دوران کہا کہ اس طرح کے حملوں کی سازش کو بے نقاب کرنا بہت مشکل ہوتا ہے۔ انہوں نے کہا کہ برطانیہ کی انٹیلی جنس سروسز کی مہارت اور شاندار کارکردگی کی وجہ سے برطانیہ اب تک سڈنی طرز کے حملوں سے بچا ہوا ہے۔ ۔ انہوں نے کہا کہ سیکورٹی کے ادارے پاکستان یا افغانستان یا پھر شام اور عراق کے دہشت گرد نیٹ ورکس پر نظر رکھے ہوئے ہیں
ایمز ٹی وی (فارن ڈیسک ) واشنگٹن میں آئی ایم ایف کے ایگزیکٹو بورڈ نے پاکستان کیلئے ایک ارب 10کروڑ ڈالر قرض کی منظوری دیدی ہے‘واشنگٹن میں ہونے والے اجلاس میں پاکستان کی اقتصادی کارکردگی پر اطمینان کا اظہار کیا گیا‘بورڈکے فیصلے کے مطابق رقم پاکستان کو 55،55 کروڑڈالر کی2اقساط میں ادا کی جائیگی۔ گزشتہ ماہ آئی ایم ایف جائزہ مشن نے وزارت خزانہ سے مذاکرات کے بعد دو اکٹھی اقساط کے اجراءکی سفارش کی تھی جس کی روشنی میں آئی ایم ایف کے ایگزیکٹو بورڈ نے پاکستان کو 1 ارب 10 کروڑ ڈالر جاری کرنے کی حتمی منظوردی تھی جبکہ 1 ارب 10 کروڑ ڈالر کی دو اقساط آئندہ چند روز میں مل جائیں گی ۔
ایمز ٹی وی (فارن ڈیسک)
دہشت اور خوفناک مناظر سے بھرپور فلم ’دی وومن ان بلیک‘ کے سیکوئل’ اینجل آف ڈیتھ‘ کا نیا ٹریلر جاری کردیا گیا ہے۔ٹام ہارپر کی ہدایت کاری میں بننے والی اس فلم کی کہانی ایک نرسری میں زیر تعلیم بچوں کے گرد گھومتی ہے جنہیں دوسری جنگ عظیم کے دوران ان کے ٹیچرز بمباری کی وجہ سے کئی عرصے سے ویران پڑی ایک حویلی میں منتقل کردیتے ہیں۔فلم میں اپنی اداکاری کے جلوے دکھانے والوں میں ہیلن مک کروری،جیریمی ایروائن،ایڈرین رالنس،لیان بیسٹ،اورجوڈ رائٹ سییت دیگر شامل ہیں۔واضح رہے کہ اس سلسلے کی پہلی فلم وومن ان بلیک برطانیہ کی 20سالہ تاریخ کا سب سے زیادہ بزنس سمیٹنے میں کامیاب ہوئی تھی۔ٹوبن آرمبرسٹ کی پروڈکشن میں تیار ہونے والی یہ فلم 2جنوری 2015کو سینما گھروں میں نمائش کیلئے پیش کردی جائے گی۔
ایمزٹی وی (فارن ڈیسک) اب کھانے پینے کی چیزیں بھی پرتعیش اشیاء میں شمار ہونگی جن میں سونے چاندی کے ذرات شامل کیے جارہے ہیں۔ اسپین میں سونے کے ذرات سے بھری دنیا کی مہنگی ترین ڈبل روٹی فروخت کیلئے پیش کردی گئی ہے۔ اسپین کے قصبے الغاطوسن کی پین پینا بیکری میں میدے اور شہد کیساتھ سونے کے ذرات ملاکر ڈبل روٹی بیک کی جارہی ہے جسے117 یورو (93پاؤنڈ ، 145ڈالر) میں فروخت کیا جارہا ہے۔ 400 گرام (14اونس) وزن کی حامل ہر ڈبل روٹی میں 100 یورو قیمت کی حامل 250 ملی گرام گولڈ ڈسٹ شامل کی جارہی ہے ۔
ایمزٹی وی (فارن ڈیسک) افغانستان کے دارالحکومت کابل میں خودکش حملے میں 4 افغان اہلکار ہلاک اور6 زخمی ہوگئے، کابل پولیس کے مطابق خودکش حملہ تنگی ترخیل کے علاقے میں کیا گیا۔ خودکش حملہ آور نے دھماکا خیز مواد سے بھری گاڑی علاقے میں گشت کرنےوالے سیکیورٹی اہلکاروں کی گاڑی سے ٹکرادی، افغان میڈیا رپورٹس کے مطابق مرنے والےسی آئی ڈی اہلکار ہیں، طالبان نے خودکش حملے کی ذمہ داری قبول کرلی ہے ۔
ایمز ٹی وی (اسلام آباد) وزیر اعظم نواز شریف سے ایئرچیف مارشل طاہر رفیق بٹ نے اسلام آباد میں ملاقات کی اور دہشتگردوں کیخلاف فضائی حملوں کے حوالے سے بریفنگ دی۔ پاک فضائیہ کے سربراہ نے گزشتہ روز وادی تیراہ میں کی گئی کارروائیوں سے متعلق بھی وزیر اعظم کو آگاہ کیا ۔ وزیر اعظم نواز شریف نے ایئرچیف کو ہدایت کی کہ دہشتگردوں کو چن چن کر نشانہ بنایا جائے ۔ وزیر اعظم کا کہنا تھا کہ اپنے بچوں کے قاتلوں کو اب اس سرزمین پر ٹکنے نہیں دینگے، معصوم بچوں کے قاتلوں سے خون کے ایک ایک قطرے کا حساب لیا جائے گا ۔ انہوں نے کہا کہ پاک فضائیہ ملکی دفاع میں ریڑھ کی ہڈی کی حیثیت رکھتی ہے، پاک فضائیہ کے ہواباز دہشتگردوں کو نشانہ بناتے وقت سانحہ پشاور کو سامنے رکھیں۔