ایمز ٹی وی (کراچی) پولیس چیف غلام قادر تھیبو نے کہا کہ دہشت گردی کے خاتمے کے لیے پولیس پر بڑی ذمہ داری عائد ہوتی ہے۔ ایڈیشنل آئی جی کراچی غلام قادر تھیبو نے میڈیا سے بات کرتے ہوئے کہا کہ پولیس دہشت گردوں کے خلاف لڑتی رہے گی اور اس جنگ میں سب سے اہم ذمہ داری پولیس پر عائد ہوتی ہے۔پولیس چیف نے اس بات کی بھی وضاحت کی کہ تمام قانون نافذ کرنے والے اداروں کو مل کر کام کرنا ہو گا اور اب وقت آ گیا ہے کہ دہشت گردی کے خلاف بھرپور آپریشن کیا جائے۔
ایمز ٹی وی (اسلام آباد) سانحہ پشاور میں ملوث دہشت گرد افغانستان میں موجود انڈین ایمبیسی کے قونصلیٹ کے ساتھ رابطے میں رہے ،وہاں سے ہدایات لیتے رہے اور آپریشن کے حوالے سے لمحہ بالمحہ رپورٹ دیتے رہے۔ چیف آف آرمی سٹاف جنرل راحیل شریف نے افغانستان کے صدر اشرف غنی کو اس بارے میں ساری معلومات و ثبوت دئیے۔صدر اوباما کو بھی اس بارے میں آگاہ کیاگیا جس پر اوباما نے بھارتی وزیراعظم نریندری مودی اور پاکستان کے وزیراعظم کو فون کیا اورپاکستان کو اپنی طرف سے ہر طرح کی مدد اور تعاون کا یقین دلایا۔چیف آف آرمی سٹاف نے اشرف غنی سے کہا کہ اس سارے واقعے میں ملوث ملا فضل اللہ اور اس کے دست راست خالد عمر خراسانی اور منصور ناری کو یا تو انہیں پاکستان کے حوالے کریں یا انہیں خودسزا دیں، یا پاکستانی فورسز کو اس بات کی اجازت دیں کہ وہ خود اس حوالے سے آپریشن کریں۔ اشرف غنی نے کہا کہ چیف ایگزیکٹو عبداللہ عبداللہ کے ساتھ مشاورت کے بعد آگاہ کیا جائے گا۔ اشرف غنی کا جھکاﺅ پاکستان کی طرف ہے جبکہ عبداللہ عبداللہ کی ہمدردیاں بھارت کے ساتھ ہیں۔ملا فضل اللہ افغانستان اور تاجکستان کے سرحدی علاقے میں روپوش ہوگیا ہے تاکہ پاکستان کی جانب سے کسی ممکنہ حملے کی صورت میں بچ سکے۔ملا فضل اللہ کے تاجک ریاستوں میں جانے کی صورت میں چونکہ موسم انتہائی سرد اور دس، دس فٹ سے زائد سے زائد برف باری کی وجہ سے وہاں زمینی آپریشن ناممکن ہوگا۔
ایمز ٹی وی ( لاہور) لاہور میں پولیس اور حساس اداروں نے کاروائی کر کے 270 مشکوک افراد حراست میں لے لیے۔تفصیلات کے مطابق پولیس اور حساس اداروں نے کاروائی کرتے ہوئے سرچ آپریشن کے دوران 270 غیر ملکی مشکوک افراد کو حراست میں لے لیا۔ان گرفتار ہونے والوں میں 250 کا تعلق افغانستان سے ہے جبکہ 20 افراد کا تعلق باجوڑ ایجنسی سے ہے۔پولیس نے انہیں مزید تفتیش کے لیے نامعلوم مقام پر منتقل کر دیا ہے جہاں ان سے مزید پوچھ گچھ کی جا رہی ہے۔
ایمزٹی وی (کھیل) بھارت ٹیم آفیشلز کا کہنا ہے کہ تحفظات دور کیے جائیں توہم 100 فیصد بے عیب ٹیکنالوجی کے مطالبے سے پیچھے ہٹنے کو تیار ہیں، دوسری جانب کپتان مہندرا سنگھ دھونی نے دہائیاں دیتے ہوئے کہاکہ ففٹی ففٹی فیصلے ہمیشہ ہمارے ہی خلاف ہوتے ہیں، تھرڈ امپائر بھی فیلڈ آفیشل کوہی شک کا فائدہ دیتا ہے۔
تفصیلات کے مطابق بھارت شروع سے ہی ڈی آر ایس کے حوالے سے موقف اختیار کیے ہوئے ہے کہ جب تک ٹیکنالوجی 100 فیصد بے عیب نہیں ہوتی وہ اسے قبول نہیں کرسکتا، آسٹریلیا کے خلاف اب تک ہونیوالے 2 ٹیسٹ میچز میں اپنے خلاف ہونیوالے فیصلوں سے تنگ آ کر اس نے موقف میں نرمی کا عندیہ دیا ہے۔ بھارتی ٹیم مینجمنٹ کے ایک رکن نے کہا کہ ہم اس موقف پر نظر ثانی کرسکتے ہیں لیکن کچھ تحفظات ہیں، انھیں پہلے ختم ہونا چاہیے۔ ان میں سے ایک یہ بھی ہے کہ کلوز فیصلے ہمارے ہی خلاف کیوں ہوتے ہیں۔
یاد رہے کہ پہلے ٹیسٹ میں دھون، راہنے اور وردھیمان ساہا جبکہ اب برسبین میں چتیشور پجارا اور روی چندرن ایشون کے خلاف متنازع فیصلے ہوئے، اگر ان کو چیلنج کیا جاتا تو یہ بھارت کے حق میں تبدیل ہوسکتے تھے لیکن کپتان دھونی اس بات سے اتفاق نہیں کرتے، انھوں نے کہا کہ ڈی آر ایس سے بھی اہم معاملہ یہ ہے کہ ففٹی ففٹی فیصلے ہمارے حق میں نہیں ہوتے، زیادہ تر ہمیں ہی مایوس رہنا پڑتا ہے، ایسے فیصلوں میں اگر امپائر آئوٹ قرار دے دیتا ہے تو ڈی آر ایس سے بھی ہمیں مدد نہیں ملے گی، تھرڈ امپائر بھی ٹیکنالوجی کو صرف اپنے فیلڈ آفیشل کو درست ثابت کرنے کیلیے استعمال کرتا اور شک کا فائدہ اسے ہی دیا جاتا ہے۔
ایمز ٹی وی (کراچی) متحدہ قومی موومنٹ کی رابطہ کمیٹی کے انچار ج قمر منصور نے کہا ہے کہ مولانا عبد العزیز مختلف مسالک کو لڑا کر اپنے مقاصد حاصل کر نا چاہتا ہے،اور لال مسجد بھی انہیں مقاصد کر پورا کرنے کے لیے قائم کی گئی ہے ۔انہوں نے کہا کہ مولانا عبدالعزیز نے الطاف حسین کو قتل کی دھمکی دی اور پارٹی کے دیگر رہنماﺅں کو بھی سنگین نتائج کی دھمکی دی لیکن ایم کیو ایم ایک پرُ امن جماعت ہے اور وہ ہر دھمکی کا جواب قانونی طریقے سے دیں گے اور اسی لیے مولانا عبد لعزیز کیخلاف تھانہ عزیز آباد میں مقدمہ درج کروا دیا ہے ۔انہوں نے کہا کہ الطاف حسین نے سانحہ پشاور کے خلاف سب سے پہلے آواز بلند کی اور الطاف حسین نے قرآن حدیث کی روشنی میں بتایا کہ کس طرح مسجد ضرار بنائی گئی انہوں نے آرمی چیف سے درخواست کی کہ وہ ضرب عضب کو پورے ملک میں پھیلائیں تاکہ دہشت گردی کاخاتمہ مکمل طور پر ہو سکے ۔واضح رہے کہایم کیو ایم نے مولانا عبدالعزیز کیخلاف آج شام کو کراچی پریس کلب کے سامنے احتجاج کا اعلان بھی کر دیا ہے ۔
ایمز ٹی وی (کراچی) کراچی سمیت سندھ اور بلوچستان کو گذشتہ 12 گھنٹوں سے معطل بجلی بحال نہ ہوسکی ۔ بجلی کی عدم بحالی کی وجہ سے شہرقائد میں پانی کی بھی شدید قلت ہوگئی جبکہ گورنر سندھ ڈاکٹرعشرت العباد نے جلد ازجلد بجلی کی بحالی کے احکامات جاری کردیئے ہیں ۔ ہائی ٹرانسمشن لائن فنی خرابی کے باعث گذشتہ شب تین بجے کے بعد ٹرپ کرگئی اور جامشوروگرڈسٹیشن،نیشنل گرڈسٹیشن سے بجلی معطل ہوگئی ۔ذرائع کے مطابق کراچی سمیت سندھ کے تمام اضلاع اور بلوچستان بھر میں بجلی کی فراہمی معطل ہوگئی ہے جس کی وجہ سے شہریوں کو شدید مشکلات کا سامنا ہے ۔کے الیکٹرک کے ذرائع کے مطابق سندھ بھر کے 119گرڈسٹیشن اور 657فیڈر بند ہوگئے ۔واٹربورڈ کے ترجمان نے بتایاکہ گذشتہ چھ گھنٹوں سے گھارو، دھابیجی اور ناتھ کراچی پمپنگ سٹیشن بند ہیں جس کی وجہ سے پانی کی قلت پیداہوگئی ہے ۔
ایمزٹی وی (کھیل) سابق آف اسپنر ثقلین مشتاق انگلینڈ سے لاہور پہنچ گئے ہیں اور انھوں نے آتے ہی سعید اجمل کے بولنگ ایکشن پردوبارہ کام شروع کر دیا ہے، سابق ٹیسٹ کرکٹر نے گذشتہ روز قذافی اسٹیڈیم لاہور میں پاکستان اے اور کینیا کا میچ دیکھا، اس دوران وہ سعید اجمل کی بولنگ کا بغور جائزہ لیتے رہے۔
انھوں نے ایکشن کی ویڈیوز بھی بنائیں، ثقلین مشتاق حفیظ کا ایکشن عالمی قوانین کے مطابق لانے کیلئے بھی نیشنل کرکٹ اکیڈمی میں ہنگامی بنیادوں پر کام کریں گے۔ واضح رہے کہ سعید اجمل اور محمد حفیظ پر آئی سی سی کی جانب سے ایکشن درست نہ ہونے کی وجہ سے پابندی عائد ہے۔ اس لئے پی سی بی نے حتمی ٹیسٹ سے پہلے دونوں بولرز کے ایکشن کوبھارتی شہر چنئی میں جانچنے کا فیصلہ کیا ہے۔
مزید معلوم ہوا ہے کہ پاکستان کرکٹ بورڈ رواں ماہ کے آخر میں سعید اجمل اور محمد حفیظ کا انگلینڈ میں دوبارہ ٹیسٹ کرانے کا خواہاں ہے۔ آئی سی سی سے کلیرنس ملنے کی صورت میں دونوں کھلاڑیوں کو ورلڈ کپ کے15رکنی حتمی سکواڈ میں شامل کر لیا جائے گا۔
ایمزٹی وی (کھیل) قومی ہاکی ٹیم کے کوچ شہنازکا کہنا ہے کہ ہمارے خلاف استعمال کئے جانے والے منفی ہتھکنڈوں سے نہ صرف کھلاڑیوں کو ذہنی اذیت میں مبتلا کیا بلکہ ایسے اقدامات سے انٹرنیشنل ہاکی پر بھی منفی اثرات مرتب ہوسکتے ہیں۔ قومی ہاکی ٹیم کے کوچ کی جانب سے تیار کردہ رپورٹ کا پہلے پاکستان ہاکی فیڈریشن جائزہ لے گی بعد ازاں اسے ایف آئی ایچ کے حوالے کردیا جائے گا۔
شہناز شیخ نے بتایا کہ میں نے رپورٹ میں ان تمام واقعات کا ذکر کیا جو ہمارے کیخلاف گئے۔ انھوں نے کہا کہ چیمپئنز ٹرافی میں پاکستانی کھلاڑیوں کے ساتھ ہونے والی ناانصافی سے نہ صرف ٹیم کے حوصلے پست ہوئے بلکہ ایسے منفی اقدامات مستقبل میں انٹرنیشنل ہاکی کو بھی متاثر کرسکتے ہیں۔ انھوں نے کہا کہ 2 پاکستانی پلیئرز پر پابندی، رات کو انتہا پسندوں کی جانب سے دھمکیوں کی اطلاعات اور پھر فائنل والے دن ٹورنامنٹ آرگنائزرز اور ایف آئی ایچ حکام کی جانب سے بار بار بلانے کے عمل سے ہم ذہنی طور پر مفلوج ہو کر رہ گئے تھے۔
انھوں نے کہا کہ سیمی فائنل میں فتح کے بعد ہمارے کھلاڑیوں نے شرٹس اتار کر کچھ زیادہ خوشی منائی لیکن بڑے اور سنسنی خیز مقابلوں کے بعد ایسا ہوتا رہتا ہے، کھلاڑیوں کے اس عمل میں گرائونڈ میں موجود شائقین کے منفی رویے کا بھی ہاتھ تھا جنھوں نے پاکستانی کھلاڑیوں کے خلاف انتہائی نامناسب زبان کا استعمال کیا۔ انھوں نے مزید کہا کہ فائنل میں پاکستان کیخلاف گول کرنے کے بعد بعض جرمن پلیئرز نے بھی ایسے ہی خوشی منائی لیکن اس کو نظر انداز کردیا گیا۔ شہناز شیخ نے کہاکہ میں نے رپورٹ میں انٹرنیشنل ہاکی فیڈریشن سے درخواست کی کہ بھارت کے نامناسب رویے پر سخت ایکشن لیا جائے، اگر ایسا کیا گیا تو یہ انٹرنیشنل ہاکی کیلیے مثبت اقدام ہوگا۔ انھوں نے کہا کہ اگر بھارت ہار تسلیم نہیں کرسکتا تو اسے انٹرنیشنل ایونٹس کی میزبانی بھی نہیں کرنی چاہیے۔
واضح رہے کہ ایونٹ کے سیمی فائنل میں میزبان ملک سے فتح کے بعد پاکستانی کھلاڑیوں کا جشن میزبان میڈیا اور فیڈریشن کو سخت ناگوار گزرا تھا۔ انھوں نے انتہائی نامناسب رویہ اختیار کرتے ہوئے فائنل سے قبل قومی کھلاڑیوں کو شدید ذہنی اذیت میں مبتلا کئے رکھا۔ انڈین فیڈریشن نے ایف آئی ایچ کو یہاں تک دھمکی دی کہ اگر گرین شرٹس پلیئرز کے خلاف ایکشن نہ لیا گیا تو وہ آئندہ کسی بھی بین الاقوامی ایونٹ کی میزبانی نہیں کریں گے، عالمی تنظیم نے صبح پلیئرز کے جشن کو قوانین کے مطابق قرار دیا لیکن دھمکی ملتے ہی پاکستانی کھلاڑیوں محمد توثیق اور امجد پر ایک میچ کی پابندی لگا دی، نائب کپتان شفقت رسول کو وارننگ جاری کر دی گئی۔ پاکستان ہاکی ٹیم کے چیف کوچ شہناز شیخ نے ٹورنامنٹ کے دوران پیش آنے والے تمام واقعات کو قلم بند کرتے ہوئے اسے پی ایچ ایف کو بھیج دیا جو جائزہ لینے کے بعد انٹرنیشنل باڈی کو ارسال کریگی۔
ایمز ٹی وی (فارن ڈیسک) چین میں پٹرول پمپ پر کھڑا ہوکر دھمکیاں دینے والا شخص پکڑا گیا- آ، ۔گزشتہ رات صوبہ ژی جانگ کے شہر تائے زو میں ایک سرپھرے نے پیڑول پمپ ہنگامہ کھڑا کردیا۔اس نے ایک ہاتھ سے پیٹرول اپنے اطراف گرایا اور دوسرے ہاتھ میں لائٹر پکڑ کر چلانا اور لوگوں کو ڈرانا دھمکانا شروع کر دیا۔پولیس کے پہنچنے پر بھی وہ شخص نہ مانا تو پولیس اہکاروں نے چال بازی کی۔اس سرپھرے کو اکسایا اور پھر قابو کرلیا۔
ایمز ٹی وی (فارن ڈیسک ) ہالی ووڈ کی آسکر ایوارڈ اداکارہ کیٹ ونسلیٹ کی نئی رومانٹک کامیڈی ڈرامہ فلم "اے لٹل کیوس"کا پہلا ٹریلر جاری کردیا گیا۔ہدایتکار ایلن رک مین کی اس فلم میں کیٹ ونسلیٹ کیساتھخود ایلن رک مین،اسٹینلے طوسی،میتھیاس شون آرٹس،اسٹیون ویڈنگٹن اور پولین موران اہم کردار ادا کررہے ہیں۔گیل ایگن اور اینڈریا کیلڈر ووڈ کی پروڈیوس کردہ اس فلم کی کہانی لینڈ اسکیپ گارڈنرز کے گرد گھوم رہی جنہیں ورسیلز پیلس میں فاؤئنٹین ڈیزائن کرنے کی ذمہ داری سونپی گئی ہے۔بی بی سی فلمز اور لائنز گیٹ کے اشتراک سے بننے والی یہ رومانٹک کامیڈی ڈرامہ فلم اے لٹل کیوس فوکس فیچر کے تحت اگلے سال27مارچ کو سینما گھروں کی زینت بنے گی۔