ایمز ٹی وی (فارنڈیسک)نیویارک .....یوں تو دنیا بھر میں گاڑیاں رکھنے والے افراد چھٹی کے روز اپنی اپنی گاڑیوں کی صفائی کرتے ہیں یا سروس اسٹیشن پر کار واش کروانے پہنچ جاتے ہیں لیکن اب یہ کام جانور سر انجام دینے لگے ہیں۔جی ہاں امریکی ریاست کولو راڈو کے پہاڑی سلسلے پر موجود بھیڑیں وہاں سے گزرنے والی گاڑیوں کے لئے کار واش سروس فراہم کرتی ہیں۔دونوں بھیڑیں گاڑیوں پر لگی دھول اور مٹی کو اپنی زبان سے چاٹ لیتی ہیں جس سے گاڑیاں ایک دم چمک جاتی ہیں۔پہاڑی بھیڑیں یہ سروس بالکل مفت فراہم کرتی ہیں جس سے لوگ خوشی سے نہال ہوجاتے ہیں اور اپنی گاڑیاں خاص طور پر ان کے پاس روک کر صفائی کرواتے ہیں۔

ایمزٹی وی (کھیل)   پی سی بی نے سعید اجمل کوکینیا سے سیریزکے آخری2میچز میں آزمانے کا فیصلہ کیا ہے،ذرائع کے مطابق بورڈکی کمیٹی آف اسپنر کے ایکشن کا باریک بینی سے جائزہ لے گی، اگر خم 15 ڈگری کے اندر رہا تو انھیں رواں ماہ کے آخر میں سرکاری ٹیسٹ کیلئے انگلینڈ بھجوادیا جائے گا۔ یاد رہے کہ پابندی لگنے کے بعد سابق آف اسپنر ثقلین مشتاق کی خدمات سے مستفید ہونے کے باوجود ابتدائی ٹیسٹ میں ایکشن کو قانونی حد میں لانے سے قاصر رہے تھے ۔

دوسری طرف قومی سلیکٹرز نے نوجوان پلیئرزمیں اعتماد کی بحالی کیلیے کینیا کیخلاف سیریز کے آخری2 میچوں کی پاکستان اے ٹیم میں مزید7 تبدیلیاں کی ہیں۔ پی سی بی پریس ریلیزکے مطابق مختار احمد، عمر صدیقی، ظفر گوہر، احمد جمال، ضیا الحق، میر حمزہ اور زوہیب احمد کیلئے شرجیل خان، سمیع اسلم، انور علی، احسان عادل، محمد طلحہٰ، عمران خان اور حماد اعظم کو جگہ خالی کرنا پڑی۔ یاد رہے کہ پاکستان اے اور کینیاکے مابین چوتھا ون ڈے 18دسمبر کو شیڈول تھا لیکن سانحہ پشاور کی وجہ سے اسے ایک دن کیلئے ملتوی کردیا گیا۔ پاکستان کو ابتدائی 3 ون ڈے جیتنے کی وجہ سے سیریز میں فیصلہ کن برتری حاصل ہے، آخری میچ جمعے کو ہوگا

ایمزٹی وی (سیاسی) پشاور میں طالبان کے حالیہ حملے میں درجنوں بچوں کی ہلاکت کے بعد پاکستان اور قبائلی علاقوں میں سکیورٹی فورسز کی کارروائیوں میں تیزی آئی ہے اور حکام کے مطابق چھ مختلف کارروائیوں میں کم از کم 49 شدت پسندوں کو ہلاک کیا گیا ہے۔ یہ کارروائیاں گذشتہ بارہ گھنٹے کے دوران قبائلی علاقے خیبرایجنسی کے علاوہ سندھ کے دارالحکومت کراچی، بلوچستان کے ضلع زیارت اور پنجاب کے شہر لالہ موسیٰ میں ہوئیں۔ پاکستانی فوج نے خیبر ایجنسی کے مختلف علاقوں میں زمینی کارروائی کے دوران مجموعی طور پر 42 دہشت گردوں کو ہلاک کرنے کا دعویٰ کیا ہے۔ فوج کے شعبۂ تعلقاتِ عامہ کی جانب سے جاری کیے گئے پیغام میں کہا گیا ہے کہ سب سے زیادہ ہلاکتیں وادی تیراہ میں ورما گئی اور سپرکوٹ میں ہوئیں جہاں سکیورٹی فورسز نے پاکستان اور افغانستان کی سرحد کی جانب جانے والے شدت پسندوں کے گروپوں کو نشانہ بنایا۔ رفعت اللہ اورکزئی کا کہنا ہے کہ فوج کے مطابق دونوں مقامات پر ہونے والی جھڑپوں میں 32 دہشت گرد ہلاک ہوگئے جبکہ تین سکیورٹی اہلکار بھی فائرنگ کے تبادلے میں زخمی ہوگئے۔ اس سے قبل حکام نے خیبر ایجنسی میں ہی جاری فوجی آپریشن کے دوران دس دہشت گردوں کی ہلاکت کا دعویٰ کیا تھا۔ ریڈیو پاکستان نے فوج کے شعبۂ تعلقات عامہ کے حوالے سے کہا ہے کہ یہ شدت پسند بھی ایک زمینی کارروائی میں مارے گئے۔ خبر رساں ادارے اے ایف پی نے ایک سینیئر فوجی اہلکار کے حوالے سے بتایا ہے کہ یہ کارروائی جمعرات کی شام ملک شگہ نلہ کے علاقے میں کی گئی اور اس آپریشن میں دو شدت پسند اور دو سکیورٹی اہلکار زخمی بھی ہوئے ہیں۔ شدت پسندوں نے مقابلے کے دوران رینجرز کے جوانوں پر چار دستی بم بھی پھینکے۔ آئی ایس پی آر کا یہ بھی کہنا ہے کہ اس جھڑپ کے دوران چھ دہشت گرد فرار ہونے میں بھی کامیاب رہے جنکا تعاقب کیا جا رہا ہے۔ ادھر کراچی میں رینجرز کے ترجمان میجر سبطین نے بتایا ہے کہ مشرف کالونی میں ہاؤنسلو روڈ پر جمعے کی صبح ہونے والے آپریشن میں تحریکِ طالبان کے مقامی کمانڈر سمیت 4 شدت پسند مارے گئے۔ انکا کہنا تھا کہ رینجرز نے شدت پسندوں کی موجودگی کی اطلاع پر علی الصبح کارروائی کی تو ملزمان نے ان پر فائرنگ کر دی۔ ترجمان کے مطابق اس مقابلے کے دوران شدت پسندوں نے رینجرز کے جوانوں پر چار دستی بم بھی پھینکے جن سے ایک جوان زخمی ہوا۔ انکا کہنا تھا کہ رینجرز کی جوابی کارروائی سے چار شدت پسند مارے گئے جن میں ٹی ٹی پی کا مقامی کمانڈر عابد مچھڑ بھی شامل ہے جبکہ بقیہ تین افراد کی شناخت کا عمل جاری ہے۔رینجرز نے جائے وقوعہ سے چار سب مشین گن اور دیگر اسلحہ بھی برآمد کرنے کا دعویٰ کیا ہے۔ ان کا کہنا تھا کہ ہلاک ہونے والے دونوں شدت پسندوں کا تعلق ایک کالعدم تنظیم سے تھا ۔

ایمزٹی وی (سیاسی) پاکستان کے صوبہ بلوچستان کے ضلع زیارت سے سات افراد کی لاشیں بر آمد ہوئی ہیں جنھیں گولیاں مار کر ہلاک کیا گیا ہے۔ زیارت کی مقامی انتظامیہ کے مطابق یہ لاشیں جمعے کو سنجاوی کے علاقے سے ملی ہیں اور انکی حالت سے لگتا ہے کہ ان افراد کی ہلاکت کو زیادہ وقت نہیں گزرا۔ انتظامیہ کے ایک سینیئر اہلکار نے بتایا کہ علاقے میں لاشوں کی موجودگی کی اطلاع پر حکام جائے وقوع پر پہنچے اور انھیں مقامی ہسپتال منتقل کر دیا۔تاحال ان ساتوں افراد کی شناخت نہیں ہو سکی ہے۔ یہ ہفتۂ رواں میں بلوچستان سے ایسی لاشیں ملنے کا دوسرا واقعہ ہے۔ اس سے قبل جمعرات کو قلعہ سیف اللہ کے علاقے سے ایسی تین لاشیں ملی تھیں جنھیں سر میں گولیاں مار کر ہلاک کرنے کے بعد ویرانے میں پھینک دیا گیا تھا۔ ان تینوں افراد کے جسموں پر تشدد کے نشانات بھی تھے۔ بلوچستان سے مسخ شدہ اور تشدد زدہ لاشوں کی بر آمدگی کا سلسلہ سن 2008 میں شروع ہوا تھا۔ قوم پرست اورعلیحدگی پسند ان واقعات کے لیے ملک کی اسٹیبلشمنٹ کو ذمہ دار ٹھہراتے رہے ہیں۔ تاہم بلوچستان کی موجودہ حکومت کا دعویٰ ہے کہ اب ایسے واقعات میں کمی آئی ہے۔ محکمہ داخلہ حکومت بلوچستان کے ذرائع کے مطابق اس سال کے دوران اب تک 150 سے زائد افراد کی لاشیں بر آمد ہوئی ہیں۔ تاہم لاپتہ افراد کے رشتہ داروں کی تنظیم وائس فارمسنگ بلوچ پرسنز کا دعوی ہے کہ اس سال کے دوران برآمد ہونے والی لاشوں کی تعداد 500 کے لگ بھگ ہے ۔