ایمزٹی وی (سیاسی) پاکستان تحریک انصاف کے پلان سی کے تحت کل کراچی بند کرانے کی منصوبہ بندی کے جواب میں پولیس نے بھی لائحہ عمل تیار کرلیا ہے۔ کراچی پولیس چیف کا کہنا ہے کہ کسی کو قانون شکنی نہیں کرنے دیںگے۔ کراچی پولیس چیف غلام قادر تھیبو نے جیو نیوز کو بتایا کہ کراچی میں احتجاج یا جلسہ جلوس کرنا کسی بھی شہری کا جمہوری حق ہے، دفعہ 144 کے تحت پانچ یا اس سے زائد افراد کے جمع ہونے کی بھی کوئی پابندی نہیں ہے۔ پی ٹی آئی کی جانب سے کل 12 دسمبر کو شہر بند کرنے کے حوالے سے ایک سوال کے جواب میں ایڈیشنل آئی جی کراچی غلام قادر تھیبو نے کہا کہ کوئی شہری اپنی مرضی سے اپنی دکان، دفتر یا کاروبار بند کرنے کا اختیار رکھتا ہے لیکن اس سلسلے میں کسی کو دھونس، دھاندلی یا زبردستی نہیں کرنے دیںگے۔ جلاؤ گھیراؤ یا قانون ہاتھ میں لینے والے افراد سے سختی سے نمٹا جائیگا۔ غلام قادر تھیبو نے بتایا کہ پی ٹی آئی کی قیادت نے 12 دسمبر کے حوالے سے کراچی کے 25 سے زائد مقامات پر احتجاج کرنے کا لائحہ فراہم کیا ہے۔ جسکے تحت شاہراہ فیصل نرسری، کلفٹن تین تلوار، نمائس چورنگی، ملیر، نارتھ ناظم آباد، صدر اور لیاری کے علاقوں میں مرکزی پروگرام ہونگے۔ غلام قادر تھیبو کیمطابق پی ٹی آئی کے احتجاج کرنے والے رہنماؤں اور کارکنوں کو مکمل سیکورٹی فراہم کی جائیگی۔ پولیس چیف کیمطابق کل شہر میں امن و امان برقرار رکھنے کے لئے پولیس کی اضافی نفری تعینات کردی گئی ہے انہوں نے توقع ظاہر کی کہ کل کراچی میں فیصل آباد کے احتجاج جیسی صورت حال نہیں ہوگی ۔
ایمز ٹی وی( فارن ڈیسک) افغانستان کے دارالحکومت کابل میں فوجیوں کی بس پر خود کش حملے میں 6 فوجی ہلاک ہوگئے ۔ پولیس کے مطابق افغان نیشنل آرمی کی بس پر خو دکش حملےکی ذمہ داری طالبان نے قبول کرلی ہے ، دھماکے میں کم ازکم 6 فوجی ہلاک اور آٹھ زخمی ہوئے۔ کرائم برانچ یونٹ کےسربراہ کاکہناہے کہ خود کش حملہ آور پید ل تھا، اور تنگی تراخیل کے مقام پر اُس نے خود کو دھماکے سے اڑا لیا۔
ایمزٹی وی (سیاسی) قائد حزب اختلاف خورشید شاہ نے کہا ہے کہ سندھ میں دھاندلی ہو تو دوسرے نمبر پر آنے والے کو کامیاب قرار دیا جاتا ہے، پنجاب میں ہوتو دوبارہ انتخابات کرائے جاتے ہیں، چیف الیکشن کمشنر الیکشن ٹربیونل کے طریقہ کار کا نوٹس لیں۔ اسلام آباد سے جاری اپنے ایک بیان میں خورشید شاہ نےکہا ہے کہ سندھ میں دھاندلی کی صورت میں الیکشن ٹربیونل دوسرے نمبر پر آنے والے امیدوار کو کامیاب قرار دیتا ہے، جبکہ پنجاب میں ایسی ہی صورت میں دوبارہ انتخابات کرائے جاتے ہیں، الیکشن ٹربیونل کے فیصلوں میں یہ تضاد کیوں ہے، چیف الیکشن کمشنر اس معاملے کا نوٹس لیں ۔
ایمزٹی وی (سیاسی) ڈاکٹرعافیہ اور سیاہ فاموں کے ساتھ ناانصافیوں نے امریکی نظام انصاف کی قلعی کھول دی ہے۔ یہ صورت حال چراغ تلے اندھیرا کے مترادف ہے کہ امریکا پوری دنیا میں انسانی حقوق، اپنی جمہوریت اور دنیا کی واحد سپر پاور ہونے کا ڈھنڈورا پیٹتا ہے لیکن وہاں نچلی عدالتوں کے فیصلوں کے خلاف اپیل پر انتہائی بھاری بھر کم اخراجات آتے ہیں کہ کوئی اپنا دفاع ہی نہ کرسکے۔ امریکا کے قول و فعل میں گہرا تضاد ہے۔ ان خیالا ت کا اظہار سپریم کورٹ کے جسٹس (ر) وجیہہ الدین احمد نے مقامی ہوٹل میں عافیت ٹرسٹ، ہیومن رائٹس نیٹ ورک و دیگر کے زیر اہتمام مشترکہ سیمینار سے ریٹائرڈ ایڈمرل سروہی، ڈاکٹر فوزیہ صدیقی، بیرسٹر نسیم باجوہ، ڈاکٹر ابوبکر شیخ، مسزشمیم کاظمی اورالطاف شکور نے بھی خطاب کیا ۔
ایمزٹی وی (کھیل) آل راؤنڈر حارث سہیل نے محمد حفیظ کےلئے خطرے کی گھنٹی بجادی اور نوجوان کرکٹرکا کہنا ہے کہ نیٹ میں مسلسل بولنگ کا ثمر مل گیا، کوچز اور کپتان نے بہتر پرفارم کرنے کا حوصلہ دیا، ٹیم کے کام آنے پر خوش ہوں۔
پاکستان کو محمد حفیظ کا ریڈی میڈ متبادل آل راؤنڈر میسر آگیا ہے، رنز دینے میں کنجوس شمار ہونیوالے تجربہ کار پلیئرکا بولنگ ایکشن آئی سی سی کے تحت بائیومکینک تجزیے میں غیر قانونی قرار دیا گیا ہے، بولنگ سے معطل کیے جانے کے بعد قوی امکان تھا کہ میزبان ٹیم 3 پیسرز محمد عرفان، وہاب ریاض اور عمرگل کیساتھ اسپنر ذوالفقار بابر کی خدمات سے فائدہ اٹھائے گی، مگر اضافی بیٹسمین کھلانے کیلئے سلو بولنگ کے شعبے کو حارث سہیل سے تقویت دینے کا فیصلہ کیا گیا۔
شاہد آفریدی کے ساتھ نوجوان بیٹسمین بھی ایک مکمل آل راؤنڈر کے روپ میں نظر آئے، لیفٹ آرم اسپنر کی پروفائل میں تو میڈیم پیسر لکھا ہے لیکن انھوں نے اچھی اسپن بولنگ کرتے ہوئے مسلسل 10 اوورز کا کوٹہ پورا کیا، حارث نے39رنز دیے لیکن کوئی وکٹ نہ حاصل کرسکے، حیرت کی بات یہ ہے کہ وہ اس سے قبل کبھی مستند بولر کے روپ میں سامنے نہیں آئے، انھوں نے کیریئر کے 57 فرسٹ کلاس میچز میں بھی صرف 11 اوورز اور 2 گیندیں ہی کی ہیں، میڈیا سے گفتگو میں انھوں نے کہا کہ ہیڈ کوچ وقار یونس، بولنگ میں انکے معاون مشتاق احمد اور مصباح الحق نے دہرے کردار کیلئے تیار کرتے ہوئے اعتماد دیا، بطور اسپنر بھی پرفارم کرنے کے حوالے سے ان کی حوصلہ افزائی کے بعد نیٹ میں 2 سے 3گھنٹے تک پریکٹس کرتا رہا۔
خوش ہوں کہ میری کارکردگی ٹیم کے کام آگئی، انھوں نے کہا کہ بیٹنگ کے دوران شاہدآفریدی نے بھی بڑا سپورٹ کیا، کسی موقع پر اس دباؤ میں نہیں آنے دیاکہ انٹرنیشنل میچ میں کتنی اہم اننگز کھیل رہا ہوں، ایک سوال پر حارث سہیل نے کہا کہ مڈل آرڈر میں بیٹنگ کرنا مشکل لیکن کچھ کردکھانے کا عزم اور سینئرز کی سپورٹ ہو تو مسائل پر قابو پایا جا سکتا ہے۔
شایمز ٹی وی (فارن ڈیسک ) لاس اینجلس میں سچے واقعے پر مبنی تھرل سے بھرپور ڈرامہ فلم ان دی ہارٹ آف دی سی( In The Heart Of The Sea)کا پہلاانٹرنیشنل ٹریلر جاری کردیا گیا ۔ران ہاورڈ کی ہدایت کاری میں بننے والی اس فلم کی کہانی مچھلیوں کے شکار کیلئے سمندر میں جانے والی ایسکس نامی ایک کشتی کے گرد گھومتی ہے جو ایک بڑی وہیل مچھلی کے حملے کا شکار ہوجاتی ہے۔فلم میں اپنی اداکاری کے جوہر دکھانے والوں میں کرس ہیمس ورتھ،بنجمن واکر،سیلین مرفی،ٹام ہالینڈ اور مائیکل فیئرلے سمیت دیگر فنکار شامل ہیں۔وارنر برادرز کے بینر تلے بننے والی اس فلم کی پروڈکشن کے فرائض بریان گریزر نے انجام دیئے ہیں جبکہ یہ فلم آئندہ برس 15مارچ کو سینما گھروں کی زینت بنے گی-
ایمزٹی وی (فارن ڈیسک) امریکی سینیٹ کمیٹی کی جاری رپورٹ میں کہا گیا ہے کہ القاعدہ دہشت گردوں پر بتائے گئے تشدد سے کہیں زیادہ بھیانک تشدد کیا گیا، اور کوئی مفید معلومات بھی نہیں مل سکیں، اس سلسلے میں سی آئی اے نے وائٹ ہاؤس اور کانگریس کو بھی دھوکے میں رکھا، رپورٹ امریکی سی آئی اے کے تفتیشی پروگرام کی 5 سال کی تحقیقات کے بعد ریلیز کی گئی ہے، سینیٹ کی انٹیلی جنس کمیٹی کی جاری کردہ رپورٹ 500 صفحات پر مشتمل ہے، جسے کمیٹی کی سربراہ ڈیان فینسٹین نے سینیٹ میں پیش کیا، رپورٹ دہشت گردی کے خلاف جنگ کے دوران القاعدہ کے گرفتار رہنماؤں اور دیگر قیدیوں پر تشدد اور ان سے حاصل ہونے والی معلومات پر مشتمل ہے۔ رپورٹ کے مطابق سی آئی کی جانب سے القاعدہ کے گرفتار دہشت گردوں پر دوران تفتیش کیا جانے والا تشدد اُس سے کہیں زیادہ بھیانک تھا کہ جسکا اعتراف کیا جاتا تھا، اوراس سے کوئی مفید انٹیلی جنس معلومات بھی نہیں مل سکی تھیں۔ سی آئی اے نے اس سلسلے میں نہ صرف وائٹ ہائوس بلکہ کانگریس تک کو دھوکے میں رکھا اور اپنے تفتیشی پروگرام کا زیادہ تر حصہ دو غیر متعلق کنٹریکٹر سے آپریٹ کرایا گیا۔ سی آئی اے کے موجودہ ڈائریکٹر جان برینن کا کہنا تھا کہ تفتیشی طریقہ کار میں خامیاں تھیں تاہم انہوں نے ان کارروائیوں کا دفاع کرتے ہوئے کہا کہ سابق صدر جارج ڈبلیو بش کے دور میں کیے جانے والے ان حربوں کے نتیجے میں امریکی شہروں کو دہشت گرد حملوں سے محفوظ رکھنے میں مدد ملی۔ رپورٹ پر اپنے رد عمل کا اظہار کرتے ہوئے صدر براک اوباما کا کہنا تھا کہ سی آئی اے کی خوفناک سزاؤں اور انکے تفتیشی طریقہ کار سے دنیا بھر میں امریکی مفادات کو نقصان پہنچا۔ انکا کہنا تھا کہ وہ اس پر کوئی دلائل دینے کی بجائے امید کرتے ہیں کہ اس ظالمانہ طریقہ کار کو اب اختیار نہیں کیا جائیگا اور اب یہ ماضی کا حصہ ہے۔ دوسری جانب امریکی وزیر خارجہ جان کیری نے خبردار کیا کہ رپورٹ منظرعام پر آنے سے دنیا بھر میں امریکی سفارت خانوں اور امریکی شہریوں کو خطرات لاحق ہوسکتے ہیں۔ وائٹ ہاؤس کے ترجمان کا کہنا تھا کہ رپورٹ کے ردعمل کو سامنے رکھتے ہوئے دنیا بھر میں امریکی سفارت خانوں سمیت دیگر عمارتوں کی سیکورٹی ہائی الرٹ کردی گئی ہے۔ اُدھر اقوام متحدہ کے انسانی حقوق کے ادارے کا کہنا تھا کہ رپورٹ سے ظاہر ہوتا ہے کہ سی آئی اے نے تفتیش کے لیے جو طریقے اختیار کیے وہ عالمی قوانین اور بنیادی انسانی حقوق کے خلاف ہیں اور اس غیر انسانی تشدد میں ملوث افراد کے خلاف قانونی کارروائی ہونی چاہئے، جس کے جواب میں، امریکی محکمہ انصاف نے ان مطالبات کو مسترد کرتے ہوئے کہا ہے رپورٹ میں کوئی ایسی بات نہیں جسکی بنیاد پر فرد جرم عائد کی جائے ۔
ایمزٹی وی (سیاسی) فیصل آباد کے وکلاء نے پی ٹی آئی کارکن کی ہلاکت کا مقدمہ سابق صوبائی وزیر قانون رانا ثناء اللہ کے خلاف درج ہونے کے خلاف آج ہڑتال اور عدالتوں کا بائیکاٹ کر دیا ہے۔ فیصل آباد میں 8 دسمبر کو ہنگامہ آرائی کے دوران پی ٹی آئی کے ایک کارکن حق نواز ہلاک ہو گیا تھا جسکے مقدمے میں سابق وزیر قانون رانا ثناء اللہ کو بھی ملزم نامزد کیا گیا ہے۔ ڈسٹرکٹ بار ایسوسی ایشن فیصل آباد کی جانب سے بار کے ممبر اور سابق صوبائی وزیر قانون رانا ثناء اللہ کے خلاف درج مقدمہ کو بے بنیاد اور جھوٹا قرار دیتے ہوئے آج ہڑتال کی کال دی گئی تھی جس پر آج وکلاء نے مکمل طور پر عدالتی بائیکاٹ کر رکھا ہے ۔ وکلاء کی جانب سے گذشتہ روز پولیو ورکر کے قتل کے واقعہ کی بھی مذمت کی گئی ہے ۔
ایمزٹی وی (فارن ڈیسک) نیوزی لینڈ سے تعلق رکھنے والے ہالی ووڈ کے صفِ اول کے ہدایت کار پیٹرجیکسن کیلئے ہالی ووڈ واک آف فیم اسٹار کا اعزاز۔ نیوزی لینڈ سے تعلق رکھنے والے آسکرایوارڈ یافتہ 53 سالہ ہدایت کار پیٹرجیکسن کو ہدایتکاری کے شعبے میں بہترین کارکردگی کا مظاہرہ کرنے پر گذشتہ روز ہالی ووڈ واک آف فیم پر ستارے سے نوازا گیا ہے۔ ہالی ووڈ کو آسکر ایوارڈ وننگ فلموں"دی ہوبٹ فرنچائز" اور"کنگ کانگ" سمیت کئی کامیاب فلمیں دینے والے پیٹر جیکسن کو ہالی ووڈ واک آف فیم میں 2,538 ویں ستارے کا حقدار ٹھہرایا گیا۔ ہالی ووڈ بولیورڈ پر اس اعزاز کا حقدار ٹھہرائے جانے کی تقریب میں پیٹر جیکسن کے دی ہوبٹ فلموں کے اداکاروں ںآرلنڈو بلوم، الیجا ووڈ، ایونجلین للی، اینڈی سرکس، رچرڈ آرمیٹج اور لی پیس کے علاوہ انکی اہلیہ اسکرین رائٹر فرین والش اور بچوں نے شرکت کی۔ اس موقع پرپیٹر جیکسن موجود اپنے مداحوں کی چاہت اور والہانہ محبت کا تہہ دل سے شکریہ ادا کیا بلکہ ہالی ووڈ واک آف فیم پر اپنے نام کے ستارے کی نقاب کشائی بھی کی ۔
ایمزٹی وی (سیاسی) سیالکوٹ میں باؤ محمد انور کے قتل پر ردعمل نہ دکھانے پر متحدہ قومی موومنٹ کے قائد الطاف حسین نے لندن اور کراچی میں رابطہ کمیٹیوں کو معطل کردیا ہے، قمرمنصورکوایم کیو ایم رابطہ کمیٹی پاکستان اورارشد حسین کولندن کا انچارج مقرر کردیا، انہوںنے رابطہ کمیٹی پر شدید برہمی کا اظہارکرتے ہو ئے کہا کہ آج بھی رابطہ کمیٹی اور ارکان قومی و صوبائی اسمبلی کو زحمت نہیں دی، کیونکہ وہ بڑے لوگ ہیں۔ زونل، یونٹ انچارجز اور کارکن اپنے طور پر احتجاج کریں ۔