ایمزٹی وی (فارن ڈیسک) بالی ووڈ میں بنگالی حسینہ کے نام سے مشہور بپاشا باسو کی آ نے والی نئی ہارر فلم "الون" کا دہشت ناک مناظر پر مشتمل پہلا ٹریلر ریلیز کر دیا گیا ہے۔ اس فلم میں بپاشا باسو ڈبل رول ادا کر رہی ہیں جبکہ انکے مدِ مقابل مرکزی کر دار انڈین ٹی وی کے نامور ہیرو کرن سنگھ گروور ادا کررہے ہیں جو کہ انکی کیرئیر کی پہلی بالی ووڈ فلم ہے۔ الون کی کہانی دو جڑواں بہنوں کے گرد گھومتی ہے جنکا دھڑ پیدائشی طور پر آپس میں جڑا ہو اہے۔ تن سے جڑی یہ دونوں بہنیں ایک دوسرے سے بے پناہ محبت کرتی ہیں اور ہمیشہ ساتھ رہنے کے وعدے بھی کرتی ہیں لیکن ایک بہن نامعلوم وجوہات کی بناء پر مرنے کے بعد بد روح کا روپ دھار کر دوسری بہن کا جینا مشکل کر دیتی ہے۔ بھو شان پٹیل کی ہدایات میں بننے والی سنسنی سے بھر پور یہ ہارر فلم 16 جنوری کو دنیا بھر سے عام نمائش کیلئے پیش کر دی جائے گی ۔

ایمز ٹی وی (نیوز ڈیسک)

خواجہ آصف کا کہنا ہے کہ اضافی بلوں کا معاملہ حل کرلیا گیا بجلی کا سرکلر ڈیٹہ 300 سے 400 ارب روپے ہے۔ حکومت کی بنیادی توجہ دریائے سندھ پر پانی سے سستی پن بجلی پیدا کرنے پر مرکوز ہے- انکا یہ بھی  کہنا تھا کہ اووربلنگ کی تین بنیادی وجوہات سامنے آئی ہیں۔ آئندہ ماہ سے بجلی کے بل معمول کے مطابق ہوں گے۔ خواجہ آصف نےبتایا کہ تربیلا فور 2016 تک مکمل کر لیا جائے گا جبکہ تربیلا فائیو پر بھی کام شروع ہو گیا ہے۔ بھاشا ڈیم کی زمین کی خریداری کے لئیے 25 ارب روپے واپڈا اور گلگت بلتستان حکومت کے پاس موجود ہیں،  وفاقی وزیر پانی و بجلی کا کہنا تھا کہ داسو پاور پراجیکٹ کیلئے ابتدائی فنڈنگ مل چکی ہے اور کام بھی شروع ہو گیا ہے۔

ایمز ٹی وی (فارن ڈیسک ) پاک امریکا دفاعی مشاورتی گروپ کے 23ویں اجلاس میں دونوں ملکوں نے اس بات پر بھی اصرار کیا کہ اتھادی امدادی فنڈ کی مدت ختم ہونے بعد پاکستان کو رقم کی ضرورت پڑے گی -

اجلاس کے بعد جاری مشترکہ بیان میں کہا گیا کہ دونوں وفود نے شمالی وزیرستان میں دہشت گردوں کے خلاف جاری آپریشن کی اہمیت کو تسلیم کرتے ہوئے کہا کہ اس سے دہشتگردوں کو بھاری نقصان اٹھانا پڑا۔

دونوں ملکوں نے اس بات پر بھی رضامندی ظاہر کی کہ دہشت گردی اور عسکریت پسندی کے خلاف جنگ میں پاکستانی ضروریات کا خیال رکھا جاتا رہے گا۔

پاک امریکا دفاعی مشاورتی گروپ کا اجلاس نو اور دس دسمبر کو واشنگٹن میں منعقد ہوا تھا جس میں پاکستانی وفد کی قیادت سیکریٹری ڈیفنس ریٹائرڈ لیفٹننٹ جنرل عالم خٹک نے کی جبکہ امریکی وفد کی قیادت پالیسی پر سیکریٹری ڈیفنس کرسٹائن ای ورمتھ کر رہے تھے۔

اجلاس میں دونوں ملکوں نے پاک امریکا دوطرفہ تعلقات میں مسلسل مثبت پیشرفت کا خیرمقدم کیا اور اس بات پر اتفاق کیا کہ خطے میں امن و استحکام اور القاعدہ سمیت تمام دہشتگرد قوتوں کو شکست دینے کے لیے دوطرفہ تعاون بہت ضروری ہے۔

ایمزٹی وی (سیاسی) سیالکوٹ میں باؤ محمد انور کے قتل کے خلاف ایم کیوایم کے کارکنوں نے کراچی سمیت مختلف شہروں میں مظاہرے کیے۔ مظاہرین نے پنجاب حکومت کے خلاف نعرے بازی کی اور مطالبہ کیا کہ قاتلوں کو گرفتار کر کے کیفر کردار تک پہنچایا جائے۔ حیدرآباد میں ایم کیوایم زون کی جانب سے حیدر چوک پر احتجاجی مظاہرہ کیا گیا اوردھرنا دیا گیا۔ مظاہرے اور دھرنے میں زونل انچارج نوید شمسی، راشد ممتاز، ایم این اے سید وسیم حسین اور ایم پی اے رانا انصار سمیت مرد و خواتین کارکنوں کی بڑی تعداد شریک تھی۔ ایم کیوایم سکھر زون کے کارکنوں نے زونل انچارج سکھر شہزادہ گلفام کی سربراہی میں پریس کلب کے سامنے احتجاجی مظاہرہ کیا۔ میرپورخاص میں بھی ایم کیو ایم کے کارکنوں نے پریس کلب کے سامنے احتجاجی مظاہرہ کیا۔ ایم کیو ایم میرپورخاص زون کے انچارج مجیب الحق نےکہا کہ جاگیردار اور سرمایہ دار نہیں چاہتے کہ متحدہ کا پیغام دیگر صوبوں تک پھیلے۔نوابشاہ کے پراٹا چوک پرمتحدہ قومی موومنٹ کی جانب سے احتجاج کیا گیا۔ مظاہرے سے ایم کیوایم نوابشاہ کے جوائنٹ زونل انچارج راؤ ساجد اور دیگر نے خطاب کیا۔ اسکے علاوہ دادو، ٹنڈواللہ یار اور خیرپور سمیت سندھ کے دیگر چھوٹے بڑےشہروں میں بھی ایم کیوایم کےرہنما باؤمحمد انور کے قتل کے خلاف مظاہرے کیے گئے۔ ملتان میں بھی ایم کیو ایم کے کارکنوں نے پریس کلب پہنچ کر احتجاج ریکارڈ کرایا۔ اس موقع پر مقتول کی غائبانہ نماز جنازہ بھی ادا کی گئی ۔