کراچی: پاکستان سنگل ونڈو اور سرسید یونیورسٹی آف انجینئرنگ اینڈ ٹیکنالوجی کے مابین ایک مفاہمتی یادداشت پر دستخط کئے گئے جس کے تحت دونوں اداروں کے درمیان طویل مدتی پائیدار اور باہمی تعاون قائم کرنا ہے ۔

معاہدہ پر دستخط سرسید یونیورسٹی کی جانب سے رجسٹرارانجینئر کموڈور (ر) سید سرفرازعلی اورپاکستان سنگل ونڈو کی جانب سے او ڈی مینجر عثمان محبوب نے کئے ۔

مفاہمتی یادداشت کے تحت سرسید یونیورسٹی کے طلباء اور گریجویٹس کو انٹرن شپ کے مواقع فراہم کئے جائیں گےاورتعلیم،تربیت، تحقیق، صنعتی روابط اور روزگار کے مواقع فراہم کرنے کے حوالے سے مشترکہ کوششیں اور کاوشیں کی جائیں گی

اس کے علاوہ مشترکہ تحقیقی سرگرمیوں کی حوصلہ افزائی کی جائے گی اور تحقیقی سرگرمیوں کو فروغ دیا جائے گا ۔ معاہدے کے تحت جامعہ کے اساتذہ کی مختصر مدت کے لیے پاکستان سنگل ونڈو میں تعیناتی کی جائے گی ۔

اسلام آباد: وزیراعظم شہباز شریف نے وفاقی ہائر ایجوکیشن کمیشن کے چیئرپرسن کے تقرر کے سلسلے میں 6؍ رکنی تلاش کمیٹی قائم کردی ہے جس کا باقاعدہ نوٹیفیکیشن جاری کردیا گیا ہے۔

تلاش کمیٹی کا کنوینر وفاقی وزیر برائے تعلیم و پیشہ وارانہ تربیت رانا تنویر کو مقرر کیا گیا ہے جبکہ ارکان میں ہلال احمر پنجاب کے چیئرمین جسٹس (ر) شیخ احمد فاروق، پنجاب انفارمیشن ٹیکنالوجی بورڈ کے سابق چیئرمین ڈاکٹر عمر سیف، علامہ اقبال اوپن یونیورسٹی کے وائس چانسلر ڈاکٹر ضیاء القیوم ، بلوچستان یونیورسٹی آف انجینئرنگ اینڈ انفارمیشن ٹیکنالوجی کے وائس چانسلر احمد فاروق بازئی اور سیکرٹری وزارت تعلیم و پیشہ وارانہ تربیت ناہید شاہ درانی شامل ہیں۔

یہ کمیٹی ہائر ایجوکیشن کمیشن آرڈیننس 2002ء کے سیکشن 3کے تحت مشتہر کردہ معیار پر درخواستوں کی جانچ پڑتال اور شارٹ لسٹ کرے گی اور انٹرویو لینے اور کنٹرولنگ اتھارٹی کی منظوری کیلئے کم از کم تین موزوں / اہل امیدواروں کے پینل کی تجویز پیش کرے گی۔کمیٹی امیدواروں کی متعلقہ اہلیت اور تجربے کا جائزہ لینے کیلئے رہنما خطوط بھی تجویز کرے گی۔

چیئرمین ایچ ای سی کے عہدے کیلئے عمر کی کوئی حد مقرر نہیں ہے جبکہ امیدواروں کو درخواست جمع کرانے کیلئے محض 4؍ روز دئیے گئے تھے۔ چیئرمین ایچ ای سی ڈاکٹر طارق بنوری کی چار سالہ مدت 28 مئی کو مکمل ہوگئی تھی تاہم سابق وزیر اعظم عمران خان کے دور میں آرڈیننس جاری کر کے ان کی مدت چار سال سے کم کرکے دو سال کرکے انہیں عہدے سے ہٹادیا گیا تھا تاہم وہ ہائی کورٹ کے احکامات کے بعد بحال ہوگئے تھے مگر اس عرصے تک وہ 8ماہ عہدے سے محروم رہے تھے۔ اس معیاد کی بحالی کیلئے انہوں نے وزیر اعظم کو خط بھی تحریر کر رکھا ہے۔

لاہور: پاکستان کے وکٹ کیپر بیٹر محمد رضوان کی ویٹالٹی بلاسٹ ٹی ٹوئنٹی میں شاندار بلے بازی کا سلسلہ جاری ہے۔

محمد رضوان نے بلاسٹ ٹی ٹوئنٹی میں مسلسل دوسری نصف سنچری اسکور کی ہے، انہوں نے 43 گیندوں پر 2 چھکوں اور 4 چوکوں کی مدد سے 58 رنز کی اننگز کھیلی۔

قومی وکٹ کیپر بلے باز نے اس سے قبل گلمورگن کے خلاف بھی نصف سنچری اسکور کی تھی۔

محمد رضوان نے سسیکس کی نمائندگی کرتے ہوئے گلیمورگن کاؤنٹی کے خلاف 60 گیندوں پر بطور اوپنر 81 رنز کی ناقابلِ شکست اننگز کھیلی۔

پیرس: چیمپیئنز لیگ کے فائنل میں ریال میڈرڈ نے لیور پول کو سنسنی خیزمقابلےکے بعد 0-1 سے شکست دے دی۔

پیرس میں ہونے والے چیمپیئنز لیگ فائنل میں ریال میڈرڈ نے 14 واں ٹائٹل حاصل کیا جبکہ لیورپول ساتویں مرتبہ یہ خواب پورا کرنے میں ناکام رہا۔ ریال میڈرڈ کی جانب سے وینیشیئس جونیئر کے گول نے میچ میں اہم کردار ادا کیا اور فتح کا راستہ ہموار کیا۔

میچ سے پہلے ہی ریال میڈرڈ کو پسندیدہ قرار دیا جا رہا تھا اور فیصلہ کُن لمحہ 59 منٹ بعد اس وقت آیا جب وینیشیئس نے گول کیا۔

لیورپول اب تک چھ مرتبہ یہ ٹرافی جیت چکا ہے اور آخری مرتبہ اس نے یہ کپ سنہ 2018 تا 2019 کے سیزن میں اٹھایا تھا۔ محمد صلاح جو سنہ 2018 میں ریال میڈرڈ کے خلاف فائنل میں انجری کے باعث میچ سے باہر ہو جانے کا بدلہ لینا چاہتے تھے، اپنی خواہش پوری نہ کر سکے، حریف ٹیم کے گول کیپر نے انکے 3 یقینی گولز روکے۔

دوسری جانب کارلو اینسیلوٹی چوتھی مرتبہ چیمپیئنز لیگ ٹائٹل جیتنے والے تاریخ کے پہلے کوچ بن چکے ہیں۔

لاہور بورڈنے ملتوی ہونے والاواحد پرچےکی نئی تاریخ کااعلان کردیا۔

لاہور بورڈ کے تحت میٹرک سالانہ امتحان کا ملتوی ہونے والا واحد مطالعہ پاکستان کا پیپر 11 جون کو لیا جائے گا۔

لاہور بورڈ آف انٹر میڈیٹ اینڈ سکینڈری ایجوکیشن لاہور کے تحت 25 مئی کو ملتوی ہونے والے مطالعہ پاکستان کے پیپر کی تاریخ کا اعلان کردیا گیا۔ پیپر آئندہ ماہ 11 جون بروز ہفتہ کو لیا جائے گا۔لاہور بورڈ نے طلبا کو پیپر سے ایک گھنٹہ قبل امتحانی سنٹر پہنچنے کی ہدایت کردی۔ صبح کی شفٹ میں 8 بجے اور دوپہر کی شفٹ میں 1 بجے پیپر لیا جائے گا۔

حیدرآباد: ثانوی و اعلیٰ ثانوی تعلیمی بورڈ حیدرآبادنےانٹرمیڈیٹ کےسالانہ امتحانات برائے 2022 کا شیڈول جاری کردیا۔

تعلیمی بورڈ حیدرآباد کے تحت گیارہویں و بارہویں جماعتوں کے سالانہ امتحانات2022ء 15جون سے شروع ہو نگے ، صبح کے اوقات میں سائنس گروپ اور دوپہر کو جنرل سائنس گروپ کے امتحانات ہو نگے ۔

تعلیمی بورڈ حیدرآباد کے زیر اہتمام 10اضلاع مٹیاری ،حیدرآباد ، دادو ،بے نظیر آباد، جام شورو ، ٹھٹھہ ، سجاول ، بدین ، ٹنڈو الہیار اور ٹنڈو محمد خان میں امتحانات کا آغاز بدھ15جون سے ہو گاجبکہ اختتام پیر4جولائی کو ہوگا

جبکہ دوسری جانب بارہویں جماعت کے امتحانی فارم وصول کا سلسلہ جاری ہے جو آج (اتوار )کو بھی بورڈ سے منسلک یوبی ایل کی برانچ میں جمع کرائے جاسکتے ہیں جبکہ فارم جمع کرانے کی حتمی تاریخ30مئی ہے ۔

لاہور: کتابوں کی عدم موجودگی کے باعث موسم گرما کی تعطیلات کاکام تیار کرنےمیں مشکلات کاسامنا ہے۔

محکمہ اسکول ایجوکیشن پنجاب کی جانب سے موسم گرما کی چھٹیوں کاکام دینے کی ہدایت کی گئی ہےمگر نئی کلاسز کےلئے کتابیں ہی نہیں ملیں ۔لاہو ر کے سرکاری اسکولو ں میں زیر تعلیم طلبا کے لئے 36لاکھ نئی کتابیں فوری طورپر درکار ہیں۔

تاحال کسی اسکول میں طلبا کو نئی کتابیں فراہم نہیں کی جاسکیں۔ ڈسٹرکٹ ایجوکیشن اتھارٹی نے گرمی کی چھٹیوں کاہوم ورک 31 مئی سے قبل تیار کرنے کوکہاگیا ہے ۔اساتذہ کاکہناہے کہ بغیر کتابوں کے بچے ہوم ورک کیسے کریں گے؟ پنجاب ٹیکسٹ بک بورڈ نئی کتابوں کی فراہمی کو فوری یقینی بنائے

لندن: پاکستانی نژاد برطانوی باکسر عامر خان نے ریٹائرمنٹ کا اعلان کردیا۔

عامر خان نے سوشل میڈیا پر جاری پیغام میں اپنی ریٹائرمنٹ کے حوالے سے بتاتے ہوئے کہا کہ مجھے اپنے 27 سالہ کیرئیر پر فخر ہے، اپنے مداحوں، دوستوں اور فیملی کا شکر گزار ہوں۔

پاکستانی نژاد برطانوی باکسر نے سوشل میڈیا پر اپنے کیرئیر کی چند تصاویر بھی شیئر کیں۔

یاد رہے کہ عامر خان نے اپنے باکسنگ کیرئیر میں 34 فائٹس جیتیں اور 6 میں انہیں شکست کا سامنا کرنا پڑا۔

لاہور: قومی کرکٹ کے سابق کپتان اور آل رائونڈر شاہد آفریدی نے چیمپئنز ٹرافی کےفاتح کپتان سرفرازاحمدکی حمایت کردی

پاکستان کے سابق کپتان اور سٹار آل راؤنڈر شاہد آفریدی نے 2017ء کی چیمپئنز ٹرافی کے فاتح کپتان سرفراز احمد کی حمایت کرتے ہوئے کہا کہ اگر ان کے ہم منصب محمد رضوان کو ویسٹ انڈیز کے خلاف آئندہ ہوم سیریز میں آرام دیا جاتا ہے تو انہیں موقع دیا جائے گا۔

آفریدی نے کہا سرفراز کو موقع دیا جانا چاہیے اگر سلیکشن کمیٹی انہیں سیریز کے لیے منتخب کرتی ہے۔ اگر رضوان کو آرام دیا جاتا ہے اور سرفراز سکواڈ میں ہوتے ہیں تو مجھے یقین ہے کہ سرفراز کھیلنے کا حقدار ہے۔

انہوں نے مزید کہا کہ میری رائے میں سرفراز دوسرا بہترین انتخاب ہے اور اگر وہ اسکواڈ کا رکن ہے تو اسے پہلے موقع دیا جانا چاہیے۔ ہمیں کسی کھلاڑی کے ساتھ احترام کے ساتھ پیش آنا چاہیے۔ آفریدی نے نوجوان وکٹ کیپر بلے باز محمد حارث کے ون ڈے میں ڈیبیو کرنے اور رضوان کے بعد پاکستان کے لیے دوسرے وکٹ کیپنگ آپشن ہونے کے امکان کے بارے میں یہ کہہ کر رائے دی کہ حارث کے لیے ابھی بہت جلدی ہے، ہمیں حارث کے لیے اتنی جلدی کیوں ہے؟ اسے کھیلنے دو۔

پنجاب: اسکولوں میں تعلیمی سیشن کے حوالےسے محکمہ اسکول ایجوکیشن نےوضاحت کردی

محکمہ اسکول پنجاب کا کہناہے کہ تعلیمی سیشن 31مئی تک جاری رہےگا جبکہ جبکہ قبل ازوقت چھٹیوں کے حوالےسے خبروں میں کوئی صداقت نہیں۔

انہوں نے مزید کہا کہ تعطیلات کے حوالےسے تجویز آئندہ ہفتےسیکرٹری اسکولز ایجوکیشن کو بھجوائی جائےگی۔

انہوں نے واضح کیاہےکہ اسکولوں میں موسم گرما کی تعطیلات جون اور جولائی میں ہونگی جبکہ نیا تعلیمی سال یکم اگست سے شروع ہوگا