ایمزٹی وی(بزنس) پاکستان نے وزارت مواصلات کی اجازت اور ان رولمنٹ کے بغیر ملکی و غیرملکی ٹرانسپورٹ کمپنیوں کو سی پیک کے تحت اشیا کی کراس بارڈر ترسیل کی اجازت نہ دینے کا اصولی فیصلہ کیا ہے جبکہ وفاقی حکومت نے مذکورہ کمپنیوں کی رجسٹریشن کے طریقہ کار اور رولزکا ابتدائی مسودہ تیار کرلیا ہے۔

میڈیا کی دستیاب دستاویز کے مطابق وزارت مواصلات کی تیارکردہ مجوزہ میکنزم و رولز میں کہا گیا ہے کہ سی پیک کے آپریشنل ہونے پر کسی بھی ملکی و غیر ملکی ٹرانسپورٹ کمپنی کو وزارت مواصلات میں ان رولمنٹ کرائے اوراجازت حاصل کیے بغیر کراس بارڈر اشیا ترسیل کرنے کی اجازت نہیں دی جائے گی، کمپنیوں کو اشیا کی کراس بارڈر ترسیل کی آپریشنل سرگرمیوں کی اجازت کیلیے وزارت مواصلات کو درخواست دینا ہوگی جس کے ساتھ تمام ضروری دستاویزات بھی فراہم کرنا ہونگی، ان رولمنٹ کیلیے ٹرانسپورٹ کمپنی کو پہلے کمپنیز آرڈیننس کے تحت ایس ای سی پی سے رجسٹریشن کرانا ہوگی۔

مذکورہ کمپنی کا پرائیویٹ لمیٹڈ کمپنی ہونے کے ساتھ کار آمد نیشنل ٹیکس نمبر اور سیلز ٹیکس رجسٹریشن نمبر ہونا بھی ضروری ہے، رجسٹریشن کیلیے غیر ملکی کمپنی کے پاس کم از کم 10اور مقامی ٹرانسپورٹر کے پاس 5گاڑیاں ہونی چاہئیں، غیرملکی کمپنی کا اشیا کی ترسیل کیلیے کسی مقامی ٹرانسپورٹ کمپنی سے جوائنٹ وینچر ہونا ضروری ہوگا، اس کیلیے زیادہ سے زیادہ غیر ملکی ایکویٹی کی شرح 70 فیصد تک ہوسکتی ہے، غیرملکی ٹرانسپورٹر کے بورڈ آف ڈائریکٹرز میں کم ازکم 2 پاکستانی ممبر بھی ہونا ضروری ہوگا، ان رولمنٹ کی درخواست کے ساتھ ٹرانسپورٹ کمپنی کو گاڑیوں کی تصدیق شدہ کارآمد رجسٹریشن، نیشنل ہائی ویز اینڈ موٹروے پولیس کا فٹنس سرٹیفکیٹ فراہم کرنا ہوگا۔

دستاویز کے مطابق وزارت مواصلات اندراج کی درخواست سیکیورٹی کلیئرنس کیلیے وزارت داخلہ کے ذریعے متعلقہ سیکیورٹی ایجنسیوں کو بھجوائے گی، قواعدو ضوابط اور قانونی تقاضے پورے کرنے کیساتھ سیکورٹی کلیئرنس کی صورت میں ملکی و غیر ملکی ٹرانسپورٹ کمپنیوں کی 5 سال کیلیے ان رولمنٹ کرکے کراس بارڈر ترسیل کرنے دی جائیگی۔

دستاویز کے مطابق ٹرانسپورٹرز کو اسٹیمپ پیپر پر بیان حلفی بھی دینا ہوگا کہ وہ پاکستانی قواعدوضوابط اور قوانین کی پاسداری کرینگے، دستاویزمیں خامی یا کسی بدعنوانی کے باعث پاکستان میں یا باہر نقصان کی صورت میں تمام ذمے داری متعلقہ ٹرانسپورٹ کمپنی پر عائد ہوگی۔ ذرائع کے مطابق مسودے کو اسٹیک ہولڈرز کی مشاورت سے حتمی شکل دی جائیگی۔

ایمزٹی وی(تجارت) پاکستان اسٹاک ایکس چینج کے40فیصد اسٹریٹجک حصص کی فروخت کے لیے چینی سرمایہ کار کنسورشیم کی بولی منظور کر لی گئی ہے جس سے کم وبیش 9ارب روپے کی آمدن متوقع ہے۔

پاکستان اسٹاک ایکس چینج کی جانب سے جاری کردہ اعلامیے کے مطابق شہزاد چامڈیہ کی سربراہی میں قائم کی جانے والی ڈائیوسمنٹ کمیٹی کو 22 دسمبر تک ملنے والی بولیاں تمام فریقین کے نمائندوں کی موجودگی میں جمعرات کو ہی کھولی گئیں جس میں چینی کنسورشیم کی جانب سے سب سے زیادہ 28 روپے فی حصص کی بولی دی جسے متعلقہ قوانین کے تحت کامیاب قرار دیا گیا۔

چینی کنسورشیم چین کی 3 اسٹاک ایکس چینجز بشمول چائنا فنانشل فیوچر ایکس چینج کمپنی لمیٹڈ، شنگھائی اسٹاک ایکس چینج اور شینزن اسٹاک ایکس چینج کے ساتھ 2 بڑے مالیاتی اداروں پاک چین انویسٹمنٹ کمپنی لمیٹڈ اور حبیب بینک لمیٹڈ پر مشتمل ہے، ڈائیوسٹمنٹ کمیٹی سیکیورٹیزاینڈ ایکس چینج کمیشن سے منظوری کے بعد کامیاب بولی دینے والے کنسورشیم کو قبولیت کا خط (لیٹر آف ایکسیپٹینس) جاری کرے گی۔

ڈائیوسٹمنٹ پالیسی کے تحت اسٹاک ایکس چینج میں عوامی شراکت بڑھانے کے لیے20فیصد حصص کی عوامی فروخت آئندہ 6 ماہ میں کی جائے گی اور ایکوزیشن کا عمل مکمل کرنے کے لیے مجموعی طور پر 16کروڑ حصص عوام کو فروخت کیے جائیں گے، نیلامی کا عمل مکمل ہونے کے بعد اسٹاک ایکس چینج کے بنیادی آپریشنز کا کنٹرول اسٹریٹجک انویسٹرزکو سونپ دیا جائے گا۔

پاکستان اسٹاک ایکس چین کی نیلامی میں ابتدائی طور پر 19سرمایہ کاروں نے دلچسپی کا اظہار کیا تھا جن میں چین، برطانیہ، امریکا کے اسٹرٹیجک سرمایہ کاروں سمیت ایکویٹی فنڈز اور مقامی مالیاتی ادارے ایم سی بی بینک، نیشنل بینک، فیصل بینک اور ایچ بی ایل شامل تھے۔ اسٹیٹ بینک آف پاکستان اور سیکیورٹیز اینڈ ایکس چینج کمیشن کی جانب سے مالیاتی اداروں پر 5فیصد سے زائد حصص کی آفر دینے پر پابندی عائد کی گئی تھی۔

واضح رہے کہ حالیہ نیلامی کے عمل میں40 فیصد یا 32 کروڑ حصص اسٹریٹجک سرمایہ کار کو فروخت کرنے کے لیے پیش کیے گئے جن کے لیے پی ایس ایکس اعلامیے کے مطابق سب سے بڑی بولی 28 روپے فی شیئر قرار پائی اس حساب سے بروکرز کو 8ارب 96 کروڑ روپے کی آمدن متوقع ہے۔

ایمز ٹی وی(انٹرٹینمنٹ) تمغہ امتیاز اور پرائیڈ آف پرفارمنس کی حامل پاکستان کی معروف گلو کارہ ملکہ ترنم نور جہاں کی آج 16ویں برسی منائی جارہی ہے۔

تفصیلات کےمطابق برصغیر کی نامورگلوکارہ ملکہ ترنم نور جہاں کو ہم سے بچھڑے 16برس بیت گئے ہیں مگر وہ اپنے صدا بہار گانوں کی بدولت آج بھی ہم میں موجود ہیں۔

ملکہ ترنم نور جہاں 21 ستمبر 1926 کو قصور میں پیدا ہوئیں،ان کا اصل نام اللہ وسائی جبکہ نور جہاں ان کا فلمی نام تھا۔

انہوں نے اپنے فنی کیرئیر کا آغاز 1935 میں پنجابی زبان میں بننے والی پہلی اولین فلم ’شیلا عرف پنڈ دی کڑی‘سے بطور چائلڈ سٹار بے بی نور جہاں کے نام سے کیا۔

بے بی نورجہاں نے بطور چائلڈ اسٹارمتعدد فلمیں کیں جن میں ’گل بکاﺅلی‘، ’سسی پنوں‘، ’ہیرسیال‘شامل ہیں‘۔

موسیقار غلام حیدر نے1941میں انہیں اپنی فلم ’خزانچی‘ میں پلے بیک سنگر کے طور پر متعارف کروایا اور اسی برس بمبئی میں بننے والی فلم ’خاندان‘ ان کی زندگی کا ایک اور اہم سنگ میل ثابت ہوئی۔

اسی فلم کی تیاری کے دوران ہدایت کار شوکت حسین رضوی سےان کی شادی ہوگئی،جبکہ قیام پاکستان کے بعد وہ اپنے شوہر شوکت حسین رضوی کے ہمراہ ممبئی سے کراچی منتقل ہوگئیں۔

انہوں نےبطوراداکارہ بھی متعدد فلمیں کیں جن میں گلنار،چن وے، دوپٹہ، پاٹے خان، لخت جگر، انتظار،نیند، کوئل، چھومنتر، انار کلی اور مرزا غالب کے نام شامل ہیں۔

میڈم نورجہاں نے 1965ءکی جنگ میں اے وطن کے سجیلے جوانوں، رنگ لائے گا شہیدوں کا لہو، میریا ڈھول سپاہیا تینوں رب دیاں راکھاں، میرا ماہی چھیل چھبیلا کرنیل نی جرنیل نی، اے پتر ہٹاں تے نہیں وکدے گاکرپاک فوج کے جوش وجذبے میں بے پناہ اضافہ کیا۔

ملکہ ترنم نور جہاں 23 دسمبر 2000 کو 74 برس کی عمر میں انتقال کر گئیں۔اگرچے ایسا لگتا ہے کہ وہ ہم میں نہیں لیکن ان کے گائے ہوئے گیت آج بھی عوام میں بےپناہ مقبول ہیں۔

ایمز ٹی وی(انٹرٹینمنٹ) بالو ماہی' کے پہلے ٹیزر کو دیکھ کر ایسا محسوس ہوا تھا کہ فلم ایک سنجیدہ رومانوی کہانی پر مبنی ہے، تو اس کا نیا ٹریلر نے بلکل مختلف تاثر دیا ہے۔

فلم 'بالو ماہی' کی کہانی نہایت ہی کامیڈی نظر آرہی ہے، جس میں کئی تیز گانے اور ایکشن کے مناظر شامل ہیں، فلم ٹریلر سے تو دیکھنے میں کافی پر لطف نظرآرہی ہے، تاہم امید ہے کہ یہ اور رومانوی فلموں کی طرح نہ بنائی گئی ہو۔

فلم کے ٹریلر سے کہانی کا کچھ ایسا اندازہ لگایا جاسکتا ہے، جیسے مرکزی کردار عثمان خالد بٹ ایک ایسی شادی میں پہنچ جاتے ہیں، جہاں وہ سمجھتے ہیں کہ شادی میں موجود دلہن وہ لڑکی ہے جس سے وہ پیار کرتے تھے، تاہم قدرت کو کچھ اور ہی منظور تھا ، وہ لڑکی کوئی اور یعنی عینی جعفری نکلتی ہیں، جو یہ شادی نہیں کرنا چاہتی، اور موقع کا فائدہ اٹھا کر عثمان خالد کے ساتھ بھاگ جاتی ہیں، جس کے بعد ان کے رومانوی سفر کا آغاز ہوتا ہے۔

اس فلم کے ٹریلر کو دیکھ کر کہیں نہ کہیں فلم 'کراچی سے لاہور' کی بھی یاد آئی، فلم میں پاکستان کے خوبصورت علاقوں کو نہایت بہترین انداز میں پیش کیا گیا ہے۔

امید ہے کہ 'نامعلوم افراد'، 'جوانی پھر نہیں آنی' اور 'ایکٹر ان لا' کی طرح فلم 'بالو ماہی' بھی پاکستان کی کامیاب فلم ثابت ہو۔

حیثم حسین کی ہدایات میں بننے والی فلم 'بالو ماہی' کی کہانی سعد اظہر نے تحریر کی، جسے 10 فروری 2017 کو سینما گھروں میں نمائش کے لیے پیش کیا جائے گا۔

ایمزٹی وی(اسپورٹس) قومی ٹیم کے آل راؤنڈر شاہد خان آفریدی نے کہا ہے کہ جب بھی موقع ملا بھارت میں انکے نام کی شرٹ پہننے پر گرفتار کیے جانے والے مداح پون چوہدری سے ضرور ملوں گا ۔شاہد آفریدی کے 21 سالہ مداح کو آسام میں مقامی کرکٹ ٹورنامنٹ کے دوران ان کی شرٹ پہننے پر گرفتار کر لیا گیا تھا۔

حکمران جماعت بھارتیہ جنتا پارٹی کے یوتھ ونگ کی جانب سے شکایت پر رپورن چوہدری کو آٹھ گھنٹے تک پولیس کی حراست میں رکھا گیا۔آفریدی کے پرستار نے ٹی وی چینل سے خصوصی گفتگو کرتے ہوئے کہا کہ مجھے اکثر جارحانہ بیٹنگ کرنے پر میرے گاؤں میں شاہد آفریدی کہا جاتا ہے اور یہی وجہ تھی کہ انہوں نے آفریدی کی طرح دس نمبر کی شرٹ پہنی تھی

اس موقع پر معروف آل راؤنڈر کے پرستار نے ان سے زندگی میں ایک مرتبہ ملاقات کی خواہش ظاہر کی اور امید کی کہ ان کی یہ خواہش ایک دن ضرور پوری ہو گی۔اس سلسلے میں جب شاہد آفریدی سے رابطہ کیا گیا تو انہوں نے کہا کہ پاکستان اور بھارت کو کرکٹ کے ذریعے قریب لایا جا سکتا ہے، ہمیں زیادہ سے زیادہ کرکٹ کھیلنے کی حوصلہ افزائی کرنی چاہیے۔انہوں نے مزید کہا کہ انہیں جب کبھی بھی پون سے ملنے کا موقع ملا تو وہ ان سے ضرور ملنا پسند کریں گے۔

ایمز ٹی وی(مانیٹرنگ ڈیسک) فرانس میں دنیا کی پہلی سولر ہائی وے کا افتتاح کردیا گیا۔ اس سڑک کو شمسی توانائی کے پینلز سے بنایا گیا ہے جو سڑک کنارے لگی لائٹس کو روشنی فراہم کریں گے۔

فرانس کے ایک چھوٹے سے قصبے میں بنائی جانے والی اس سڑک کا نام ’واٹ وے‘ رکھا گیا ہے۔ ایک کلومیٹر کے فاصلے پر محیط اس سڑک کا افتتاح فرانس کی وزیر ماحولیات سیگولین رائل نے کیا۔

انہوں نے ملک کے مختلف حصوں میں اسی طرز کی سڑکیں تعمیر کرنے کے 4 سالہ منصوبے کا بھی اعلان کیا۔

شمسی توانائی کے پینلز سے سڑکیں بنانے کا خیال جرمنی، نیدر لینڈز اور امریکا میں بھی زیر غور ہے جو نہ صرف سڑکوں کے انفراسٹرکچر کو بہتر بنائیں گی بلکہ علاقے کی توانائی کی ضروریات کو بھی پورا کرنے میں مددگار ثابت ہوں گی۔

فرانسیسی ماہرین کا کہنا ہے کہ اس طرح کی سڑکوں کی تعمیر سے فرانس توانائی کے شعبہ میں خود کفیل ہوسکتا ہے اور اس مد میں خرچ کیا جانے والا کثیر زر مبادلہ بھی بچا سکتا ہے۔

فی الحال دیکھا جارہا ہے کہ یہ سڑک کتنے عرصے تک مختلف موسموں اور حالات کا مقابلہ کرسکتی ہے اور بھاری بھرکم ٹرکوں کے گزرنے کی صورت میں کتنے عرصے تک صحیح سالم رہ سکتی ہے۔

ماہرین کا کہنا ہے کہ اس منصوبے میں صرف ایک خامی ہے کہ ان شمسی پینلز کی افادیت اس وقت بڑھ جاتی ہے جب انہیں سورج کے رخ پر براہ راست ترچھا کر کے نصب کیا جائے۔ سڑک پر بالکل سیدھا نصب کرنے کی صورت میں یہ سورج سے کم توانائی حاصل کرتے ہیں۔

سڑکوں پر سورج سے توانائی حاصل کرنے والے ذرائع استعمال کرنے کا خیال کافی پرانا ہے۔

اس سے قبل پولینڈ میں بھی سڑک پر ’لومینوفور‘ نامی مادہ بچھایا گیا تھا جو دن بھر سورج کی روشنی کو اپنے اندر جذب کرتا ہے اور اندھیرا ہوتے ہی جگمگا اٹھتا ہے۔

ایمزٹی وی(اسپورٹس) آسٹریلیا کیخلاف پہلے ٹیسٹ میچ میں انجری کا شکار ہونے والے پاکستانی فاسٹ بالر محمد عامر کے میلبورن میں ہونے والے دوسرے ٹیسٹ میچ سے قبل مکمل فٹ ہونے کا امکان ہے۔

ٹیسٹ میچ میں دہشتگردی کا خطرہ

برسبین میں ہونے والے پہلے ٹیسٹ میچ میں فیلڈنگ کے دوران محمد عامر کو گھٹنے میں تکلیف ہوئی تھی اور پھر دوسری اننگز میں بیٹنگ کرتے ہوئے مچل اسٹارک کی 152کلومیٹر فی گھنٹہ کی رفتار سے کی گئی گیند ان کی رانوں پر لگی تھی۔

ٹیم مینجمنٹ نے قوی امید ظاہر کی ہے کہ محمد عامر دوسرے ٹیسٹ سے قبل مکمل فٹ ہو جائیں گے اور محمد عامر خود بھی اس کے لئے پر امید ہیں۔پاکستان اور آسٹریلیا کے درمیان سیریز کا دوسرا ٹیسٹ میچ 26 دسمبر سے میلبورن میں کھیلا جائے گا۔

ی
ایمزٹی وی(اسپورٹس)آسٹریلیا میں باکسنگ ڈے ٹیسٹ سے قبل دہشتگردی کی مبینہ کوشش ناکام بنائے جانے کے بعد پاکستانی کرکٹ ٹیم کی سکیورٹی مزید سخت کر دی گئی۔

میڈیا رپورٹ کے مطابق آسٹریلوی پولیس نے دعوی کیا ہے کہ کرسمس کے موقع پر میلبورن میں دہشتگردی کا بڑا حملہ ناکام بناتے ہوئے 7 افراد کو گرفتار کرلیا گیا ہے۔ دوسری جانب کرکٹ آسٹریلیا نے اپنے اعلامیے میں کہا ہے کہ ہم میچ کے بااحسن انداز میں انعقاد کے لیے وکٹوریہ پولیس اور وفاقی سیکیورٹی ایجنسیز کے ساتھ مل کر کام کر رہے ہیں۔

پاکستان سے باکسنگ ڈے ٹیسٹ اور دیگر میچز کا پرامن ماحول میں انعقاد ہماری اولین ترجیح ہے، کھلاڑیوں، شائقین اور میچ آفیشلز کی سکیورٹی کو ہر حال میں ممکن بنایا جائے گا۔ آسٹریلوی حکام کا کہناہے کہ مقامی اور غیر ملکی کرکٹرز کی سکیورٹی پر ہرگز کوئی سمجھوتہ نہیں کیا جا سکتا اور اس تناظر میں سکیورٹی کے غیر معمولی انتظامات کئے گئے ہیں۔

ایمز ٹی وی(مانیٹرنگ ڈیسک) پاکستان میں ریسرچ کرنے والے طالب علموں کیلئے خوشخبری ہے کہ پاکستان اور امریکہ نے سائنس اینڈ ٹیکنالوجی میں تعاون کا پروگرام متعارف کرا دیا ہے جس کے تحت طالب علم اپنی ریسرچ کیلئے پانچ کروڑ روپے کا فنڈ حاصل کر سکتے ہیں۔

تفصیلات کے مطابق امریکہ میں نیشنل اکیڈمی آف سائنس (این اے ایس) کے تحت چلنے والا یہ پروگرام پاکستان میں ہائیر ایجوکیشن کمیشن (ایچ ای سی) کے تحت چلے گا۔ اس پروگرام کا مقصد پاکستانی سائنسدانوں اور سائنسی اداروں کا امریکی سائنسدانوں اور اداروں کیساتھ تعاون کو بڑھانا ہے۔ نیشنل اکیڈمی آف سائنس میں پاک، امریکہ سائنس اینڈ ٹیکنالوجی تعاون پروگرام ڈویلپمنٹ، سیکیورٹی اور بین الاقوامی تعلقات ڈویژن کے زیر انتظام ہے۔

پاک، امریکہ مشترکہ ریسرچ فنڈز کیلئے ایک سے تین سال کیلئے پروپوزل کی وصولی شروع کر دی گئی ہے اور پروپوزل جمع کرانے کی آخری تاریخ 13 جنوری 2017ءبروز جمعہ ہے۔

اس پروگرام کے تحت فنڈ حاصل کرنے کیلئے پیش کئے جانے والے پراجیکٹ کا پاکستان میں تحقیقی صلاحیت میں اضافے اور پاک، امریکہ باہمی تعلقات میں مندرجہ ذیل کردار ہونا چاہئے۔

1:۔ پاکستان میں معاشی اور انسانی ترقی میں تیزی لانے کیلئے سائنس اور ٹیکنالوجی کے شعبے کی صلاحیت کو بڑھا سکے۔
2:۔ ہائیر ایجوکیشن کمیشن کے تحت تعلیمی اداروں کے سائنس اور تکنیکی شعبوں میں تعلیم ، تحقیق، معیار اور مطابقت میں اضافہ کر سکے۔
3:۔ صنعتی شعبے میں جاری مقابلے میں تعاون کیلئے پاکستانی تحقیقی اداروں کی صلاحیت میں اضافہ کر سکے۔

اس پروگرام کے تحت بہت سے شعبوں سے متعلق پراجیکٹ کے پروپوزل قبول کئے جا رہے ہیں جن میں مندرجہ ذیل شعبے شامل ہیں۔

صحت اور سیکیورٹی،تعلیم،صحت، صحت عامہ اور ادویات،غذائیت،پانی اور صفائی،زراعت،ماحولیاتی ، موسمیاتی تبدیلی اور حیاتی ماحول میں تنوع،توانائی اور قابل تجدید توانائی،سوشل سائنسنز ،اقصادی ترقی،جمہوریت اور گورننس،خوراک کی سیکیورٹی

واضح رہے کہ سال 2003ءمیں پاکستان اور امریکہ کے درمیان سائنس اور ٹیکنالوجی میں تعاون کا ایک وسیع معاہدہ ہوا تھا جس میں دونوں ممالک میں سائنس اور تعلیم کے شعبوں کے درمیان سائنس، ٹیکنالوجی، انجینئرنگ اور تعلیم میں مشترکہ مفادات کیلئے باہمی تعاون کا ایک فریم ورک تیار کیا گیا تھا۔

ایمزٹی وی(کراچی) رینجرز نے آصف زرداری کے قریبی دوست کے 3 دفاتر پر چھاپے مارکر اہم ریکارڈ کی چھان بین کی۔

ذرائع کے مطابق رینجرز نے کراچی کی مصروف ترین شاہراہ آئی آئی چندریگر روڈ پر واقع آصف زرداری کے قریبی دوست انورمجید کے دفتر یر چھاپہ مار کر 2 افراد کو حراست میں لے لیا جبکہ دفتر سے اہم ریکارڈ لیپ ٹاپ بھی قبضے میں لے لیا گیا ہے۔

حراست میں لئے جانے والے 2 افراد کی نشاندہی پر ہی ہاکی اسٹیڈیم کے قریب واقع انورمجید کے ایک اور دفتر پر بھی چھاپہ مارا گیا اورعلاقے کو مکمل طور پر گھیرے میں لے کر تمام آنے اور جانے والے راستوں کو بند کردیا گیا۔

ہاکی اسٹیڈیم کی قریب واقع دفتر کے ایڈمن منیجر کو حراست میں لے کر ریکارڈ بھی قبضے میں لے لیا گیا جب کہ رینجرز نے تیسرا چھاپہ میٹروپول میں واقع انورمجید کے ہی ایک اور دفتر میں مارا جہاں سے ریکارڈ قبضے میں لیا گیا۔