کراچی: ملک بھرمیں انٹرنیٹ کی سروس سست ہوگئی۔

پاکستان سے افریقا جانے والی انٹرنیٹ کیبل کی سروس معطل ہونے سے ملک میں انٹرنیٹ کی رفتار کم ہوگئی۔

ٹیلی کام ذرائع کا کہنا ہے سی ایم وی 4 کیبل کٹنے سے ملک میں انٹرنیٹ اسپیڈ میں ایک ٹیرا بائٹ کمی ہوئی ہے جس سے انٹرنیٹ کی رفتار میں بھی کمی واقع ہوئی ہے۔

ذرائع کا کہنا ہےکہ پاکستان میں رش کے اوقات میں انٹرنیٹ کی رفتار مزید متاثر ہونے کا امکان ہے۔

ذرائع کےمطابق سی ایم وی 4 انٹرنیٹ کیبل کی مرمت کاکام جنوری میں مکمل ہوگا تاہم پی ٹی سی ایل کی جانب سے انٹرنیٹ ٹریفک دیگرکیبلزپر منتقل کرنے کی کوشش کی جارہی ہے۔

چترال : محکمہ تعلیم گلگت بلتستان نےصوبے بھر کے تمام سرکاری تعلیمی ادارے موسم سرما کی تعطیلات کے حوالے سے31 جنوری تک بند رکھنے کا فیصلہ کیاہے۔

تفصیلات کے مطابق صوبے گلگت بلتستان سردیوں کی چھٹیوں کی حوالے سے تمام تعلیمی ادارے بند رہیں گے چھٹیوں کا دورانیہ 40 دن کا ہو گا۔یکم فروری کو دوبارہ کھل جائیں گے۔

دسمبر اور جنوری شدید سردی اور درجہ حرارت منفی بیس تک گر جانے کے باعث انتظامیہ نے فیصلہ کیاہے کہ تعلیمی اداروں میں ہیٹنگ کا کوئی خاص انتظام نہیں ہوتا اس وجہ سے بیماریوں کے شدید خطرات ہوتے ہیں اسلئے ہرسال کی طرح رواں سال بھی سکول بند کرنےکافیصلہ کیا ہے۔

اساتذہ نے والدین سے اپیل کی کہ وہ چھٹیوں دوان بچوں کی پڑھائی کا خاص خیال رکھیں ورنہ مارچ میں ہونے والے سالانہ امتحانات میں ان کے بچوں کو مشکلات پیش آ سکتی ہیں۔

لاہور: لاہور قلندرز نے پی ایس ایل 7 کیلیےنیا کپتان مقرر کردیا۔

لاہور قلندرز کے نئے کپتان شاہین آفریدی کومقرر کوکرتے ہوئےسی او او ثمین رانا کا کہنا ہے کہ نوجوان ٹیلنٹ کو گروم کرنے کا عزم لیے میدان میں آئے تھے، شاہین آفریدی کو قیادت سونپ کر اس سمت میں بڑا قدم اٹھانے جارہے ہیں۔

شاہین شاہ نے کہا کہ لاہور قلندرز کا شکریہ ادا کرتا ہوں، ہم ایک فیملی کی طرح ہیں، لاہور قلندرز کیلیے ہمیشہ سو فیصد دینے کی کوشش کی، بطور کپتان بھی یہی کروں گا، سب کو ساتھ لیکر چلوں گا۔

عاقب جاوید نے کہا کہ کسی کرکٹر کو اتنی جلدی گروم ہوتا نہیں دیکھا، اچھی سوچ اور اچھے انسان ہیں، ایسے لوگ ہی لیجنڈ بنتے ہیں،میرے لیے آج بہت خوشی کا دن ہے۔

سان فرانسسکو: یوٹیوب نے 70 ممالک کے شارٹس ویڈیوز کے تخلیق کاروں کےلئےفنڈزکااعلان کردیا

تفصیلات کے مطابق چند ماہ قبل یوٹیوب نے شارٹس ویڈیوز کے تخلیق کاروں کے لیے اپنی طرف سے امدادی فنڈز کا اعلان کیا تھا۔ اس وقت فہرست میں 30 ممالک شامل تھے۔ لیکن اب 70 ممالک کی نئی فہرست جاری کی گئی ہے جس کے تحت یوٹیوب ان ممالک کے تخلیق کاروں میں 10 کروڑ ڈالر سے مدد کرے گا۔

اب 70 ممالک کی فہرست میں پاکستان بھی شامل ہے اس کے علاوہ شارٹس کے تجزیاتی (اینے لیٹکس) ٹول میں بھی اضافہ کیا گیا ہے۔ اس سے قبل مئی میں یویٹیوب نے کہا تھا کہ وہ سال 2021 اور 2020 کے لئے بطورِ خاص شارٹ ویڈیو بنانے والے یوٹیوبرز کے لیے دس کروڑ ڈالر رکھے گا۔

اس کا اہم مقصد یہ ہے کہ کسی طرح ٹِک ٹاک کا زور کم کیا جائے جو شارٹ ویڈیو کی سب سے مشہور ایپ ہے اور بہت تیزی سے اوپر جارہی ہیں۔ دوسری جانب خود یوٹیوب کے مالکان بھی اس سے فکرمند ہیں۔

یوٹیوب کمپنی نے اپنے ایک اعلامئے میں اسے شارٹ بونس کا نام دیا ہے۔ لیکن اس فنڈنگ کی کچھ شرائط اور معیارات ہیں جو ابھی فی الحال سامنے نہیں آئے ہیں تاہم توقع ہے کہ اس کا اعلان جلد ہوجائے گا۔ ظاہر ہے کہ ان ترغیبات کا اہم مقصد یہ ہے کہ نوجوان نسل کویوٹیوب شارٹس کی طرف لایا جائے اور اسی لیے شارٹس بونس کا اعلان کیا گیا ہے۔

نیدرلینڈز: 5G نیٹ ورکس سے تحفظ فراہم کرنے کی دعویدار اشیاء مثلاً گلے کے ہار یا بریسلٹ وغیرہ انتہائی ریڈیائی لہروں کی حامل قرار دی گئی ہیں۔

غیرملک خبررساں ادارے کے مطابق ڈچ اتھارٹی برائے جوہری ہتھیاروں اور تابکاری سے تحفظ (اے این وی ایس) نے ایسی 10 مصنوعات کے بارے میں وارننگ جاری کی ہے جو انسانوں کیلئے نقصان دہ خطرناک تابکاری شعاعوں کی حامل ہیں۔

اتھارٹی نے لوگوں سے اپیل کی ہے کہ وہ ایسی مصنوعات ہرگز نہ پہنیں جنہیں طویل مدت تک استعمال کیا جائے تو صحت کے اعتبار سے اس کے نقصانات شدید ہوں۔ مصنوعات میں انرجی آرمر، گلے میں پہنے جانے والے مخصوص ہار اور بریسلٹ شامل ہیں۔

تاہم یہ خیال رہے کہ 5 جی نیٹ ورکس کے نقصانات سے متعلق ابھی تک کوئی ٹھوس شواہد سامنے نہیں آئے ہیں۔

ڈبلیو ایچ او کے مطابق 5 جی نیٹ ورک بے ضرر ہے اور بنیادی طور پر موجودہ 3 جی اور 4 جی نیٹ ورکس سے مختلف نہیں ہے۔

ڈھاکا: پاکستان ہاکی ٹیم نے ایشین چیمپینز ٹرافی کےسیمی فائنل تک رسائی حاصل کرلی۔

بنگلا دیش کے شہر ڈھاکا میں جاری ایشین چیمپینز ٹرافی کے چھٹے ایڈیشن میں پاکستان نے سیمی فائنلز میں جگہ بنالی۔ رابن راؤنڈ میچز کے سلسلہ میں آخری میچ میں پاکستان نے بنگلا دیش کو 2-6 گول سے شکست دے کر پول پوزیشن بہتر بناتے ہوئے تیسری پوزیشن پر قدم جما دیے۔

پوائنٹس ٹیبل پر انڈیا 10 پوائنٹس کے ساتھ پہلی، کوریا 6 پوائنٹس کے ساتھ دوسری جبکہ پاکستان پانچ پوائنٹس اور بہتر گول ایوریج کے ساتھ تیسری اور جاپان 5 پوائنٹس کے ساتھ چوتھی پوزیشن پر موجود ہے۔

ایشین چیمپینز ٹرافی کے سیمی فائنلزکل سے کھیلے جائیں گے۔ پاکستان سیمی فائنل میں کوریا کے مدمقابل پاکستانی وقت 2:30 بجے دوپہر کھیلے گا جبکہ انڈیا اور جاپان کے مابین میچ 5:00 بجے پاکستان ٹائم کھیلا جائے گا۔

ٹینیسی: ایک امریکی پروفیسر نے طلبا و طالبات کو سبق اچھی طرح پڑھنے کی ترغیب کے طور پر رقم کا لالچ دیا ہے لیکن اس رقم تک صرف اسی وقت پہنچا جاسکتا ہے جب نصاب کو اچھی طرح پڑھا جائے۔

یونیورسٹی آف ٹینسی کے کینیون وِلسن نے ایک لاکر میں 50 ڈالر کا نوٹ بطور انعام رکھا تھا۔ نصاب کے اندر ایک جگہ اس کا اشارہ کچھ یوں دیا گیا تھا۔

’جو بھی پہلے حاصل کرے گا یہ اس کا ہوگا۔ لاکر نمبر 147 اور اس کا کمبی نیشن ہے 15، 25 اور 35۔ لیکن دلچسپ بات یہ ہے کہ کوئی بھی طالبعلم اسے حاصل نہ کرسکا کیونکہ کسی نے بھی سنجیدگی سے نصاب یا کورس نہیں پڑھا تھا۔ کیونکہ سیمسٹر کے اختتام پر جب پروفیسر نے لاکر کھولا تو50 ڈالر کا نوٹ وہیں موجود تھا۔

پروفیسر کینیون نے بتایا کہ بچے نصاب اور مضامین پڑھنے میں دلچسپی نہیں لیتے اور تیزی سے آگے بڑھ جاتے ہیں۔ ان کی جماعت مین 71 طلبا و طالبات تھے لیکن کسی نے بھی مضمون پڑھ کر رقم حاصل نہیں کی۔ حالانکہ پروفیسر نے کلاس کے پہلے ہی روز کہا تھا کہ اب نصاب بدل چکا ہے اور اس لئے ضروری ہے کہ سارے متن کو اچھی طرح پڑھنا ضروری ہوگا۔

پروفیسر کینیون نے لاکر میں رقم کے نیچے مبارک باد کے پیغام کے ساتھ کہا گیا تھا کہ وہ رقم لے کر اپنا نام اور تاریخ ضرور لکھیں تاکہ اس کی تصدیق ہوجائے۔ لیکن کوئی بھی طالبعلم یہ انعام حاصل نہ کرسکا۔

تاہم انہوں نے کہا کہ ان کے طالبعلم پڑھتے ضرور ہیں لیکن وہ حرف بہ حرف پڑھنے کا تکلف نہیں کرتے۔ یہی وجہ ہے کہ وہ اس رقم سے محروم رہ گئے ہیں۔

لاہور: نیوزی لینڈ کرکٹ ٹیم آئندہ سال دسمبراورجنوری میں پاکستان کا دورہ کرے گی۔

چیئرمین پاکستان کرکٹ بورڈ رمیز راجہ اور نیوزی لینڈ کرکٹ کے چیئرمین مارٹن سینیڈن کی ملاقاتوں کے بعد نیوزی لینڈ کے پاکستان کے دوروں کو حتمی شکل دی گئی۔

نیوزی لینڈ کرکٹ ٹیم کے پہلے دورہ پاکستان میں شامل 2 ٹیسٹ اور 3 ون ڈے انٹرنیشنل میچز بالترتیب آئی سی سی ورلڈ ٹیسٹ چیمپئن شپ اور آئی سی سی مینز کرکٹ ورلڈ کپ سپر لیگ کا حصہ ہوں گے۔

مہمان ٹیم کا دوسرا دورہ اپریل 2023 میں ہوگا جہاں وہ 10 وائٹ بال میچز پر مشتمل سیریز کھیلے گی۔

دوسرے دورے میں مہمان ٹیم کو5ون ڈے اور 5 ٹی ٹونٹی انٹرنیشنل میچز کھیلنے ہیں۔دونوں بورڈز اب دورے کی تاریخوں کو حتمی شکل دیں گے۔

چیئرمین پاکستان کرکٹ بورڈ رمیز راجہ کا کہنا ہے کہ وہ مارٹن سینیڈن اور ان کے بورڈ کے شکر گزار ہیں اور ان سے ہونی والی ملاقاتوں کے نتائج پر خوش ہیں۔

نیوزی لینڈ کرکٹ کے چیف ایگزیکٹو ڈیوڈ وائیٹ کا کہنا ہے کہ رمیز راجہ اور مارٹن سینیڈن کی دبئی میں نتیجہ خیز اور تعمیری گفتگو ہوئی جس سے دونوں بورڈز کے تعلقات بھی مزید مضبوط ہوئے ہیں۔

پاکستان مارچ 2022 سے اپریل 2023 کے دوران آسٹریلیا، انگلینڈ اور نیوزی لینڈ کے خلاف 8 ٹیسٹ، 11 ون ڈے اور 13 ٹی ٹوئنٹی میچز کی میزبانی کرے گا۔

اسلام آباد: وفاقی تعلیمی بورڈ میٹرک کے سالانہ امتحانات کےدوسرےمرحلےکے نتائج کا اعلان کل کرے گا

نتائج کااعلان سہہ پہر3 بجے فیڈرل بورڈ کے آڈیٹوریم میں ہوگا ۔

اعلان کے بعد نتائج ویب سائٹ پراپلوڈ کردیئے جائیں گے۔

کراچی: ثانوی تعلیمی بورڈکراچی نے سائنس اورجنرل گروپ ریگولرسالانہ امتحانات 2022ء کیلئےانرولمنٹ فارم جمع کرانےکانیاشیڈول جاری کردیاہے۔

چیئرمین میٹرک بورڈ سید شرف علی شاہ نے کہا کہ اسکولوں میں موسم سرما کی تعطیلات ہونے کے باعث اسکول سربراہان اور طلباء وطالبات کو سہولت فراہم کرنے کیلئے بغیر لیٹ فیس کے 31دسمبر 2021ء تک انرولمنٹ فارم جمع کرانے کی تاریخ بڑھا دی گئی ہے۔

انہوں نے بورڈ سے الحاق اسکولوں کو ہدایت کی کہ وہ جلد از جلد طلباء وطالبات کے انرولمنٹ فارم جمع کرا دیں، تاریخ گزرنے کے بعد نئے شیڈول کے مطابق فارم لیٹ فیس کے ساتھ جمع کئے جائیں گے۔گورنمنٹ اسکول بھی اسی شیڈول کے مطابق بغیر کسی فیس کے انرولمنٹ فارم جمع کرا سکتے ہیں۔انہوں نے کہا کہ بورڈ کو والدین کی طرف سے مسلسل یہ شکایات آرہی ہیں کہ مختلف اسکولز طلباء و طالبات سے بورڈ کے نام پر امتحانی فیسوں کی مد میں زیادہ فیسیں لے رہے ہیں،چیئرمین بورڈ نے ان تمام اسکولوں کو تنبیہ کی ہے کہ اسکول ز ائدامتحانی فیسیں وصول نہ کریں، بورڈ کی طرف سے پہلے ہی انرولمنٹ کی فیس کم کر کے 900 روپے کر دی گئی تھی اور فارم کی فیس صرف 100 روپے مقرر ہے، شکایت کی صورت میں زائد فیسیں لینے والے اسکولوں کی رجسٹریشن ختم کر دی جائے گی۔

تفصیلات کے مطابق لیٹ فیس کے ساتھ 3جنوری 2022ء سے 14جنوری تک 200 روپے، 17جنوری سے 28جنوری تک 600روپے،31جنوری سے 11فروری تک 1200روپے،14فروری سے 25فروری تک 1800روپے،28فروری سے 11مارچ تک 2000روپے اورآخری تاریخ گزرنے کے بعد2500 روپے لیٹ فیس کے ساتھ امتحانی فارم جمع کئے جائیں گے۔ اسکولوں کے سربراہان کو تاکید کی جاتی ہے کہ فارم کو جمع کرانے کیلئے طلباء وطالبات کو انفرادی طور پر بورڈ آفس نہ بھیجا جائے۔