ایمز ٹی وی (کراچی) پاکستان تحریک انصاف کراچی ریجن کے صدر علی زیدی نے کہا ہے کہ سندھ حکومت عوامی مسائل کو حل کرنے کی اہلیت نہیں رکھتی ، کئی دفعہ پیٹرولیم مصنوعات کی قیمتوں میں کافی کمی کے باوجود عام لوگوں کو ریلیف نہیں مل سکا ۔ حکومتی ادارے اور صوبائی وزراءصرف بیانات اور نوٹیفکیشن جاری کر کے غریب عوام کو جھوٹی تسلیاں دے رہی ہیں ویسے تو کراچی شہر صوبائی حکومت کی نااہلی کی وجہ سے مسائلستان بنا ہوا ہے اور عوام یہ سوچنے پر مجبور ہیں کہ یہ کیسے حکمران ہیں جنہیں عوامی مسائل سے کوئی سروکار نہیں ، کراچی شہر میں پبلک ٹرانسپورٹ نے بھی ایک مافیا کی شکل اختیار کرلی ہے ۔ یہ باتیں انہوں نے تحریک انصاف کے مرکزی میڈیا سیل کراچی میں صحافیوں کے ایک وفد سے ملاقات کے موقع پر بات چیت کرتے ہوئے کہیں ۔ علی زیدی نے مزید کہا کہ حکومت سندھ کے محکمہ ٹرانسپورٹ نے دو دفعہ کرایوں کی کمی میں صرف نوٹیفکیشن جاری کیا لیکن اس نوٹیفکیشن پر کسی بھی قسم کی عمل درآمد نظر نہیں آرہی ۔ کراچی میں پبلک ٹرانسپورٹ ایسوسی ایشن کی جانب سے پبلک ٹرانسپورٹ کے کرایوں میں کمی نہ کرنا غریب شہریوں کے ساتھ سراسر ظلم و زیادتی ہے ، صوبائی حکومت اگر اپنے آپ کو عوامی نمائندہ سمجھتی ہے تو فوری طور پر ٹرانسپورٹ مافیا کے خلاف ایکشن لیں اور پبلک ٹرانسپورٹ کے کرایوں میں واضح حد کمی کی جائے ۔ علی زیدی نے مزید کہا کہ ٹرانسپورٹ مافیا بھی ہوش کے ناخن لیں اور سی این جی کی بندش کے دوران عوام سے پورا کرایہ وصول کر کے انہیں آدھے راستے میں اتار نے والے ہتھکنڈوں سے باز رہیں بصورت دیگر ٹرانسپورٹ مافیا کو عوام کے غیض و غضب کا سامنا کرنا پڑے گا اور حالات کے خرابی کی تمام تر ذمہ داریاں ٹرانسپورٹ مافیا کے ساتھ ساتھ حکومت سندھ پر عائد ہوگی

پاکستان کے قبائلی علاقے شمالی وزیرستان میں مشتبہ امریکی ڈرون حملے میں کم ازکم سات مبینہ شدت پسند ہلاک ہو گئے ہیں۔سکیورٹی ذرائع کے مطابق اتوار کی صبح الوڑہ منڈی کے علاقے میں بغیر ہواباز کے جاسوس طیارے سے ایک مکان پر دو میزائل داغے گئے۔حملے میں یہ مکان مکمل طور پر تباہ ہوگیا اور یہاں موجود سات مشتبہ شدت پسند مارے گئے۔ہلاک ہونے والوں کی شناخت کے بارے میں مصدقہ معلومات حاصل نہیں ہو سکی لیکن مقامی ذرائع کے مطابق یہ مکان کالعدم تحریک طالبان پاکستان کے جنگجوؤں کے زیر استعمال تھا۔گزشتہ ہفتے بھی شمالی وزیرستان میں ہونے والے ڈرون حملے میں کم ازکم سات مشتبہ شدت پسند مارے گئے تھے۔ 2015ء میں پاکستان کے قبائلی علاقوں میں ہونے والا یہ پہلا ڈرون حملہ ہے۔قبائلی علاقوں میں ذرائع ابلاغ کی رسائی نہ ہونے کی وجہ سے یہاں پیش آنے والے واقعات کی آزاد ذرائع سے تصدیق تقریباً ناممکن ہے۔گزشتہ دس سالوں سے افغان سرحد سے ملحقہ قبائلی علاقوں میں ڈرون طیاروں سے حملے ہوتے رہے ہیں جن میں القاعدہ سے منسلک کئی اہم شدت پسند کمانڈر ہلاک ہوچکے ہیں۔گزشتہ سال ڈرون حملوں میں اس وقت تقریباً چھ ماہ کا تعطل دیکھا گیا جب پاکستانی حکومت نے ملک میں قیام امن کے لیے شدت پسندوں کے ساتھ مذاکرات کا سلسلہ شروع کیا۔پاکستان مشتبہ امریکی ڈرون طیاروں سے کی جانے والی کارروائیوں کو اپنی خودمختاری اور بین الاقوامی قوانین کی خلاف ورزی قرار دیتے ہوئے ان کی بندش کا مطالبہ کرتا آیا ہے جب کہ عہدیداروں کا کہنا ہے کہ ان کارروائیوں کا شدت پسندوں کے خلاف فوجی آپریشن سے کوئی تعلق نہیں ہے۔لیکن ان مذاکراتی کوششوں کے بے نتیجہ اور گزشتہ جون میں شمالی وزیرستان میں فوجی آپریشن "ضرب عضب" شروع ہونے کے بعد ڈرون حملوں کا سلسلہ بھی دوبارہ شروع ہو گیا۔امریکہ انسداد دہشت گردی کی جنگ میں ڈرون کو ایک مؤثر ہتھیار گردانتا ہے۔

 ایمز ٹی وی(نیوز ڈیسک) لوئر اورکزئی کے مقامی فٹبال گراؤنڈ میں نوجوان فٹ بال میچ کھیل رہے تھے کہ اسی دوران زوردار دھماکا ہوگیا جس کے نتیجے میں 5 افراد جاں بحق اور 8 زخمی ہوئے، دھماکے کے بعد قانون نافذ کرنے والے اداروں نے علاقے سے شواہد اکٹھے کرکے تحقیقات شروع کردی ہے جب کہ ریسکیو ٹیموں نے جائے وقوعہ پر پہنچ کر لاشوں اور زخمیوں کو قریبی اسپتال منتقل کردیا جہاں زخمیوں کو طِبی امداد فراہم کی جارہی ہے تاہم اسپتال ذرائع کا کہنا ہے کہ زخمیوں میں سے بھی بعض کی حالت تشویشناک ہے۔دوسری جانب وزیراعظم نوازشریف نے لوئر اورکزئی ایجنسی میں بم دھماکے کی شدید مذمت کرتے ہوئے انسانی جانوں کے ضیاع پر گہرے دکھ اور افسوس کا اظہار کیا ہے۔

ایمز ٹی وی ( فارن ڈیسک ) سماجی رابطے کی ویب سائٹ فیس بک کے بانی مارک زکربرگ نے اپنے مطالعاتی پروگرام کا اعلان کرتے ہوئے کہا ہے کہ وہ سال 2015 کے دوران ہر دوسرے ہفتے ایک کتاب پڑھا کریں گے۔فیس بک پر اپنے پیج “A Year of Books” میں انہوں نے کہا کہ وہ مختلف مذاہب، ثقافتوں اور ٹیکنالوجیز کے بارے میں جاننے کے لیے کتابیں پڑھنے کا سلسلہ شروع کر رہے ہیں ۔  انہوں نے  کتابوں کو ذوق کی تسکین کا اہم ذریعہ قرار دیتے ہوئے کہا کہ کتابیں انسان کو کسی بھی دوسرے میڈیا کے مقابلے میں کسی بھی موضوع کو مکمل طور پر سمجھنے اور کھنگالنے میں مدد دیتی ہیں اور میں کسی بھی دوسرے میڈیا پر انحصار کرنے کے بجائے اپنی توجہ کتابوں کے مطالعے کی طرف مرکوز کر رہا ہوں ۔وہ اپنے ریڈنگ چیلنج کے حوالے سے پرجوش ہیں۔مارک کے فیس بک پیج پر ان کتابوں کی فہرست بھی دی گئی ہے جو ان کے ریڈنگ پروگرام کا حصہ ہیں۔