اسلام آباد: وفاقی وزیر اطلاعات فواد چوہدری کا کہنا ہے کہ پیپلز پارٹی اور (ن) لیگ زرداری اور شریف سے باہر نکلیں۔
سماجی رابطے کی سائٹ ٹوئٹر پر وفاقی وزیر اطلاعات فواد چوہدری کا کہنا تھا کہ پیپلز پارٹی اور (ن) لیگ زرداری اور شریف سے باہر نکلیں اور نئے سیاسی بیانیے پر توجہ دیں، کرپشن کیسز سے گھبرائی ہوئی لیڈر شپ دونوں پارٹیوں کا مستقبل تاریک کر چکی ہے۔
وفاقی وزیر اطلاعات نے کہا کہ کبھی اٹھارویں ترمیم میں تبدیلی اور کبھی صدارتی نظام جیسی غیر سنجیدہ بحث کرتے ہیں، دونوں چاہتے ہیں کہ کسی طرح مقدمات سے توجہ ہٹے مگر ایسا نہیں ہوگا۔
کراچی: محکمہ تعلیم میں ٹیجنگ ،نان ٹیجنگ اسٹاف کی غیر قانونی بھرتیوں کے ریفرنس کا فیصلہ سنادیا، مجرم نے 2008 میں ضلعہ غربی میں 140 غیر قانونی بھرتیاں کی تھی،
مجرم نے بھرتیوں کے نام پر کروڑوں روپے کی کرپشن کی تھی اور عدالت نے مجرم کا جرم ثابت ہوتے ہی سزاکے طور پر دی سات سال کی قید اور ۴کروڑ پچاس لاکھ کا جرمانہ عائد کردیا ۔
پشاور: احتساب عدالت پشاور نے آمدن سے زائد اثاثوں کے کیس میں پیپلزپارٹی کے رہنما ارباب عالمگیر اور عاصمہ عالمگیر پر دوبارہ فرد جرم عائد کردی اور نئی فردجرم میں بیرون ملک اثاثوں سے متعلق نکات کونکال دیاگیا ۔
تفصیلات کے مطابق احتساب عدالت پشاور میں پیپلزپارٹی کے رہنما ارباب عالمگیر اور عاصمہ عالمگیر کیخلاف آمدن سے زائد اثاثوں کی سماعت ہوئی، پیپلزپارٹی کے دونوں رہنماوکلا کیساتھ احتساب عدالت میں پیش ہوئے،عدالت نے پیپلزپارٹی رہنماؤں پردوبارہ فردجرم عائدکردی ،نئی فردجرم میں بیرون ملک اثاثوں سے متعلق نکات کونکال دیاگیا ۔عدالت نے آئندہ سماعت پر4 گواہوں کو طلب کر لیااورسماعت5 مارچ تک ملتوی کردی۔
لاہور: کوٹ لکھ پت جیل کے باہر سابق وزیرِقانون پنجاب ، رانا ثنا اللہ کا کہنا تھا کہ اگر پارٹی کی طرف سے کال دی گئی تو بھرپور احتجاجی تحریک چلائے گے ۔
یاد رہے کہ سابق وزیرِعظم نواز شریف کی نہ صرف نااہلی بلکہ کرپشن کے الزام میں گرفتار ی پر لیگی قیادت اور کارکنان میں آج بھی غم و غصے کی لہر پائی جاتی ہے۔اس بات کا اندازہ رانا ثنا اللہ کے آج کے اس بیان سے لگایا جا سکتا ہے۔
کراچی: جامعہ کراچی کے 29ویں جلسہ تقسیم اسناد سے گورنر سندھ عمران اسماعیل نے بحیثیت مہمان خصوصی خطاب کرتے ہوئے کہا کہ اعلی تعلیم کے فروغ کے بغیر کو ئی بھی معاشرہ ترقی نہیں کرسکتا، دو ر حاضر میں اعلیٰ تعلیم ہی ملک کی ترقی و خوشحالی میں کلیدی اہمیت کی حامل ہے۔ انہوں نے کہا کہ محدود وسائل ہونے کے باوجود جامعہ نے اپنی حیثیت کو منوایا ہے اور اس کی بنیادی وجہ جہد مسلسل ، علم و تحقیق اور عزم لازوال ہے۔ اللہ تعالیٰ نے اس خطے کو بہترین افرادی قوت سے نوازا ہے ان بہترین اذہان کے حامل افراد کو ماہرین میں تبدیلی کرنے میں ہماری جامعا ت اور خاص کر جامعہ کراچی کا کردار قابل تحسین ہے۔
اسلام آباد میں چیمبرآف کامرس میں خطاب کے دوران وفاقی وزیراطلاعات و نشریات فواد چوہدری نے کہا کہ 1985 والی سیاست اب ختم ہوگئی، آصف زرداری اور نواز شریف اپنا آخری الیکشن لڑچکے، ان کی سیاست ختم ہوچکی۔
منی لانڈرنگ
فواد چوہدری نے کہا کہ پچھلی حکومتوں کا سب سے بڑا مسئلہ کرپشن اور منی لانڈرنگ تھی، منی لانڈرنگ کے خلاف اقدامات شروع کردیے ہیں، سندھ کی کہانیاں سامنے آرہی ہیں کہ پیسا کیسے باہرگیا۔
سی پیک کا محور زراعت
ملک میں زراعت کے شعبے کو جدت اور ترقی لائی جائے گی، اس کے لیے ہم سی پیک کا محور زراعت کو بنا رہے ہیں۔ چین اور پاکستان کے درمیان زراعت سے متعلق مفاہمتی یادداشت پردستخط ہوئے ہیں۔
روپے کی قدر
وزیر اطلاعات کا کہنا تھا کہ ہم فائر فائٹنگ کررہے ہیں، گزشتہ حکومت نے ڈالر کو ایک سو روپے پر رکھنے کے لیے7 ارب ڈالر خرچ کیے،مصنوعی طریقے سے ڈالر کی قیمت برقرار رکھنا تباہ کن پالیسی ہے۔
ٹیکس نیٹ میں اضافہ
فواد چوہدری نے کہا کہ موجودہ ٹیکس دینے والوں پر بوجھ نہیں ڈال سکتے، ٹیکس نیٹ سے باہر لوگوں کو ٹیکس نیٹ میں لایا جا رہا ہے، اس بارریکارڈ ٹیکس ریٹرنزجمع ہوئے جومثبت پیش رفت ہے، طویل عرصے بعد دگنی تعداد میں ٹیکس وصولی ہوئی ہے۔
معیشت سب سے بڑا چیلنج
وفاقی وزیر کا کہنا تھا کہ ملک میں سب سے بڑا چیلنج معیشت کا ہے، ہم حکومت میں آئے تو ڈالر 128 روپے کا تھا، حکومت میں آئے تو پتا چلا 12ارب ڈالر نہ ہوئے تو ہم دیوالیہ ہوجائیں گے، ہماری پہلی ترجیح تھی کہ دیوالیہ ہونے کے خطرے سے کیسے نکلیں۔ اصل سفر اپنے پاؤں پر کھڑے ہونے کا ہے ، جب برآمدات زیادہ اور درآمدات میں کمی سے ملک اپنے پاؤں پر کھڑا ہوگا، ہم درآمدات کی حوصلہ شکنی اور برآمدی صنعت کو سہولیات دے رہے ہیں، ہم ہر سال 2 ارب ڈالرز کے موبائل فون منگوا لیتے ہیں، سعودی عرب کے ساتھ آئل ریفائنری کا معاہدہ ہواہے، ہم انفرا اسٹرکچر میں پرائیویٹ سیکٹر کو شامل کریں گے۔
پاکستان کا امیج
وزیر اطلاعات کا کہنا تھا کہ پاکستان کا بیرون ممالک امیج بہتر ہو رہا ہے، امریکا کے ساتھ تعلقات بہتر ہورہے ہیں، طالبان کےمذاکرات شروع کرانے پر امریکا نے شکریہ ادا کیا، فرانس نے اپنی سفری ایڈوائزری تبدیل کر دی، جرمنی سوچ رہا ہے، پاکستان میں بیرونی سیاحوں کا آنا بہت ضروری ہے، ہمیں پاکستان میں مذہبی سیاحت کو فروغ دینا ہے، کرتار پور کو سکھوں کے لیے کھولنے کا ایک پہلو مذہبی سیاحت بھی ہے۔
نیب نے خواجہ سعد رفیق اور ان کے بھائی سلمان رفیق کو گرفتار کرلیا۔
ذرائع کے مطابق سابق وزیر ریلوے سعد رفیق اور ان کے بھائی سلمان رفیق کو ضمانت قبل از گرفتاری کی درخواست خارج ہونے پر نیب نے گرفتار کرلیا ہے۔
اسلام آباد: بینکنگ کورٹ نے اومنی گروپ کی جانب سے اربوں روپے کی چینی غائب کرنے پر اومنی گروپ کی 8 شوگر ملز کے چیف ایگزیکٹوز اور ڈائریکٹرز کے قابل ضمانت وارنٹ گرفتاری جاری کردیے۔
اربوں روپے کی چینی غائب کرنے کے معاملے میں اومنی گروپ کے خلاف کارروائی میں اہم پیش رفت سامنے آگئی۔ کراچی کی بینکنگ کورٹ میں سندھ بینک نے اومنی گروپ کی 8 شوگر ملز کے چیف ایگزیکٹو اور ڈائریکٹر کے خلاف کرمنل درخواستیں دائر کر دیں۔ عدالت نے اومنی گروپ ؍ شوگر ملز چیف ایگزیکٹوز اور ڈائریکٹرز کے قابل ضمانت وارنٹ جاری کردیے۔
قابل ضمانت وارنٹ گرفتاری کھوسکی، نیو دادو، انصاری شوگر، باوانی، نوڈیرو،چیمبر شوگر اور لار اور ٹنڈو اﷲ یار شوگر ملز کے چیف ایگزیکٹوز اور ڈائریکٹرز کے جاری کیے گئے ہیں۔