ایمزٹی وی(راولپنڈی)پاک فوج کے ترجمان نے افغان فورسز کی جانب سے مردم شماری میں مصروف عمل ایف سی اہلکاروں کو نشانہ بنانے کے اقدام کو انتہائی افسوسناک قرار دیا ہے۔ پاک فوج کے شعبہ تعلقات عامہ (آئی ایس پی آر) کے ڈائریکٹر جنرل میجر جنرل آصف غفور نے سوشل میڈیا پر ٹویٹ کیا کہ افغان فورسز کی جانب سے مردم شماری میں مصروف ایف سی اہلکاروں پر فائرنگ کی گئی جس کے نتیجے میں ایک شہری شہید اور ایف سی کے 4 اہلکاروں سمیت 18 افراد زخمی ہوئے۔ افغان فورسز کی جانب سے چمن کے علاقوں کلی لقمان اور کلی جہانگیر میں مردم شماری میں رکاوٹیں کھڑی کی جا رہی ہیں۔ ترجمان پاک فوج کے مطابق افغان حکام کو مردم شماری سے متعلق آگاہ کیا جا چکا ہے لیکن تفصیلات فراہم کرنے کے باوجود افغان فورسز کی جانب سے کارروائی افسوسناک ہے۔ ڈی جی آئی ایس پی آر کے مطابق دونوں جانب سے فائرنگ کا تبادلہ تاحال جاری ہے جب کہ افغان فورسز کی جانب سے فائرنگ کے پیش نظر چمن بارڈر کو بند کر دیا گیا ہے۔

ایمزٹی وی(اسپورٹس)بھارت 21 برس بعد پہلی بار فیفا رینکنگ میں ٹاپ 100 میں شامل ہوگیا۔ بھارت نے آخری مرتبہ ٹیم نے یہ اعزاز 1996 میں حاصل کیا تھا جب آل ٹائم بیسٹ رینکنگ 94 پر قدم رکھے تھے جبکہ نوم پنا میں مارچ 22 کو کمبوڈیا کے خلاف3-2 سے کامیابی اور پھر 28 مارچ کو ینگون میں میانمار کے خلاف 1-0 سے کامیابی کی بدولت اس کی رینکنگ میں بہتری آئی۔ دوسری جانب فیفا رینکنگ میں پاکستان کی201 ویں پوزیشن میں کوئی بھی فرق نہیں آیا ہے جبکہ ٹاپ پر بدستور برازیل کی ٹیم موجود ہے۔ پانچ مرتبہ کی عالمی چیمپئن سائیڈ نے گزشتہ ماہ 7 برس بعد نمبر ون پوزیشن حاصل کی تھی، ارجنٹائن دوسرے اور جرمنی تیسرے نمبر پر ہے جبکہ چوتھی سے دسویں پوزیشن پر بالترتیب چلی، کولمبیا، فرانس، بیلجیئم، پرتگال، سوئٹزرلینڈ اور اسپین موجود ہیں۔

ایمزٹی وی(اسلام آباد)وزیر اعظم نواز شریف کا کہنا ہے کہ افغان سرحد سے فائرنگ کے واقعات امن کی کوششوں کے لئے نقصان دہ ہیں لہذا افغان حکومت کی ذمہ داری ہے کہ ایسے واقعات کی روک تھام کرے۔ وزیر اعظم نوا زشریف نے پاک افغان بارڈر پر فائرنگ کے واقعے کی مذمت کرتے ہوئے متاثرہ افراد کے خاندانوں سے ہمدردی کا اظہار کیا ہے۔ وزیراعظم کا کہنا تھا کہ بارڈر پر فائرنگ اور اہلکاروں کی شہادت انتہائی افسوسناک ہے، فائرنگ کے واقعات امن کی کوششوں کے لئے نقصان دہ ہیں لہذا افغان حکومت کی ذمہ داری ہے کہ ایسے واقعات کی روک تھام کرے۔ واضح رہے کہ آج صبح افغان فورسز نے چمن کے سرحدی علاقے میں پاکستانی چیک پوسٹوں پر فائرنگ کی اور گولے برسائے، افغان فورسز کی جانب سے داغے گئے گولے گلدار باغیچہ اور اڈہ کہول میں مکانات پر گرنے سے 8 پاکستانی شہری شہید جب کہ 6 بچوں اور 3 خواتین سمیت 36 افراد زخمی ہو گئے۔

ایمزٹی وی(کراچی) اپوزیشن لیڈر خورشید شاہ نے کہا ہے کہ حکمرانوں کی سوچ انہیں کہیں نہ کہیں ضرور لیکر جائے گی ۔گورنر سندھ نے آئین سے تجاوز کیالہذٰا انہیں مستعفیٰ ہو جانا چاہیے ۔ہمیں نیوٹرل گورنر سندھ چاہئیے۔ گورنر سندھ شاہ سے زیادہ شاہ کے وفادار نہ بنیں ۔ ذرائع کے مطابق پریس کانفرنس کے دوران انکا کہنا تھا کہ میاں صاحب جھوٹ بولتے ہیں اور ہم شہبازشریف کا بھی نیا نام رکھ رہے ہیں ۔حکمرانوں نے عوام کو دھوکا دیا ، حکومت نے چار سالوں میں صرف 4سو میگا واٹ بجلی پیدا کی جبکہ نوازشریف نے لوڈشیڈنگ کے خاتمے کے وعدے پر ووٹ لیے تھے ۔ انہوں نے کہا کہ ملک میں بجلی کا شارٹ فال 17ہزار میگا واٹ ہے جبکہ لاہور میں بھی لوڈشیڈنگ بڑھ گئی ہے ، پنجاب میں بنیادی سہولتوں کا فقدان ہے ۔ لوڈشیڈنگ تین ماہ میں ختم کرنے کا وعدہ پورا نہیں ہوا ۔ خورشید شاہ کا مزید کہنا تھا کہ پاناما کیس پیپلز پارٹی نے نہیں بنایا ، حکومت سیکیورٹی رسک بن چکی ہے ۔ ایک وفاقی وزیر نے ٹویٹ کو زہر قاتل کہہ دیا ۔

ایمزٹی وی(راولپنڈی)عوامی مسلم لیگ کے سربراہ شیخ رشید احمد نے وزیر اعظم کو ضدی بچہ قرار دیتے ہوئے کہا ہے کہ ضدی بچے کو فوج میں اپنا امیج بہتر کرنا ہو گا ۔ میڈیا ذرائع کے مطابق اپنے بیان میں انہوں نے کہا کہ فوج اور سویلین میں کھینچا تانی مناسب بات نہیں ، اب وزیر اعظم کو صرف اور صرف گھر جانا ہے ۔ شیخ رشید نے مزید کہا کہ وزیر اعظم نوازشریف نے انتخابی مہم شروع کر دی ہے ، خوفزدہ وزیر اعظم کو فیصلے میں اپنا ڈوبتا ہوا مستقبل نظر آرہا ہے۔ وزیر اعظم کے استعفیٰ پر اے این پی اور جے یو آئی کا ارادہ ففٹی ففٹی ہے ۔ جمعیت علماءاسلام اور اے این پی کے علاوہ تمام جماعتیں وزیر اعظم سے استعفیٰ مانگ رہی ہیں ۔

ایمزٹی وی(کراچی)پاکستان پیپلز پارٹی کے چیئرمین بلاول بھٹو زرداری نے کہا ہے کہ دنیا میں بہت سی زبانیں بولی جاتی ہیں لیکن صوفی ازم کی ایک زبان ہے اور دہشت گردی کے ناسور کے خاتمے میں صوفیوں کے پیغام کو عام کرنا ضروری ہے ۔ تفصیلات کے مطابق چیئرمین پیپلز پارٹی بلاول بھٹو زرداری نے عالمی صوفی کانفرنس سے خطاب کرتے ہوئے کہا کہ سندھ صوفیوں کی سرزمین ہے اور صوفیوں نے اسلام کے فروغ میں اہم کردار ادا کیا ہے۔ صوفیوں نے دنیا میں امن کو عام کرنے میں اہم کردار ادا کیا اور ان کی قربانیاں سیکڑوں سال پر محیط ہیں۔ بلاول بھٹو زرداری کا کہنا تھا کہ آج امن کی جگہ دہشت گردی نے لے لی ہے ، میں نے اپنی ماں کو دہشت گردی کے ہاتھوں کھویا ہے۔

ایمزٹی وی(اسلام آباد)دفتر خارجہ نے چمن بارڈر پر افغان فورسز کی فائرنگ پر سخت تشویش کا اظہار کرتے ہوئے کہا ہے کہ صبح سے جاری فائرنگ کا سلسلہ بند نہ کیا گیا تو پاکستان جوابی کارروائی کا حق رکھتا ہے۔ تفصیلات کے مطابق ترجمان دفتر خارجہ نفیس زکریا نے ہفتہ وار بریفنگ دیتے ہوئے کہا کہ چمن بارڈر پر افغان فورسز کی فائرنگ پر سخت تشویش ہے۔ فائرنگ سے ایک ہلاکت اور متعدد افراد کے زخمی ہونے کی اطلاع ہے جبکہ پاکستان جوابی کارروائی کا حق محفوظ رکھتا ہے۔ ترجمان نے بتایا کہ مردم شماری کے حوالے سے افغانستان کوپہلے سے آگاہ کیا تھا جبکہ مردم شماری ٹیم پاکستانی علاقے میں اپنے فرائض انجام دے رہی تھی۔ انہوں نے کہا کہ ہم افغان حکومت پر زور دیتے ہیں کہ وہ پاکستانی دیہات پر فائرنگ فوری بند کرے اور اگر فائرنگ کا یہ سلسلہ نہ رکا تو پاکستان جواب دینے کا حق محفوظ رکھتا ہے ۔ ان کا کہنا تھا کہ افغان صدر اشرف غنی کی جانب سے بیانات صرف الزامات ہیں اور بیان بازی سے امن کے قیام میں کوئی مدد نہیں ملے گی۔ ترجمان نے مزید کہا کہ اپریل میں 2خواتین اور 11 بچوں سمیت 25 کشمیری شہید ہوئے ہیں جبکہ بھارت کا منفی کردار افغانستان میں بھی مسائل بڑھا رہا ہے۔سی پیک میں کسی بھی ملک کی شمولیت کا فیصلہ پاکستان اور چین کریں گے۔

ایمزٹی وی(قصور)کور کمانڈر لاہور لیفٹیننٹ جنرل صادق علی نے فوج اور سول انتظامیہ کی زیر نگرانی قصور شہر میں جاری مردم شماری مہم کا جائزہ لینے کیلئے سینس کنٹرول ہیڈ کوارٹر قصورکا دورہ کیا۔ جہاں انہیں خانہ شماری اور مردم شماری کے حوالے سے اب تک کی مرحلہ وار پیشرفت کے بارے میں مفصل بریفنگ دی گئی۔ بعدازاں کور کمانڈر، قصور شہر کے مختلف وارڈز میں گئے اور مردم شماری ٹیموں اور شہریوں سے گفت و شنید کی اور مہم کے حوالے سے ان کا نقطہ نظر اور ردعمل معلوم کیا۔ انہوں نے دوران مہم عام شہریوں کے تعاون کو بے حد سراہا اور شکریہ ادا کیا اور مردم شماری کے اغراض و مقاصد اور یکساں قومی ترقی کے حوالے سے مردم وخانہ شماری کو بہت اہم قرار دیا۔' کور کمانڈر نے سول اور قومی اداروں کے باہمی اشتراک سے کامیابی سے جاری اس مہم اور اس مہم میں حصہ لینے والی ٹموں کی کارکردگی کی تعریف کی۔ دورے کے دوران اہم سول اور فوجی افسران ان کے ہمراہ تھے۔

ایمزٹی وی(اسلام آباد)پاکستان پیپلز پارٹی نے قومی اسمبلی میں اپوزیشن لیڈر خورشید شاہ کے خلاف بیان دینے پر وزارت داخلہ کے ترجمان کیخلاف تحریک استحقاق قومی اسمبلی میں جمع کرا دی ہے۔ تفصیلات کے مطابق پیپلز پارٹی کا کہنا ہے کہ ترجمان وزارت داخلہ نے اپوزیشن لیڈر خورشید شاہ کے خلاف بیان دیا اس لئے تحریک استحقاق جمع کرائی گئی ہے۔ ذرائع کے مطابق یہ تحریک استحقاق نوید قمر، نواب یوسف تالپور، ڈاکٹر نفیسہ شاہ، شازیہ مری، اعجاز جاکھرانی اور عمران ظفر لغاری کی جانب سے جمع کرائی گئی ہے۔

ایمزٹی وی(لاہور)سابق آرمی چیف جنرل (ر) اسلم بیگ نے بھارتی آرمی چیف کی دھمکی کو بڑھک قرار دیتے ہوئے کہا ہے کہ بھارت کو جارحیت کی قیمت کا بخوبی علم ہے۔ میڈیا ذرائع کے مطابق جنرل (ر) اسلم بیگ نے کہا ہے کہ بھارت کو جارحیت کی قیمت کا بخوبی علم ہے اس لئے بھارتی آرمی چیف کی دھمکی بڑھک سے زیادہ کچھ بھی نہیں ہے۔ انہوں نے کہا کہ بھارتی فوجیوں کی ہلاکت میں پاکستان ملوث نہیں جبکہ بھارت کشمیریوں کا حق خود ارادیت تسلیم کرے۔