Reporter SS

’دی اسائنمنٹ‘ کا نیا ٹریلر جاری

ایمز ٹی وی (انٹرٹینمنٹ)تھرل سے بھرپور فلموں کے دیوانوں کیلئے خوشخبری یہ ہے کہ امریکن تھرلر فلم ’دی اسائنمنٹ‘ کا نیا ٹریلر جاری کردیا گیا ہے۔

والٹر ہِل کی ہدایتکاری میں بننے والی اس فلم کی کہانی ایک ایسے پیشہ ور قاتل کے گرد گھوم رہی ہے، جو اپنی جنس کی تبدیلی کے بعد انتقام لینے کیلئے بے چین ہوتا ہے۔

فلم کی کاسٹ میں مچل روڈریگویز،سگورنے ویور،ٹونی شیلہوب،اینتھونی لاپگلیا،ٹیری چین اور پال میک گلین سمیت دیگر اداکار شامل ہیں۔

سیڈ بین سیڈ کی پروڈیوس کردہ یہ سنسنی خیز مناظر سے بھرپور فلم 3مارچ کو سینما گھروں کی زینت بنے گی۔

قومی ویمن ٹیم ورلڈ کپ میں اپنی عمدہ کارکردگی دکھائے گی

ایمز ٹی وی(اسپورٹس) ویمن کرکٹ ٹیم کی کپتان ثناءمیر کا کہنا ہے کہ میں نے ون ڈے ٹیم کی قیادت چھوڑنے سے متعلق ابھی کوئی اعلان نہیں کیا۔

تفصیلات کے مطابق میڈیا سے گفتگو کرتے ہوئے ان کا کہنا تھا کہ قومی ویمن ٹیم ورلڈ کپ میں اپنی عمدہ کارکردگی دکھائے گی۔بھارت سے ہار جانا کھیل کا حصہ ہے،اس ایک میچ کے علاوہ باقی میچز میں ٹیم کی پرفارمنس بھی دیکھیں ۔ان کا کہنا تھا کہ ہمارا مقصد صرف ورلڈ کپ کے لئے کوالیفائی کرنا تھا۔

میرے وزیراعظم نے ایمانداری کا مظاہرہ نہیں کیا

ایمزٹی وی(اسلام آباد)سپریم کورٹ میں پانامہ کیس کی سماعت کے دوران جسٹس عظمت سعیدشیخ کا نعیم بخاری سے مکالمہ ہوا اور جسٹس عظمت سعید نے کہا کہ” آج میری طبیعت ٹھیک نہیں اس لئے زیادہ تنگ نہیں کرنا“۔

تفصیلات کے مطابق سپریم کورٹ میں پانامہ کیس کی سماعت میں نعیم بخاری نے دلائل دیتے ہوئے کہا کہ میرے وزیراعظم نے ایمانداری کا مظاہرہ نہیں کیا،وزیر اعظم نے موزیک فونسیکاکو قانونی نوٹس نہیں بھجوایا،گیلانی کیس کی طرح میں بھی عدالت سے ڈکلیریشن مانگ رہا ہوں۔

عیم بخاری کا کہنا تھا کہ سالہا سال تک قطری مراسم کا کوئی ذکر نہیں کیا گیا،کیا ایسا شخص وزیر اعظم ہو سکتا ہے؟جس پر جسٹس عظمت سعید نے ریمارکس دیئے کہ آج میری طبیعت ٹھیک نہیں زیادہ تنگ نہیں کرنا۔یاد رہے کہ سپریم کورٹ میں پانامہ کیس کی سماعت ہورہی ہے اور امکان ہے کہ آج کیس کا فیصلہ سنا دیاجائے گا۔

لاہورمیں پر اسرار دھماکے کی گونج

ایمز ٹی وی(لاہور) لاہور کے پوش علاقے ڈیفنس میں پر اسرار دھماکے کے نتیجے میں 3 افراد کے شہید ہونے کی اطلاع ہےجبکہ متعدد زخمی ہیں۔

میڈیا رپورٹس کے مطابق لاہور کے علاقے ڈیفنس زیڈ بلاک کی مارکیٹ میں زور دار دھماکا ہوا جس کے نتیجے میں 3افراد شہیداو ر متعدد زخمی ہو گئے جنہیں طبی امداد کیلئے ہسپتال روانہ کر دیا گیا ہے ۔ دھماکے کے بعد امدادی ٹیمیں اور قانون نافذ کرنے والے اداروں کے اہلکار جائے حادثہ کی جانب روان ہو گئے ہیں ۔

دھماکے کے بعد قانون نافذ کرنے والے اداروں نے علاقے کو گھیرے میں لے لیا ہے اور پولیس کی مزید نفری طلب کر لی گئی ہے جبکہ سرچ آپریشن کا بھی آغاز کر دیا گیا ہے ۔ دھماکے میں شہید ہونے والے شخص کی شناخت ابھی تک نہیں ہو سکی اور دھماکے کی نوعیت کا تعین کیا جا رہا ہے۔

شریف خاندان سے 371سوالات کئے ،جواب نہیں دیا گیا

ایمزٹی وی(اسلام آباد)پاناما لیکس کی سماعت کے دوران دلائل دیتے ہوئے شیخ رشید نے کہا کہ میں اتنا اسکول و کالج نہیں گیا جتنا عدالت میں پیش ہوتا رہا ہوں ،سب سے زیادہ سوال جسٹس عظمت سعید نے کیے اس لیے ان کا دل زخمی ہو گیا ۔اس بات پر جسٹس عظمت نے جواب دیتے ہوئے کہا کہ آپ تھوڑی سنجیدگی اختیار کریں تاکہ آگے بڑھیں ۔

تفصیل کے مطابق سپریم کورٹ میں پاناما لیکس کیس کی سماعت کے دوران شیخ رشید نے دلائل دیتے ہوئے کہا کہ اہم فیصلوں کے لیے اللہ ہی لوگوں کا انتخاب کرتا ہے ۔انہوں نے کہا کہ انصاف کی اکیڈمی میں ایک دن بھی ناغہ نہیں کیا ،میں اتنا اسکول و کالج نہیں گیا جتنا عدالت میں پیش ہوتا رہا ہوں ۔

ان کا کہنا تھا کہ عدالت نے شریف خاندان سے 371سوالات کیے ،جواب نہیں دیا گیا ،سب سے زیادہ سوالات جسٹس عظمت سعید نے کیے ،اس لیے ان کا دل زخمی ہو گیا ۔اس بات پر جسٹس آصف کھوسہ نے کہا کہ کیا جسٹس عظمت سعید کا دل جواب نہ آنے سے زخمی ہوا ؟۔شیخ رشید کی بات پر جسٹس عظمت سعید نے کہا کہ آپ تھوڑی سنجیدگی اختیار کریں تاکہ آگے بڑھیں جس پر شیخ رشید نے کہا کہ میں سنجیدگی سے بات کر رہا ہوں ۔

تاجروں کو ایئرپورٹ پر ویزا دینے کا اعلان

ایمز ٹی وی(تجارت) نیپالی حکومت نے پاکستانی تاجروں کو ایئرپورٹ پر ہی ویزا دینے کا اعلان کردیا اور کہا ہے کہ پاکستانی تاجروں کا خیرمقدم کریں گے۔

یہ بات نیپالی سفیر سیوالمسال ادھیکاری نے ایف پی سی سی آئی(پاکستان چیمبر آف کامرس اینڈ انڈسٹری)کے دورے میں تاجروں سے خطاب میں کہی ۔اطلاعات کے مطابق نیپال کے سفیر نے کہا کہ نیپال پاکستان کے ساتھ خوشگوار تجارتی تعلقات استوار کرنا چاہتا ہے جس کے لیے وہ ہرممکن اقدام اٹھائے گا، تاجروں کو ویزا دینے کی راہ میں کوئی رکاوٹ حائل نہیں، وہ نیپال آئیں انہیں ایئرپورٹ پر ہی ویزا دے دیا جائے گا۔

ان کا کہنا تھا کہ نیپال اور پاکستان کے درمیان تجارتی حجم کم ہونے کی بڑی وجہ ذرائع نقل و حمل نہ ہونا اور معلومات کا فقدان ہیں جنہیں دور کرنے کی ضرورت ہے۔ نیپال کے سفیر نے ایف پی سی سی آئی کے ممبران کو نیپال انویسٹمنٹ سمٹ میں شرکت کی دعوت بھی دی جو کہ رواں سال مارچ میں منعقد ہوگی۔ سارک چیمبر کے نائب صدر افتخار علی ملک نے کہا کہ سارک چیمبر نیپال اور پاکستان کے درمیان تجارت کو مضبوط کرنے میں اہم کردار ادا کرسکتا ہے، خطے کی معاشی ترقی کے لیے ہرممکن کوششیں کریں گی تاہم ضرورت اس با ت کی ہے کہ دونوں ممالک آپس میں مارکیٹنگ اور ریسرچ کے شعبوں میں تعاون کریں۔

وفاقی چیمبر کے نائب صدر اور ریجنل چیئرمین منظور الحق نے کہا کہ نیپال اور پاکستان کو تجارتی مواقع کے ساتھ ساتھ سیاحت اور زراعت پر بھی توجہ دینی چاہیے۔

وزیراعظم نے 5سو روٹ پرمٹ ہم منصب حکومت کے حوالے کردیئے

ایمز ٹی وی(تجارت) پاکستان نے ترکی کی گاڑیوں کو ای سی او ممالک تک رسائی دینے کے لیے 5سو روٹ پرمٹ ترک حکومت کے حوالے کر دیے۔ روٹ پرمٹ ملنے کے بعد ترکی کی گاڑیاں پاکستان کے راستے ای سی او ممالک جائیں گی، پاکستان بھرپور سیکیورٹی فراہم کرے گا۔

اس سے قبل وزیراعظم نوازشریف اعلیٰ حکام کے ہمراہ تین روزہ دورے پر ترکی پہنچے ہیں،وفاقی وزراء شاہد خاقان عباسی،خرم دستگیر اور معاون خصوصی طارق فاطمی سمیت دیگر اعلیٰ حکام بھی وزیراعظم کےہمراہ ہیں۔

وزیراعظم اپنے دورے میں ترک قیادت سے دوطرفہ، علاقائی اور عالمی امور پر مشاورت کریں گےجبکہ ترک ہم منصب کے ہمراہ پانچویں اعلیٰ سطح کے اسٹریٹیجک کوآپریشن کونسل کی مشترکہ صدارت کریں گے۔ دورے کےموقع پرمختلف شعبوں میں معاہدوں پربھی دستخط کئے جانے کا امکان ہے۔

یونیور سٹی میں دفعہ 144کا نفاذ

ایمز ٹی وی (تعلیم /کراچی) جامعہ کراچی میں تمام تعلیمی، غیر تعلیمی پروگرامز اور اجتماعات ملتوی کردئے گئے ہیں ۔

جامعہ کراچی کےرجسٹرار نبیل زبیری کے جاری کردہ نوٹی فیکشن کے مطابق شہر میں سیکورٹی الرٹ اور دفعہ144 کے نفاز کے باعث یہ فیصلہ کیا گیا ہے۔

دریں اثنا رجسٹرار کے عہدے سے ہٹائے گئے ڈاکٹر معظم نے بدھ کو کیمپس سکریٹری ایڈوائزر کا عہدہ کا چارج نہیں سنبھالا اس اہم اور حساس عہدےپر تعینات ڈاکٹر خالدعراقی منگل کو مستفی ہوگئے تھے۔

کوئٹہ گلیڈی ایٹرز اور کراچی کنگزکا ٹکراﺅ

ایمز ٹی وی(اسپورٹس) پاکستان سپر لیگ میں کوئٹہ گلیڈی ایٹرز اور کراچی کنگز آج دبئی میں مد مقابل ہوں گی ۔

پی ایس ایل ٹو میں دو دن کے بریک کے بعد آج ہو گا پھر ہنگامہ ، شائقین کا شور و غل اور کھلاڑیوں کے چھکے چوکے، بیٹسمین گیند کو گراؤنڈ سے باہر پھینکیں گے تو بولرز بیٹسمینوں کو میدان بدر کریں گے ۔

ٹورنامنٹ میں کوئٹہ کی ٹیم پانچ میچز کھیل کر سات پوائنٹس کے ساتھ ٹاپ پوزیشن پر موجود ہے جبکہ کراچی کنگز پانچ میچز میں چار پوائنٹس کے ساتھ آخری پوزیشن پر ہے ۔

کوئٹہ کی ٹیم کے کپتان سرفراز اپنی برتری کو قائم کرنے کے لیے پر عزم ہیں تو دوسری جانب کراچی ٹیم کے سنگاکارا پی ایس ایل ٹو میں ایک اور جیت کےلیے پر امید ہیں۔

ایونٹ کا یہ میچ آج رات نو بجے جیوسوپر براہ راست دکھایا جائے گا۔

ایل ایل بی 5 سالہ پروگرام کو تسلیم کرنے کا حکم نامہ جاری

ایمز ٹی وی(تعلیم / کراچی ) پاکستان بار کونسل نے بینظیر بھٹو شہید یونیورسٹی لیاری کراچی کےا یل ایل بی 5 سالہ پروگرام کو تسلیم کرنے کا حکم نامہ جاری کر دیا ہے۔ پاکستان بار کونسل کے حکم نامے کے مطابق تین سالہ ایل ایل بی پروگرام کے پاس ہونے والے طلباء کو سی آر بی سی اور سی پی سی کے مضامین میں نیشنل ٹیسٹنگ سروس (NTS)کا امتحان پاس کرنا ہوگا۔

بصورت دیگر 2ہزار روپے فی اسٹوڈنٹس کو پاکستان بار کونسل کے اکائونٹ میں جمع کروانا ہوگا تاکہ ان طلباء کے ناموں کو صوبائی بار کونسل کو سفارش کے ساتھ انرولمنٹ کے لئے بھیجا جا سکے۔ شہید ذوالفقار علی بھٹو لاء کالج کی انتظامیہ نے طلباء کو ہدایت کی ہے کہ وہ جلد از جلد کالج کے ایڈمن آفس سے رابطہ کریں۔

Page 1898 of 2387