Reporter SS
ایمزٹی وی(اسپورٹس)پاکستان سپر لیگ کا فائنل لاہور میں کرانے کے لیے پنجاب حکومت نے سیکیورٹی کے لیے کمیٹی تشکیل دیدی ہے۔
ذرائع کے مطابق پنجاب حکومت نے پاکستان سپر لیگ کا فائنل لاہور میں کرانے کے لیے سیکیورٹی کمیٹی تشکیل دی ہے جو قومی و بین الاقوامی کھلاڑیوں اور عوام کو سیکیورٹی فراہم کرے گی۔ کمیٹی میں صوبائی وزرا، محکمہ داخلہ، پولیس اور قانون نافذ کرنے والے اداروں کے افسران شامل ہیں جو سیکیورٹی پلان کا مکمل جائزہ لے کر وزیراعلیٰ کو آگاہ کریں گے۔
واضح رہے کہ آرمی چیف جنرل قمر جاوید باجوہ پہلے ہی کہہ چکے ہیں کہ پاکستان سپر لیگ کا فائنل شیڈول کےمطابق لاہورمیں ہی ہوگا اور پی ایس ایل فائنل کے تمام انتظامات مکمل رکھے جائیں جب کہ پی ایس ایل فائنل کی سکیورٹی کے لئے پولیس ودیگرسیکیورٹی اداروں کی معاونت کریں گے۔
ایمزٹی (اسلام آباد)اسلام آباد میں فوجی عدالتوں کی مدت میں تو سیع پر قومی اسمبلی کی ذیلی کمیٹی کا اجلاس آج بغیر کسی نتیجے کے ختم ہوگیا کل دوبارہ سے شروع ہوگا۔
میڈیا ذرائع کے مطابق ذرائع کا کہنا تھا کہ پاکستان پیپلز پارٹی اور پی ٹی آئی کے حکومتی مسودے پر تحفظات ابھی تک برقرار ہیں۔
زاہدحامدکا کہنا تھا کہ اجلاس میں 2 جماعتوں نے فوجی عدالتوں سے متعلق پرانی ترمیم کی حمایت جبکہ 2نے ان کی مخالفت کی۔
ایمزٹی وی(اسپورٹس)پاکستان کے مڈل آرڈر بلے باز عمر اکمل نے کہا ہے کہ بھارتی کرکٹر ویرات کوہلی کے ساتھ ان کا نہیں بلکہ بابر اعظم کا موازنہ کیا جائے جو تیسرے نمبر پر بہترین کارکردگی دکھا رہے ہیں۔
تفصیلات کے مطابق عمر اکمل کا کہنا ہے کہ ان کا موازنہ ویرات کوہلی کے ساتھ کیا جانا غلط ہے کیونکہ وہ مختلف نمبروں پر بلے بازی کرتے ہیں۔ اسلام آباد یونائیٹڈ کے خلاف 42 گیندوں پر 66 رنز کی عمدہ اننگز کھیلنے کے بعد گفتگو کرتے ہوئے عمر اکمل کا کہنا تھا کہ ”جب لوگ ویرات کوہلی کے ساتھ میرا موازنہ کرتے ہیں، تو یہ صرف نمبر کی بات ہے، کوہلی شروع سے ہی تیسرے نمبر پر بیٹنگ کر رہا ہے اور میں چھٹے نمبر پر بیٹنگ کر رہا ہوں۔ مجھے تیسرے نمبر پر کھیلنے دو اور اسے چھٹے نمبر پر، پھر ہم دونوں کا موازنہ کریں۔“
انہوں نے مزید کہا کہ ویرات کوہلی کے ساتھ موازنے کیلئے صحیح کھلاڑی بابر اعظم ہیں جنہوں نے گزشتہ چند مہینوں میں بین الاقوامی کرکٹ کی دنیا میں خوب دھوم مچائی ہے۔ ان کا کہنا تھا کہ ”ویرات کا موازنہ بابر اعظم سے کریں، جو تیسرے نمبر پر بہترین کارکردگی دکھا رہا ہے، وہ بہترین فارم میں ہے اس لئے آپ اس کا ویرات کوہلی کے ساتھ موازنہ کر سکتے ہیں، میرا نہیں۔“
واضح رہے کہ ویرات کوہلی نے 179 ون ڈے انٹرنیشنل میچوں میں 7,755 رنز بنا رکھے ہیں جبکہ عمر اکمل نے 116 میچ کھیل کر 3,044 رنز بنائے ہیں۔ اسی طرح ویرات کوہلی نے 48 میچ کھیل کر 1,709 رنز بنا رکھے ہیں جبکہ عمر اکمل نے 82 میچوں میں 1,690 رنز بنائے ہیں
ایمزٹی وی(اسلام آباد)وزیرمملکت برائے انفارمیشن ٹیکنالوجی انوشہ رحمان کی جانب سے صحافی کا موبائل فون چھینے جانے کے معاملے پر صحافیوں نے شدید احتجاج کیا اور جب پاناما کیس کی سماعت کے بعد وفاقی وزیر سعد رفیق پریس کانفرنس کے لئے ڈائس پر پہنچے تو صحافیوں نے حکومت کے خلاف نعرے بازی کرتے ہوئے کہا کہ وفاقی وزراء ججز کا غصہ ہم پر نہ نکالیں۔ متاثرہ صحافی نے کہا کہ انوشہ رحمان مجھ سے موبائل فون چھینا اور دھمکی بھی دی جب کہ ایک اورصحافی نے کہا کہ انوشہ رحمان قرآن پر ہاتھ رکھ کر بتائیں کہ وہ خود عدالت کے اندر سے موبائل فون سے مریم نواز کو میسج نہیں کرتیں۔
خواجہ سعد رفیق نے واقعے کی وضاحت کرتے ہوئے بتایا کہ جب مجھے اس بات کا پتہ چلا تو انوشہ رحمان سے کہہ کر صحافی کا موبائل واپس دلوایا لیکن قانون کے مطابق کسی کو بھی احاطہ عدالت میں موبائل لے کر جانے کی اجازت نہیں ہے۔ خواجہ سعد رفیق بھی اپنی پریس کانفرنس کے دوران صحافیوں پر برستے رہے اور کہا کہ کسی بھی صحافی، وزیر یا وکیل کے لئے علیحدہ قانون نہیں ہو سکتا بلکہ قانون سب کے لئے برابر ہےجب کہ انہوں نے احتجاج کرنے والے صحافیوں کو تحریک انصاف کا ایجنٹ قرار دیدیا۔
مسلم لیگ (ن) کی رہنما انوشہ رحمان کی جانب سے صحافی کا موبائل فون چھیننے کے معاملے پر صحافیوں نے وفاقی وزیر ریلوے خواجہ سعد رفیق کی پریس کانفرنس کے دروان شدید احتجاج کیا جس کی وجہ سے ان کی کانفرنس بد نظمی کا شکار ہو گئی۔
بعد ازاں متاثرہ صحافی نے وزیر مملکت انوشہ رحمان کے خلاف تھانہ سیکرٹریٹ میں درخواست دائر کرادی جس میں موقف اختیار کیا گیا کہ انوشہ رحمان نے سپریم کورٹ کے احاطے میں موبائل چھیننے کی کوشش کی اور دھمکیاں بھی دیں۔ درخواست میں کہا گیا ہے کہ بااثر وزیر سے جان کا خطرہ ہے تحفظ فراہم کیا جائے اور انصاف فراہم کیا جائے۔ دوسری جانب وزیر مملک برائے انفارمیشن ٹیکنالوجی انوشہ رحمان نے اپنے بیان میں کہا کہ صحافی چھپ کر میری ویڈیو بنا رہا تھا اس لئے موبائل چھینا۔
ایمزٹی وی(کراچی)قومی انسداد دہشتگردی حکام نے ملک بھر میں مزارات پر خودکش حملوں کا خدشہ ظاہر کر دیا ۔ میڈیا ذرائع کے مطابق نیشنل کاﺅنٹر ٹیررازم اتھارٹی (نیکٹا) نے مراسلہ جاری کرتے ہوئے ملک بھر میں مزارات پر خودکش حملوں کا خدشہ ظاہر کیا ہے ۔ مراسلے میں مزید کہا گیا ہے کہ دہشگردوں نے حملوں کیلئے بارود سے بھری گاڑیاں تیار کر لی ہیں مگر پاک افغان سرحد بند ہونے سے یہ گاڑیاں پاکستان میں داخل نہیں ہو سکیں ۔
نیکٹاکی جانب سے ملک بھر میں قانون نافذکر نے والے اداروں کو آگاہ کر دیا گی اہے اور مراسلے میں کہا گیا ہے کہ ممکنہ دہشتگردی سے نمٹنے کیلئے سخت سیکیورٹی انتظامات جبکہ سپتالوں اور سکولوں سمیت اہم مقامات کو کڑی نگرانی میں رکھا جائے۔
مراسلے میں کہا گیا ہے کہ دہشتگرد پنجاب اور سندھ سمیت ملک کے دیگر حصوں میں بڑے اور چھوڑے مزارات کو نشانہ بنا سکتے ہیں ۔
ایمزٹی وی(اسلام آباد)پاکستان تحریک انصاف کے چیئر مین عمران خان نے بنی گالہ کے باہر میڈیا سے گفتگو کرتے ہوئے کہا کہ میرے فلیٹ کی ہر چیز اور سیلز ڈیٹ الیکشن کمیشن کے پاس ہے اور میں نے فلیٹ کی منی ٹریل بھی دے رکھی ہے مگر شریف خاندان نے اب تک خریداری کی تاریخ نہیں دکھائی ۔ اٹارنی جنر ل شریف خاندان کے وکیل بنے ہوئے تھے ۔
انہوں نے کہا کہ موٹو گینگ کے حالات بڑے برے نظر آرہے ہیں کیونکہ انہیں معلوم ہے کہ عدالت میں کہنے کی باتیں ختم ہو چکی ہیں۔اٹارنی جنر ل نے آج سپریم کورٹ میں جو کہا مجھے شرم آئی ۔ ایف بی آر کو بھی کرپشن کی تحقیقات میں دلچسپی نہیں ہے ۔ایف بی آر پیسے جمع کرنے کی بجائے سودے بازی کرتا ہے۔
چیئرمین تحریک انصاف عمران خان کا مزیعد کہنا ہے کہ نیب صرف کرپٹ شریف فیملی کی حفاظت کررہا ہے ، کل عدالت میں نیب کا جنازہ نکلے گا ۔ نیب پر کسی کو اعتماد نہیں تاہم دعا ہے کہ کل تک پاناما کیس کا فیصلہ آجائے گا ۔ انہیں 6باریاں اور دے دیں ادارے ٹھیک نہیں ہوں گے۔
عمران خان نے کہا کہ کے پی پولیس کو غیر سیاسی کردیا کوئی نہیں کہتا کہ وہاں رینجرز کی ضرورت ہے۔ادارے ایسے ہی تباہ نہیں ہوئے بلکہ انہیں تباہ کیا گیا ۔ہم نے خیبر پختونخوا کی پولیس کو غیر سیاسی کیا ۔زبیر محمود کو برا بھلا کہنے کا فائدہ مل گیا مگر دوسرے لوگوں کے نصیب میں شیروانی نہیں ہو گی ۔
ایمزٹی وی(اسلام آباد)وفاقی وزیرداخلہ چوہدری نثار کی زیر صدارت اجلاس کیا گیا جس میں نیشنل سیکیورٹی ایڈوائزرناصر جنجوعہ، سیکریٹری داخلہ اور آئی جی پنجاب نے شرکت کی۔اجلاس میں رینجرز کو پنجاب میں اختیارات انسداد دہشت گردی ایکٹ کے تحت60 دن کیلئے دیئے جا رہے ہیں۔
پنجاب میں رینجرز کو اختیارات دینے کی سفارش اپیکس کمیٹی کی جانب سے کی گئی تھی۔اس موقع پر وفاقی وزیرداخلہ نے کہا کہ دہشتگرد اورسہولت کار جہاں بھی ہوں تعاقب کرکے کیفر کردار تک پہنچایا جائیگا، رینجرزدہشتگردوں کیخلاف پولیس،قانون نافذ کرنےوالے اداروں کی معاونت کرے گی۔
انہوں نے کہا کہ حکومت دہشت گردی کے مکمل خاتمے کے لیے پر عزم ہے، صوبوں کو ہر ممکن مدد فراہم کرنے کی پالیسی پر سختی سے کاربند ہیں۔چوہدری نثار کا کہنا تھا کہ دہشتگردوں کیخلاف جنگ میں مضبوط اعصاب اورقومی یکجہتی کی ضرورت ہے۔
ایمزٹی وی(اسلام آباد)پانامہ کیس میں ہلکے پھلکے جملوں سے ماحول خوشگوار رہا۔ سوال تھا کہ جھوٹ بولنے والا رکن اسمبلی نہیں بن سکتا تو پھر کیا سارے شوہروں کی رکنیت خطرے میں پڑ گئی؟ جسٹس کھوسہ نے کنوارے لوگوں کو سچا کہہ ڈالا تو شیخ رشید مسکرا دیئے۔
پاناما کیس میں سوال اٹھ گیا بے ایمانی کا مطلب آخر ہے کیا؟ جسٹس شیخ عظمت کہنے لگے کہ جواب کسی فریق نے نہیں دیا۔ جسٹس عظمت نے یہ بھی پوچھ لیا کہ کیا جھوٹ بولنے والا رکن اسمبلی نہیں بن سکتا؟ انھوں نے ساتھ ہی کہا کہ بیوی سے تو ہر شخص جھوٹ بولتا ہے ، دفتر میں بیٹھ کر کہا جاتا ہے راستے میں ہوں۔ اس پر جسٹس کھوسہ کہنے لگے کہ جو شادی شدہ نہیں وہ جھوٹ بھی نہیں بولتا۔
ریمارکس سن کر کنوارے شیخ رشید زیر لب مسکرا دیئے۔ عدالت نے نیب پراسیکیوٹر گمراہ کرنے لگے۔ دوران سماعت اٹارنی جنرل کی ٹانگ دکھنے لگی تو جسٹس اعجاز افضل نے بیٹھ کر دلائل دینے کو کہہ دیاتو نعیم بخاری نے اپنی نشست پیش کر دی ۔
ایمزٹی وی(راولپنڈی )اڈیالہ جیل کو دہشتگردوں کی طرف سے نشانہ بنانے کیلئے الرٹ جاری کردیا گیا ہےمیڈیا ذرائع کے مطابق حساس اداروں کی جانب سے الرٹ کے بعد اڈیالہ جیل کی سکیورٹی پاک فوج نے سنبھال لی ہے اور جیل کے اندر دہشتگردوں کیلئے الگ بیرک بنا لیا گیا ہے
اڈیالہ جیل کی حفاظت کیلئے 200 جوانوں پر مشتمل اسکواڈ بنا دیا گیا ہے جبکہ پولیس ،رینجرز اور پاک فوج کے جوانوں نے جیل میں کنٹرول روم قائم کرلیا ہے۔
واضح رہے کہ گذشتہ روز چارسدہ تنگی کچہری کے باہر خودکش حملہ آور نے اپنے آپ کو دھماکے سے اڑا لیا تھا جس کے نتیجے میں 7 افراد جاں بحق جبکہ 20 زخمی ہوگئے تھے۔
ایمز ٹی وی(مانیٹرنگ ڈیسک) دنیا بھر میں تیزی سے مقبول ہوتی ہوئی سوشل میڈیا ویب سائٹ فیس بک نے اب ایک انوکھی سہولت متعارف کرادی ہے جس میں صارفین بیرون ملک رقم بھی بھیج سکتے ہیں۔
فیس بک کے ذریعے رقم ٹرانسفر کرنے کی سہولت ایک نئی کمپنی ٹرانسفر وائز کے ذریعے ہوسکے گی جس نے ایک چیٹ بوٹ لانچ کیا ہے جو فیس بک صارفین کو اس کی میسنجر سروس کے ذریعے رقم منگوانے اور بھیجنے کی سہولت فراہم کرتا ہے۔
تجرباتی طور پر یہ چیٹ بوٹ امریکا، کینیڈا، آسٹریلیا اور یورپی یونین کے درمیان رقم کی آمد و ترسیل کی سہولت فراہم کرتا ہے۔ اس کے علاوہ یہ صارفین کو ان کی کرنسی کی مناسب شرح تبادلہ ( ایکسچینج ریٹس) سے بھی آگاہ کرتا ہے۔
اس سے قبل فیس بک کے ذریعے رقم کی منتقلی کی سہولت صرف امریکا میں موجود تھی لیکن مختلف ممالک کے اکاؤنٹس کے درمیان رقم کا تبادلہ ممکن نہ تھا۔ ٹرانسفر وائز کمپنی لندن میں واقع ہے جس کے ذریعے ہر ماہ 10 لاکھ افراد ایک ارب ڈالر تک کی رقم کا تبادلہ کرتے ہیں۔ اس نئی کمپنی کے لیے ورجن فاؤنڈر رچرڈ برینسن اور ایک مالیاتی فرم اینڈرسین ہوروز نے رقم فراہم کی ہے۔
ٹرانسفر وائز پیسوں کی منتقلی کے درمیان بھاری رقم کا مطالبہ نہیں کرتی اور اسی بنا پر لوگوں نے اسے پسند کیا ہے۔ کمپنی صارفین کو اجازت دیتی ہے کہ وہ اپنی رقم اپنے ملک کے کسی مقامی ٹرانسفر وائز بیک اکاؤنٹ میں جمع کروادیں اور اتنی ہی رقم دوسرے ملک کے کسی مقامی ٹرانسفر وائز بینک سے حاصل کرسکتے ہیں۔
کمپنی کو برطانیہ کے مالیاتی اداروں نے ریگولیشن سند دیدی ہے جب کہ کمپنی کا مؤقف ہے کہ اس کا چیٹ بوٹ صارفین کے تحفظ کے تمام معیارات پر پورا اترتا ہے۔ فیس بک میسنجر کے لیے یہ چیٹ بوٹ پہلی مرتبہ گزشتہ سال اپریل میں جاری کیا گیا تھا۔