Reporter SS

تحصیل نارا میں اسکولوں پر چھاپے

ایمز ٹی وی (تعلیم) ایڈیشنل ڈپٹی کمشنر ریاض حسین وسان کے تحصیل نارا میں اسکولوں پر چھاپے یونین کونسل کھینواری کے 18اسکولوں میں سے 10اسکولوں کو تالے لگے ہوئے تھے 8اسکول بغیر عمارت کے دھوپ میں چل رہے تھے، تفصیلات کے مطابق ایڈیشنل ڈپٹی کمشنر خیرپور ریاض حسین وسان نے تعلیمی ایمرجنسی پر عمل درآمد کرانے کے لیے تحصیل نارا میں اسکولوں پر اچانک چھاپے مارے اسکولوں پر اچانک چھاپوںکے دوران یونین کونسل کھینواری کے 18اسکولوں میں سے 10اسکولوں کو تالے لگے ہوئے تھے جبکہ 8اسکول بغیر عمارتوں کے دھوپ میں چل رہے تھے بعد ازاں ریاض حسین وسان نے بتایا کہ حکومت نے ان کو تعلیمی ایمر جنسی پر عمل درآمد کرانے کے لیے ڈسٹرکٹ ایجوکیشن مانیٹرنگ آفیسر مقرر کیا ہے وہ تعلیم کی بہتری کیلئے تحصیل نارا گئے تھے جہاں انہوں نے یونین کونسل کھینواری کے اسکولوں کو دیکھا یونین کونسل کھینواری میں جملے 18پرائمری اسکول ہیں ان میں سے 10اسکولوں کو تالے لگے ہوئے تھے جبکہ 8اسکول بغیر عمارت کے دھوپ میں چل رہے تھے انہوں نے کہاکہ اسکولوں کو تالے لگے ہوئے دیکھ کر ان کو بہت بڑا صدمہ پہنچا جبکہ 8اسکولوں کے اساتذہ بچوں کو دھوپ میں پڑھا رہے تھے تحصیل نارا سندھ کی پسماندہ تحصیل ہے جہاں ان کو اسکول بند دیکھ کر افسوس ہوا انہوں نے بتایا کہ وہ تفصیلی رپورٹ تیار کر کے سندھ کے سیکرٹری تعلیم اور ڈپٹی کمشنر خیرپور کو دیں گے انہوں نے کہاکہ بند اسکولوں میں مقرر اساتذہ کو انہوں نے دفتر طلب کیا ہے اسکول کیوں بند پڑے ہیں اس کی انکوائری کریں گے جبکہ جن اسکولوں کو عمارتیں نہیں ہیں اس کیلئے وہ سندھ حکومت کو اسکولوں کو عمارتیں مہیا کرنے کیلئے لکھیں گے ۔

بیواؤں کے قرضے معاف کرنے پر غور

ایمز ٹی وی (تجارت) وفاقی حکومت نے ملک بھر کی 5 ہزار بیواؤں کے ہاؤس بلڈنگ فنانس کارپوریشن سے حاصل کردہ قرضے معاف کرنے کا اصول فیصلہ کرتے ہوئے سمری منظوری کے لیے وزیر خزانہ کو بھیج دی ہے۔ تفصیلات کے مطابق وفاقی حکومت نے 5 ہزار بیواؤں کے ہاؤس بلڈنگ فنانس کارپوریشن سے حاصل کردہ قرضے معاف کرنے کا فیصلہ کرلیا ہے، اس ضمن میں ایچ بی ایف سی کے بورڈ آف ڈائریکٹر نے بھی بیواؤں کے واجب الادا قرضوں کے تمام بقایا جات معاف کرنے کی منظوری دے دی ہے۔ قرضہ حاصل کرنے والی بیواؤں کی مکمل تفصیلات یکجا کر کے محکمہ جاتی کارروائی مکمل کرلی گئی ہے تاہم مزید بیوہ خواتین کی تصدیق کا عمل جاری ہے جو جلد مکمل کرلیا جائے گا۔

وزیرخزانہ کو بھیجی جانے والی دستاویز میں لکھا گیا ہے کہ بیواؤں کے ہاؤس بلڈنگ قرضوں کی معافی کے لیے 80 کروڑ روپے سے زائد فنڈز مختص کیے گئے ہیں۔ ایچ بی ایف سی کی جانب سے بھی باقاعدہ طور پر وزارتِ خزانہ کو تحریری خط منظوری کے لیے بھیج دیا گیا ہے تاہم جواب موصول ہوتے ہی قرضے کی معافی کا عمل شروع کردیا جائے گا۔ دستاویز کی منظوری کے بعد قرضوں کی معافی اور بیواؤں سے متعلق مزید کارروائی عمل میں لائی جائے گی تاہم وزیرخزانہ کی جانب سے جواب نہ آنے تک بیواؤں کے خلاف قرضوں کی ادائیگی پر کوئی کارروائی عمل میں نہیں لائی گی اور حکومت کے جواب کے بعد ہی مزید اقدامات کیے جائیں گے۔

گیس لیکیج کے باعث دھماکہ مکان ملبے کا ڈھیر

ایمز ٹی وی(کراچی) کلفٹن نیلم کالونی میں گیس لیکیج کے باعث دھماکے سے 2 منزلہ مکان گرگیا جس کے نتیجے میں خاتون سمیت 2 افراد جاں بحق جبکہ 4 شدید زخمی ہوگئے۔

کراچی میں کلفٹن کے علاقے نیلم کالونی میں گیس لیکج کے باعث 2 منزلہ مکان گرگیا، عمارت زمین بوس ہوئی تومکین ملبے کے نیچے دب گئے۔ علاقہ مکینوں نےاپنی مدد آپ کے تحت انہیں باہر نکالا، ملبے میں دبے 6 زخمی افراد کو جناح اسپتال منتقل کیا گیا جہاں خاتون سمیت 2 افراد جاں بحق ہوگئے۔

علاقہ مکینوں نے بتایا کہ کوئی حکومتی مشینری مدد کے لئے نہیں پہنچی اورانہوں نے اپنی مدد آپ کے تحت ملبہ ہٹانے کا کام کیا۔ زخمیوں نے اسپتال پہنچ کر ڈاکٹرز کو بتایا کہ مکان میں گیس نہیں تھی، پڑوسی سے کنکشن لیا ہوا تھا جس سے گیس لیک ہورہی تھی اور جیسے ہی کمرے میں روشنی کے لئے بٹن دبایا تو دھماکا ہوگیا اورمکان گرگیا۔

کریم کیب سروس کو سندھ ہائی کورٹ میں چیلنج

ایمز ٹی وی(کراچی) کریم کیب سروس کو سندھ ہائی کورٹ میں چیلنج کردیا گیا، عدالت نے درخواست قابل سماعت ہونے پر دلائل طلب کرلیے۔

سندھ ہائی کورٹ کے دورکنی بینچ نے درخواست کی سماعت کی، درخواست گزار احسن پوری کا کہنا ہےکہ کریم کیب سروس رجسٹریشن کے بغیر کمرشل بنیادوں پر چلائی جارہی ہے، پرائیویٹ کار کو کمرشل بنیادوں پر نہیں چلایا جاسکتا ، کریم کیب سروس نے موٹر وہیکل آرڈیننس کی خلاف ورزی کی ہے۔

عدالت نے درخواست قابل سماعت ہونے پر دلائل طلب کرتے ہوئے سماعت غیر معینہ مدت تک ملتوی کردی۔

ملبے تلے دب کر2 بچوں سمیت4 افراد زخمی

ایمز ٹی وی(کراچی) کراچی کے علاقے کلفٹن نیلم کالونی میں 2 منزلہ عمارت گرگئی جس کے نتیجے میں خاتون سمیت 2 افراد جاں بحق ہوگئے۔

ریسکیو ذرائع کے مطابق عمارت کے ملبے تلے دب کر2 بچوں سمیت4 افراد زخمی ہوئے ہیں جنہیں اسپتال منتقل کردیا گیا ہے جبکہ ملبے میں مزید افراد کے دبے ہونے کاخدشہ ہے۔

ریسکیو اور پولیس اہلکار حادثے کی جگہ پر امدادی سرگرمیوں میں مصروف ہیں، تنگ گلیوں کے باعث امدادی سرگرمیوں میں مشکلات کا سامنا ہے۔

اہل علاقہ کا کہنا ہے کہ عمارت زیادہ مخدوش نہیں تھی، عمارت کی نچلی منزل میں کرائےداررہائش پذیرتھے۔

انگلینڈ اوربھارت کا آخری ٹی ٹوئنٹی

ایمز ٹی وی(اسپورٹس) انگلینڈ اوربھارت کے درمیان تیسرااور آخری ٹی 20 میچ آج(بدھ کو ) کھیلا جائے گا۔

بھارتی نجی ٹی وی کے مطابق 3 میچوں کی سیریزکا تیسرا اور آخری ٹی ٹو ئنٹی میچ آج (بدھ کو) بھارتی شہر بنگلورکے چناسوامی اسٹیڈیم میں پاکستانی وقت کے مطابق رات ساڑھے چھ بجے جبکہ بھارتی وقت کے مطابق 7 بجے شروع ہوگا ، تین میچوں کی سیریز 1-1 سے برابر ہے۔

واضح رہےٹی 20 میں اب تک دونوں ٹیموں 10 مرتبہ مد مقابل آ چکی ہیں جس میں 4 میچوں میں بھارت کو کامیابی ملی جبکہ 6 میچوں میں انگلینڈ نے اپنے مخالف کو مات دی۔ٹی20 میں بھارت کی قیادت ویرات کوہلی جبکہ مورگن انگلینڈ کرکٹ ٹیم کی قیادت کریں گے۔

سندھ کے نئے گورنر حلف لیں گے

ایمزٹی وی(کراچی)صوبہ سندھ کے نئے گورنر محمد زبیر کل اپنے عہدے کا حلف اٹھائیں گے،چیف جسٹس سندھ ہائیکورٹ نئے گورنرمحمدزبیرسے حلف لیں گے۔

تفصیلات کے مطابق صوبہ سندھ کے نئے گورنر محمد زبیر کل اپنے عہدے کا حلف اٹھائیں گے،چیف جسٹس سندھ ہائیکورٹ نئے گورنرمحمدزبیرسے حلف لیں گے، گورنر سندھ جسٹس (ر)سعید الزماں صدیقی کے انتقال کے بعد محمد زبیر کوگورنر سندھ تعینات کیا گیا ہے،نئے گورنر ،چیئرمین نجکاری کمیشن رہے ہیں، تحریک انصاف کے مرکزی رہنما اسد عمر کے بھائی ہیں،ان کے ایک بھائی منیر کمال ہیں جو نیشنل بینک کے چیئرمین بھی ہیں،زبیر عمر وزیراعظم نوازشریف کے کافی قریب سمجھے جاتے ہیں اور وہ پارٹی کے انتہائی سینئر رہنما بھی ہیں۔

شہری چڑیا گھر میں بڑی تبدیلی دیکھیں گے،وزیرا علیٰ سندھ

ایمز ٹی وی(کراچی) کراچی کے چڑیا گھر کی درخواست منظور، وزیرا علیٰ سندھ سید مراد علی شاہ چڑیا گھر پہنچ گئے ۔

میڈیا رپورٹس کے مطابق وزیرا علیٰ سندھ اچانک چڑیا گھر کا دورہ کرنے پہنچ گئے ۔ انکے ہمراہ میئر کراچی وسیم اختر اور وزیر بلدیات سندھ جام خان شورو بھی انکے ہمراہ ہیں ۔ اس موقع پر میئر کراچی وسیم اختر نے مراد علی شاہ کو چڑیا گھر کے حوالے سے بریفنگ بھی دی ۔

انہوں نے کہا کہ مزید نئے جانور منگوانے کیلئے احکامات دے دیے ہیں اور جانوروں کی خوراک اور صفائی کے نظام پر کسی قسم کا سمجھوتہ نہیں کیا جائے گا ۔

وزیرا علیٰ کا مزید کہنا تھا کہ چڑیا گھر سمیت دیگر تفریخی مقامات کیلئے حکومت نے کثیر رقم مختص کر رکھی ہے اور جلد چڑیا گھر میں نایاب نسل کے جانوراور پرندے منگوائے جائیں گے جبکہ یہاں لوگوں کو سہولیات فراہم کرنے کیلئے بھی اقدامات کیے جارہے ہیں اور جلد شہری چڑیا گھر میں بڑی تبدیلی دیکھیں گے۔

طیبہ کے مجرموں کی ضمانت میں توسیع

ایمزٹی وی(اسلام آباد)طیبہ تشددکیس میں راجاخرم کی اہلیہ ماہین ظفرکی ضمانت میں بھی10فروری تک توسیع دے دی گئی ہے۔تفصیلات کے مطابق طیبہ تشدد کیس میں مرکزی ملزم ماہین ظفر اور راجا خرم آج عبوری ضمانت کے لئے ایڈیشنل سیشن جج راجا آصف محمود کی عدالت میں پیش ہوئے ۔جج راجا آصف نے استفسار کیا کہ طیبہ کوعدالت میں کیوں پیش نہیں کیا گیاہے۔

جواب میں وکیل کے ملزم نے کہا کہ طیبہ ابھی ریاست کی تحویل میں ہے،ابھی تک سپریم کورٹ نے بچی کی کسٹڈی نہیں دی ہے۔ایڈیشنل سیشن جج راجا آصف محمود نے طیبہ کے والدین کو عدالت میں طلبی کیلئے والدین کو نوٹس جاری کرتے ہوئے کہا کہ آئندہ سماعت پر والدین اور طیبہ کو عدالت میں پیش کیا جائے۔

یاد رہے گزشتہ روز سپریم کورٹ میں ازخودنوٹس کیس کی سماعت میں دوہفتوں کیلئے ملتوی کردی گئی تھی۔

پاکستان سپر لیگ کے دنگل کی تیاریاں شروع

ایمز ٹی وی(اسپورٹس)’پاکستان سپر لیگ ‘ دوسرے ایڈیشن کا دنگل 9 فروری کو دبئی میں سجے گا ، اس ایونٹ کیلئے روانہ ہونے والی ٹیم ”لاہور قلندرز“ کے کھلاڑیوں کے اعزاز میں الحمرا کلچرل کمپلیکس میں ”قلندرز نائٹ “ کا اہتمام کیا گیا جس میں عوام کی بھی بہت بڑی تعداد شریک ہوئی۔ اس تقریب میں جوش، جشن، موج مستی ، کیٹ واک ، ہلہ گلہ اور انٹرٹینمنٹ کے تمام ہی رنگ تھے۔

پورا ہال فیملیز اور نوجوانوں کی بڑی تعداد سے کھچا کھچ بھرا ہوا تھا ، چاروں جانب جشن کا سماں تھا، بھنگڑے کی تھاپ پر عوام کی بڑی تعداد جھومتی رہی اور ”دمادم مست قلندر، جیو لاہور قلندر “ کے نعرے بھی گونجتے رہے، ”قلندرز نائٹ “کا آغاز تلاوت کلام پاک سے ہوا ۔ اس کے بعد قومی ترانہ پڑھا گیا تو حاضرین با ادب کھڑے ہوگئے۔

سب سے پہلے اسٹیج پر اسٹریو نیشن نے اپنے فن کا مظاہرہ کیا، اس کے بعد معروف گلوکار اسرار احمد نے گروپ کے ہمراہ اسٹیج کی رونق کو دوبالا کیا اور گیت ”افغان جلیبی“ نے نوجوانوں کو رقص کرنے پر مجبور کردیا، قراۃ العین نے بھی اپنی آواز کا جادو جگایا، ریمپ پر واک کرتے ہوئے عمر اکمل اور دیگر کھلاڑیوں نے لاہور قلندرز کی کٹ کی رونمائی کی ۔

اس موقع پر ٹیم انتظامیہ اور دیگر کھلاڑی بھی اسٹیج پر موجود تھے، چیئرمین لاہور قلندر رانا فواد اور عاقب جاوید نے بھی کھلاڑیوں کی حوصلہ افزائی کی، سہیل تنویر، عمر اکمل ، یاسر شاہ ، اظہر علی بھی عوام کے درمیان گھلتے ملتے اور سیلفیاں بنواتے دکھائی دیئے۔

پاکستانی فلموں کی شان سمجھے جانے والے ماڈل ، اداکار اور میزبان ”شان“ جب اسٹیج پر آئے تو لوگوں کے چہرے خوشی سے کھل گئے، اُن کے بعد عالمی شہرت یافتہ گلوکار شفقت امانت علی آئے تو لوگ جھوم اُٹھے، شفقت امانت علی کے گیت پر شان نے بھی ساتھ دیا اور دونوں نے ملکر عوام میں مزید جوش پیدا کیا۔ بعد ازاں فلم اسٹار شان نے لاہور قلندرز کی حوصلہ افزائی کی اور لاہوریوں کے جوش و جذبے کو سلام پیش کیا۔

میزبانی کے فرائض معروف کمپیئر نور الحسن نے انجام دیئے، اس سے قبل ”جیوسوپر“ کے محمد علی نے کہا کہ ”لاہور قلندر “ پاکستان کی سب سے مقبول فرنچائز ہے اور ہر چیز کو بہت زبردست انداز میں انجوائے کرتی ہے، اس فرنچائز نے پورے پاکستان سے جو ٹیلنٹ منتخب کرکے متعارف کرایا ہے وہ ملک کا نام روشن کرے گا۔

لاہور قلندر کی ایپ سے مفت پاسز ڈاؤن لوڈ کرنے والوں کیلئے مخصوص گیٹ نصب تھا جہاں سے ہال میں داخل ہونے والوں نے اپنے خیالات کا اظہار کرتے ہوئے کہا کہ لاہوری ، لاہوری ہیں اور ”لاہور قلندر“ کو سپورٹ کریں گے اور فائنل بھی لاہور میں ہی دیکھیں گے، لاہور قلندر زتمام فرنچائز کیلئے ایک ٹرینڈ سینٹر بن چکا ہے۔ اس موقع پر قرعہ اندازی کے ذریعے منتخب ہونے والے شخص داؤد کو ”دلیر قلندر“ کا خطاب دیا گیا اور اُسے لاہور قلندر کی جانب سے ایک بائیک کا تحفہ بھی دیا گیا۔

Page 1972 of 2387