Reporter SS
ایمزٹی وی (کراچی) محرم الحرام میں سیکیورٹی کے غرض سے ایمپریس مارکیٹ کی سِل کی گئی دکانوں کے تالوں کو توڑکرلوٹ لیا گیا۔
تفصیلات کے مطابق کراچی میں محرم الحرام کے آٹھ، نو اور دس محرم الحرام کے مرکزی جلوس کے راستے میں آنے والی ایمپریس مارکیٹ کو پولیس نے رات گئے سیل کردیا گیا تھا، تاہم رات گئے مارکیٹ سیل ہونے کے باوجود بیس دوکانوں کے تالے توڑ کر نقد رقم، اوردیگر سامان کو لوٹ لیا گیا ہے۔
واقعہ کی اطلاع ملنے کے بعد پولیس نے جائے وقوعہ کا دورہ کیا اور ابتدائی شواہد اکھٹے کیے، پولیس نے چوکیدار کو حراست میں لے کر بیان قلم بند کر کے تحقیقات کا آغاز کردیا ہے بعد ازاں پولیس نے مارکیٹ کو ایک بار پھردس محرم تک لیے سیل کردیا ہے۔
دوکانداروں کا کہنا ہے کہ مارکیٹ کے چاروں دروازوں پرتالے لگے ہوئے تھے،جب کہ ایمپریس مارکیٹ کے مرکزی دروازے کو بھی سِل کردیا گیا تھا،اس کے باوجود چور کا مارکیٹ میں گھس جانا حیران کن امر ہے۔
واضح رہے ہر سال کی طرح اس سال بھی محرم الحرام کے مرکزی جلوس کے رُوٹ میں آنے والی ایمپریس مارکیٹ،زینب مارکیٹ،بولٹن مارکیٹ سمیت ساری دکانوں کو چیک کرنے کے بعد سِل کردیا گیا تھا۔
شہر میں ہائی الرٹ ہونے کے باوجود ایمپریس مارکیٹ میں نقب زنی کی واردات نے کراچی میں سیکیورٹی اداروں کی کارکردگی کی قلعی کھول دی ہے
ایمزٹی وی(بلوچستان) ایف سی اور حساس ادارے نے خفیہ اطلاع پر کوئٹہ کے علاقے لہڑی میں کارروائی کی جس کے نتیجے میں ایک دہشتگرد مارا گیا
ایف سی ترجمان کے مطابق اہلکاروں کو دیکھتے ہی دہشتگرد وں نے فائرنگ کردی ، جوابی کارروائی میں ایک دہشتگرد مارا گیا جبکہ اس کے ساتھی فرار ہوگئے۔
ہلاک دہشتگرد کے قبضے سے اسلحہ بارود بھی برآمد کیا گیا ہے،جس میں دو کلو گرام دھماکہ خیز مواد بھی شامل ہےجبکہ مفرور دہشتگردوں کی گرفتاری کے لئے کارروائیاں بھی جاری ہیں۔
ایمزٹی وی(اسلام آباد) وزیراعظم نوازشریف کی زیرصدارت مسلم لیگ ن کی مرکزی کونسل کا اجلاس آج اسلام آباد میں ہوگا جس میں30 اکتوبر کے تحریک انصاف کے دھرنے کے حوالے سے مشاورت کی جائے گی.
ملکی سیاسی صورتحال پر تبادلہ خیا ل بھی ہوگا،۔مسلم لیگ ن کی مرکزی کونسل کے اجلاس میں مقبوضہ کشمیر میں بھارتی بربریت، کنٹرول لائن پر بھارتی جارحیت اور خطے کے صورتحال کے ساتھ ساتھ پارٹی الیکشن اور حکومتی کارکردگی کے حوالے سے بھی ارکان کو اعتماد میں لیا جائے گا۔
ایمز ٹی وی ( تعلیم) اقراء یونیورسٹی نےجلسہ تقسیم اسناد کی رجسٹریشن کے لئے آخری تاریخ کا اعلان کر دیا ہے۔
تفصیلات کے مطابق اقراء یونیورسٹی مین کیمپس کے رجسٹرار کے مطابق جلسہ تقسیم اسناد کی رجسٹریشن کا آغازآج سے ہوچکا ہے۔
تقسیم اسناد کی رجسٹریشن کی آخری تاریخ 30اکتوبرمقرر کی گئی ہے ۔جبکہ رجسٹریشن آن لائن یونیورسٹی کی ویب سائٹ پر بھی کرائی جاسکتی ہے ۔
ایمز ٹی وی ( تعلیم) صوبائی سیکرٹری اسکول ایجوکیشن فضل پیجوہو نے کہاہے کہ صوبائی محکمہ تعلیم میں اب جو10ہزاراسکول اساتذہ کی بھرتیاں ہوں گی وہ اسکولوں کی بنیاد پر ہوں گی اور صرف متعلقہ مضامین کے ہی اساتذہ بھرتی ہوں گے ۔
سیکرٹری اسکول ایجوکیشن فضل پیجوہو نے کہاکہ ایک دفعہ جو استاد جس اسکول میں بھرتی ہوگا ریٹائربھی وہ وہیں سے ہوگا تبادلے کی کوئی گنجائش نہیں ہوگی تبادلے پر ملازمت ختم تصورہوگی انہوں نے کہاکہ ماضی میں بھرتی ہونے والے اساتذہ پسند کے اسکولوں میں تبادلہ کرالیتے تھے جس سے ان کا اسکول خالی ہوجاتا تھالیکن اب ایسا نہیں ہوگا فضل پیجوہو نے کہاکہ اب ہم انگریزی، ریاضی اور سائنس کے اساتذہ بھرتی کریں گے
جب کہ دیگر مضامین کی بھرتیاں نہیں ہوں گی کیوں کہ پہلے ہی ان کی تعداد زیادہ ہے۔ یہ بھرتیاں ٹیسٹ اور انٹرویو کی بنیاد پر ہوں گی اور غیرجانبدار ادارہ ان کا ٹیسٹ لے گا بڑے شہروں میں یہ بھرتیاں ضلع کے اسکول کی بنیاد پر ہوں گی تاکہ میرٹ برقرار رہے انہوں نے کہاکہ محکمہ تعلیم کو دوحصوں میں تقسیم کرنے میں ان کی رضامندی شامل تھی اور وہ خود چاہتے تھے کہ صوبے میں تعلیم کی بہتری کے لیے دو محکمے کرے جائیں۔ انھوں نے کہا کہ ہم سرکاری اسکولوں میں ارلی چائیلڈ ہڈ (نرسری اور پری نرسری) کی کلاسوں کے لئے بھی اساتذہ بھرتی کریں گے جس کیلئے نجی اسکولوں میں پڑھانے والے مونٹیسوری ڈپلومہ ہولڈر قابل ترجیح ہوں گے۔
ایمز ٹی وی ( تعلیم) اعلیٰ ثانوی تعلیمی بورڈ کراچی کے ناظم امتحانات محمد عمران خان چشتی نے انٹرمیڈیٹ کے تمام گروپس کیلئے ضمنی امتحانات امتحانی فارمز جمع کروانے کی تاریخوں کااعلان کردیا ہے۔
تفصیلات کے مطابق محمد عمران خان چشتی نے کہا کہ پروگرام کے مطابق سائنس پری میڈیکل، پری انجینئرنگ، سائنس جنرل،کامرس ریگولر ، کامرس پرائیویٹ،آرٹس ریگولر،آرٹس پرائیویٹ اور ہوم اکنامکس گروپس سمیت امپروومنٹ آف ڈویژن، بینیفٹ کیسز اورایڈیشنل سبجیکٹس کے ضمنی امتحانات میں شرکت کے خواہشمند اور اہل ریگولر امیدوار اپنے امتحانی فارم 24اکتوبر تک اپنے متعلقہ کالجوں میں جمع کرواسکتے ہیں۔
جبکہ پرائیویٹ امیدوار اپنے امتحانی فارم ضروری تصدیق کے بعد انہی تاریخوں میں اعلیٰ ثانوی تعلیمی بورڈ میں واقع بینک برانچ میں جمع کرواسکتے ہیں۔کالجوں کو ہدایت کی گئی ہے کہ وہ تمام ریگولر امیدواروں کے امتحانی فارمز اور فیسوں کے پے آرڈرز بروز منگل 25اکتوبر اور بروز بدھ 26اکتوبر کو اعلیٰ ثانوی تعلیمی بورڈ کے اکائونٹس سیکشن میں جمع کروادیں۔
ناظم امتحانات کا کہناتھا کہ جو امیدوار مقررہ تاریخ تک اپنے امتحانی فارم جمع نہیں کراسکیں وہ 25اکتوبر سے 28اکتوبر تک 200روپے لیٹ فیس کے ساتھ ، 31 اکتوبر سے 3 نومبر تک 500 روپے لیٹ فیس کے ساتھ جبکہ 4نومبر سے 8نومبر تک ایک ہزار روپے لیٹ فیس کے ساتھ اپنے امتحانی فارمز جمع کرواسکتے ہیں۔
ایمزٹی وی(مانیٹرنگ ڈیسک)وائٹ ہاؤس کی ویب سائٹ پر آن لائن پٹیشن پر پاکستانیوں نے بھی جوابی پٹیشن دائر کر دی۔ 13دنوں میں پٹیشن کی منظوری کے لیے94ہزار 60دستخط ہوچکے ہیں۔
پٹیشن کی منظوری کے لیے لگ بھگ 6ہزار دستخط ہونا باقی ہیں ۔وائٹ ہاؤس کی ویب سائٹ پر دائر پٹیشن پر 30 دن میں ایک لاکھ دستخط درکار ہوتے ہیں جس کے بعد 60روز کے اندر کانگریس اُس پٹیشن پر ردعمل دیتی ہے اور ثابت ہو جانے پر کارروائی کی جاتی ہے۔
بھارت نژاد امریکی شہریوں کی جانب سے ایسی ہی پٹیشن پاکستان کے خلاف دائر کی گئی تھی ۔کانگریس نے اُس پر ردعمل ظاہر کر دیا۔ جواباً پاکستانی نژاد امریکی شہریوں نے بھی ایسی ہی ایک پٹیشن مقبوضہ کشمیرمیں ریاستی دہشتگردی اور پاکستان میں دہشتگرد عناصر کی پشت پناہی کرنے پر بھارت کے خلاف دائر کر دی۔
پٹیشن میں یہ بھی کہا گیا ہے کہ بلوچستان، قبائلی علاقوں اور کراچی میں بھارتی خفیہ ایجنسی را کے ملوث ہونے کے ٹھوس شواہد کلبھوشن یادیوکی صورت میں پاکستان کے پاس موجود ہیں ۔
کلبھوشن یادیو بھارتی ایجنسی را کے ایما پر بلوچستان میں دہشت گرد کارروائیوں میں ملوث ہے، اس نے کالعدم ٹی ٹی پی ،داعش اور القاعدہ کی مدد کا اعتراف بھی کیا ہے۔ کلبھوشن یادیو بھارتی بحریہ کا حاضر سروس کمانڈر ہے ۔ ان شواہد کو اقوام متحدہ کے اکہترویں اجلاس میں بھی پیش کیا گیا ہے۔
ایمزٹی وی(گلگت بلتستان)محرم الحرام میں امن وامان کی صورتحال پر نظر رکھنے کیلئے محکمہ داخلہ بھی متحرک ہوگیا ،ہو م ڈیپارٹمنٹ نے تمام اضلاع کے ضلعی کنٹرول رومز سے مسلسل رابطہ رکھنے کیلئے گلگت میں الگ کنٹرول روم قائم کردیا ،ذرائع کے مطابق محکمہ داخلہ میں قائم کئے گئے کنٹرول روم کو گلگت سمیت دیگر اضلاع کے کنٹرول رومز کے ساتھ رابطے میں رکھاگیا ہے جو صبح اٹھ بجے سے رات بارہ بجے تک محرم الحرام کے جلوسوں اور مجالس کے پرامن انعقاد کیلئے متعلقہ حکام سے رابطہ رکھے گا
ذرائع کے مطابق ہوم ڈیپارٹمنٹ میں قائم کئے گئے کنٹرول روم کی نگرانی صوبائی سیکرٹری داخلہ کررہے ہیں صوبائی حکومت کی ہدایت پر محکمہ داخلہ کے کنٹرول روم سے رابطہ میں رہنے کیلئے تمام اضلاع کے ڈپٹی کمشنرز اور ضلعی پولیس سربراہوں کو خصوصی ہدایات بھی جاری کی گئی ہیں
،ذرائع کے مطابق کنٹرول روم کو موصول ہونےوالی کسی بھی شکایت کا فور ی طور پر ازالہ کرنے کیلئے بھی موثرنظام تشکیل دیاگیا ہے ذرائع کے مطابق مرکزی کنٹرول روم میں دو ٹیلی فون بھی نصب کئے گئے ہیں اور عوام سے کہا گیا ہے کہ وہ کسی بھی شکایت یا مشکوک شخص واجبنی شخص یا لاوارث بیگ وغیر ہ نظر آنے کی صورت میں ٹیلی فون نمبر 05811-920208اور 05811-920209پر رابطہ کرکے اطلاع دیں ۔
ایمزٹی وی(آزاد کشمیر) آل جموں و کشمیر مسلم کانفرنس نے سیز فائر لائن توڑنے کا اعلان کرتے ہوئے تمام کشمیریوں کو 24 اکتوبر کو کنٹرول لائن کی جانب مارچ کرنے کی اپیل کر دی ہے۔
ذرائع کے مطابق آل جموں کشمیر مسلم کانفرنس کے صدر سردار عتیق نے کہا ہے کہ 24 اکتوبر کوتین مقامات پر سیز فائر لائن توڑیں گے جس کا مقصد کشمیر پر دنیا کی توجہ مبذول کروانا ہے۔
انہوں نے کہا کہ پونچھ اور میرپور سے کنٹرول لائن پار کرنے کی کوشش کریں گے اور اس مقصد کیلئے دیگر جماعتوں کو بھی ساتھ ملانے کی کوشش کی جائے گی۔ انہوں نے کشمیریوں سے اپیل کی ہے کہ وہ 24 اکتوبر کو کنٹرول لائن کی جانب مارچ کریں۔
ایمزٹی وی(راولپنڈی)آرمی چیف جنرل راحیل شریف نے ایل او سی کا دورہ کیا اوراگلے مورچوں پر تعینات فوجی جوانوں کے جذبے اور آپریشنل تیاریوں پر مکمل اطمینان کا اظہار کیا۔
پاک فوج کے شعبہ تعلقات عامہ (آئی ایس پی آر) کی طرف سے جاری بیان کے مطابق آرمی چیف جنرل راحیل شریف نے ایل او سی پر حاجی پیر سیکٹرکا دورہ کیا اور فرنٹ لائن پر تعینات فوجیوں سے ملاقات کی ، آرمی چیف جنرل راحیل شریف کو ایل او سی پر فارمیشن کمانڈر نے تفصیلی بریفنگ دی۔
آرمی چیف نے فوجی جوانوں کے جذبے،کنٹرول لائن پر نگرانی کے کڑے نظام اور آپریشنل تیاریوں پر مکمل اطمینان کا اظہار کیا ۔ آرمی چیف جنرل راحیل شریف کا استقبال کورکمانڈرلیفٹیننٹ جنرل ملک ظفراقبال نے کیا۔