ایمز ٹی وی (کراچی) ایڈیشنل آئی جی سندھ پولیس مشتاق مہر نے کہا ہے کہ محرم الحرام میں امن و امان کی صورتحال کو کنٹرول میں رکھنے کے لیے آج شام 6 بجے سے 11 محرم تک موٹر سائیکل کی ڈبل سواری پر پابندی عائد کر دی گئی ہے۔

تفصیلات کے مطابق سندھ پولیس کی جانب سے جاری کردہ اعلامیے میں ایڈیشنل آئی جی نے ڈبل سواری پر پابندی لگانے کے حوالے سے کہا ہے کہ شہر قائد میں سیکیورٹی خدشات کے پیش نظر ڈبل سواری پر پابندی عائد کی گئی ہے، جس کا اطلاق 8 اکتوبر کی شام 6 بجے سے 11 محرم 13 اکتوبر تک ہوگا۔

انہوں نے شہریوں سے اپیل کی کہ وہ امن و امان کی صورتحال کے پیش نظر انتظامیہ کے ساتھ تعاون کریں اور ڈبل سواری سے گریز کریں تاہم صحافیوں، عمر رسیدہ افراد، خواتین اور بچوں کو اس سے مستثنی قرار دیا گیا ہے۔

ترجمان سندھ نے ڈبل سواری کی خلاف ورزی کرنے والوں کو خبردار کیا ہے کہ اگر احکامات کی خلاف ورزی کی گئی تو قانون کے مطابق سخت سزا دی جائے گی۔

پولیس افسران کو مجالس اور جلوسوں میں فول پروف سیکیورٹی کے انتظامات بروئےکار لانے کے احکامات دیتے ہوئے واقع میں ملوث ملزمان کو فوری گرفتار کرنے کی ہدایت بھی کی گئی ہے۔

ایمز ٹی وی (کراچی) ائرپورٹ حملہ کیس سوا دوسال بعد پھرزندہ ہوگیا۔ حملے میں ہلاک دو دہشت گردوں کا تعلق کراچی سے تھا۔ نارتھ کراچی سے گرفتار دہشت گردوں نے دوران تفتیش سنسنی خیز انکشاف کر دیا۔

کراچی ائرپورٹ حملے کے سوا دو سال بعد اہم انکشاف سامنے آ گیا۔ حملے میں ہلاک تمام دہشت گرد غیرملکی نہیں تھے ، دوکا تعلق کراچی سے ہی تھا۔ نارتھ کراچی سے گرفتاردہشتگردوں نے دوران تفتیش ائرپورٹ حملے سے متعلق انکشاف کے علاوہ عاشورہ پرحملے کی منصوبہ بندی کا اعتراف بھی کرلیا۔

گرفتار القاعدہ برصغیر کراچی کے امیر اور اُس کے ساتھیوں نے بتایا کہ ائرپورٹ حملے میں ہلاک تمام دہشت گرد غیرملکی نہیں تھے بلکہ دس میں سے دو کا تعلق کراچی کے علاقے اورنگی ٹاون سے تھا۔دہشتگردوں کے ڈی این اے کیلئے قبرکشائی کی جائے گی۔

کاؤنٹر ٹیررازم ڈیپارٹمنٹ نے بتایا کہ نارتھ کراچی میں چھاپے کے دوران گرفتار ملزمان عاشورہ پرحملے کا منصوبہ بنارہے تھے، انچارج سی ٹی ڈی کے مطابق ایک خودکش حملہ آور فرار ہو گیا جس کی تلاش کیلئےشہر بھر میں کڑہ پہرہ لگادیا گیا ہے۔

ایمز ٹی وی ( ژوب ) محرم کے دوران سیکورٹی میں غفلت برداشت نہیں کی جائے گی ساتویں محرم کے جلوس کے حوالے سے سخت انتظامات کیے جائیں ان خیالات کا اظہار ڈپٹی کمشز ژوب محمد عظیم کاکڑ نے محرم کے دوران سیکورٹی انتظامات سے متعلق اجلاس سے خطاب کرتے ہوئے کہا کہ اجلاس میں ڈی پی او محمد سلیم ایم ایس سول ہسپتال ڈاکٹر اختر ایس ڈی او واپڈا محمد یوسف چیف آفیسر میو نسپل کمیٹی خالد ایس ایچ او حمید اللہ امام بارگاہ کے حیدر علی توقیر حسین اور دیگر نے شرکت کی۔

ایمز ٹی وی ( تعلیم) سندھ مدرسہ بورڈ نے محکمہ تعلیم حکومت سندھ کے ادارے سندھ ایجوکیشن فائونڈیشن کے باہمی اشتراک سے کراچی کے تمام دیہی علاقوں خصوصا ضلع ملیر میں معیاری تعلیم کو ہر بچے تک پہنچانے کے لئے ایک وسیع اور جامع پروگرام کا آغاز کر دیا ہے ۔

اس پروگرام کے تحت ان علاقوں میں جو اسکول بند ہیں یا جہاں گنجائش سے کم بچے زیر تعلیم ہیں انہیں سندھ ایجوکیشن فائونڈیشن کے ساتھ مل کر پوری طرح فعال کیا جارہا ہے۔مقامی آبادی ہی سے میرٹ پر اساتذہ کا انتخاب کیا گیا ہے اور یہ اساتذہ ایک نئے جذبے اور جانفشانی سے ان اسکولوں کو مثالی اسکول بنانے میں مصروف ہیں ۔

اس بات کا اعلان سندھ مدرسہ بورڈ کے صدر اور سابق وائس چانسلر سندھ یونیورسٹی مظہر الحق صدیقی نے یوم اساتذہ کے عالمی دن کے موقع پر ایک تقریب سے خطاب کرتے ہوئے کیا۔یہ تقریب ضلع ملیر کے علاقے درسانو چنا میں مجوزہ ایجوکیشن سٹی کے عین وسط میں واقع ایس ایم بی قائد اعظم پبلک اسکول میں منعقد ہوئی ۔

تقریب میں عمائدین ،بورڈ کے اراکین ،ممتاز ماہر ین تعلیم،اسکول کے اساتذہ،والدین اور طلباء و طالبات کی کثیر تعداد نے حصہ لیا ۔ اس تقریب میں موجود اساتذہ اور طلباء و طالبات کا جوش قابل دید تھا۔اساتذہ گروپس کی صورت میں اسٹیج پر آتے رہے اور سیکڑوں طلباء و طالبات قطار در قطار انتہائی محبت ،احترام اور جذبے سے آگے بڑھ کر انہیں اپنے ہاتھوں سے بنائے ہوئے کارڈز، تحفے اور پھول پیش کرتے رہے۔