ایمزٹی وی(کراچی)کراچی کے علاقے گلشن اقبال میں پولیس مقابلہ مشکوک نکلا۔ مقابلے میں جاں بحق ہونیوالا سید عتیق رینجرز کالج میں سیکنڈ ایئر کا طالبعلم تھا۔وزیر اعلیٰ سندھ نے گلشن اقبال پولیس مقابلے کا نوٹس لیتے ہوئے آئی جی سندھ سے واقعے کی رپورٹ طلب کر لی

ذرائع کے مطابق گلشن اقبال میں گزشتہ روز ہونے پولیس مقابلے میں جاں بحق ہونیوالے لڑکے کی شناخت سید عتیق کے نام سے ہوئی ہے۔ سید عتیق رینجرز کالج میں سیکنڈ ائیر کا طالب علم تھا اور اپنے کزن کے ساتھ موٹر سائیکل پر جا رہا تھا اور اس کی کل انسٹیویٹ میں پہلی کلاس تھی۔

پولیس حکام کا کہنا ہے کہ مقابلے کی تحقیقات شروع کر دیں ہیں اور اگر واقعے میں اہلکاروں کی غفلت ثابت ہوئی تو سخت کارروائی کی جائے گی۔

ایمزٹی وی(پشاور) نیکی خیل میں مکان کی چھت گرنے سے ایک ہی خاندان کے 5 بچے جاں بحق ہو گئے۔

ذرائع کے مطابق پولیٹیکل انتظامیہ کا کہنا ہے کہ خیبر ایجنسی کی تحصیل لنڈی کوتل کے علاقے نیکی میں خستہ حال مکان کی چھت گرنے سے میاں بیوی اور 3 بچے جاں بحق ہو گئے۔

پولیٹیکل تحصیلدار ارشاد خان کا کہنا ہے کہ امدادی ٹیموں کے اہلکاروں نے موقع پر پہنچ کر 5 افراد کی لاشیں گھر کے ملبے سے نکال لی ہیں جب کہ مزید افراد کی تلاش کے لئے کارروائی جاری ہے۔ ان کا کہنا تھا کہ لاشوں کی تدفین کے لئے ورثا کو ایک لاکھ روپے نقد فراہم کر دیئے ہیں۔

ایمز ٹی وی (کھیل) پاکستان سپرلیگ کی ایمرجنگ کیٹیگری میں زائد العمر کرکٹرز کی شمولیت کے دروازے بند کر دیے گئے،23سال سے بڑے کھلاڑی منتخب نہیں ہو سکیں گے، ریجنل کوچز اور فرنچائزز کے ٹیلنٹ ہنٹ پروگرامز میں سامنے آنے والے کھلاڑی بھی نامزد کیے جا سکیں گے، ہر پلیئنگ الیون میں ایک نوجوان کو شامل کرنا لازمی ہوگا، پلیئر کوچ یا مینٹور کا ٹوئنٹی 20 انٹرنیشنل کرکٹ سے ریٹائرہونا بھی لازمی قرار دے دیا گیا۔

تفصیلات کے مطابق پی ایس ایل کے دوسرے ایڈیشن کیلیے ڈرافٹ کا عمل 19اکتوبر کو دبئی میں ہوگا، پی سی بی کی جانب سے مختلف کیٹیگریز میں لاگو ہونے والے قواعد کی وضاحت کردی گئی ہے، بتایا گیا ہے کہ ایمرجنگ کیٹیگری میں صرف وہی کرکٹرز منتخب ہوسکیں گے جن کی عمر یکم جنوری کو 23سال سے کم ہوگی، ٹیموں کے ریجنز سے تعلق رکھنے والے کوچز 5،5 نوجوان کھلاڑیوں کے نام ڈرافٹ کیلیے پیش کریں گے۔

فرنچائزز اپنے ٹیلنٹ ہنٹ پروگرامز میں سامنے آنے والے پلیئرز بھی نامزد کرسکتی ہیں، میچز کے دوران ہر پلیئنگ الیون میں ایک نوجوان پلیئر کو شامل کرنا لازمی ہوگا، بطور پلیئر کوچ یا مینٹور خدمات حاصل کرنے کیلیے اس کھلاڑی کا پہلے میچ سے کم از کم ایک سال قبل ٹوئنٹی 20 انٹرنیشنل کرکٹ سے ریٹائرہونا بھی لازمی ہوگا، مسابقتی کرکٹ میں کسی ٹیم کے ساتھ بحیثیت کوچ یا مشیر کام کرنے کا تجربہ بھی ہونا چاہیے۔

پلیئرکوچ یا مینٹور کا انتخاب بھی باقاعدہ ڈرافٹ کے ذریعے ہوگا، اگر اس نے مینٹور کے طور پر پلاٹینم کیٹیگری میں معاملات طے کیے لیکن بعد میں تنزلی قبول کرتے ہوئے ڈائمنڈ کیٹیگری میں جانے کو تیار ہوگیا تو بطور مینٹور معاوضہ اضافی ہوگا، اس کا مقصد یہ ہے کہ فرنچائزز دنیا بھر سے بہترین ٹیلنٹ حاصل کرکے اپنے اسکواڈز کو متوازن اور نوجوان کھلاڑیوں کی صلاحیتوں کو اجاگر کرنے کا سلسلہ جاری رکھ سکیں۔

ایمزٹی وی(اسلام آباد) وزیراعظم کے معاون خصوصی برائے امور خارجہ طارق فاطمی نے کہاہے کہ پاکستان کی سفارتی تنہائی کی باتیں درست نہیں، کچھ لوگ فوج اور سول حکومت کے درمیان اختلافات پیدا کرنا چاہتے ہیں، وزیر خارجہ کا عہدہ سرتاج عزیز کے پاس ہی ہے اوروہ اپنا کردار بخوبی ادا کر رہے ہیں۔
ایک انٹرویومیں انھوں نے کہاکہ سیکیورٹی فورسزکی ہر قسم کے دہشت گردوں کیخلاف بلا امتیازکارروائی جاری ہے،ضرب عضب اور نیشنل ایکشن پلان کے بعد کسی کو شک نہیں رہناچاہیے، ہم محدود صلاحیتوں کی وجہ سے سب کیخلاف بیک وقت کارروائی نہیں کر سکتے، امریکا کے بھارت کو ترجیح دینے سے خطے میں تناؤ بڑھے گا، پاکستان نے امریکا کو بتا دیا کہ وہ ہم سے امتیازی سلوک نہ کرے۔

ایمز ٹی وی (کھیل) امیر پاکستان کرکٹ بورڈ نے غریب پی ایچ ایف کو16سال قبل دیا گیا قرضہ واپس مانگ لیا، ذرائع کے مطابق سابق چیئرمین پی سی بی لیفٹیننٹ جنرل (ر) توقیر ضیا نے2000 میں سڈنی اولمپکس کیلیے ہاکی فیڈریشن کو ایک کروڑ روپے کا چیک دیا تھا، بعد ازاں بورڈ حکام کی طرف سے موقف اختیار کیا گیا کہ یہ قرضہ تھا اس لیے پی ایچ ایف اسے لوٹانے کی پابند ہے۔
10مارچ2011 کو حکام نیشنل کرکٹ اکیڈمی لاہور میں ملے جس میں فریقین میں طے پایا کہ پی ایچ ایف قسطوں میں یہ رقم واپس کرے گی، اس موقع پر یہ طے نہیں پایا تھا کہ یہ رقم کتنی اقساط میں ادا کی جائیگی تاہم 10 جنوری2012 کو پی سی بی نے ایک اور خط بھیجا کہ کرکٹ بورڈ کو10اقساط میں ادائیگی کی جائے۔
ذرائع کا کہنا ہے کہ پی سی بی کے ہر سالانہ آڈٹ میں پی ایچ ایف کو دیے گئے ایک کروڑ روپے کا ذکر آتا ہے، حکام کے مطابق وزارت بین الصوبائی رابطہ کے کہنے پر پی ایچ ایف سے رقم واپس مانگی گئی ہے، اس سے پہلے بھی پی ایچ ایف کو کئی مرتبہ خط لکھ چکے جس کاکوئی جواب آیا نہ ہی پیسے واپس ملے۔
دوسری جانب صدر پی ایچ ایف بریگیڈیئر (ر) خالد سجاد کھوکھر نے کہاکہ پی سی بی کو رقم دینے کے پابند ہیں لیکن وہ معاف کردیں یا گرانٹ میں بدل دیں، میڈیا سے بات چیت میں انھوں نے کہاکہ کرکٹ حکام سے بات کریں گے کہ ایک کروڑ سے انھیں تو کوئی فرق نہیں پڑتا مگر فیڈریشن کیلیے یہ بڑی رقم ہے۔

ایمزٹی وی(اسلام آباد)اسلام آباد اور گردو نواح میں زلزلے کے جھٹکے محسوس کئے گئے۔
زلزلہ کوہ پیما مرکز کے مطابق صبح 8 بج کر 5 منٹ کر اسلام آباد اور گردونواح میں زلزلے کے جھٹکے محسوس کئے گئے۔

زلزلے کی شدت ریکٹر اسکیل پر 2 ریکارڈ کی گئی جب کہ زمین میں اس کی گہرائی 25 کلو میٹر تھی، زلزلے کا مرکز کوہاٹ کے مشرق میں 10 کلو میٹردورتھا۔

ایمزٹی وی(آزاد کشمیر)صدر آزاد کشمیر مسعود خان نے کہا ہے کہ کشمیریوں نے واضح کر دیا بھارت کے ساتھ نہیں رہنا،آزادی چاہتے ہیں ،حالیہ تحریک میں سیکڑوں کشمیری شہید اورہزاروں زخمی ہوئے۔
۔

میڈیا کی ایک تقریب سے خطاب کرتے ہوئے صدر آزاد کشمیر کا کہناتھاکہ تحریک آزادی دبانے کیلئے مقبوضہ کشمیر کے عوام نے بھارتی ظلم وتشدد مسترد کر دیا ،پاکستان ان کی اخلاقی، سفارتی اورسیاسی حمایت کر رہا ہے۔ان کا مزید کہناتھا کہ کشمیر بھارت کا اٹوٹ انگ ہوتا تو 70 سال بعد بھی کشمیری آزادی کی تحریک نہ چلاتے

مسعود خان نے مزید کہا کہ بھارت کی طرف سے کشمیر کو اٹوٹ انگ کہنا بالکل غلط ہے ،اگر ایسا ہوتا تو کشمیری آج بھی آزادی کی تحریک نہ چلارہے ہوتے،انہوں نے واضح کردیا کہ وہ بھارت کے ساتھ نہیں رہنا چاہتے

ایمز ٹی وی (پشاور) صوبائی حکومت نے سپریم کورٹ کے احکامات کی روشنی میں بہبودآباد پروگرام کے تحت کام کرنے والے اے ڈی پی ملازمین کو بحال کردیا تاہم نظر ثانی کیلئے سپریم کورٹ سے رجوع بھی کرلیا ،پشاور ہائیکورٹ اور بعد ازاں سپریم کورٹ نے خیبر پختونخوا میں بہبودآباد پروگرام 2011-14ءکے تحت کام کرنے والے ملازمین جنہیں پراجیکٹ ختم ہونے پر فارغ کیا گیا تھا بحالی کے احکامات جاری کیئے تھے جن کے تسلسل میں ان ملازمین کو فوری طور پر ریگولر آسامیوں پر بحال کردیا گیا ہےتاہم ساتھ ہی صوبائی حکومت نے سپریم کورٹ میں مزکورہ فیصلہ پر نظرثانی کی پٹیشن بھی دائر کردی ہے۔

۔

ایمزٹی وی(تعلیم)وزیراعلیٰ سندھ کی زیر صدارت ایجوکیشن فائونڈیشن بورڈ کا اجلاس ہوا ،جس میں محکمہ تعلیم کے سیکریٹری اور دیگر اعلیٰ حکام نے شرکت کی ۔ اس موقع پر وزیر اعلیٰ نے طلبا کو جدید ٹیکنالوجی کے ذریعے تعلیم دینے کی ہدایات جاری کردیں ۔

انہوں نے کہا کہ سرکاری اسکولوں میں تنخواہ کا معیار نجی شعبے سے بہتر ہے،پھر بھی نجی شعبے کی تعلیم سرکاری اداروں سے بہتر ہے، ہمیں اپنے تعلیمی اداروں میں نظم و ضبط لانے کی ضرورت ہے۔

وزیر اعلیٰ کا کہنا تھا کہ سندھ حکومت ہر بچے پر ماہانہ 3ہزار روپے خرچ کرتی ہے، پھر بھی 30 لاکھ بچے اسکول نہیں جاتے،ایسے ہر بچے کو 500 روپے ماہانہ دینے کو تیار ہوں۔

مراد علی شاہ نے محکمہ تعلیم کے افسران کو ہدایت کی کہ وہ سائنس ،انگریزی اورریاضی کے مضامین پڑھانے کیلئے جدید ٹیکنالوجی استعمال کریں۔

انہوں نے سندھ ایجوکیشن فاؤنڈیشن کے 600 اسکولوں کے لیے 62 کروڑ 20 کروڑ روپے کی اسکیم کی بھی منظوری دی ۔

ایمزٹی وی(اسلام آباد)قومی اسمبلی کے اسپیکر سردارایاز صادق نے میڈیا سے گفتگو کرتے ہوئےکہا کہ انہوں نے پارلیمنٹ میں ہمیشہ تمام اراکین کوبات کرنے کے لئے موقع دیا۔ پارلیمنٹ کے مشترکہ اجلاس میں وہ بارباراراکین سے یہ کہتے رہے کہ اجلاس کشمیرکے مسئلے پربلایا ہے، اس لئے اسی پربات کی جائے لیکن وہ کسی کا منہ بند نہیں کرسکتے۔
سردار ایاز صادق نے کہا کہ ان کے پاس جو بھی ریفرنسز آئے انہوں نے ان کو رولز کے مطابق 30 دنوں کے اندر الیکشن کمیشن کوبجھوادیا ہے اورانہوں نے مذکورہ ریفرنسزکے حوالے سے اپنا موقف بھی الیکشن کمیشن کو بتادیا ہے، اس لئے اب ریفرنس کے معاملے میں ابہام مکمل طور پر ختم ہونا چاہئے۔
اسپیکر قومی اسمبلی کا کہنا تھا کہ احتجاج اوردھرنے والوں کو پہلے بھی مایوسی ہوئی ہے اور اب بھی احتجاج اور دھرنوں سے کچھ نہیں ہوگا۔ 30 اکتوبرکو شہربھی بند نہیں ہوگا۔ احتجاج اور دھرنے والے باقاعدہ سازش کے تحت ملک میں چین سمیت دیگر ملک سے آنے والے سرمایہ کاروں کو بھگانا چاہتے ہیں مگر ایسے لوگوں کو پہلے بھی مایوسی ہوئی ہے اور آئندہ بھی ایسا ہی ہوگا، ملک ترقی اورخوشحالی کی راہ پر گامزن رہے گا اور ملک میں جمہوریت بھی چلتی رہے گی۔ عمران خان کو سمجھانے کی ضرورت نہیں، وہ سمجھداراوربالغ ہیں بچے نہیں اوروہ اپنا اچھا برا خود سوچ سکتے ہیں۔