ایمزٹی وی(تعلیم)محمد علی جناح یونیورسٹی کراچی کے صدرپروفیسرڈاکٹرزبیرشیخ نے کہاہے کہ یونیورسٹی میں نتیجہ خیزتعلیمی سرگرمیوں کوجاری رکھنے کے پروگرام کے تحت آئندہ سال کے دوران محمد علی جناح یونیورسٹی کے کچھ کورسز کو ممتازبین الاقوامی یونیورسٹیوں کے کورسز کے ساتھ ہم آہنگ کردیاجائے گاتاکہ ہمارے طلبہ اعلیٰ معیارکی تعلیم حاصل کرنے کے بعد نہ صرف اپنے ملک میں بلکہ بیرون ملک جاکربھی اپنی بہترین صلاحیتوں کامظاہرہ کرسکیں۔

یہ بات انہوں نے گزشتہ شام یونیورسٹی کی بزنس ایڈمنسٹریشن سوسائٹی کے زیراہتمام سیمسٹر فال2016ء میں داخلہ لینے والے نئے طلبہ کے اعزاز میں دی جانے والی خیرمقدمی پارٹی سے خطاب کرتے ہوئے کہی جس میں طلبہ اوراساتذہ کی ایک بڑی تعداد نے شرکت کی ۔ اس موقع پرموسیقی اورڈرامہ کے پروگرام بھی پیش کیے گئے ۔ڈاکٹر زبیرشیخ نے یونیورسٹی میں داخلہ لینے والے نئے طلبہ سے کہاکہ یونیورسٹی کی سطح پر تعلیم شروع کرنا ان کے لیے ایک نیا تجربہ ہوگا،یہاں انہیں ہر طرح کے استاد میسر ہونگے جن سے وہ بہتر سے بہتر استفادہ کرسکتے ہیں جس کے لیے انہیں اپنی تعلیم پر پوری توجہ دینا ہوگی۔

انہوں نے بتایا کہ آئندہ سال شروع ہونے والے ہمارے نئے سیمسٹر سے بی ای الیکٹریکل، بی ایس میڈیا سائنسز اور بی ای کمپیوٹر سسٹم انجینئرنگ کے نئے ڈگری پروگرام شروع کیے جارہے ہیں۔انہوں نے بتا یا کہ یونیورسٹی میں نئی لیب بنانے کے ساتھ ساتھ کلاس رومز کو جدید سہولتوں سے آراستہ کررہے ہیں جن میں طلبہ کو لیپ ٹاپ کی سہو لت بھی حاصل ہوگی۔

تقریب سے خطاب کرتے ہوئے طلبہ امور کے ڈائریکٹر احمر عمر نے کہا کہ محمد علی جناح یونیورسٹی میں تعلیمی سرگرمیوں کے ساتھ ساتھ طلبہ کی غیر نصابی سرگرمیوںمیں حصہ لینے کی بھرپور حوصلہ افزائی کی جاتی ہے جس کے لیے بہت جلد طلبہ سوسائٹیوں کے قیام کا اعلان کردیا جائے گا۔انہوں نے کہا کہ انہیں اس بات پر فخر ہے کہ ہمارے طلبہ شہر کی دیگر یونیورسٹیوں میں منعقد ہونے والے کھیلوں، موسیقی، ڈراموں، تقریری، معلومات عامہ ،نعت گوئی، قرات ، ادبی اور دیگر مقابلوں میں حصہ لے کر نمایاں کارکردگی کا مظاہرہ کرتے ہیں۔انہوں نے کہا کہ طلبہ سوسائٹیوں کے ممبر بن کر اپنی تخلیقی صلاحیتوں کا اظہار کرسکتے ہیں۔

ایمز ٹی وی (کھیل) ٹوئنٹی 20 سیریز میں فتح کے بعد اب لاغر ون ڈے ٹیم کو قدموں پرکھڑا کرنے کی تیاری مکمل ہوگئی، جیت کی لگن کھلاڑیوں کو کندن بنانے لگی۔

مختصر طرز کے میچز میں لگاتار 4کامیابیوں نے مستقبل کے حوالے سے توقعات بھی کئی گنا بڑھا دیں،باصلاحیت نوجوانوں کی آمد سے سینئرز سے بھی قدامت پرستی کا ’چولا‘ اتارنے پر مجبور ہوگئے، ویسٹ انڈیز کے خلاف سرفراز احمد کی زیرقیادت ٹی ٹوئنٹی سیریز میں کلین سوئپ نے ایک روزہ کپتان اظہر علی پر بھی دباؤ بڑھا دیا، انھوں نے ابوظبی میں حریف قائد جیسن ہولڈر کے ساتھ ٹرافی اور لوگو کی رونمائی کردی، دونوں ٹیموں نے شارجہ میں پریکٹس بھی کی۔

دوسری جانب سرفراز احمد کا کہنا ہے کہ ورلڈ چیمپئن کے خلاف وائٹ واش کی توقع نہیں تھی، کھلاڑیوں نے صلاحیتوں سے بڑھ کر پرفارم کیا، 50 اوورز کے فارمیٹ میں بھی حریف سائیڈ کو ہرانے کیلیے پُرعزم ہیں۔ تفصیلات کے مطابق ٹوئنٹی 20 میں قیادت کی تبدیلی پاکستان ٹیم کو راس آگئی جو سرفراز احمد کی کپتانی میں لگاتار چار میچز جیت چکی ہے، اس سلسلے کا آغاز انگلینڈ کے خلاف واحد میچ سے ہوا اور ویسٹ انڈیز سے سیریز میں بھی جاری رہا۔ فتح کی لگن نے کھلاڑیوں میں نئی روح پھونک دی،ان کے رنگ ڈھنگ مکمل طور پر تبدیل دکھائی دیے، نوجوان کھلاڑی ملنے والے مواقعوں کو دونوں ہاتھوں سے تھامتے ہوئے بھرپور فائدہ اٹھانے کی کوشش کررہے ہیں، ان کی وجہ سے گرین شرٹس پر لگا زمانہ قدیم کی کرکٹ کھیلنے کا لیبل بھی ہٹتا ہوا دکھائی دے رہا ہے، نوجوان پلیئرز کی باڈی لینگویج اور جارحانہ انداز میں کامیابی کیلیے جوش وخروش نے ٹیم میں موجود سینئرز کو بھی قدامت پسندی کا چولا بدلنے پر مجبور کردیا، وہ بھی ٹیم میں موجودگی کا احساس دلانے میں کامیاب رہے ہیں۔

پاکستان کی اگلا ہدف ون ڈے سیریز ہے جو جمعے کو شروع ہورہی ہے، اس میں قیادت اظہر علی کریں گے، محدود ترین فارمیٹ میں کالی آندھی کے خلاف شاہینوں کی شاندار کارکردگی سے ان پر بھی دباؤ میں اضافہ ہوگیا،ان کے لیے ویسے ہی ٹیم کو رینکنگ میں نویں پوزیشن پر دیکھ کر حوصلہ برقرار رکھنا مشکل ہورہا ہے، البتہ ٹوئنٹی 20 سیریز میں کامیابی کی وجہ سے بہرحال ون ڈے سائیڈ کے بھی حوصلے بلند اور وہ اس میں بھی کامیابیوں کا سلسلہ برقرار رکھنے کی کوشش کرے گی۔

گذشتہ روز دبئی کے مقامی ہوٹل میں ون ڈے سیریز کی ٹرافی اور لوگو کی رونمائی ہوئی جس میںاظہر اور ان کے ویسٹ انڈین ہم منصب جیسن ہولڈر موجود تھے۔ بعد ازاں دونوں ٹیموں نے شارجہ میں پریکٹس کی جہاں پہلا ون ڈے انٹرنیشنل بھی شیڈول ہے۔

ادھر بطور کپتان ویسٹ انڈیز پر کلین سوئپ کرنے والے سرفراز احمد اسے ٹیم ورک کا نتیجہ قرار دیتے ہیں، انھوں نے کہاکہ یہ ایک نئی سائیڈکی تشکیل کی جانب پہلا قدم ہے، اگر ہم دنیا کی بہترین ٹیم بننا چاہتے ہیں تو کارکردگی میں مستقل مزاجی لانا ہوگی، جونیئر اور سینئر پلیئرز عمدہ پرفارم کرتے ہوئے اپنا حصہ ڈال رہے ہیں، یہی اچھی ٹیم کی علامت ہے۔

سرفراز احمد نے تسلیم کیا کہ ویسٹ انڈیز کے خلاف کلین سوئپ ان کے گمان میں بھی نہیں تھا، انھوں نے کہا کہ ہم نے اندازہ نہیں لگایا تھا کہ ورلڈ چیمپئن کیخلاف 3-0 سے جیت جائیں گے، میں اس کا پورا کریڈٹ کھلاڑیوں کو دوں گا جنھوں نے صلاحیتوں سے بڑھ کرپرفارم کیا، یہی وجہ ہے کہ ہم سیریز اپنے نام کرنے میںکامیاب رہے۔ انھوں نے مزید کہا کہ میرے لیے خوشی کی بات یہ ہے کہ سینئرز اور جونیئرزسب ہی تعاون کرتے ہوئے اچھا کھیل پیش کررہے ہیں، میں خود بھی بطورکپتان کافی لطف اندوز ہورہا ہوں۔

ایمز ٹی وی (کھیل) قومی کرکٹ سلیکشن کمیٹی نے پی سی بی کو تجویز دی ہے کہ پاکستان ٹیسٹ ٹیم کو ڈے اینڈ نائٹ ٹیسٹ سے پہلے کم از کم آٹھ دن پریکٹس کا موقع فراہم کیا جائے ۔

ذرائع کے مطابق قومی سلیکشن کمیٹی نے ٹیسٹ اسکواڈ کےلیے یو اے ای میں زیادہ سے زیادہ ٹریننگ کی تجویز دی ہے اس کا کہنا ہے کہ ٹیم کو کم از کم آٹھ دن گلابی گیند سے پریکٹس ملنی چاہیئے، کیونکہ پاکستان ٹیم پہلی بار ڈے اینڈ نائٹ ٹیسٹ کھیلے گی۔

اس لیے زیادہ پریکٹس کی ضرورت ہے،ذرائع کے مطابق سلیکشن کمیٹی ویسٹ انڈیز کے خلاف ٹیسٹ سیریز کےلیے ٹیسٹ اسکواڈ کا اعلان قائد اعظم ٹرافی میچ کے دوران کرے گی ۔

انگلینڈ کے خلاف ٹیسٹ کھیلنے والی ٹیم میں زیادہ تبدیلیوں کا امکان نہیں،البتہ ٹیم کے اعلان سے پہلے یونس خان کی فٹنس کا جائزہ لیا جائے گا۔

ایمز ٹی وی (کھیل) بھارتی کرکٹر یووراج سنگھ اور بالی ووڈ اداکارہ ہیزل کیج 30 نومبر کوشادی کے بندھن میں بندھ جائیں گے۔
بھارتی کرکٹر یوراج سنگھ اور بالی ووڈ اداکارہ ہیزل کیچ نے طویل معاشقے کے بعدمنگنی کرلی تھی لیکن اب دونوں رواں سال رشتہ ازدواج میں منسلک ہوجائیں گے ۔ بھارتی میڈیا رپورٹس کے مطابق ہیزل کیج اور یووراج سنگھ 30 نومبر کو شادی کے بندھن میں بندھ جائیں گے جب کہ شادی مکمل پنجابی رسومات کے تحت چندی گڑھ میں منقعد ہوگی جس کی مرکزی تقریب دسمبر کے پہلے ہفتے میں نئی دلی میں ہوگی۔
واضح رہے کہ اداکارہ ہیزل کیچ نے کئی فلموں میں اداکاری کے جوہر دکھائے ہیں تاہم انہیں شہرت فلم ’’باڈی گارڈ‘‘ سے حاصل ہوئی ہے۔

ایمز ٹی وی (کھیل) کبڈی کے بعد پاکستان ہاکی ٹیم بھی بھارت کودھول چٹانے کے لیے تیار ہوگئی، چوتھے انڈر 18 ایشیا ہاکی کپ کے ناقابل شکست گرین شرٹس جمعرات کو سیمی فائنل میں بلوشرٹس کیخلاف میدان میں اتریں گے۔

دونوں ٹیموں کے کوچز نے فیصلہ کن مقابلہ اپنے نام کرنے کا دعوی کیا ہے، پاکستانی کوچ مدثر علی خان کا کہنا ہے کہ تمام میچز میں کامیابیاں سمیٹنے کے بعد کھلاڑیوں کے حوصلے بلند ہیں اور روایتی حریف کے خلاف بھی فتح حاصل کر کے فائنل تک رسائی حاصل کرنے کے لیے پُرامید ہیں، بھارتی کوچ بی جے کریپا کے مطابق کھلاڑیوں نے پاکستان کے خلاف میچ پر توجہ مرکوز کی ہوئی ہے۔

یہ مقابلہ ہمارے لیے کسی چیلنج سے کم نہیں ہوگا، جارحانہ انداز اپنا کر میچ کا نتیجہ اپنے نام کرنے کی کوشش کریں گے، ایونٹ کے دوسرے مقابلے میں بنگلہ دیش کا مقابلہ چائنیزتائپے سے ہو گا۔ موصولہ اطلاعات کے مطابق بنگلہ دیش میں جاری انڈر 18ایشیا ہاکی کپ اختتامی مراحل کی طرف گامزن ہے،4 ٹیموں پاکستان، بنگلہ دیش، بھارت اور چائنیزتائپے نے عمدہ کارکردگی کی بدولت سیمی فائنل میں جگہ بنا رکھی ہے، یاد رہے کہ ایونٹ میں مجموعی طور پر 7 ٹیمیں شریک ہیں جنھیں 2گروپس میں تقسیم کیا گیا۔

پول اے میں بھارت، اومان اور بنگلہ دیش شامل جبکہ پول بی میں پاکستان کے ساتھ چین، چائینز تائپے اور ہانگ کانگ چین کو رکھا گیا، پاکستان اور بھارت کے درمیان جاری سرحدی کشیدگی کے بعد دونوں ملکوں کی کروڑوں عوام نے اپنی نظریں جمعرات کو بنگلہ دیش کے دارالحکومت ڈھاکا میں شیڈول انڈر 18 ایشیا ہاکی کپ کے سیمی فائنل مقابلے پر مرکوز کر لی ہیں۔

پاکستان شائقین پُر امید ہیں کہ کبڈی کی طرح ہاکی ٹیم بھی بھارت کوزیرکرنے میں کامیاب رہے گی، گرین شرٹس مسلسل 3 میچز جیت کر ایونٹ میں ناقابل شکست ہیں، ٹیم نے ایونٹ کے افتتاحی میچ میں چائینز تائپے کو6-1سے ہرانے کے بعد دوسرے میچ میں چین کو صفر کے مقابلے میں 6گول سے زیر کیا تھا،گرین شرٹس نے پہلے راؤنڈ کے آخری میچ میں ہانگ کانگ کو 14-0 سے ہراکر نہ صرف فتوحات کی ہیٹ ٹرک مکمل کی بلکہ سیمی فائنل میں بھی جگہ پکی کی۔

ایونٹ میں اب تک پاکستانی ٹیم نے مجموعی طور پر26 گول کیے جبکہ صرف ایک گول اس کے خلاف ہوا۔ادھر بھارت کو سنسنی خیز مقابلے میں بنگلہ دیش کے ہاتھوں 4کے مقابلے میں5گول سے اپ سیٹ شکست کا سامنا کرنا پڑا تھا، یاد رہے کہ انڈر 18 سطح کے انٹرنیشنل مقابلوں میں یہ بنگال ٹائیگرز کی بلوزشرٹس کے خلاف پہلی فتح تھی، دوسرے میچ میں بھارت نے عمدہ کم بیک کرتے ہوئے اومان کے خلاف صفر کے مقابلے میں 11 گول سے کامیابی حاصل کی تھی۔ یاد رہے کہ پاکستان اور بھارت کو ایشیائی کپ کا ٹائٹل اپنے نام کرنے کا اعزاز حاصل ہے۔

پاکستان نے2009 میں چیمپئن بننے کے بعد 2011 میں کانسی کا تمغہ حاصل کیا تھاجبکہ بھارتی ٹیم 2001 میں پہلی پوزیشن حاصل کرنے میں کامیاب رہی۔ایونٹ کے دوسرے سیمی فائنل میں بنگلہ دیش کا مقابلہ چائنیزتائپے سے ہو گا۔

ادھر پاکستان اور بھارت کے کوچز مقابلہ اپنے نام کر کے فائنل تک رسائی حاصل کرنے کے لیے پُرامید ہیں۔ پاکستان ہاکی ٹیم کے کوچ مدثر علی خان کا کہنا ہے کہ کہ تمام میچز میں کامیابیاں سمیٹنے کے بعد کھلاڑیوں کے حوصلے بلند ہیں، وہ روایتی حریف کے خلاف بھی فتح حاصل کر کے فائنل تک رسائی حاصل کرنے کا عزم رکھتے ہیں، انھوں نے کہا کہ بلوشرٹس کو کسی بھی طرح آسان نہیں لیں گے بلکہ بھرپور تیاریوں کے ساتھ میدان میں اتریں گے۔

بھارتی کوچ بی جے کریپا کا کہنا ہے کہ تمام کھلاڑیوں نے پاکستان کے خلاف میچ پر توجہ مرکوز کی ہوئی ہے، یہ مقابلہ ہمارے لیے کسی طرح بھی چیلنج سے کم نہیں ہوگا، انھوں نے کہاکہ پاکستانی ٹیم نے اب تک ایونٹ میں عمدہ کھیل پیش کرتے ہوئے تمام مقابلوں میں کامیابی حاصل کی ہے، اس لیے بخوبی جانتے ہیں کہ جیت کے لیے تمام کھلاڑیوں کو غیرمعمولی کارکردگی کامظاہرہ کرنا ہوگا۔

ایمزٹی وی(تعلیم/ اسلام آباد)وزیر مملکت تعلیم و پیشہ ورانہ تربیت انجینئر بلیغ الرحمن نے نیشنل لائبریری اسلام آباد میں یوتھ فار پیس فیسٹیول کی افتتاحی تقریب سے خطاب کرتے ہوئے کہاہے کہ حکومتی کوششوں سے ملک میں امن آیاہے ،حکومت معیشت کی ترقی ،امن و امان کی بہتری اور تعلیمی ترقی کے لیے فعال کردار ادا کررہی ہے ، نیشنل ایکشن پلان کی کامیابی سے دہشت گردی کے واقعات میں نمایاں کمی آئی اور سیاحت کو فروغ ملا ہے ،سی پیک کی تکمیل سے نوجوانوں کو روزگار کے مواقع ملیں گے ۔نیپال کے رکن پارلیمنٹ مسٹر اکناتھ ڈھاکال نے کہاکہ عالمی امن کیلئے نوجوانوں کو متحرک کرنے کی ضرورت ہے ۔

علاوہ ازیں یونیسکو کی جاری ‘گلو بل ایجوکیشن مانیٹرنگ رپورٹ’ کی تقریب سے خطاب کرتے ہوئے بلیغ الرحمن نے کہا کہ گلو بل ایجوکیشن مانیٹرنگ رپورٹ کے اعداد و شمار 2030ایجنڈا کی تکمیل میں معاون ثابت ہوں گے۔ ، رپورٹ کے مطابق چو بیس ملین بچے اسکولوں سے باہر ہیں، گزشتہ برس یہ تعداد پچیس ملین تھی جس سے ثابت ہوتا ہے کہ حکومت نے اسکول میں داخلے کے لیے اقدامات اٹھائے ہیں، کردار سازی ،اچھے شہری اور حسن سلوک سے متعلق مضامین بھی نصاب کا حصہ بنائیں گے۔

ایمزٹی وی(واشنگٹن) امریکی مشیر قومی سلامتی سوزن رائس کا کہنا ہے کہ پاکستان کے خلاف بھارت کی مہم سے خطے میں امن وامان کا توازن بگڑرہا ہے لہذا بھارت خطے میں تناؤ نہ بڑھائے۔

مشیر قومی سلامتی سوزن رائس نے بھارتی ہم منصب اجے ڈیول کو ٹیلی فون کرکے اُڑی حملے پر تبادلہ خیال سمیت حملے کی مذمت کی۔ اس موقع پر سوزن رائس کا کہنا تھا کہ پاکستان کے خلاف بھارت کی مہم سے خطے میں امن بگڑ رہا ہے لہذا بھارت خطے میں تناؤ نہ بڑھائے۔امریکی وزیرخارجہ نے بھارتی ہم منصب کو دوبارفون کرکے انتباہ کیا کہ کشیدگی کو مزید ہوا نہ دی جائے۔

بھارتی میڈیا کے مطابق سوزن رائس نے کہا کہ وہ امید کرتی ہیں کہ پاکستان لشکر طیبہ سمیت ہر اس تنظیم کے خلاف کارروائی کرے گا جسے اقوام متحدہ کی جانب سے دہشت گرد قرار دیا جاچکا ہے۔ امریکی صدر براک اوباما اس عزم پر قائم ہیں کہ دنیا بھر میں دہشتگردی کے مرتکب افراد کو انصاف کے کٹھرے میں لایا جائے گا۔

ایمزٹی وی (تعلیم)وزیر اعلیٰ سندھ سید مراد علی شاہ نے کہا ہے کہ تعلیمی بورڈز کو کرپشن سے پاک کیا جائے گا۔غلط کام کو معاف نہیں کیا جائے گا لیکن وہاں کچھ اچھے کام بھی ہو رہے ہیں ۔ انٹرمیڈیٹ کے امتحانات میں پوزیشن حاصل کرنے والی طالبہ کا تعلق غریب گھرانے سے ہے ۔گزشتہ روز سندھ اسمبلی میں پاکستان تحریک انصاف کے خرم شیر زمان کے توجہ دلاؤ نوٹس پر وزیر اعلیٰ سندھ سید مراد علی شاہ نے کہا کہ بورڈ آف انٹرمیڈیٹ کراچی میں اینٹی کرپشن نے چھاپہ مارا تھا ۔

اس ضمن میں ایف آئی آر نمبر 38/2016 درج کی گئی ہے ۔ دو افراد کو گرفتار کیا گیا تھا ، جن میں اسسٹنٹ کنٹرولر نے ضمانت حاصل کر لی ہے ۔ 95 جوابی کاپیاں ضبط کی گئی ہیں ، کارروائی جاری ہے ۔ انہوں نے کہا کہ تعلیمی بورڈز میں خالی اسامیاں پر کر دی گئی ہیں ، جن افسروں کا کنٹریکٹ ختم ہو گا ، ان کی جگہ نئے لوگوں کا تقرر ہو گا ۔

انہوں نے کہا کہ بورڈز میں کرپشن کا مسئلہ ہے اس لیے اینٹی کرپشن نے چھاپہ مارا ہے ، مناسب کارروائی کی جارہی ہے ، کرپشن میں ملوث افراد کو سزا دی جائے گی ۔ وزیر اعلیٰ سندھ نے کہا کہ تعلیمی بورڈز کو کرپشن سے پاک کیا جائے گا تاکہ صحیح مارکنگ ہو ، غلط کام کو معاف نہیں کیا جائے گا لیکن صحیح کام بھی کیا جا رہا ہے ۔ انٹر میں پہلی پوزیشن حاصل کرنے والی طالبہ غریب گھرانے سے تعلق رکھتی ہیں ۔ خرم شیر زمان نے توجہ دلاؤ نوٹس پر کہاکہ تعلیمی بورڈ میں رشوت کے عوض نمبرز دینا بورڈز کے طریقہ امتحانات کی شفافیت پر ایک سوالیہ نشان ہے ۔ تعلیمی بورڈز میں مال بناؤ پالیسی پر عمل کیا جا رہا ہے ، تعلیمی ڈگریاں دولت کے بل بوتے پر حاصل کی جا رہی ہیں.

ایمز ٹی وی (کھیل) پی سی ایگزیکٹیو کمیٹی کے چیئرمین نجم سیٹھی نے واضح کیا ہے کہ شاہد آفریدی کو الوداعی انٹرنیشنل میچ کھلانے کا کوئی امکان نہیں ہے۔

انھوں نے کہا کہ دنیا میں ایسا کہیں نہیں ہوتا کہ کسی کھلاڑی کو سلیکشن کمیٹی منتخب نہیں کر رہی مگر اسے آخری میچ کھلانے کیلیے واپس لے آیا جائے، انھوں نے کہا کہ مجھ سمیت چیئرمین شہریارخان، سی او او سبحان احمد اور کوچ مکی آرتھر اس فیصلے سے مفتق ہیں، البتہ ہم آل راؤنڈر کو اچھے انداز میں رخصت کرنا چاہتے ہیں۔

معاملات طے کرنے کیلیے 26 ستمبر کی میٹنگ کے منتظر تھے تاہم آفریدی نے مصروفیات کی بنا پر اسے ملتوی کر دی،ہم اب بھی آفریدی کے منتظر ہیں، ان کے پاس جب بھی وقت ہو وہ ہمیں نئی تاریخ بتا دیں، ہم ان کے ساتھ بات چیت کر لیں گے،ان کیلیے کوئی میچ بھی رکھا جا سکتا ہے مگر اس کا فیصلہ بعد میں ہوگا۔