ٹوکیو: جاپان کے سرکاری تحقیقی ادارے ’’رائیکن لیبارٹری‘‘ نے نجی ٹیکنالوجی کمپنی ’’فیوجیتسو‘‘ کے تعاون و اشتراک سے دنیا کا طاقتور ترین سپر کمپیوٹر ’’فُوگاکُو‘‘ (Fugaku) تیار کرلیا ہے جو صرف ایک سیکنڈ میں 415 کروڑ ارب حسابات لگا سکتا ہے۔

اس سے پہلے  ’’سمّٹ‘‘ کو دنیا کا سب سے تیز رفتار سپر کمپیوٹر کا اعزاز حاصل تھا جو امریکا کی اوک رِج نیشنل لیبارٹری نے تیار کیا تھا اور 148 پی-ٹا فلوپس کی رفتار سے حساب لگاتا ہے۔ اس طرح رفتار کے میدان میں ’’فُوگاکُو‘‘ کی رفتار، سمّٹ کے مقابلے میں 2.8 گنا زیادہ ہے۔

لیکن فُوگاکُو کی برتری صرف یہیں پر ختم نہیں ہوجاتی بلکہ یہ دنیا کا سب سے پہلا تیز رفتار ترین سپر کمپیوٹر بھی ہے جس میں ’’اے آر ایم آرکٹیکچر‘‘ کے حامل 158,976 سی پی یو ایک ساتھ استعمال کیے گئے ہیں۔ قدرے تکنیکی الفاظ میں یوں کہا جاسکتا ہے کہ فُوگاکُو کی رفتار ’’415 پی-ٹا فلوپس‘‘ (415 peta flops) ہے۔

واضح رہے کہ اے آر ایم آرکٹیکچر پر مبنی مائیکرو پروسیسرز کا استعمال آج کل اسمارٹ فون، اسمارٹ واچ اور ٹیبلٹ پی سی وغیرہ جیسے جدید دستی برقی آلات میں بکثرت کیا جارہا ہے کیونکہ یہ مختصر ہونے کے علاوہ خاصی کم توانائی بھی صرف کرتے ہیں۔

ماضی میں بھی اے آر ایم آرکٹیکچر والے سی پی یوز کی مدد سے سپر کمپیوٹر تیار کیے جاچکے ہیں لیکن وہ زیادہ طاقتور نہیں تھے۔ اس لحاظ سے یہ پہلا موقع ہے جب ’’اسمارٹ فون پروسیسر‘‘ کی ٹیکنالوجی سے دنیا کا سب سے تیز رفتار سپر کمپیوٹر تیار کیا گیا ہے۔ 

دیگر خبروں سے یہ بھی پتا چلا ہے کہ فُوگاکُو کا اعلان کرنے سے پہلے ہی یہ سپر کمپیوٹر کورونا وائرس کی ویکسین تلاش کرنے میں استعمال کیا جانے لگا تھا۔ 

لاہور: محکمہ ا سکول ایجوکیشن پنجاب نے سرکاری   اسکولوں میں بچوں کی داخلہ مہم شروع کرنے کی اجازت دیدی ۔ تفصیلات کے مطابق مہم کے دوران پرائمری،ایلیمنٹری اور ہائی  اسکولوں میں آئندہ سیشن کیلئے بچوں کے داخل کیے جائیں گے ۔

 مراسلے کے مطابق  داخلوں کے دوران کورونا ایس او پیز کامکمل خیال رکھا جائے گا۔بچوں میں کتابوں کی تقسیم اور داخلوں کاعمل 15 جولائی تک مکمل کیا جائے ۔نئے داخلوں کیلئے کتابوں کی ڈیمانڈ 16 جولائی تک محکمہ کو بھجوا دی جائے ۔

 اس حوالے سے پنجاب ٹیچر یونین کاکہنا تھامحکمہ تعلیم ا سکولز پنجاب کی طرف سے سرکاری اسکولوں میں نئے داخلوں کی اجازت دینے کے فیصلے کا خیر مقدم کرتے ہیں ۔

رانا لیاقت کا کہنا تھا نئے داخلوں کیلئے سرکاری  اسکولوں میں ہرہفتے کم از کم 4 روز کیلئے ایڈمشن ڈیسک قائم کئے جائیں ۔پرائیویٹ  اسکولوں کی بھاری فیسوں اور خراب معاشی حالات کی وجہ سے اس سال سرکاری اسکولوں میں زیادہ داخلوں کی توقع ہے ۔ لاہور میں 100 نئے انصاف اسکولز کا اجرا بھی فی الفور کیا جائے ۔ انصاف اسکولز میں بھی طلبہ داخل ہو کر زیور تعلیم سے آراستہ ہو سکیں گے ۔