کراچی: جامعہ کراچی میں سالانہ جلسہ تقسیم اسنادکے لئے ریہرسل27 دسمبر کو ہوگی

جامعہ کراچی کے سالانہ جلسہ تقسیم اسناد کے لئے ریہرسل بروزجمعہ27 دسمبر2019 ءکودوپہر2:30 بجے ولیکا گراﺅنڈ میں منعقد ہوگی۔طلبہ اکیڈمک گاﺅن پہن کرہی ریہرسل میں شرکت کرسکیں گے۔علاوہ ازیں بسلسلہ ریہرسل اور جلسہ تقسیم اسناد بروز جمعہ 27 اورہفتہ28دسمبر 2019 ءکو جامعہ کراچی میں مارننگ وایوننگ اوقات میں کسی قسم کی پبلک ڈیلنگ نہیں ہوگی، کلاسیں معطل رہیںگی اور کوئی امتحان منعقد نہیں ہوگا۔

صرف ڈگری اور گولڈ میڈل کے حصول کے امیدواروں کو ہی مذکورہ تاریخوں میں جامعہ آنے کی اجازت ہوگی۔واضح رہے کہ جامعہ کراچی کا تیسواں سالانہ جلسہ تقسیم اسناد بروز ہفتہ28 دسمبر2019 ءکوصبح 9:30بجے جامعہ کراچی کے ولیکا کرکٹ گراونڈ میں منعقد ہورہا ہے۔ جس کی صدارت گورنر سندھ و چانسلر جامعہ کراچی عمران اسماعیل کریں گے جبکہ شیخ الجامعہ پروفیسر ڈاکٹر خالد محمود عراقی خطبہ استقبالیہ پیش کرینگے۔

کراچی: جامعہ کراچی سالانہ جلسہ تقسیم اسناد کے دعوت نامے24 اور25 دسمبر 2019 ءکو حاصل کئے جاسکتے ہیں۔

جامعہ کراچی کا سالانہ جلسہ تقسیم اسناد برائے 2019 ء28 دسمبر 2019 ءکو منعقد ہوگا۔اس سلسلے میں طلبہ اپنے دعوت نامے ایڈمنسٹریشن بلڈنگ کے گراﺅنڈ فلور پر واقع کمرہ نمبر 01 سے 24 اور25 دسمبر 2019 ءکو صبح10:00 تادوپہر3:00 بجے تک حاصل کرسکتے ہیں۔

امیدوار اصل شناختی کارڈ اور اصل رسید دکھا کر دعوت نامے حاصل کرسکتے ہیں۔علاوہ ازیں جلسہ تقسیم اسناد میں شرکت کے لئے گاﺅن حاصل کرنے کی سہولت بھی کمرہ نمبر 01 میں میسر ہوگی۔

واضح رہے کہ دعوت ناموں اور گاﺅن کے حصول کے لئے 25 دسمبر کو بھی رجوع کیا جاسکتاہے۔

اسلام آباد: ایئر یونیورسٹی کے فارغ التحصیل طلباء و طالبات کی نمائندہ تنظیم ایلومینائی ایسو سی ایشن کے سالانہ انتخابات کے انعقاد کا اعلان کردیا گیا ہے ۔

وائس چانسلر فائز امیر نے گریجوایٹس کو حق رائے دہی استعمال کرنیکی تلقین کی ، سیکرٹری الیکشن کمیٹی کے مطابق رواں برس ایک صدر، 5 نائب صدور کیلئے ووٹنگ کا عمل جاری ہے ، نومنتخب کابینہ کی تقریب حلف برداری کا انعقاد 27دسمبر کو ہو گا ۔ ووٹنگ کا عمل 24دسمبر رات بارہ بجے تک جاری رہے گا۔

کراچی 2019:جناح سندھ میڈیکل یونیورسٹی المنائی پاکستان اور امریکا کے باہمی اشتراک سے جاری 2روزہ انٹرنیشنل ریسرچ کانفرنس کے اختتام پر مختلف ملکوں سے آئے ہوئے شرکا کے لیے گالا ڈنرکااہتمام جناح سندھ میڈیکل یونیورسٹی میں منگل 24دسمبر شام 7:30بجے کیا گیا ہے، پروگرام کے مہمانِ خصوصی چیف سیکٹری سندھ سید ممتاز علی شاہ ہونگے۔

 جناح یونیورسٹی برائے خواتین کے وائس چانسلر پروفیسر ڈاکٹر نعیم فاروقی نے کہا ہے کہ جامعہ میں ڈی ایچ ایم ایس ڈگری کلاسزشروع کرنے پر کام کر رہے ہیں، نیشنل کونسل فار ہومیو پیتھی کی ٹیم کی جانب سے یونیورسٹی کے دورے کے بعد منظوری ملتے ہی باقاعدہ کلاسوں کا اہتمام کر دیا جائے گا۔یہ بات انہوں نے پاکستان ہومیو پیتھک فزیشن سوسائٹی کے بانی ڈاکٹر سید جاوید حسین شاہ سے ملاقات کے دوران گفتگو کرتے ہوئے کہی۔

اس موقع پر جامعہ ہذا کے ڈین فیکلٹی برائے فارمیسی پروفیسر ڈاکٹر غلا م سرور بھی موجود تھے ۔ پاکستان ہومیو پیتھک فزیشن سوسائٹی کے بانی ڈاکٹر سید جاوید شاہ نے اس موقع پر یاد ہانی کراتے ہوئے کہا کہ کچھ عرصہ قبل یونیورسٹی میں ڈی ایچ ایم ایس کلاسز شروع کرانے کیلئے ہم نے فزیبلٹی رپورٹ دی تھی خواہش ہے کہ جناح ویمن یونیورسٹی میں جلد از جلد ڈی ایچ ایم ایس ڈگری پروگرام شروع ہو جائے۔

 کراچی:  عثمان انسٹیٹیوٹ آف ٹیکنالوجی میں نئے تعلیمی سال 2019-20 کا آغاز ہوگیا، اس سلسلے میں نئے طلبا و طالبات کے لئے ویلکم پارٹی کا انعقاد کیا گیا۔

تقریب کا افتتاح عثمان انسٹیٹیوٹ آف ٹیکنالوجی کے ڈائریکٹر ڈاکٹر ظاہر علی سید نے کیا۔ 2019-20 کے تعلیمی سیشن میں 500 کے قریب طلبہ نے ٹیسٹ پاس کیا اور داخلے کے اہل قرار پائے، جن میں سے 205 کا بیچلرزآف انجینئرنگ کے مختلف شعبوں جبکہ 285 طلبہ کا اندراج کمپیوٹر ٹیکنالوجی میں ہوا۔ ویلکم پارٹی میں پرانے طلبہ نے نئے طلبہ کو خوش آمدید کہا۔

اس موقع پر ٹیبلوز بھی پیش کئے گئے۔ ڈاکٹر زاہد علی سید نے نئے آنے والے طلبہ کا حوصلہ بڑھاتے ہوئے کہا کہ انسٹیٹیوٹ کو اپنے طلبہ پر فخر ہے، اس انسٹیٹیوٹ کے طلبا نے نہ صرف پاکستان بلکہ دنیا بھر میں ہمارا نام روشن کیا ہے۔