اسلام آباد: حکومت کے خلاف لائحہ عمل مرتب کرنے کے لیے اپوزیشن کی 9 جماعتوں کی آل پارٹیز کانفرنس کل منعقد ہوگی جس میں بلاول بھٹو زرداری نے بھی شرکت کی یقین دہانی کرادی۔

ذرائع کے مطابق جمیعت علمائے اسلام (ف) کے سربراہ مولانا فضل الرحمن نے حکومت کے خلاف آئندہ کا لائحہ عمل مرتب کرنے کے لیے اپوزیشن جماعتوں کی آل پارٹیز کانفرنس طلب کرلی۔

جے یو آئی کے مطابق اپوزیشن کی آل پارٹیز کانفرنس کا وقت تبدیل کردیا گیا ہے، آل پارٹیز کانفرنس صبح 11 کے بجائے دن دو بجے ہوگی۔ ذرائع کا کہنا ہے کہ بلاول بھٹو زرداری کی درخواست پر اے پی سی کا وقت تبدیل کیا گیا۔

ترجمان بلاول بھٹو کے مطابق اے پی سی میں چیئرمین بلاول بھٹو کی قیادت میں پارٹی وفد شریک ہوگا جس میں پارٹی کے سینئر قائدین شامل ہوں گے، بلاول بھٹو زرداری اپوزیشن کی تحریک کے حوالے سے پارٹی کی پالیسی بھی اے پی سی میں رکھیں گے۔

لاہور:  سری لنکا کو پاکستان کے ٹھکرائے ہوئے کوچز بھانے لگے، ممکنہ ہیڈ کوچ مکی آرتھر کی بیٹنگ میں معاونت کیلیے گرانٹ فلاور سے بھی رابطہ کرلیا۔

سری لنکن ٹیم دورئہ پاکستان کی تیاری کے لیے کولمبو کے پریماداسا اسٹیڈیم میں پریکٹس جاری رکھے ہوئے ہے، فی الحال عبوری کوچ رمیش رتنائیکے اور منیجر چیف سلیکٹر اشانتھا ڈی میل کیمپ کی نگرانی کررہے ہیں، دسمبر کے پہلے ہفتے میں مکی آرتھر بطور ہیڈ کوچ اور شین میکڈرموٹ فیلڈنگ میں معاون کی حیثیت سے ٹیم کو جوائن کرلیں گے،پاکستان کرکٹ ٹیم کے سابق ہیڈ کوچ ان دنوں آسٹریلیا میں بطور مبصر سرگرم ہیں۔

دوسری جانب سری لنکن کرکٹ بورڈ پاکستان کے لیے خدمات سرانجام دینے والے گرانٹ فلاور کے ساتھ بھی رابطے میں ہے،ان کے ساتھ معاملات جلد طے پانے کا امکان ہے، پاور ہٹنگ ایکسپرٹ جولین ووڈ کی بھی جزوقتی خدمات حاصل کرنے کی کوشش ہورہی ہے۔

واضح رہے کہ سری لنکن ٹیم دورئہ پاکستان پر8 دسمبر کو روانہ ہوگی، اسے ایک ٹیسٹ راولپنڈی اور دوسرا کراچی میں کھیلنا ہے، مہمان ٹیم کا پاکستان کیلیے خدمات سرانجام دینے والے سابق کوچز کی رہنمائی میں کھیلنا شائقین کیلیے دلچسپی سے خالی نہیں ہوگا، سری لنکن ٹیم میزبانوں کی کمزوریوں سے فائدہ اٹھانے کیلیے دونوں سابق کوچز کی معلومات سے فائدہ اٹھائے گی۔

 کراچی:برسبین میں ہارکے بعد پاکستانی ٹیم مینجمنٹ کو غلطیوں کا احساس ہو گیا۔

آسٹریلیا سے پہلے ٹیسٹ میں پاکستان کو اننگز اور5رنز کی بدترین شکست کا سامنا کرنا پڑا تھا،  ماہرین نے ناقص کارکردگی کے بعد ٹیم کمبی نیشن پر بھی سوال اٹھائے تھے۔ مینجمنٹ کو بھی اپنی غلطیوں کا احساس ہو گیا اور دوسرے میچ کے لیے تبدیلیاں متوقع ہیں۔

ذرائع کے مطابق اوپنر امام الحق اور فاسٹ بولر محمد عباس کی شمولیت کا امکان روشن ہے،اس صورتحال میں شان مسعود کے ساتھ ممکنہ طور پر امام ہی اننگز کا آغاز کریں گے، اظہر کی پوزیشن تیسری ہوگی،امام الحق کے لیے حارث سہیل کو جگہ خالی کرنا پڑے گی جوپہلے میچ میں بدترین ناکامی کا شکار ہوئے تھے، ٹیم میں دوسری تبدیلی عمران خان سینئر کی جگہ محمد عباس کو شامل کرنے کی صورت میں ہوگی، انھیں برسبین میں نہ کھلانے پر ٹیم مینجمنٹ کو کڑی تنقید کا سامنا کرنا پڑا تھا۔

دریں اثنا پہلے ٹیسٹ میں شکست کے بعد مصباح الحق نے کھلاڑیوں کو تلقین کی کہ وہ غلطیوں کو نہ دہرائیں اسی صورت میں اگلا میچ جیت سکیں گے۔

ذرائع نے بتایاکہ کوچ و چیف سلیکٹر گوکہ بابر اعظم اور محمد رضوان کی اننگز سے خوش مگر وہ چاہتے تھے کہ دونوں لمبی باری لیں، اس لیے آؤٹ ہونے پر مایوسی کا اظہار کیا۔ واضح رہے کہ فلڈ لائٹس میں دوسرا ٹیسٹ جمعے کو شروع ہوگا۔

 اسلام آباد: وزیراعظم عمران خان کی زیرصدارت وفاقی کابینہ کا اجلاس جاری ہے۔

وفاقی کابینہ کا اجلاس وزیراعظم عمران خان کی زیرصدارت جاری ہے جس میں ملکی سیاسی، معاشی و سیکورٹی صورتحال کا جائزہ لیا جارہا ہے۔ اس کے علاوہ کابینہ کی 3 سالہ حج پالیسی کی تیاری میں درپیش مشکلات کا جائزہ لیا جائے گا۔

ذرائع کے مطابق اجلاس میں وفاقی کابینہ کو جیل ریفارمز پر بریفنگ دی جائے گی جس کے بعد کابینہ 65 سال سے زائد عمر کے قیدیوں کی رہائی سے متعلق فیصلہ کرے گی۔

اسلام آباد: ہائی کورٹ نے حکومت کی درخواست پر سابق صدر پرویز مشرف غداری کیس کا فیصلہ روکنے کے لیے لارجر بینچ تشکیل دیدیا۔

اسلام آباد ہائی کورٹ نے سابق صدر پرویز مشرف کے خلاف غداری کیس کا فیصلہ روکنے کے لیے حکومت کی جانب سے دائر درخواست پر سماعت کے لیے لارجر بنچ تشکیل دیدیا ہے۔ چیف جسٹس اسلام آباد ہائی کورٹ جسٹس اطہرمن اللہ کی سربراہی میں 3 رکنی بینچ درخواست پر آج سماعت کرے گا، جسٹس عامرفاروق اور جسٹس محسن اختر کیانی بھی بینچ کا حصہ ہوں گے۔

 اسلام آباد:  مشیرخزانہ ڈاکٹر عبدالحفیظ شیخ نے کہا ہے کہ غیرملکی سرمایہ کاروں نے پاکستان میں 1 ارب ڈالر کا سرمایہ لگایا ہے۔

رواں مالی سال میں غیرملکی زرمبادلہ کے ذخائر میں اتناہی اضافہ ہوا ہے۔ اسٹیٹ بینک کے اعدادوشمار کے مطابق بیرونی سرمایہ کاروں نے بیشتر رقم سہ ماہی ٹریژری بلز کی خریداری میں صرف کی جس سے یہ ظاہر ہوتا ہے کہ غیرملکی سرمایہ کار شرح مبادلہ کے اتار چڑھاؤ سے منسلک طویل مدتی رسک لینے کیلیے تیار نہیں ہیں۔

مشیرخزانہ نے ایشیائی ترقیاتی بینک اور کارانداز پاکستان کے تحت منعقدہ پاکستان انوویٹیو فنانس فورم سے خطاب کرتے ہوئے کہا کہ بیرونی سرمایہ کاروں نے حکومت کی سیکیورٹیز میں 1 ارب ڈالر کی سرمایہ کاری کی ہے۔ ان غیرملکی سرمایہ کاروں کے ساتھ ٹریژری بلز اور پاکستان انویسٹمنٹ بانڈز میں سرمایہ کاری پر خصوصی برتاؤ روا رکھا گیا۔

اسٹیٹ بینک کے مطابق 1.1 ارب ڈالر میں سے 612.7 ملین ڈالر امریکا، 466.4 برطانیہ، 5.1 ملین متحدہ عرب امارات، 496,000 ڈالر جزائر کیمین اور 363,000 آئرلینڈ سے آئے۔ اس سرمایہ کاری کے بعد غیرملکی زرمبادلہ کے ذخائر بڑھ کر 8.4 ارب ڈالر ہوگئے

اسلام آباد: احتساب عدالت نے سابق صدر آصف زرداری اور ان کی بہن فریال تالپور کے جوڈیشل ریمانڈ میں 17 دسمبر تک توسیع کردی۔

احتساب عدالت کے جج اعظم خان نے جعلی بنک اکاؤنٹس، میگا منی لانڈرنگ اور پارک لین ریفرنس پر سماعت کی۔ آصف علی زرداری کو عدالت میں پیش نہ کیا جا سکا جبکہ فریال تالپور کو اڈیالہ جیل سے پیش کیا گیا۔

اسلام آناد: اسلام آباد ہائی کورٹ نے وزیراعظم عمران خان کے خلاف توہین عدالت کی درخواست کے قابل سماعت ہونے پر فیصلہ محفوظ کرلیا۔

درخواست گزار سمیع اللہ خان ایڈووکیٹ نے موقف اختیار کیا کہ وزیراعظم عمران خان کے خلاف توہین عدالت کی کارروائی شروع کی جائے کیوں کہ ان کی تقریر توہین عدالت کے زمرے میں آتی ہے۔

چیف جسٹس اطہر من اللہ نے درخواست گزار سے کہا کہ وزیراعظم کی تقریر سے آپ کیوں پریشان ہیں، کیا آپ منتخب وزیراعظم کے خلاف ٹرائل کرانا چاہتے ہیں؟، کیا آپ نے کل کا ہمارا فیصلہ پڑھا ہے، توہین عدالت کے حوالے سے پہلے آگاہی نہیں تھی اب آجائےگی، عدالتیں تنقید سننے کے لیے تیار ہیں۔

اسلام آباد ہائی کورٹ نے دلائل سننے کے بعد درخواست کے قابل سماعت ہونے پر فیصلہ محفوظ کرلیا۔