کراچی: بحیرہ عرب میں موجود سپر سائیکلون ’کیار‘ مزید کمزور پڑگیا ہے لیکن محکمہ موسمیات نے بحیرہ عرب میں ایک اور طوفان ماہا کے حوالے سے خطرے کی گھنٹی بجادی ہے۔

محکمہ موسمیات کے مطابق سمندری طوفان کیار مزید کمزور پڑگیا ہے اور کراچی سے اب طوفان کا فاصلہ 120 کلو میٹر مزید بڑھنے کے بعد  910 کلو میٹر ہوگیا ہے، آج صبح تک کراچی سے طوفان کا فاصلہ 790 کلومیٹر تھا۔ اگلے 12 گھنٹوں میں کیار طوفان مزید ایک درجہ کم ہوکر کیٹگری 2 میں جاسکتا ہے اور اگلے 24 گھنٹوں میں گلف آف عدن میں داخل ہوگا۔

دوسری جانب محکمہ موسمیات نے نئے سمندری طوفان ماہا کے حوالے سے پہلی ایڈوائزری جاری کردی ہے، جس میں بتایا گیا ہے کہ بحیرہ عرب میں ایک اور سمندری طوفان ماہا بن گیا ہے۔ ہوا کا کم دباؤ انتہائی تیزی سے تبدیل ہونے والا نیا طوفان ماہا اگلے 24 گھنٹوں میں شدت اختیار کرے گا۔

 اسلام آباد: پیپلز پارٹی کے سینیٹر خانزادہ خان سینیٹ کی رکنیت سے مستعفی ہوگئے۔

ذرائع کے مطابق پیپلزپارٹی کے سینیٹر خانزادہ خان سینیٹ کی رکنیت سےمستعفی ہوگئے ہیں، چیئرمین سینیٹ صادق سنجرانی نے خانزادہ خان کا استعفیٰ منظور کرلیا ہے جب کہ سینیٹ سیکریٹری نے باقاعدہ نوٹی فکیشن بھی جاری کردیا ہے۔

ذرائع کے مطابق خانزادہ خان مارچ 2015 میں 6 سال کی مدت کے لیے سینیٹر منتخب ہوئے تھے تاہم پارٹی قیادت اوران کے درمیان اختلافات تھے جس کی بنا پر انہوں نے مدت پوری سے پہلے ہی استعفیٰ دے دیا، ان کے استعفیٰ کے بعد سینیٹ میں ان کی نشست خالی قرار دے دی گئی ہے

اسلام آباد: وفاقی حکومت نے آئی ایم ایف جائزہ مشن کے پاکستان پہنچتے ہی ٹوبیکو پراڈکٹس کی آن لائن مانیٹرنگ کا نظام شروع کر کے عالمی ادارے کی ایک اور شرط پوری کر دی۔

فیڈرل بورڈ آف ریونیو لاء ڈویژن سے قانونی رائے لینے کے بعد سب سے کم بولی دینے والے وزارت دفاع کے ذیلی ادارے نیشنل ریڈیو ٹیلی کمیونیکیشن (این آر ٹی سی) کو ملک میں ٹوبیکو سیکٹر کی آن لائن مانیٹرنگ کے ٹریک اینڈ ٹریس سسٹم کیلیے لائسنس جاری کر دیا گیا۔

  کراچی: کسٹم حکام نے اربوں روپے واجبات کی وصولی نہ ہونے پر شاہین ایئرکے اثاثے منجمد کردیے۔

ذرائع کے مطابق سوا چار ارب روپے کے لگ بھگ واجبات کی عدم ادائیگی پر کسٹم حکام نے شاہین ایئر کے جناح ٹرمینل پر 6 دفاتر کے علاوہ بکنگ آفس بھی منجمد کردیا۔