اسلام آباد:پاک بھارت کشیدگی کے پیش نظر وزارت مذہبی امور نے زائرین کوبھارت جانے سے روک دیا۔

پاک بھارت کشیدگی کے باعث زیارت کیلیے بھارت جانے والے زائرین مشکلات سے دوچارہیں،حالات کے پیش نظر وزارت مذہبی امور نے زائرین کوبھارت جانے سے روک دیا۔

ذرائع کے مطابق ہرسال زائرین بھارت میں خواجہ معین الدینؒ اجمیر شریف ،حضرت مجدد الفؒ سرہند شریف اور حضرت نظام الدین اولیا کی درگاہ جاتے ہیں۔ زائرین وزارت مذہبی میں فیس بھی جمع کرا چکے ہیں۔

اسلام آباد:  قومی اسمبلی کی قائمہ کمیٹی برائے قانون وانصاف نے شادی کی عمر 18 سال مقرر کرنے سے متعلق بل کثرت رائے سے مسترد کر دیا۔

چیئرمین ریاض فتیانہ کی زیرصدارت اجلاس میں چیئرمین اسلامی نظریاتی کونسل قبلہ ایاز نے کہا16 سال کی عمر مقرر کرنا بھی شرعی نہیں ،کم عمری کی شادی کی حوصلہ شکنی اور عوامی شعور بیدار کیاجائے۔ریاض فتیانہ نے کہا سری لنکن کرکٹ ٹیم پرحملے اورسیالکوٹ جیل میں ججوں کے قتل کے ذمہ داروں کیخلاف کارروائی کی جائے۔

اجلاس میں کوڈ آف سول پروسیجر (ترمیمی)بل 2019 ء پر غور کیا گیا ،وزیر قانون فروغ نسیم نے کہا سول مقدموں میں تیس، چالیس سال لگ جاتے ہیں ،حکم امتناع کے بعد مقدمہ قطار میں لگ جاتا ہے ،اس کی وجہ سے بنیادی مقدمے کا فیصلہ نہیں ہوتا، یہی راستہ ہے کہ حکم امتناع کے ساتھ بنیادی مقدمہ نہ رکے،جس سے چھ ماہ میں بنیادی مقدمے کا فیصلہ ہو جائے گا۔

اسلام آباد: ترجمان دفتر خارجہ ڈاکٹر محمد فیصل کا کہنا ہے کہ بھارت نے مقبوضہ کشمیرکو دنیا کی سب سے بڑی جیل بنا دیا ہے۔

دفتر خارجہ اسلام آباد میں ہفتہ وار پریس کانفرنس کے دوران ڈاکٹر فیصل نے کہا کہ 9 لاکھ سے زائد بھارتی افواج مقبوضہ کشمیر میں مظالم میں مصروف ہیں، ایک ہفتے کے دوران قابض بھارتی فوج کے کریک ڈاؤن اور سرچ آپریشنز میں 4 کشمیری شہید ہو گئے، سیکڑوں کشمیری بھارتی افواج کے ہاتھوں زخمی ہو چکے ہیں۔ ہم عالمی برادری سے مقبوضہ کشمیر کی صورتحال کا نوٹس لینے کی اپیل کرتے ہیں۔

بھارت نے مقبوضہ کشمیر کو دنیا کی سب سے بڑی جیل بنا دیا ہے۔ دنیا کشمیریوں کی جسمانی اور ذہنی اذیت کا اندازہ نہیں لگا سکتی۔ ایک کروڑ 40لاکھ کشمیریوں کو محصور کر دیا گیا ہے۔ ادویات اور خوراک کی شدید قلت پیدا ہو چکی ہے۔ بھارت کب تک کرفیو لگا کر رکھے گا؟ ظلم بڑھے گا تو ختم ہو جائے گا۔

ترجمان دفتر خارجہ کا کہنا تھا کہ بھارت میں ایک بھی پاکستانی پھنسا ہوا نہیں اور پاکستان میں موجود بھارتی شہری واہگہ سرحد سے واپس جاسکتے ہیں۔

کابل میں داعش کے خودکش حملے سے متعلق ڈاکٹر فیصل نے کہا کہ پاکستان افغانستان میں امن کے لیےعالمی کوششوں کی حمایت کرتاہے، پاکستان میں داعش کا وجود نہیں، ہمسائے ملک میں داعش کی موجودگی پر تشویش ہے، افغانستان میں دہشت گردی کے واقعات کی مذمت کرتے ہیں، کابل دھماکوں میں ملوث دہشت گرد کے پاکستانی ہونے سے متعلق داعش کے دعوے کو مسترد کرتے ہیں۔

اسلام آباد: سابق صدر پرویز مشرف کے خلاف سنگین غداری کیس کی سماعت کرنے والی خصوصی عدالت نے رضا بشیر کو وکیل دفاع مقرر کردیا۔

ذرائع کے مطابق سابق صدر پرویز مشرف کے خلاف سنگین غداری کیس کی سماعت کرنے والی خصوصی عدالت نے رضا بشیر کو وکیل دفاع مقرر کردیا ہے۔ اس حوالے سے جاری کردہ تحریری حکم نامے میں کہا گیا ہے کہ پرویز مشرف کے دفاع اور 342 کے بیان کے لئے رضا بشیر کی بطور وکیل دفاع تقرری کا نوٹی فکیشن 3 روز میں جاری کردیا جائے جب کہ رضا بشیر کو اخراجات بھی وزارت قانون ادا کرے گی۔ کیس کی آئندہ سماعت 28 اگست کو ہوگی۔

اس سے قبل جسٹس طاہرہ صفدر کی سربراہی میں 3 رکنی خصوصی عدالت نے سابق صدر پرویز مشرف کے خلاف سنگین غداری کیس کی سماعت کی۔ وزارت قانون نے پرویز مشرف کے دفاع اور 342 کے بیان کیلئے 14 ناموں پر مشتمل وکلاء پینل عدالت میں جمع کروایا۔ وکیل استغاثہ کا کہنا تھا کہ ملزم کیلئے وکیل مقرر کرنا عدالت کی صوابدید ہے، فہرست میں شامل کسی نام پر اعتراض نہیں۔

اسلام آباد: وزیراعظم عمران خان نے خدشہ ظاہر کرتے ہوئے کہا ہے کہ اب وہ بھارت سے مزید بات چیت کا کوئی ارادہ نہیں رکھتے کیونکہ اس کا اب کوئی فائدہ نہیں ہے۔

وزیراعظم نے کہا امریکی صدرڈونلڈ ٹرمپ کوانتہائی تباہ کن صورتحال کے خدشے سے آگاہ کردیا، نئی دلی حکومت نازی جرمنی جیسی ہے، خدشہ ہےکہ مقبوضہ کشمیر میں نسل کشی ہونے والی ہے، 80 لاکھ کشمیریوں کی جانیں خطرے میں ہیں، کشیدگی بڑھنے کا خطرہ ہے دنیا کواس صورتحال سےخبرداررہناچاہیے۔

دوسری جانب وزیر اعظم نے اپنی ٹوئٹ میں کہا کہ آج مذہبی بنیادوں پر تشدد کا نشانہ بننے والوں کے پہلے عالمی دن کے موقع پر ہم دنیا کی توجہ بھارت کے جبرواستبداد میں گھرے لاکھوں کشمیریوں کی جانب مبذول کروانا چاہتے ہیں جنہیں توہین و تشدد کا سامنا ہے۔ جن کے تمام بنیادی انسانی حقوق سلب کرکے ہر قسم کی آزادیوں سے محروم کیا جاچکا ہے۔

وزیر اعظم نے کہا کہ قابض بھارتی افواج کشمیریوں سے عید الاضحیٰ سمیت دیگر مذہبی شعائر کے اہتمام کا حق بھی چھین چکی ہے۔ آج جب دنیا مذہبی عقائد کی بناء پر تشدد کا نشانہ بننے والوں سے اظہار یکجہتی کرنے جارہی ہے، اسے مقبوضہ کشمیر میں عنقریب ہونے والے قتل عام کا رستہ روکنے کیلئے بھی متحرک ہونا ہوگا۔