اسلام آباد: امیر قطر تمیم بن حماد الثانی اتوار کو پاکستان کا دورہ کریں گے۔

قطر کے امیر تمیم بن حماد الثانی وزیراعظم عمران خان کی دعوت پر پاکستان کا دورہ کر رہے ہیں جب کہ امیر قطر کے ساتھ ایک اعلیٰ سطحی وفد بھی آئے گا۔

تمیم بن حماد الثانی اس دورے کے دوران وزیراعظم سے مذاکرات کے علاوہ اعلیٰ سیاسی و عسکری قیادت سے بات چیت کریں گے۔

قاہرہ: مصر کے پہلے منتخب سابق صدر محمد مرسی کو قاہرہ میں سپرد خاک کردیا گیا۔

غیرملکی خبر رساں ادارے  کے مطابق محمد مرسی کی تدفین قاہرہ کے مشرقی علاقے مدینۃ النصر میں ان کے رشتہ داروں کی موجودگی میں کی گئی۔

سرکاری ٹی وی کے مطابق 67 سالہ محمد مرسی کی موت گزشتہ روز حرکت قلب بند ہونے کی وجہ سے ہوئی جب کہ دائیں بازو کی جماعت سے تعلق رکھنے والے گروپس نے محمد مرسی کی حراست میں موت کی آزادانہ تحقیقات کا مطالبہ کیا ہے۔

یاد رہے کہ مصر میں حسنی مبارک کی 30 سالہ آمریت کے خاتمے کے بعد محمد مرسی ملک کے پہلے سویلین صدر منتخب ہوئے تھے۔ 

اقتدار پر تقریباً ایک سال رہنے کے بعد 3 جولائی 2013 کو آرمی چیف عبدالفتح السیسی نے محمد مرسی کی حکومت کا تختہ الٹا جس کے بعد صدر سمیت اخوان المسلمین کے سیکڑوں کارکنان کو جیلوں میں ڈال کر ان پر مقدمات قائم کیے گئے۔

سابق صدر محمد مرسی پر دہشت گرد تنظیموں اور عالمی طاقتوں سے رابطوں کا الزام تھا جس پر انہیں سزائے موت بھی سنائی گئی تھی۔

پٹنہ: بھارتی ریاست بہار میں گرمی کی شدید لہر کے باعث 2 دن میں 143 افراد ہلاک ہوگئے۔

بھارت کی کئی ریاستیں ان دنوں شدید ترین گرمی کی لپیٹ میں ہیں جن میں ریاست بہار سب سے زیادہ متاثر ہے، بیشتر علاقوں میں دن کے اوقات میں درجہ حرارت 41 سے 45 ڈگری سینٹی گریڈ تک پہنچ جاتا ہے۔
ریاست میں گزشتہ 2 روز کے دوران اب تک 143 افراد کے ہلاک ہونے کی تصدیق کی گئی ہے، سب سے زیادہ ہلاکتیں اورنگ آباد میں ہوئی ہیں جہاں 2 روز میں 63 افراد کی ہلاکت کی تصدیق کی گئی ہے۔ اورنگ آباد میں ہر آدھے گھنٹہ بعد ایک موت واقع ہورہی ہے۔ اسپتالوں میں گرمی سے متاثرہ مریضوں کی بڑھتی تعداد کے سامنے ڈاکٹرز بھی بے بس ہوگئے

میٹرولوجیکل ڈپارٹمنٹ کے مطابق اگلے دو سے تین روز تک گرمی کی شدت میں کمی آنے کا امکان نہیں۔ خدشہ ظاہر کیا جارہا ہے کہ ہیٹ ویو سے مزید ہلاکتیں ہوسکتی ہیں۔

واضح رہے 2015 میں بھی ہیٹ ویو کے باعث بھارت اور پاکستان میں سیکڑوں ہلاکتیں ہوئی تھیں

ورلڈ کپ 2019 میں بھارت کے خلاف میچ میں حسن علی نے پاکستان کی جانب سے عالمی کپ کا بدترین ریکارڈ اپنے نام کر لیا۔ بھارت کے خلاف ورلڈ کپ کے اہم میچ میں حسن علی بھارتی بلے بازوں کا مرکزی ہدف رہے اور تمام ہی بلے بازوں نے ان کے خلاف دل کھول کر رنز بٹورے۔ حسن نے میچ میں اپنے کوٹے کے 10 اوورز بھی مکمل نہ کیے اور 9 اوورز میں سب سے زیادہ 84 رنز دیے جس کے ساتھ ہی وہ ورلڈ کپ کے کسی بھی میچ میں سب سے زیادہ رنز دینے والے پاکستانی باؤلر بن گئے ہیں۔ حسن علی کی ناقص فارم کا اندازہ اس بات سے لگایا جا سکتا ہے کہ وہ اب تک ورلڈ کپ میں کرائے گئے 33 اوورز میں 256 رنز دے چکے ہیں اور صرف 2 وکٹیں لینے میں کامیاب رہے ہیں۔ اب تک اس ورلڈکپ میں کسی بھی باؤلر نے اتنے زیادہ رنز نہیں دیے۔

ورلڈکپ 2019 کے دوران اپنے ابتدائی 5 میچوں میں صرف ایک فتح حاصل کرنے والے قومی کرکٹ ٹیم کے کپتان سرفراز احمد عالمی کپ کے فائنل میں پہنچنے کے لیے پرامید ہیں۔ فرانسیسی خبر رساں ادارے اے ایف پی کی رپورٹ کے مطابق سرفراز احمد کا کہنا تھا کہ بھارت کے خلاف شکست کے بعد بہت تکلیف ہوئی۔ انہوں نے مزید کہا کہ ایسی شکست کے بعد اکثر ٹیموں کا حوصلہ پست ہوتا ہے لیکن ہم اپنے آپ کو دوبارہ اٹھائیں گے اور ایونٹ میں واپسی کی کوشش کریں گے۔ 16 جون کو مانچسٹر میں کھیلے گئے پاک- بھارت میچ کا روایتی نتیجہ قومی ٹیم کی شکست کی صورت میں سامنے آیا جس کی سب سے بڑی وجہ ٹیم کی کھیل کے ہر شعبے میں ناقص کارکردگی ہے۔ اس شکست کے بعد قومی ٹیم ورلڈکپ کے پوائنٹس ٹیبل پر 9 ویں نمبر پر چلی گئی جبکہ دسویں نمبر پر صرف افغانستان ہے جسے اب تک عالمی کپ میں کامیابی نہیں مل سکی۔ آسٹریلیا 8، نیوزی لینڈ 7، بھارت 7 اور انگلینڈ 6 پوائنٹس کے ساتھ اس وقت پوائنٹس ٹیبل پر سر فہرست 4 ٹیمیں ہیں جو ممکنہ طور پر سیمی فائنل میں شامل ہونے کے لیے فیورٹ ہیں۔ تاہم یہاں سری لنکا کی ٹیم بھی 4 پوائنٹس کے ساتھ اس دوڑ میں شامل ہے، لیکن آخری 4 ٹیموں کا فیصلہ تمام گروپ میچز کے بعد ہی سامنے آسکتا ہے۔ ادھر قومی ٹیم کے کپتان سرفراز احمد نے بھی سیمی فائنل میں پہنچنے کی امید نہیں چھوڑی جبکہ اس حوالے سے کہا کہ ہمارے لیے ورلڈکپ ابھی ختم نہیں ہوا، ہم جانتے ہیں کہ یہ بہت مشکل ہے، ہمیں بغیر غلطی کیے اپنے تمام میچز جیتنے ہیں۔ خیال رہے کہ پاکستان کا اپنے باقی 4 میچز میں نیوزی لینڈ، جنوبی افریقہ، بنگلہ دیش اور افغانستان سے مقابلہ ہے۔ پاک بھارت میچ سے متعلق بات کرتے ہوئے سرفراز احمد کا کہنا تھا کہ یہ درست ہے کہ ہم ورلڈکپ میں بھارت کے خلاف میچ نہیں جیت رہے، تاہم یہ ایک اسپیشل میچ ہے، جہاں جو ٹیم دباؤ برداشت کرتی ہے وہ کامیابی حاصل کر لیتی ہے، بھارت نے آج اور گزشتہ تمام میچز میں دباؤ کو ہی برداشت کیا اور کامیابی حاصل کی۔ سرفراز احمد نے شکست کی ذمہ داری بیٹنگ لائن پر ڈال دی اور کہا کہ بابر اعظم اور فخر زمان نے اچھا کھیلا، تاہم بد قسمتی سے ٹیم نے یکے بعد دیگر وکٹیں گنوا کر میچ ہاتھ سے نکال دیا۔ خیال رہے کہ بھارت کے خلاف میچ میں پاکستانی ٹیم 117 پر ایک وکٹ کے نقصان سے 129 پر 5 وکٹوں سے محروم ہوگئی تھی۔ اس دوران بابر اعظم ، فخر زمان، محمد حفیظ اور شعیب ملک آؤٹ ہوئے تھے۔ یاد رہے کہ پاکستان کو ورلڈکپ میں اپنے پہلے میچ میں ویسٹ انڈیز کے ہاتھوں شکست کا سامنا کرنا پڑا تھا، جبکہ دوسرے میچ میں اس نے فوریٹ انگلینڈ کو شکست دی، سری لنکا کے خلاف تیسرا میچ بارش کی نذر ہوا لیکن اس کے بعد آسٹریلیا سے شکست کا سامنا کرنا پڑا تھا۔

کراچی: ملک میں جاری معاشی بحران کے باعث روپے کی بے قدری کا سلسلہ جاری ہے اور انٹر بینک میں ڈالر 157 روپے کے قریب پہنچ گیا ہے۔

ژرائع کے مطابق ڈالر کے مقابلے میں روپے کی قدر میں مسلسل کمی کا سلسلہ جاری ہے اور ہر روز ڈالر ملکی تاریخ کی نبئی سطح پر پہنچ رہا ہے۔

پیر کے روز بھی ڈالر کی اونچی اڑان کا سلسلہ جاری رہا اور انٹر بینک میں ڈالر کی قدر میں ایک روپے 12 پیسے کا اضافہ دیکھا گیا ہے، جس کے بعد ڈالر ملک تاریخ کی نئی بلند ترین سطح 156 روپے 96 پیسے کی سطح پر ٹریڈ کررہا ہے۔

واضح رہے کہ گزشتہ چند ماہ کے دوران اب تک ڈالر کی قدت میں 20 روہے تک کا اضافہ ہوچکا ہے۔