انٹربینک میں ڈالر تاریخ کی بلند ترین سطح پر پہنچ گیا جب کہ اوپن مارکیٹ میں بھی اس کی قدر میں اضافہ ہوا ہے۔

جمعرات کو کاروبار کے آغاز پر انٹربینک میں ڈالر کے مقابلے میں روپیہ ایک بار پھر کمزور ہوگیا اور روپے کے مقابلے میں ڈالر کی قیمت میں اضافہ ہوگیا جس سے ڈالر 151.90 روپے کا ہوگیا۔

کاروبار کے دوران ڈالر کی قدر مزید مستحکم ہوگئی اور اس میں 54 پیسے کا اضافہ ہوگیا جس سے ڈالر 152.10 روپے کا ہوکر تاریخ کی بلند ترین سطح پر پہنچ گیا۔

انٹر بینک میں کاروبار کے اختتام پر ڈالر تاریخ کی بلند ترین سطح پر رہا اور اس کی قیمت میں 1.33 روپے اضافہ ہوا جس سے ڈالر 152.90 پر بند ہوا۔

انٹربینک میں ڈالر کی قدر میں اضافے کے بعد اوپن مارکیٹ میں بھی اس کی قیمت میں اضافہ ہوگیا اور ڈالر 153.50 روپے کا ہوگیا ہے۔

عید کے بعد اوپن مارکیٹ میں ڈالر کی قدر میں 4.20 روپے کا اضافہ ہوا ہے۔

کراچی: بحیرہ عرب میں بننے والا سمندری طوفان 'وایو' کراچی کی جانب بڑھ رہا ہے جب کہ محکمہ موسمیات نے ماہی گیروں کو گہرے سمندر میں نہ جانے کی تاکید کی ہے۔

ڈائریکٹر محکمہ موسمیات سردار سرفراز  کے مطابق سمندری طوفان 'وایو'  کراچی سے 540 کلو میٹر دور جنوب اور جنوب مشرق میں موجود ہے جو شمال اور شمال مغرب کی جانب بڑھ رہا ہے۔

ڈائریکٹر محکمہ موسمیات کا کہنا ہے کہ طوفان 'وایو' کے باعث سمندری ہوائیں معطل ہوگئی ہیں اور درجہ حرارت کی شدت 47 سے 50 کے درمیان محسوس کی جاسکتی ہے۔

جبکہ آج دوپہر اور شام کے اوقات میں کراچی میں مٹی کا طوفان بھی آسکتا ہے تاہم بارش کے امکانات کم ہیں جب کہ ٹھٹھہ، بدین اور تھرپارکر ڈسٹرکٹ میں تیز بارش کے امکانات میں بھی کمی واقع ہوچکی ہے۔

طوفان کے باعث محکمہ موسمیات نے ماہی گیروں کو جمعہ کی شام تک  گہرے سمندر میں نہ جانے کی بھی ہدایت کی ہے۔

دوسری جانب طوفان 'وایو' کے بھارتی ریاست گجرات کے ساحلی علاقوں سے ٹکرانے کا خدشہ موجود تھا تاہم بھارتی محکمہ موسمیات کا کہنا ہے کہ طوفان کی تباہ کاریوں کا خطرہ ٹل چکا ہے۔

مانچسٹر: روایتی حریف پاکستان اور بھارت کا ورلڈکپ میں 16 جون کو ہونے والا میچ بارش سے متاثر ہونے کا خدشہ ہے۔

مانچسٹر کے اولڈ ٹریفورڈ اسٹیڈیم میں 16 جون بروز اتوار کو پاکستان اور بھارت کی ٹیمیں آمنے سامنے ہوں گی جس کے لیے کرکٹ شائقین کو بے صبری سے انتظار ہے۔

پاکستان اور بھارت کا میچ دیکھنے کے لیے دنیا بھر سے شائقین کی مانچسٹر آمد متوقع ہے اور ٹکٹ چار گُنا اضافی قیمتوں میں فروخت ہو رہا ہے۔

اس وقت مانچسٹر میں بارشوں کا سلسلہ جاری ہے اور برطانوی محکمہ موسمیات نے 16 جون کو بارش کی پیشگوئی کی ہے۔

برطانوی محکمہ موسمیات کے مطابق 16 جون اتوار کو مانچسٹر میں صبح 10 بجے سے بارش کے 50 فیصد امکان ہیں۔

اسلام  آباد: سپریم کورٹ نے ڈیمز فنڈ میں موجود رقم کی سرمایہ کاری کا فیصلہ کیا ہے۔

سپریم کورٹ نے ڈیمز فنڈ میں موجود رقم کی سرمایہ کاری کا فیصلہ کیا ہے، عدالت نے اسٹیٹ بنک کو فنڈ میں موجود 10 ارب 60 کروڑ روپے نیشنل بنک کو منتقل کرنے کا حکم دیا ہے۔ عدالت کے مطابق 19 جون کو ٹی بلز کی نئی بولی کے بعد منافع کی شرح کا اعلان ہوگا، نیشنل بنک سپریم کورٹ کی جانب سے بولی میں حصہ لے گا جب کہ طے شدہ شرح منافع پر ڈیمز فنڈ کی ٹی بلز میں 3 ماہ کے لیے سرمایہ کاری ہوگی۔

واضح رہے کہ سپریم کورٹ کی جانب سے حکم جاری ہونے کے بعد وفاقی حکومت نے دو ڈیمز دیامیربھاشا اورمہمند کی تعمیرکے لیے فنڈز قائم کیے تھے جس میں پاک فوج، سرکاری ملازمین، قومی کھلاڑیوں، اداکاروں اور سماجی شخصیات سمیت عام افراد نے پیسے جمع کرائے تھے۔

کراچی : سر سید یونیورسٹی آف انجینئرنگ اینڈ ٹیکنالوجی میں عیدملن پارٹی کاانعقاد کیا جارہاہے۔

تفصیلات کے مطابق علیگڑھ مسلم یونیورسٹی اولڈ بوائز ایسوسی ایشن کے زیر اہتمام بروز ہفتہ 15 جون تقریبِ عید ملن کا انعقاد کیا جارہا ہے

اس تقریب کی اہم خصوصیت شعرو شاعری کی محفل ہے جس میں ملک کے نامور شعراء اپنا کلام پیش کریں گے ۔