پاکستانی آل رائونڈر وہاب ریاض نے نویں نمبر پر 45رنز بناکر سابق کرکٹر عبدالقادر کا ملکی ریکارڈ توڑدیا۔

سابق کرکٹر عبدالقادر ٹیم میں نویں پوزیشن پر 41 رنز بناکر سب سے کامیاب پاکستانی پلیئر تھے، انھوں نے یہ کارنامہ 1983 ورلڈ کپ میں نیوزی لینڈ کیخلاف برمنگھم میں انجام دیا تھا تاہم اب نویں نمبر پر سب سے زیادہ رنز بنانے کا ریکارڈ وہاب کے نام ہوگیا۔

ورلڈ کپ 2019 میں پاکستانی اسکواڈ میں بڑی مشکل سے جگہ بنانے والے محمد عامر نے شاندار کم بیک کرتے ہوئے سب اندازے غلط ثابت کردیے۔

محمد عامر نے آسٹریلیا کیخلاف میچ میں کیریئر کی بہترین بولنگ کرتے ہوئے 30رنز کے بدلے میں 5شکار کیے، اس سے قبل پیسر نے 28رنز کے عوض4 وکٹیں حاصل کی تھیں۔

محمد عامر 10وکٹوں کیساتھ میگا ایونٹ کے پرفارمرز میں سرفہرست آگئے ہیں۔

قومی کپتان سرفراز احمد کا کہنا ہے کہ آسٹریلیا کیخلاف زیادہ غلطیوں کی وجہ سے فتح نہیں مل سکی۔

انھوں نے مزید کہا کہ ہماری ٹیم نے ابتدائی 20 اوورز میں آسٹریلیا کو بہت زیادہ رنز بنانے کا موقع دے دیا، عامر کے علاوہ دیگر بولرز کی پرفارمنس اچھی نہیں رہی، اس وکٹ پر 270 اور 280 بہت تھے، اگرہم جیتنا چاہتے تو ہمارے ٹاپ فور بیٹسمینوں کو رنز کرنا ہوں گے، امام نے ففٹی بنائی، بابر اعظم بھی 30 رنز بناپائے، تاہم اب اتوار کو بھارت سے ہمارا اگلا میچ ہے اور ہم اپنی بھرپور کوشش کریں گے۔

دوسری جانب فاتح کپتان آرون فنچ نے کہا کہ گرین شرٹس فتح کے قریب پہنچے، حسن اور وہاب جیسے پلیئرز کیخلاف ہمیشہ مشکل ہوتی ہے جبکہ وہ ردھم میں تھے، ہمارے لیے انھیں روکنا مشکل ہورہا تھا، ہم نے اپنی بہترین بولنگ کی۔

انھوں نے مزید کہا کہ ہم پورے 50 اوورز نہیں کھیل پائے، اس پر ہمیں مایوسی ہے، ہم اپنے حساب سے 20 سے 30 رنز پیچھے رہے، بہرحال پاکستان کیخلاف کامیابی سے ہمیں دو قیمتی پوائنٹس مل گئے

سابق کرکٹرز نے قومی ٹیم کوکینگروزکیخلاف جارحانہ اندازاپنانے کا مشورہ دیدیا۔

میڈیا سے گفتگو میں سابق ٹیسٹ کرکٹرعبدالقادرکا کہنا تھا کہ قومی ٹیم نے انگلینڈ کیخلاف مثبت کرکٹ کھیلی، کینگروزکوقابوکرنے کے لیے بھی جارحانہ انداز اپنانا ہوگا۔ میچ میں قومی ٹیم کو کوئی تبدیلی نہیں کرنی چاہیے اور مثبت ذہن کے ساتھ میدان میں اترنا چاہیے۔

عبد القادر کا کہنا تھا کہ قومی ٹیم ورلڈکپ کھیل رہی ہے اور سب کو اس کی سپورٹ کرنی چاہیے، سابق اسپنر نے ورلڈکپ کے اہم میچز بارش کی نذر ہونے کو آئی سی سی کی ناقص حکمت عملی کا شاخسانہ قرار دیتے ہوئے کہا کہ اس معاملے سے نبٹنے کے لیے آئی سی سی کوغور و فکر کرنا ہوگا۔

سابق کرکٹر الیاس کا کہنا تھا کہ آسٹریلیا کے خلاف میچ کے لیے قومی ٹیم میں کوئی تبدیلی نہ کی جائے اورانگلینڈ کیخلاف میچ والا بیٹنگ آرڈر برقراررکھا جائے۔ان کا کہنا تھا کہ حفیظ اور بابراعظم کو پاکستان کی کامیابی میں اہم کردارادا کریں گے، بولرز کو اضافی رنز دینے سے گریز کرتے ہوئے اپنی فیلڈنگ کے مطابق گیندیں کرنا ہونگی ۔

ٹاؤنٹن: پاکستان اور آسٹریلیا کے درمیان کرکٹ ورلڈ کپ کا اہم میچ آج ٹاؤنٹن میں کھیلا جائے گا۔

کرکٹ ورلڈکپ کے سنسنی خیز مقابلوں کا سلسلہ جاری ہے تاہم بارش کے باعث میچز منسوخ ہونے کی وجہ سے شائقین کرکٹ کو مایوسی کا سامنا کرنا پڑا ہے، اب تک ایونٹ میں 3 میچز بارش کی وجہ سے منسوخ ہوچکے ہیں جس میں سے ایک میچ پاکستان اور سری لنکا کے درمیان کھیلا جانا تھا۔

آج ورلڈ کپ ایونٹ کا ایک اور انتہائی اہم میچ پاکستان اور آسٹریلیا کے درمیان ٹاؤنٹن میں کھیلا جائے گا تاہم محکمہ موسمیات کی جانب سے میچ کے دوران ایک بار پھر بارش کی پیش گوئی کی گئی ہے۔ میچ پاکستانی وقت کے مطابق دوپہر 2:30 بجے شروع ہوگا۔

آسٹریلیا نے پہلے میچ میں افغانستان اور دوسرے میچ میں ویسٹ انڈیز کو شکست دی تھی تاہم تیسرے میچ میں بھارت کے ہاتھوں کینگروز کو شکست کا سامنا کرنا پڑا تھا۔

اسلام آباد: میگا منی لانڈرنگ کیس میں آصف زرداری اور فریال تالپور کی درخواست پر سماعت جاری ہے۔

اسلام آباد ہائیکورٹ میں جسٹس عامر فاروق اور جسٹس محسن کیانی میگا منی لانڈرنگ کیس کی سماعت کر رہے ہیں۔ نیب پراسیکیوٹر جہانزیب بھروانہ نے دلائل دیتے ہوئے کہا صرف 20 منٹ دلائل دوں گا، جس پر عدالت نے ریمارکس دیئے کہ آپ تو دلائل دے چکے، یہ ضمانت ہے، سزا کیخلاف اپیل نہیں۔

نیب پراسیکیوٹر نے کہا کیس کی ایف آئی آر میں 29 اکاؤنٹس ٹریس ہوئے، میگا منی لانڈرنگ کیس میں ساڑھے 4 ارب کی ٹرانزیکشن ہوئی، اے ون انٹرنیشنل، عمیر ایسوسی ایٹس سے اربوں کی ٹرانزیکشن ہوئی، اکاؤنٹس کیساتھ زرداری گروپ اور پارتھینون کمپنیوں کی ٹرانزیکشن ہوئی، یہ 29 میں سے صرف ایک اکاؤنٹ کی تفصیل ہے، دیگر 28 اکاؤنٹس کی تفتیش جاری ہے۔

ادھر نیب کی خصوصی ٹیم بھی اسلام آباد ہائی کورٹ میں موجود ہے، نیب نے آصف زرداری کی ضمانت منسوخی پر گرفتاری کے حوالے سے اپنی تیاری مکمل کر لی، آصف زرداری کی ضمانت منسوخ ہونے کی صورت میں نیب ٹیم سابق صدر کو اپنی حراست میں لے گی۔

یاد رہے سابق صدر آصف علی زرداری اور فریال تالپور کو مستقل ضمانت ملنے یا نہ ملنے کے بارے میں فیصلہ ہوگا، عدالت نے نیب سے منی لانڈرنگ کے الزامات کا مکمل ریکارڈ طلب کر رکھا ہے۔