ایمزٹی وی (اسپورٹس) ایشین ہاکی فیڈریشن پاکستان اور بھارت کی ٹیموں کے درمیان ہاکی میچز نیوٹرل مقام پر کرانے کیلیے میدان میں آ گئی۔ پاکستان اور بھارت کے درمیان جب بھی حالات کشیدہ ہوتے ہیں تو دوسرے شعبوں کی طرح اس کا منفی اثر دونوں ملکوں کے کھیلوں پر بھی پڑتا ہے، پی ایچ ایف کی بھرپورکوششوں کے باوجود گزشتہ ایک عشرہ سے دونوں ملکوں کے درمیان ہوم اینڈ اوے کی بنیاد پر ہاکی سیریز طے نہیں ہو سکی ہے۔

ایشین ہاکی فیڈریشن بھی سمجھتی ہے کہ موجودہ حالات میں دونوں ٹیموں کے درمیان ہاکی مقابلے پاکستان یا بھارت میں ہونے کا امکان کم ہی ہے اس لیے حکام نے روایتی حریفوں کے درمیان مقابلے بنگلادیش کے دارالحکومت ڈھاکا میں کروانے کی آپشن پرغور شروع کر دیا ہے۔ ڈھاکا میں ایشیا کپ کے حوالے سے ہونے والی پریس کانفرنس سے خطاب کرتے ہوئے ایشین ہاکی فیڈریشن کے چیف ایگزیکٹیو آفیسر طیب اکرام کا کہنا ہے کہ ہماری تنظیم روایتی حریفوں کے درمیان مقابلے ڈھاکا میں کروانے کے آپشن پر غورکررہی ہے

ان کا کہنا تھا کہ جب میں نے ایشین ہاکی فیڈریشن کے چیف ایگزیکٹیو آفیسر کا چارج سنبھالا تو میرا مقصد ایشیا کپ کو دوبارہ ڈھاکا میں واپس لانا تھا اور مجھے خوشی ہے کہ بنگلادیش طویل عرصہ کے بعد ایشیائی ایونٹ کی میزبانی کر رہا ہے. بنگلادیش اس وقت عالمی رینکنگ میں 278 پوائنٹس کیساتھ 34ویں نمبر پر ہے۔ بنگلادیش کی ٹیم اب تک کھیلے گئے ایشیا کپ کے 9 ایڈیشنز میں ایک بار پھر سیمی فائنل تک رسائی حاصل کرنے میں کامیاب نہیں رہی تاہم ایشین ہاکی فیڈریشن کے چیف ایگزیکٹیو آفیسر کو امید ہے کہ بنگال ٹائیگرز دنیا کی ٹاپ ٹیموں میں آنے کی بھر پور صلاحیت رکھتی ہے۔

ان کا کہنا ہے کہ بنگال ٹائیگرزمیں دنیا کی ٹاپ ٹیم بننے کے تمام لوازمات موجود ہیں اور بنگال ٹائیگرز نے اسی طرح محنت کا سلسلہ جاری رکھا تو وہ بڑی ٹیموں میں جگہ بنانے میں کامیاب ہو جائے گی۔

ایمز ٹی وی (تعلیم/کراچی)وفاقی اردو یونیورسٹی کے شعبہ امتحانات کے مطابق کراچی اسلام آباد اور راولاکوٹ میں ہونے والے بی اے( سال اول) پرائیویٹ سالانہ امتحانات2015منعقدہ امتحانات دسمبر2016کے نتائج کا اعلان کردیا گیا ہے۔ کراچی میں ہونے والے امتحان میں630طلباء رجسٹرہوئے جن میں 582طلباء نے امتحانات میں شرکت کی اور 134طلباء کامیاب قرار پائےجبکہ مجموعی رزلٹ فیصد23.02رہا۔ وفاقی اردو یونیورسٹی کے رجسٹرار ڈاکٹر محمد صارم کے مطابق بی اے، بی کام ، ایم اے اور مدارس(پرائیویٹ) کے خصوصی امتحانات کی رجسٹریشن برائے 2016 کی تاریخ میں1ہزار روپے لیٹ فیس (کُل فیس 4200) کے ساتھ 24 اگست2017 تک توسیع کردی گئی ہے۔

رجسٹریشن فارم آن لائن جامعہ اُردو کی ویب سائٹ پر دستیاب ہیں

ایمزٹی وی (اسپورٹس) پاکستان سپر لیگ کی نئی فرنچائز ملتان سلطانز میں وسیم اکرم اور وقار یونس کی جوڑی بننے سے پہلے ہی ٹوٹ گئی۔ وسیم اکرم اور وقار یونس کو اپنے کھیلنے کے دور میں دنیا کی خطرناک ترین فاسٹ بولنگ جوڑی قرار دیا جاتا تھا، یہ پاکستان سپر لیگ کی نئی فرنچائز ملتان سلطانز میں یکجا ہونے جارہی تھی جہاں پر وسیم کو پہلے ہی ڈائریکٹر کرکٹ آپریشنز مقرر کیا جاچکا ہے

وقار یونس سے ہیڈ کوچ کی ذمہ داری کے لیے بات چیت جاری تھی جوکسی نتیجے پر پہنچے بغیر ختم ہوچکی، یہ بات ان شائقین کے لیے حیران کن نہیں جو ان دونوں کو ماضی کے دنوں سے جانتے ہیں، تب بھی ہمیشہ ہی وسیم اکرم اور وقار یونس میں مقابلہ رہا اور ان کے تعلقات کشیدہ رہے تھے۔ وقار یونس نے ویب سائٹ ’کرک انفو‘ سے بات چیت میں کہا کہ میری بات چیت ہوئی مگر کسی حتمی معاہدے پر نہیں پہنچ پائے، ملتان سلطانز کے مالکان اچھے لوگ ہیں، مجھے ان کی جانب سے ملنے والی آفر پر خوشی ہوئی تھی، میں وہاں پر وسیم اکرم کے ساتھ دوبارہ مل کر کام کرسکتا تھا

اگر ہم دونوں ایک ہی ٹیم کے لیے ایک ہی مقصد کی خاطر کام کرتے تو اچھا ہوتا، میں وسیم بھائی کے اپنی ٹیم تیار کرنے سے متعلق پلان کی کامیابی کے لیے دعاگو ہوں۔ وقار یونس کی ایک رات قبل ایک نجی ٹی وی سے بات چیت سے بھی صاف محسوس ہوا کہ انھیں اصل مسئلہ ہی وسیم اکرم سے ہے، ان کا کہنا تھاکہ ’وسیم بھائی جو ٹیم چاہتے ہیں وہ بنائیں گے اور ممکنہ طور پر میں ان کے پلان کی راہ میں نہیں آؤں گا، ویسے بھی میں ان کے پلان میں کبھی شامل ہی نہیں تھا‘۔ انہوں نے مزید کہاکہ میں ہمیشہ سے ہی ملتان کا حصہ بننا چاہتا تھا کیونکہ میرا تعلق جنوبی پنجاب سے ہی ہے، اس فرنچائز کا حصہ نہ بن پانا میرے لیے مایوس کن ہے۔