ایمزٹی وی(ریاض) حج 2017ءکے لئے سعودی عرب جانے والے عازمین میں سے 22 پاکستانی عازمین مکہ مکرمہ میں وفات پاگئے۔ فوت ہونے والوں کو جنت البقیع میں دفن کردیا گیا ہے۔ وزارت مذہبی امور کے مطابق سرکاری و نجی سکیم کے تحت اب تک مجموعی طور پر ایک لاکھ 33 ہزار 868 عازمین حج مکہ مکرمہ پہنچ گئے ہیں۔
سرکاری اسکیم کے تحت 88ہزار 705 جبکہ پرائیویٹ سکیم کے تحت 45 ہزار 163 عازمین مکہ مکرمہ پہنچے ہیں۔ وزارت مذہبی امور کے ترجمان کا کہنا تھا کہ مقامی اور پاکستان سے آئے ہوئے معاونین عازمین کی رہنمائی کررہے ہیں۔ 1256 عازمین کا گمشدہ سامان ڈھونڈ کر ان کے حوالے کردیا گیا ہے۔ بیان کے مطابق راستہ بھول جانے والے 18 عازمین حج کو ان کی اقامت گاہ تک پہنچایا گیا۔ حرم گائیڈز نے 9285 عازمین کی رہنمائی کی۔
ترجمان کا کہنا تھا کہ ہیلپ لائن 623 شکایت میں سے 446 کا ازالہ کردایگ یا، پاکستان حج میڈیکل مشن سے 72711 عازمین نے استفادہ کیا ہے۔ اسی طرح 16مریض حج میڈیکل مشن کے ہسپتال میں داخل کئے گئے۔ اب تک 22عازمین حج کی طبعی اموات ہوچکی ہیں ان عازمین حج کو جنت البقیع اور جنت المعلی میں سپرد خاک کیا گیا ہے۔
ایمز ٹی وی(کراچی)کراچی کے مختلف علاقوں میں دوسرے روز بھی ہلکی تیز بارش کا سلسلہ جاری ہے۔کراچی میں رات گئے گرج چمک اور تیز ہواؤں کے ساتھ بارش ہوئی جس کے دوران مختلف واقعات میں خواتین سمیت 5 افراد جاں بحق ہوئے۔تیز ہواؤں کے باعث طوفانی بارش سے کورنگی اور لانڈھی سمیت مضافاتی علاقوں میں گھروں کی چھتیں اُڑ گئیں۔
شہر قائد میں سہ پہر شروع ہونے والی ہلکی بارش رات گئے طوفانی ہوگئی، پہلے گرد آلود تیز آندھی چلی اور پھر اچانک موسلا دھار بارش نے لانڈھی، کورنگی، ملیر ہالٹ، گلستان جوہر، گلشن اقبال، فیڈرل بی ایریا، نیو کراچی، نارتھ کراچی، نارتھ ناظم آباد، ناظم آباد، لیاقت آباد، مارٹن کوارٹرز، جہانگیر روڈ، جمشید روڈ،لسبیلہ، نشتر روڈ، گارڈن، گرومندر، نمائش، صدر، لیاری، کورنگی، کھارا دار، میٹھا در سمیت شہر کے بیشتر علاقوں میں جل تھل کر دیا۔ شارع فیصل، ایم اے جناح روڈ اور دیگر اہم شاہراہوں پر بارش کی وجہ سے ٹریفک کا نظام درہم برہم ہوگیا، کئی گاڑیاں اور موٹر سائیکلیں خراب ہوگئیں اور شہریوں کو شدید مشکلات کا سامنا کرنا پڑا۔
شہر میں بارش کا پانی مختلف سڑکوں پر جمع ہونے کے باعث جگہ جگہ ٹریفک کی روانی متاثر ہوئی جب کہ کئی علاقوں میں ٹریفک بھی جام ہوگیا۔ پی ایم ٹیز پھٹنے اور دیگر فنی خرابیوں کے باعث شہر کے کئی علاقوں میں بجلی کی فراہمی بھی معطل ہوگئی۔ ڈائریکٹرمحکمہ موسمیات کے مطابق کراچی میں بارش کا یہ سلسلہ کل تک جاری رہنے کا امکان ہے اور اس دوران شہر بھر میں کہیں ہلکی اور کہیں تیز بارش ہوسکتی ہے
ایمز ٹی وی (تعلیم)جامعہ کراچی کےقائم مقام رجسٹرار ڈاکٹر منور رشید کے اعلامیے کے مطابق جامعہ کراچی کے زیر اہتمام جامعہ کے طلبہ واساتذہ کیلئے ایک پروگرام بعنوان ’’کرپشن سے جنگ میں نوجوانوں کا کردار‘‘ بروز جمعہ 25؍ اگست2017ء کو صبح 10؍ بجے کلیہ نظمیات وانصرام میں منعقد ہوگا۔ ڈائریکٹر نیب کراچی کلیدی خطاب کریں گے۔
ایمزٹی وی (کراچی)10خطرناک دہشت گردوں کے سروں کی قیمت 5 کروڑ روپے رکھنے کا فیصلہ کیا گیا ہےتفصیلات کے مطابق رینجرز نے محکمہ داخلہ کو خط لکھا ہے جس میں تفصیلات کی استدعا کی گئی ہے۔ملزمان میں کالعدم جنداللہ کے سابقہ کمانڈر اور کالعدم تحریک طالبان سوات گروپ کے اہم کارندے منصور احمد عرف بلال کا نام بھی شامل ہے ، جس کے سر کی قیمت 1 کروڑ روپے مقرر کرنے کا فیصلہ کیا گیا ہے۔
منصور احمد 2005 میں کالعدم القاعدہ سے بھی وابستہ رہ چکا ہے۔ اس کے خلاف دہشت گردی کے چار مقدمات درج ہیں۔ خط میں رواں سال اردو بازار میں رینجرز سے مقابلے میں ہلاک ہونے والے دہشت گرد زاہد آفریدی کے بھائی رفیق عرف حبیب اللہ کا نام بھی شامل ہے۔ اس کے سر کی قیمت 50 لاکھ روپے مقرر کرنے کی سفارش کی گئی ہے۔
اردو بازار مقابلے کے دوران فرار ہونے والے مطلوب دہشت گرد اور 2009 میں کراچی میں تخریب کاری کے لیے جنداللہ میں شامل ہونے والے کالعدم تحریک طالبان سوات کے سابق کمانڈر فضل غنی کے سر کی قیمت 30 لاکھ روپے مقرر کرنے کی سفارش کی گئی ہے۔ کراچی میں ملٹری پولیس کے اہلکاروں کے قتل اور خالد خراسانی اور مولوی فضل اللہ کے قریبی ساتھی نیز کالعدم لشکر جھنگوی العالمی کے موجودہ امیر سید صفدر عرف یوسف کے سر کی قیمت 50 لاکھ روپے مقرر کرنے کی سفارش کی گئی ہے۔
1999 میں کالعدم لشکر جھنگوی میں شامل ہونے والے دیدار حسین سے متعلق خط میں بتایا گیا ہے کہ یہ کراچی کے ضلع شرقی میں کالعدم تنظیم کی ٹارگٹ کلنگ ٹیم کا سربراہ ہے اور اس کے سر کی قیمت 50 لاکھ روپے مقرر کی جائے۔ کالعدم لشکر جھنگوی کے محمد جعفر کو پولیس، بحریہ اور کسٹم کے اہلکاروں اور افسران کے قتل میں مطلوب قرار دیتے ہوئے اس کے سر کی قیمت 50 لاکھ روپے مقرر کرنے کی سفارش کی گئی ہے۔ اس کے خلاف 24 مقدمات درج ہیں۔ کالعدم لشکر جھنگوی نعیم بخاری گروپ کے ٹارگٹ کلر سمیع اللہ کے سر کی قیمت 50 لاکھ روپے مقرر کرنے کی سفارش کی گئی ہے۔
کالعدم القاعدہ بر صغیر کے محمد اکبر عرف اکاشہ کے سر کی قیمت بھی 50 لاکھ روپے مقرر کرنے کی سفارش کی گئی ہے۔ملزم بے نظیر بھٹو کے قافلے پر کار ساز بم دھماکے میں بھی ملوث بتایا گیا ہے۔ خط میں القاعدہ برصغیر کے عبداللہ بلوچ کے سر کی قیمت بھی 50 لاکھ روپے مقرر کرنے کی سفارش کی گئی ہے۔ ملزم 2012 میں لیاری میں فٹ بال میچ کے دوران بم دھماکا کرنے اور بحریہ کے لیفٹیننٹ کمانڈر عظیم حسین، کیپٹن ندیم احمد، پروفیسر شکیل اوج اور پروفیسر وحید الرحمن کے قتل میں بھی ملوث بتایا گیا ہے۔
جنداللہ کے خان بادشاہ کے سر کی قیمت 30 لاکھ روپے مقرر کرنے کی سفارش کی گئی ہے۔ مذکورہ دہشت گرد سی ٹی ڈی کی ریڈ بک میں بھی نامزد ہے۔ رینجرز نے خط میں سندھ پولیس سے استفسار کیا ہے کہ ان دہشت گردوں کے سروں کی کتنی قیمت مقرر کی گئی ہے اور اگر اب تک ایسا نہیں کیا گیا تو کیوں نہیں کیا گیا۔ رینجرز نے محکمہ داخلہ سے کہا ہے کہ پولیس سے پوچھے کہ ان دہشت گردوں کی گرفتاری کے لیے اب تک کیا کوششیں کی گئی ہیں۔ اور یہ بھی پوچھا جائے کہ سندھ پولیس نے ان کی گرفتاری اور کرمنل ریکارڈ یکجا کرنے کے لیے اب تک کیا اقدامات کیے ہیں۔
ایمزٹی وی (تجارت)پاکستان اسٹاک ایکسچینج میں کاروباری ہفتے کے دوسرے روز بھی مندی کا رجحان ہے ۔گزشتہ ہفتے بھی پاکستان اسٹاک ایکسچینج میں مندی کا رجحان رہا اور 100انڈیکس اتار چڑھاﺅ کے بعد کئی سو پوائنٹس نیچے آتا رہاجس سے سرمایہ کاروں کو شدید نقصان ہو رہا ہے ۔
منگل کے روز پاکستان اسٹاک ایکسچینج میں کاروبار کے آغا ز میں ہی منفی رجحان رہا اور 100انڈیکس 925پوائنٹس کی کمی کے بعد41227کی سطح پر آگیا۔پاکستان اسٹاک ایکسچینج کے 100انڈیکس میں1کروڑ 57لاکھ 49ہزار 660 شیئرز کا لین دین ہوچکا ہے جن کی مارکیٹنگ ویلیو 5ارب35کروڑ 81ہزار 424 روپے ہے ۔واضح رہے کہ گزشتہ تین ماہ سے ملک میں جاری سیاسی صورتحال میں عدم استحکام کا پاکستان اسٹاک ایکسچینج پر براہ راس اثر پڑ رہا ہے اور اس عرصے کے دوران100 انڈیکس میں 10 ہزار سے زائد پوائنٹس کی کمی ریکارڈ کی گئی ہے ۔
ایمزٹی وی (کراچی)پاکستان میں ذی الحج کا چاند دیکھنے کے لئے مرکزی رویت ہلال کمیٹی کا اجلاس آج ہو گا۔
ذی الحج کا چاند دیکھنے کے لئے رویت ہلال کمیٹی کا اجلاس کراچی میں محکمہ موسمیات کے دفتر میں ہو گا جس کی صدارت چیرمین رویت ہلال کمیٹی مفتی منیب الرحمان کریں گے۔ اس کے علاوہ زونل کمیٹیوں کے اجلاس بھی مقامی سطح پر منعقد ہوں گے۔
ماہرین فلکیات کے مطابق کراچی میں آج ذی الحج کا چاند نظر آنے کے بہت کم امکانات ہیں اور امکان ہے کہ یکم ذی الحج 24 اگست کو ہو گی جب کہ عید الاضحیٰ 2 ستمبر کو ہو گی۔
ایمزٹی وی(راولپنڈی)ڈی جی آئی ایس پی آر میجر جنرل آصف غفور نے کہا ہے کہ ارفع کریم ٹاور کے قریب ہونے والے دھماکے کے اصل ہدف وزیر اعلیٰ پنجاب تھے جنہوں نے اس دن سبزی منڈی کے قریب تجاوزات کے خلاف آپریشن کے مقام کا دورہ کرنا تھا لیکن عین موقع پر دہشت گردوں نے پولیس اہلکاروں کو نشانہ بنایا ، اس دہشت گردانہ حملے کے تمام افراد کو ماسٹر مائنڈ سمیت گرفتا ر کر لیا ہے۔
راولپنڈی میں میڈیا بریفنگ کے دوران ڈی جی آئی ایس پی آر میجر جنرل آصف غفور نے کہا ہے کہ ارفع کریم ٹاور کے قریب ہونے والے بم دھماکے کی پہلے سے اطلاع تھی ، اس حملے کا اصل ہدف وزیر اعلیٰ پنجاب تھے جنہوں نے اس مقام کا اسی دن دورہ کرنا تھا لیکن عین موقع پر دہشت گردوں کو پولیس فورس پر حملے کا ٹارگٹ ملا جس کی وجہ سے خود کش حملہ آور نے خود کو پولیس اہلکاروں کے پاس اڑا دیا، اس حملے کے ماسٹر مائنڈسمیت تمام دہشت گردوں کو گرفتار کر لیا ہے ۔ ان دہشت گردوں نے شہر کے باقی حصوں میں بھی دہشت گردی کے منصوبے بنائے ہوئے تھے ۔ سیکورٹی فورسز اس حوالے سے مزید کارروائیاں کر رہی ہے جس کی وجہ سے دہشت گردوں کے نام نہیں بتایاجائے گا۔۔
ایمزٹی وی (اسپورٹس)سپر لیگ کے تیسرے ایڈیشن کے لیے چین کے دو کھلاڑیوں کو بھی ڈرافٹنگ میں شامل کرلیاگیا اور اگلے ایڈیشن میں پشاور زلمی کی طرف سے ایکشن میں نظر آئیں گے ۔
زرائع کے مطابق دونوں کھلاڑیوں کو پشاور زلمی نے چین کی قومی ٹیم سے منتخب کیا ہے اور آئند ماہ دورہ چین میں پشاور زلمی کے مالک جاوید آفریدی کھلاڑیوں سے معاہدوں کو حتمی شکل دیں گے ۔ یہ بھی معلوم ہوا ہے کہ چینی حکام کی جانب سے پاکستان کرکٹ بورڈ حکام کو پیشکش کی گئی ہے کہ وہ متحدہ عرب امارات اور دیگر ممالک کے بجائے چین کو اپنی ہوم سیریز اور انٹرنیشنل میچوں کیلئے نیوٹرل وینیو بنائیں جس سے مذکورہ ملک میں جنٹل مین گیم کے فروغ کے علاوہ اس کی مقبولیت میں بھی اضافہ ہو سکتا ہے ۔
واضح رہے کہ چین میں مردوں اور خواتین کی کرکٹ ٹیمیں بھی بنائی گئی ہیں جو انٹرنیشنل ایونٹس میں حصہ لیتی ہیں تاہم وہ اب تک کوئی بڑی کامیابی سمیٹنے میں کامیاب نہیں ہوسکیں ۔ ماضی میں سابق قومی ٹیسٹ باؤلر راشد خان چین میں کھلاڑیوں کی کوچنگ کرتے رہے ہیں ان کے مطابق وہاں پر یہ کھیل مقبولیت حاصل کر رہا ہے اور آئندہ چند سال میں چین میں کرکٹ کی ترقی کے روشن امکانات ہیں ۔
ایمزٹی وی(راولپنڈی)ترجمان پاک فوج میجر جنرل آصف غفور نے خیبر ایجنسی کی وادی راجگال میں آپریشن خیبر فور کی تکمیل کا اعلان کرتے ہوئے کہا ہے کہ زمینی اہداف حاصل کرلیے۔
جی ایچ کیو راولپنڈی میں میڈیا بریفنگ کے دوران ڈی جی آئی ایس پی آر نے کہا کہ 15 جولائی سے خیبر فور آپریشن کیا تھا جو آج مکمل کر لیا گیا ہے، آپریشن بہت مشکل تھا لیکن اس دوران 253 کلومیٹر کا علاقہ کلیئر کرایا گیا۔
راجگال اور شوال میں ایک ایک دہشت گرد ہمارے نشانے پر تھا اور وہاں زمینی اہداف حاصل کر لئے گئے ہیں، آپریشن کے دوران 52 دہشت گرد ہلاک اور 31 زخمی، جبکہ 4 نے خود کو فورسز کے حوالے کیا، اس دوران 2 سپاہی شہید جب کہ 6 زخمی بھی ہوئے۔ خیبر فور آپریشن کیلیے افغان سیکیورٹی فورسز سے بھی تعاون لیا گیا، آپریشن کے دوران 152 بارودی سرنگیں ناکارہ بنادی گئی ہیں۔ آئی ای ڈی بنانے کے ایک مواد پر میڈ ان انڈیا کا لیبل چسپاں ہے۔
ایمزٹی وی (کراچی) شہر کے مختلف علاقوں میں بارش سے موسم خوشگوار ہوگیا ہے، کہیں ہلکی تو کہیں تیز بارش ہوئی جبکہ محکمہ موسمیات نے مزید دودن بارش جاری رہنے کی پیشن گوئی کردی۔
میڈیا زرائع کے مطابق شدید گرمی اور حبس کے بعد کراچی کے مختلف علاقوں میں بوندا باندی اور بارش نے ایک بار پھر موسم خوشگوار بنا دیا۔ گرمی کے مارے کراچی کے شہری بارش کے بعد سڑکوں پر نکل آئے اور موسم کی یکدم تبدیلی سے لطف اندوز ہورہے ہیں۔
گلشن حدید، ملیر، گلشن اقبال، ائرپورٹ، شارع قائدین، پٹیل پاڑہ اور دیگر علاقوں میں ہونے والی بارش نے عوام کے چہروں پر مسکراہٹ بکھیر دی ہے۔ دوسری جانب بارش کی چند بوندیں گرتے ہی شہر کے 70 فیڈر ٹرپ کرگئے جب کہ مختلف علاقوں میں بجلی کی فراہمی معطل ہوگئی ہے