ایمزٹی وی(اسپورٹس) آئی سی سی چیمپئنز ٹرافی کی فاتح پاکستان کرکٹ ٹیم کے اعزاز میں تقریب کا انعقاد کیا گیا، اسکواڈ میں شامل تمام کھلاڑیوں کو 10,10 لاکھ روپے جب کہ کپتان سرفراز احمد اور فخر زمان کو پلاٹ بھی دیئے گئے۔ بحریہ ٹاؤن میں منعقدہ تقریب میں کپتان سرفراز احمد، فخر زمان، اظہر علی، بابر اعظم، وہاب ریاض، شاداب خان، عماد وسیم، حسن علی، فہیم اشرف، حارث سہیل، احمد شہزاد، چیئرمین ایگزیکٹو کمیٹی نجم سیٹھی، چیف سلیکٹر انضمام الحق، مشتاق احمد اور دیگر آفیشلز نے شرکت کی۔ کپتان اور اسکواڈ میں شریک تمام پلیئرز کو 10,10 لاکھ روپے کے چیک دیئے گئے جب کہ کپتان سرفراز احمد کو 135 گز اور فخر زمان کو کراچی میں ایک کنال کا پلاٹ بھی دیا گیا۔ جنید خان، محمد عامر، محمد حفیظ اور شعیب ملک بیرون ملک ہونے کی وجہ سے تقریب میں شرکت نہ کر سکے، ان کے انعامی چیک پی سی بی کو دیئے گئے۔ نجم سیٹھی، انضمام الحق اور مشتاق احمد کو شیلڈز پیش کیے گئے۔
ایمزٹی وی(اسپورٹس) جنوبی افریقی کپتان فاف ڈو پلیسی نے ورنون فلینڈر کو ٹیم کیلیے نیا جیک کیلس قرار دے دیا۔ فلینڈر نے ساتویں نمبر پر بیٹنگ کرتے ہوئے 54 اور 42 رنز بنانے کے ساتھ دوسری اننگز میں صرف 24 رنز دے کر تین وکٹیں بھی لی تھیں، اس وجہ سے انھیں مین آف دی میچ قرار دیا گیا تھا۔ فاف ڈو پلیسی نے کہا کہ جس طرح فلینڈر نے بیٹنگ کی اس سے اندازہ ہو گیا کہ وہ ہمارے لیے نئے جیک کیلس بن گئے ہیں، وہ ایک شاندار کرکٹر ہیں۔ واضح رہے کہ ان کی شاندار کارکردگی نے پروٹیز کو انگلینڈ پر دوسرے ٹیسٹ میں 340 رنز سے فتح دلائی تھی۔
ایمز ٹی وی (تعلیم) اعلیٰ ثانوی تعلیمی بورڈ نے کاپیاں جانچے جانے کا مرکزی نظام ختم کرکے انٹر کی امتحانی کاپیاں جانچ کے لئے اساتذہ کے گھروں پر بھیجنا شروع کردی ہیں جس کی وجہ سے نتائج غیر شفاف ہونے کے امکانات پیدا ہوگئے ہیں ۔ گھروں پر کاپیاں غیر پیشہ وارانہ طور پر جانچنے کے عمل کی وڈیو وائرل ہوگئی ہے جس میں نظر آتا ہے کہ سیکنڈوں میں پڑھے بغیر کئی امتحانی کاپیاں جانچی جارہی ہیں، واضح رہے کہ سندھ کے تمام تعلیمی بورڈز کی صورتحال انتہائی خراب ہے، کسی بورڈ میں نہ تو مستقل ناظم امتحانات ہے نہ ہی سکریٹری۔جس کی وجہ سے سندھ بھر کے تعلیمی بورڈز کے تحت انٹر اور میٹرک کے امتحانات میں خوب نقل کی گئی پرچے آوٹ ہوتے رہے لیکن کسی کے خلاف کوئی ایکشن نہیں لیا گیا اور کراچی میں تو اتنی صورتحال خراب ہوئی امتحانی پرچے وٹس اپ پر مسلسل آوٹ ہوتے رہے جس کے بعد وزیر اعلیٰ سندھ کو اہم دفتری امور چھوڑ کر امتحانی مراکز کے دورے کرنے پڑے مگر نہ بورڈ میں مستقل ناظم امتحانات کا تقرر ہوا نہ ہی سکریٹری مقرر کیا گیا۔
ایمزٹی وی(اسپورٹس) بھارت کے نئے کوچ روی شاستری کو اپنی پرانی سپورٹ ٹیم واپس مل گئی تاہم بی سی سی آئی کمیٹی اور شاستری میں میٹنگ کے بعد بورڈ نے بھارت ارون کو بولنگ کوچ اور سنجے بنگار کواسسٹنٹ کوچ مقرر کرنے کا اعلان کردیا۔ شاستری جب ٹیم ڈائریکٹر تھے تب بھی یہ دونوں اور فیلڈنگ کوچ سری دھر ان کے ساتھ کام کرتے تھے، اب وہ ایک بار پھر اسی ٹیم کے ساتھ کام کریں گے، بنگر اور ارون کو بھی 2،2 برس کیلیے کوچ مقرر کیا گیا ہے۔ یاد رہے کہ شاستری نے ایڈوائزری کمیٹی کی جانب سے نامزد کیے جانے والے بولنگ کوچ ظہیر خان اور بیٹنگ کنسلٹنٹ راہول ڈریوڈ کو قبول کرنے سے انکار کردیا تھا، جس کے بعد ایک خصوصی کمیٹی تشکیل دی گئی تھی جس نے ان کے تمام مطالبات مان لیے ہیں، شاستری کا ظہیر خان کے بارے میں کہنا تھا کہ ضرورت پڑنے پر بطور کنسلٹنٹ ان کی خدمات بھی لی جائیں گے۔
ایمزٹی وی(اسپورٹس)سابق بھارتی اوپنر وریندر سہواگ نے ہیڈ کوچ کی پوسٹ کیلیے نظر انداز ہونے کے بعد چپ سادھ لی۔ وریندر سہواگ روی شاستری کی انٹری سے قبل ہیڈ کوچ کی ذمہ داری کیلیے مضبوط امیدوار قرار دیے جارہے تھے لیکن بعد میں یہ عہدہ روی شاستری کو دے دیا گیا، جب وریندر سہواگ میڈیا کے سامنے آئے تو ان سے اس بارے میں سوالات کیے گئے تاہم انھوں نے گھما پھرا کر پوچھے جانے والے ان سوالات کا جواب دینے کے بجائے صرف اتنا کہا کہ اگر مجھ سے کوئی سوال کرنا ہے تو صرف ٹی وی پروگرام ’امید انڈیا‘ کے بارے میں کیا جائے جس کی میں تشہیر کررہا ہوں۔
