ایمز ٹی وی(تعلیم) گورنمنٹ کالج حیدرآباد میں 58ویں سالانہ تقریب تقسیم اسناد و انعامات منعقد کی گئی۔ تقریب سے ڈائریکٹر کالجز سندھ پروفیسر ڈاکٹر ناصر انصار نے خطاب کرتے ہوئے کہا کہ مارکیٹ میں جن علوم کی ضرورت ہے ان کی تدریس کالج میں ہونی چاہیے‘ بزنس ایڈمنسٹریشن کی کلاسیں شروع کی جائیں اور طلبہ اپنے اپنے شعبوں میں مہارت پیدا کریں اور جدتوں سے اپنے آپ کو باخبر رکھیں۔ ڈائریکٹر کالجز حیدرآباد ریجن پروفیسر ڈاکٹر مرزا امام علی بیگ نے کہا کہ گورنمنٹ کالج کے طلبہ نے ہر فورم ہر مقابلے میں اپنی صلاحیتوں کو منوایا ہے‘ رجسٹرار سندھ یونیورسٹی سلیم چانڈیو نے کہا کہ میں نے گورنمنٹ کالج میں تعلیم حاصل کی ہے مجھے پھلیلین ہونے پر فخر ہے‘ کالج میں یونیورسٹی کے امتحانات میں گورنمنٹ کالج نے سب سے زیادہ اعزازات حاصل کیے ہیں‘کالج میں علمی‘ تحقیقی اور ادبی کام کیلئے یونیورسٹی تعاون کرنے پر تیار ہے۔ کالج کے پرنسپل پروفیسرڈاکٹرناصرالدین شیخ نے کہا کہ اس سال بھی کالج کے طلبہ نے گریجویشن اورپوسٹ گریجویشن امتحانات میں21فرسٹ کلاس پوزیشن لی ہیں۔

ایمز ٹی وی (تعلیم) وفاقی ہائر ایجوکیشن کمیشن کے دبائو پر وفاقی اردو یونیورسٹی کے وائس چانسلر ڈاکٹر سلمان ڈی محمد کے خلاف ان کے پی ایچ ڈی کے مقالے کے حوالے سے علمی سرقے پر کارروائی کا معاملہ آخری مراحل میں داخل ہوگیا ہے۔ جامعہ کراچی کی سنڈیکیٹ میں ’’علمی سرقہ قائمہ کمیٹی‘‘ کی رپورٹ پر حتمی فیصلہ کیا جائے گا جس کے لئے اجلاس جمعرات 20 اپریل کو طلب کر لیا گیا ہے۔ اجلاس میں جامعہ کراچی میں سندھ بینک کے قیام پر غور کیا جائے گا۔ واضح رہے کہ جامعہ کراچی پردبائو ہے کہ وہ جامعہ کے اندر سندھ بینک قائم کرے اور پہلے سے موجود نیشنل بینک سمیت دیگر بینکوں کے اکائونٹس کو سندھ بینک منتقل کر دے۔ سابق وائس چانسلر ڈاکٹر قیصر اپنے 5سالہ دور میں یہ معاملہ ٹالتےرہے تھے۔ اجلاس میں تدریسی اسامیوں کے این ٹی ایس ٹیسٹ کرانے کی منظوری بھی دی جائے گی تاہم دلچسپ امر ہے کہ وفاقی ہائر ایجوکیشن کمیشن این ٹی ایس پر عدم اعتماد کرتے ہوئے اپنا ٹیسٹنگ کا نظام قائم کر چکا ہے اور ملک بھر کی جامعات کو مفت ٹیسٹنگ کی سروس فراہم کرنے کی پیشکش کر چکا ہے۔ سنڈیکیٹ کے اجلاس میں جامعہ کراچی میں میڈیکل کالج اوراسپتال قائم کرنے پر بھی غور کیا جائے گا۔ اس حوالے سے متحدہ عرب مارت کا ایمریٹ انسٹی ٹیوٹس آف سائنسز ،جامعہ کراچی کو میڈیکل کالج اور اسپتال قائم کرنے کی پیشکش کر چکا ہے۔ اجلاس میں جامعہ کراچی میں پوسٹ گریجویٹ نیوروجیکل ریسرچ سینٹر قائم کرنے کی تجویز کی منظوری دی جائے گی۔

ایمز ٹی وی(تعلیم) صوبائی محکمہ تعلیم، محکمہ بورڈز و جامعات اور کراچی سمیت سندھ بھر کے تعلیمی بورڈز کے درمیان رابطے کے فقدان اور سیکرٹری اسکول ایجوکیشن کی جانب سے نقل کی روک تھام کے لئے کمیٹیاں نہ بنانے کے باعث کراچی سمیت سندھ بھر میں نقل کا سلسلہ جاری ہے۔ میٹرک بورڈ کراچی کے تحت جاری امتحانات میں کھلے عام نہ صرف نقل کرائی جا رہی ہے بلکہ بعض مراکز پر امیدواروں سے رقم لے کر انہیں علیحدہ کمرے میں بٹھا کر نقل کرائی جا رہی ہے۔ بعض امتحانی مراکز میں امیدواروں کو کھلے عام نقل کرتے ہوئے پایاگیا ہے۔ سینٹرل جیل کراچی کے نزدیک واقع وائٹ ہال کیمپس اسکول میں امیدواروں نے بتایا کہ انہوں نے فی کس ایک ہزار روپے دے کر نقل کی۔ ملیر، گڈاپ، لانڈھی، شاہ فیصل کالونی، عزیز آباد، قائدآباد، کورنگی، کیماڑی، اورنگی ٹائون، گلشن حدید، گلشن اقبال، بلدیہ، لیاری اور ناظم آباد کے امتحانی مراکز سے نقل کی اطلاعات موصول ہوئیں۔ بورڈ کی جانب سے ویجی لینس ٹیمیں نقل کی روک تھام کرنے سے قاصر رہیں۔ کسی امتحانی مرکز میں سیکورٹی نظر نہیں آئی۔ ویجی لینس افسران کے مطابق جب سیکورٹی نہیں تو وہ نقل سے کیسے روکیں۔ نقل سے منع کرنے پر انہیں دھمکیاں دی جا رہی ہیں۔ محکمہ تعلیم بھی کوئی تعاون نہیں کر رہا ہے۔ ہم محض سرکاری ڈیوٹی دے رہے ہیں۔ واضح رہے کہ جب تعلیمی بورڈز گورنر کے پاس تھے تو گورنر ہائوس کی جانب سے محکمہ تعلیم کے ساتھ ویجی لینس ٹیمیں تشکیل دی جاتی تھیں جو روزانہ کی بنیاد پر میٹرک اور انٹر کے امتحانی مراکز کا دورہ کرتیں اور نقل کرنے والے طلبہ اور ان کو مدد دینے کے خلاف کارروائی کرتیں تاہم جس کی وجہ سے نقل کے رجحان میں خاصی کمی ہوئی تھی لیکن رواں سال تو صورتحال انتہائی سنگین ہے۔ صوبے کے کسی تعلیمی بورڈ میں مستقل ناظم امتحانات تک نہیں ہے۔ تعلیم بچائو ایکشن کمیٹی کے رہنما انیس الرحمٰن نے کہا کہ سیکرٹری اسکول ایجوکیشن اپنے ایئرکنڈیشنڈ کمرے سے باہر نکلیں اور دیکھیں کہ میٹرک کے امتحانات میں کیا ہو رہا ہے۔ انہوں نے کہا کہ سیکرٹری بورڈ و جامعات اور سیکرٹری اسکول ایجوکیشن فوری طور پر اپنی سربراہی میں ویجی لینس ٹیمیں تشکیل دیں اور امتحانی مراکز کا دورہ کریں تاکہ نقل کی روک تھام ممکن ہوسکے۔بورڈ کے چیئرمین پروفیسر سعید الدین کے مطابق بورڈ کی اپنی ویجی لینس ٹیمیں ہیں جو امتحانی مراکز کا دورہ کر کے نقل کرنے والے امیدواروں کو پکڑ رہی ہیں انہوں نے کہا کہ امتحانی مراکز پر بجلی نہ ہونے اور سیکورٹی نہ ہونے کی وجہ سے بہت مسائل کا سامنا ہے۔

ایمزٹی وی(مانیٹرنگ ڈیسک) 2017 میں آئی فون کو دس سال مکمل ہورہے ہیں اور اس موقع کو خاص بنانے کے لیے ایپل ایک یا دو نہیں بلکہ تین فونز متعارف کرانے والی ہے۔ رپورٹ کے مطابق دو فونز میں تو گزشتہ ماڈلز کے مقابلے میں معمولی تبدیلیاں یا بہتری کی جائے گی جبکہ تیسرا مکمل طور پر ری ڈیزائن پریمیئم آئی فون ہوگا۔ اگرچہ یہ تینوں فون ایک ساتھ ہی متعارف کرائے جائیں گے مگر صارفین کو ری ڈیزائن آئی فون کو خریدنے کے لیے سال کے آخر تک انتظار کرنا پڑے گا۔ رپورٹ میں مزید بتایا گیا کہ پریمیئم آئی فون ایک یا دو ماہ تاخیر کے بعد فروخت کیا جائے گا جس کی وجہ اس ڈیوائس کی تیاری میں پیش آنے والی مشکلات ہیں۔ اس فون کے بالکل نئے ڈیزائن نے اس کی تیاری کو مشکل بنایا ہے جو کہ گلیکسی ایس ایٹ جیسی ایج اسکرین کے ساتھ ہوگا۔ اسی طرح ایپل کی جانب سے فنگر پرنٹ سنسر کو اسکرین کا حصہ بنانے کا تجربہ بھی کیا جارہا ہے جو کہ تاخیر کا حصہ بن سکتا ہے، سام سنگ نے ایس ایٹ میں اس فیچر کو لانے کی کوشش کی تھی مگر اسے کافی مشکل پایا تو اس سنسر کو فون کے بیک پر منتقل کردیا۔ اس پریمیئم آئی فون کے فرنٹ کیمرے میں تھری ڈی سنسنگ کی صلاحیت کا فیچر بھی ہوسکتا ہے بلکہ رپورٹ کے مطابق ایپل اس فون میں پہلی بار ڈوئل کیمرہ فرنٹ پر دے سکتی ہے۔ تھری ڈی کیمرہ زیادہ اچھے سیلفی فلٹرز اور augmented رئیلٹی ماسکس کو استعمال کرنے کا موقع دے گا جبکہ گیمنگ اور تھری ڈی ماڈلنگ کے لیے بھی مددگار ثابت ہوسکتا ہے۔