K2 - Results from #19124

مردم شماری کرنے والی ٹیم پر فائرنگ

ایمزٹی وی(چارسدہ)تحصیل تنگی کے علاقے ہری چند میں مردم شماری ٹیم پر فائرنگ سے ایک پولیس اہلکار زخمی جبکہ ملزم کو زخمی حالت میں گرفتار کرلیا گیا۔

تفصیلات کے مطابق چارسدہ کی تحصیل تنگی کے علاقے ہری چند میں مردم شماری کرنے والی ٹیم پر فائرنگ کی گئی ہے جس سے ڈیوٹی پر تعینات ایک پولیس ا ہلکار تاج محمد گولی لگنے سے شدید زخمی ہوگیا جسے ہسپتال منتقل کردیا گیا ہے جبکہ پولیس کی جوابی فائرنگ سے ملزم کو زخمی حالت میں گرفتار کرلیا گیا۔

یاد رہے کہ ملک بھر میں خانہ شماری کے بعد مردم شماری کا پہلا مرحلہ جاری ہے۔

بصارت سے محروم بچوں کو پروگرامنگ سکھانے کا منصوبہ

ایمز ٹی وی(مانیٹرنگ ڈیسک) پروگرامنگ اور کمپیوٹنگ سیکھنے کے لیے اب تیز نظر کی ضرورت نہیں رہے گی کیونکہ مائیکرو سافٹ کارپوریشن نے نابینا بچوں کو پروگرامنگ سکھانے کے اچھوتے منصوبے کا آغاز کر دیا ہے۔

مائیکروسافٹ کے ریسرچ ڈپارٹمنٹ نے ’پروجیکٹ ٹورینو‘ کا اجرا کیا ہے جس کے تحت بصارت میں خرابی کے شکار بچوں کو کوڈنگ سکھائی جاتی ہے۔ اس کے ذریعے 7 سے 11 سال کے بچے اپنے ہم جماعتوں کے ساتھ کوڈنگ سیکھ سکتے ہیں۔

پروجیکٹ ٹورینو میں سادہ اصولوں کے ذریعے بچوں کو ڈریگ اینڈ ڈراپ کمانڈ کے ذریعے کوڈنگ سکھائی جاتی ہے۔ ان سادہ امور کے ذریعے طالبعلم چھوٹے اور سادہ پروگرام بناسکتے ہیں مثلاً بھول بھلیوں سے گزرنا یا خلا میں آگے بڑھنا وغیرہ۔

ٹورینو کے تحت پلاسٹک کے موتی عین اسی طرح ایک دوسرے جڑتے ہیں جس طرح پروگرامنگ ٹولز میں کمانڈز دی جاتی ہیں۔ تاہم اسے کمپیوٹر کی بجائے فزیکل پروگرامنگ کہا جاسکتا ہے جس میں بچے اشیا کو چھو کر محسوس کرکے ان کو ایک دوسرے سے جوڑتے ہیں۔ مثلاً ایک بار جب اشیا درست جڑجائیں تو وہ موسیقی خارج کرتی ہیں۔ اس کے اگلے یعنی ایڈوانسڈ ورژن میں بچوں کو فزیکل سے ڈجیٹل کوڈنگ تک لے جایا جاتا ہے۔ اس طریقے سے بچے دھیرے دھیرے اصل پروگرامنگ سیکھنے لگ جاتے ہیں اور وہ پروگرامنگ پر مہارت حاصل کرنے لگتے ہیں۔

مائیکروسافٹ کا خیال ہے کہ اس طرح کوڈنگ کے اچھے ماہرین پیدا ہوں گے اور اداروں میں پروگرامنگ اور کوڈنگ کے ماہرین کی بڑھتی ہوئی طلب پوری کرنے میں مدد ملے گی۔ اسی طرح بصارت میں خرابی یا اندھے پن کے شکار افراد کو باعزت روزگار بھی میسر آسکے گا۔

پروجیکٹ ٹورینو کے مطابق دنیا بھر میں 28 کروڑ سے زائد افراد نابینا پن یا بصارت می کمی کے شکار ہیں۔ فی الحال اس پروجیکٹ کے بی ٹا ورژن میں 100 طالبعلم شامل کئے گئے ہیں اور ان کا نصاب بہت خاص انداز میں ترتیب دیا گیا ہے۔

عملی اقدامات نہ کئے تو آئندہ نسلوں کا مستقبل خطرے میں پڑ جائے گا

ایمزٹی وی(اسلام آباد)وزیراعظم میا ں نواز شریف نے کہا ہے کہ حکومت موسمیاتی تبدیلی میں درختوں کی اہمیت سے آگاہ ہے، موسمیاتی تبدیلی نہ صرف ہمارے بلکہ آئندہ نسلوں پر بھی اثر انداز ہورہی ہے۔ تفصیلات کے مطابق عالمی یوم جنگلات کے موقع پر وزیراعظم نواز شریف نے پیغام جاری کرتے ہوئے کہا کہ عملی اقدامات نہ کئے تو آئندہ نسلوں کا مستقبل خطرے میں پڑ جائے گا۔

وزیراعظم نے مزید کہا کہ پاکستان کو بہتر ماحولیاتی ذمہ دار ملک کے طور پر دیکھنا چاہتے ہیں،گرین پاکستان فنڈ میں سے 55 کروڑ30 لاکھ روپے کی پہلی قسط جاری کردی گئی ہے۔ نوازشریف کا کہنا تھا کہ جاری کی گئی رقم چاروں صوبو،آزاد جموں کشمیر،گلگت بلتستان اور فاٹا میں خرچ کی جائے گی۔

اسمارٹ فونز کی لچک دار ٹچ اسکرین تیار

ایمز ٹی وی (مانیٹرنگ ڈیسک) یونیورسٹی آف برٹش کولمبیا کے انجینئروں نے ایک ایسی انتہائی لچک دار ٹچ اسکرین کا پروٹوٹائپ تیار کیا ہے جسے کھینچا اور لپیٹا جاسکتا ہے جب کہ یہ دباؤ کے علاوہ قدرے فاصلے سے ہاتھ کی حرکت تک کو محسوس کرسکتی ہے۔

اگرچہ لچک دار برقی آلات تیار کرنے کی کوششیں پچھلے کئی سال سے جاری ہیں اور ان میں متعدد کامیابیاں بھی حاصل ہوچکی ہیں لیکن مذکورہ ٹچ اسکرین کو اس سلسلے میں اہم ترین پیش رفت قرار دیا جاسکتا ہے کیونکہ اس میں جیلی دار سلیکون (silicone) کی باریک پرت میں مختلف اقسام کے نہایت مختصر برقی آلات سموئے گئے ہیں جن میں سے کچھ تو دباؤ اور روشنی میں تبدیلی کو محسوس کرتے ہوئے سینسر کا کام کرسکتے ہیں جب کہ دیگر اقسام کے آلات بجلی کی منتقلی کا کام کرتے ہیں۔ دلچسپی کی بات تو یہ ہے کہ اس لچک دار ٹچ اسکرین میں استعمال کیے گئے سارے مادے بہت کم خرچ بھی ہیں۔

یہ لچک دار تجرباتی ٹچ اسکرین 5 سینٹی میٹر لمبی اور 5 سینٹی میٹر چوڑی ہے جسے یونیورسٹی آف برٹش کولمبیا، کینیڈا کے مرزا ثاقب سرور اور ان کے ساتھی انجینئروں نے تیار کیا ہے۔ اس ٹیکنالوجی کو مزید ترقی دے کر زیادہ بڑی اور عملی نوعیت کی ٹچ اسکرینز تیار کی جاسکیں گی جو اپنی لچک اور پائیداری کی بناء پر نہ صرف جدید ترین اسمارٹ فونز کا حصہ بن سکیں گی بلکہ انہیں مستقبل کے روبوٹس کے لیے انسانوں جیسی کھال تیار کرنے میں بھی استعمال کیا جاسکے گا۔

علاوہ ازیں آنے والے برسوں میں یہی لچک دار ٹچ اسکرین بالکل کاغذ جیسے برقی اخبارات اور ایسی ٹی وی اسکرینز کی بنیاد بھی بن سکیں گی جنہیں دیوار پر چپکایا اور ضرورت پڑنے پر لپیٹا جاسکے گا۔ غرض ہر وہ شعبہ جہاں لچک دار برقی آلات کا اطلاق ممکن ہے، ہر اس میدان میں یہ ٹچ اسکرین استعمال کی جاسکے گی۔ اس پروٹوٹائپ کی تفصیلات ’’سائنس ایڈوانسز‘‘ میں شائع ہوئی ہیں۔

وائی فائی کی رفتار کو تیز کرنا سیکھیں

ایمز ٹی وی(مانیٹرنگ ڈیسک) اگر تو آپ کو گھر میں سست وائی فائی کے مسئلے کا سامنا ہے تو اس کی وجہ یہ ہوسکتی ہے کہ آپ کے پڑوسی بھی وہی چینیل استعمال کررہے ہیں جو آپ کے پاس ہے۔اگرچہ آپ اور دیگر افراد ایک نیٹ ورک پر تو نہیں ہوں گے مگر ان کی ڈیوائسز ضرور آپ کی ڈیوائس کے کام میں مداخلت کرسکتی ہیں۔

وائی فائی سگنلز مختلف چینیلز میں تقسیم ہوجاتے ہیں اور یہی وجہ ہے کہ آپ کے گھر کے قریب موجود ڈیوائسز مختلف نیٹ ورکس پر ہونے کے باوجود اسی چینل پر ہوسکتی ہیں۔اس طرح یہ ڈیوائسز ایک دوسرے کے سگنلز میں مداخلت کرتی ہیں۔

اس مسئلے سے بچنے کے لیے اگر تو آپ ونڈوز کمپیوٹر یا لیپ ٹاپ استعمال کررہے ہیں تو Acrylic وائی فائی نامی ا سکینر کو استعمال کرسکتے ہیں، اسی طرح اینڈرائیڈ کے لیے وائی فائی اینالائزر بھی اس مقصد کے لیے بہترین ہے۔ایک بار جب آپ سسٹم کو اسکین کرلیں تو راوٹر میں لاگ ان ہوں۔یعنی ویب براوزر پر آئی پی ایڈریس ٹائپ کریں یا راوٹر بنانے والوں کا فراہم کردہ سافٹ وئیر استعمال کریں۔

پہلے بیسک وائرلیس سیٹ اپ تلاش کریں جو کہ عام طور پر ابتدائی آپشنز میں سے ایک ہوتا ہے وہاں اپنے نیٹ ورک کو تلاش کریں اور چینیلز کو بدل دیں۔اس کے بعد تبدیلیوں کو سیو کردیں جس کے بعد آپ کو دیگر ڈیوائسز کی مداخلت کا سامنا بہت کم ہوگا۔

رونالڈینو کا لیاری کے بچوں کے لئے پیغام

ایمز ٹی وی(اسپورٹس) مایہ ناز فٹبالر رونالڈینو کے پاکستان آمد کے اعلان کے بعد فٹبال کھیلنے والے پاکستانیوں کی خوشی کی انتہا نہ رہی ،لیجنڈری فٹبالر رونالڈینو نے پاکستان آنے کی تیاریاں تیز کردی ، اسٹار فٹ بالر نے کراچی آمد سے قبل لیاری کے بچوں کے نام پیار بھرا پیغام بھیج دیا۔ برازیل کے مایہ ناز فٹبالر رونالڈینیو کے پاکستان آنے کے اعلان کے بعد فٹبال شائقین ہی بیتاب نہیں ، وہ خود بھی کافی بے چین ہیں۔

سوشل میڈ یا ویب سائٹ ٹوئٹر پر لیاری کے بچوں نے رونالڈینو سے اپنی محبت کا اظہار کیا تو سٹار فٹبالر سے بھی رہا نہ گیا اور فوراً ٹوئٹر پر لکھا کہ لیاری کے بچوں ،مجھے تم سے پیار ہے اور جلد ملاقات ہو گی۔ا س سے قبل اسٹار فٹ بالر بوم بوم شاہد آفریدی سے ملنے کی خواہش کا اظہار بھی کرچکے ہیں۔رونالڈینیو جولائی میں پاکستان آئیں گے ، وہ کراچی میں ہونے والی فٹ بال لیگ میں ان ایکشن ہونگے اور بچوں کو کھیل کے گر بھی سکھائیں

بھارت کے حربے ناکام ، رانچی ٹیسٹ میچ نتیجے پر نہ پہنچ سکا

ایمز ٹی وی(اسپورٹس) بھارت اور آسٹریلیاکے درمیان کھیلا گیا تیسرا ٹیسٹ میچ سنسنی خیز مقابلے کے بعد بغیر کسی نتیجے کے ختم ہو گیا ہے اور 4 ٹیسٹ میچوں کی سیریز 1-1 سے برابر ہے۔ میچ کے پانچویں روز کھیل کے اختتام پر آسٹریلیا نے دوسری اننگز میں 6 وکٹوں کے نقصان پر 204 رنز بنائے۔

تفصیلات کے مطابق رانچی میں کھیلے گئے تیسرے ٹیسٹ میچ میں آسٹریلیا نے ٹاس جیت کر پہلی اننگز میں 451 رنز بنائے۔ کپتان سٹیو سمتھ نے بھارتی باﺅلرز کی خوب درگت بنائی اور 178 رنز کی ناقابل شکست اننگز کھیلی جبکہ گلین میکس ویل نے 104 رنز بنائے۔

دیگر بلے بازوں میں میٹ رینشاءنے 44، ڈیوڈ وارنر نے 19، شان مارش نے 2، پیٹر ہینڈزکومب نے 19، میتھیو ویڈ نے 37، پیٹ کومنز نے 0، سٹیو او کیف نے 25 اور نیتھن لیون نے 1 سکور بنایا جبکہ جوش ہیزل ووڈ کھاتہ کھولے بغیر ہی آﺅٹ ہو گئے۔

بھارت کی جانب سے رویندرا جدیجہ نے تباہ کن باﺅلنگ کرتے ہوئے 124 رنز کے عوض 5 کھلاڑیوں کو پویلین کی راہ دکھائی جبکہ اومیش یادیو نے 3 اور روی چندرن ایشوین نے ایک وکٹ حاصل کی۔

آسٹریلیا کی پہلی اننگز کے 451 رنز کے جواب میں بھارتی بلے بازوں نے بھی عمدہ بلے بازی کا مظاہرہ کیا اور چتیشور پجارا کی عمدہ ڈبل سنچری کی بدولت 603 رنز کا پہاڑ کھڑا کر کے آسٹریلیا کے خلاف 152 رنز کی برتری حاصل کر لی۔ چتیشور پجارا نے عمدہ کھیل پیش کرتے ہوئے 202 رنز بنائے جبکہ وردھیومن ساہا نے 117 رنز کی اننگز کھیلی۔

دیگر بلے بازوں میں لوکیش راہول نے 67، مرلی وجے نے 82، ویرات کوہلی نے 6، اجنکیا ریہانے نے 14، کرون نائیر نے 23، روی چندرن ایشوین نے 3، رویندرا جدیجہ نے 54 اور اومیش یادیو نے 16 رنز بنائے جبکہ ایشانت شرما کھاتہ کھولے بغیر ہی آﺅٹ ہو گئے۔

آسٹریلیا کی جانب سے پیٹ کومنز سب سے کامیاب باﺅلر رہے جنہوں نے 4 کھلاڑیوں کو پویلین کی راہ دکھائی اور سٹیو او کیف نے 3کھلاڑیوں کو آﺅٹ کیا جبکہ نیتھن لیون اور جوش ہیزل ووڈ نے ایک، ایک وکٹ حاصل کی۔

میچ آسٹریلیا نے دوسری اننگز میں 6 وکٹوں کے نقصان پر 204 رنز بنائے اور میچ بغیر کسی نتیجہ کے ختم ہو گیا۔ بھارتی باﺅلرز نے آسٹریلیا کے اوپننگ بلے بازوں کو جلد ہی ٹھکانے لگا دیا اور صرف 63 رنز پر 4 کھلاڑی آﺅٹ ہو چکے تھے تاہم شان مارش اور پیٹر ہینڈز کومب بھارتی باﺅلرز کیلئے آہنی دیوار ثابت ہوئے اور ان کے تمام حربے ناکام بناتے ہوئے ٹیم کو یقینی شکست سے بچا لیا۔ دونوں کھلاڑیوں نے بالترتیب 53 اور 72 رنز کی ذمہ دارانہ اننگز کھیلی۔

ڈاکٹر سروش لودھی کے وائس چانسلر بننے کے قوی امکانات

ایمز ٹی وی(تعلیم) جامعہ این ای ڈی میں ڈاکٹر سروش لودھی کے وائس چانسلر بننے کے قوی امکانات پیدا ہوگئے ہیں۔ پیر کو تلاش کمیٹی نے 4 میں سے تین اُمیدواروں کے ناموں پر اتفاق کرلیا۔

موجودہ وائس چانسلر ڈاکٹر افضل حق جامعہ این ای ڈی کو مالی خسارے سے نکالنے کے باوجود اگلی مدت کے لئے وائس چانسلر بننے کی دوڑ سے باہر ہوگئے ہیں کیونکہ ان کے چھپے ہوئے تحقیقی پرچوں کی تعداد کم تھی۔ تلاش کمیٹی کے ایک رکن نےبتایا ہے کہ سب سے زیادہ نمبر ڈاکٹر سروش لودھی نے لیے اور کمیٹی کے اراکین کو متاثر کن جوابات دیئے، دُوسرے نمبر پر سویڈن میں مقیم ڈاکٹر قمرالوہاب رہے ان کا انٹرویو اسکائپ پر لیا گیا۔ جبکہ تیسرے نمبر پر غلام اسحٰق خان انسٹی ٹیوٹ کے ڈاکٹر اشرف علی میو رہے۔

تلاش کمیٹی کے رکن کے مطابق وزیراعلیٰ سندھ کو یہ نام نمبروں کے بجائے حروف تہجی کے اعتبار سے بھیجے جائیں گے جن کے ساتھ نمبروں کی تفصیلات بھی منسلک ہوں گی۔ وزیراعلیٰ ان تینوں میں سے ایک نام کی منظوری دیں گے۔ وہ نام مزید کارروائی کے لئے بذریعہ چیف سیکرٹری، گورنر سندھ کو بھجوا دیا جائے گا اور گورنر سندھ اس کی حتمی منظوری دیں گے جس کے بعد ان کے نام کا باقاعدہ نوٹیفکیشن جاری کر دیا جائے گا۔

3جامعات کے وائس چانسلرزکی مدت ملازمت مکمل

ایمز ٹی وی(تعلیم) کراچی کی دو انجینئرنگ جامعات اور ایک قانون کی جامعہ کے وائس چانسلرز کی مدت مکمل ہو گئی. لیکن تینوں جامعات میں مستقل وائس چانسلر کی تعیناتی تک نہ تو وائس چانسلر کی مدت میں تاحکم ثانی توسیع کی گئی اور نہ ہی قائم مقام وائس چانسلر کا تقرر کیا گیا۔ جامعہ این ای ڈی کے وائس چانسلر ڈاکٹر محمد افضل کی چار سالہ مدت17 مارچ کو مکمل ہو گئی تھی۔

دائود یونیورسٹی کے وائس چانسلر ڈاکٹر فیض اللہ عباسی کی18 مارچ کو اور شہید ذوالفقار علی بھٹو لاء یونیورسٹی کے وائس چانسلر جسٹس (ر) قاضی خالد کی مدت19 مارچ کو مکمل ہو گئی تھی. لیکن گورنر ہائوس اور وزیراعلیٰ ہائوس کی جانب سے تینوں جامعات میں قائم مقام وائس چانسلر تک کی تعیناتی نہیں کی گئی اور تینوں جامعات پیر کو وائس چانسلر کے بغیر کام کرتی رہیں۔

جامعہ سندھ ،75 طلباءمیں اسکالر شپ کے چیک تقسیم

ایمز ٹی وی(تعلیم) جامعہ سندھ جامشورو میں ہائیر ایجوکیشن کمیشن کی ”اہلیت و ضرورت“ اسکیم کے تحت 42 اور ڈسٹرکٹ میرٹ اسکالر شپ کے تحت 33 طلباء کو اہلیت و ضرورت کی بنیاد پر 26 لاکھ روپے کے اسکالر شپ کے چیک دیئے گئے۔ وائس چانسلر سیکریٹریٹ کے سینیٹ ہال میں منعقدہ تقریب میں شیخ الجامعہ سندھ پروفیسر ڈاکٹر فتح محمد برفت نے مجموعی طور پر 75 طلباء میں چیک تقسیم کیے۔

طلباء کے مالی معاونت کے شعبے کے ڈائریکٹر ڈاکٹر حاکم علی مہیسر کی جانب سے منعقد کی گئی تقریب میں ہائیر ایجوکیشن کمیشن کی ”اہلیت و ضرورت“ اسکیم کے تحت 42طلباء کو فی کس 48ہزار وپے کے چیک دیئے گئے،. جبکہ ڈسٹرکٹ میرٹ اسکالر شپ کے تحت 33 طلباء کو فی کس 18ہزار روپے کے چیک دیئے گئے۔

اس موقع پر وائس چانسلر پروفیسر ڈاکٹر فتح محمد برفت نے طلباء کو مدد ، تعاون و سرپرستی کا یقین دلاتے ہوئے کہا کہ جامعہ سندھ کو تعلیم و تحقیق کا اعلیٰ مرکز بنایا جائے گا۔ جبکہ کوشش کی جا رہی ہے کہ طلباء کو ہر ممکن سہولیات فراہم کی جائیں۔ انہوں نے کہا کہ جامعہ سندھ کے طلباء کو لیپ ٹاپ اور فیس واپسی کے چیک دیئے گئے ہیں، باقی ماندہ طلباء کو بھی لیپ ٹاپ و اسکالر شپ دلوانے کی کوشش کریں گے۔ انہوں نے کہا کہا ماضی میں جامعہ سندھ کو انتہائی کم اسکالر شپس مل رہی تھیں، جس پر جامعہ سندھ کی انتظامیہ نے ایچ ای سی حکام پر زور دیا ہے کہ جامعہ سندھ کے غریب طلباء کی بھی مدد کی جائے۔