ایمزٹی وی (سیاسی) کراچی میں آج پاکستان کوسٹ گارڈز کے 35 ویں بیج کی پاسنگ آوٹ پریڈ منعقد ہوئی ، پاس آؤٹ ہونے والے ریکروٹس نے شاندار کارکردگی کا مظاہرہ کیا۔پاکستان کوسٹ گارڈ کے 35ویں بیج کی پاسنگ آؤٹ پریڈ کوسٹ گارڈ ٹریننگ سینٹر کورنگی میں ہوئی ۔پریڈ میں 425 ریکروٹس نےحصہ لیا ۔کمانڈرسدرن کمانڈ لیفٹیننٹ جنرل ناصر خان جنجوعہ تقریب کے مہمان خصوصی تھے۔ پاس آؤٹ ہونے والے جوانوں نے ملکی دفاع اور پیشہ وارانہ ذمہ داریاں احسن طریقے سے نبھانے کا حلف اٹھایا ۔کوسٹ گارڈز ریکروٹس نے پاسنگ آوٹ پریڈ کے دوران دشمن سے بہادری سے نمٹنے کے جوہر دکھائے، اس موقع پر ریکروٹس نے مارشل آرٹس کا مظاہرہ بھی کیا۔ملک کی سلامتی اور دفاع کو اپنا نصب العین سمجھنے والے اور اس سرزمین کے لئے جاں کی قربانی دینے سے دریغ نہ کر نے ک اعزم رکھنے والے ان جوانوں کاحوصلہ چٹانوں کی طرح مضبوط اور بلند دکھائی دیا۔

ایمزٹی وی (سیاسی) بلوچستان کے 11 اضلاع میں انسداد پولیو کی خصوصی مہم آج سے شروع ہوگئی۔ محکمہ صحت بلوچستان ذرائع کے مطابق مہم پشین، قلعہ عبداللہ، نصیرآباد، جعفرآباد، لسبیلہ، آواران، واشک، قلات، خضدار، ژوب اور شیرانی میں چلائی جارہی ہے۔ ضلع کوئٹہ میں انسداد پولیو کی مہم اگلے ہفتے سے چلائی جائے گی۔ ذرائع کے مطابق صوبے کے 12 اضلاع میں 14 لاکھ 25 ہزار سے زائد بچوں کو انسداد پولیو کے قطرے پلانے کا ہدف مقرر کیا گیا ہے ۔

ایمزٹی وی(کراچی) سندھ ہائی کورٹ میں ڈیتھ وارنٹ کے خلاف دو مجرموں کے اہل خانہ کی درخواستوں پر عدالت نے سرکاری وکیل سے جواب طلب کرلیا ہے۔ کالعدم تنظیم کے محمد اعظم اور عطا اللہ عرف عبداللہ کے اہل خانہ نے ڈیتھ وارنٹ کو معطل کرنے سے متعلق درخواست سندھ ہائی کورٹ میں دائر کررکھی ہے۔ درخواست کی سماعت سندھ ہائی کورٹ کے جسٹس محمد علی مظہر کی سربراہی میں بینچ کررہا ہے۔ دوران سماعت ایڈوکیٹ جنرل سندھ اور سپرنٹنڈنٹ سکھر جیل پیش ہوئے۔ جسٹس محمد علی مظہر نے سپریٹنڈنٹ سکھر جیل سے استفسارکیا کہ کیا آپکو پھانسی کے رولز میں کی گئی ترمیم کا علم ہے، اگر آپ جانتے ہیں تو بلیک وارنٹ جاری ہونے کے سات دن بعد پھانسی کی تاریخ مقرر کی جانی تھی۔ 23 دسمبر کیسے رکھ دی؟ تاریخ 26 دسمبر بنتی ہے۔ انہوں نے ریمارکس دیئے کہ حکومت خود قانون کا مذاق بنارہی ہے۔ اپنی مرضی نہیں قانون کے مطابق چلیں۔ درخواست گزار کے وکیل نے موقف اختیار کیا کہ سزا کے خلاف تمام اپیلیں مسترد ہونے کے بعد سپریم کورٹ میں نظر ثانی کی دوسری درخواست زیر التوا ہے۔ انسداد دہشت گردی کی عدالت نے بلیک وارنٹ جاری کرتے وقت سپریم کورٹ میں موجود نظر ثانی کی درخواست کو نظر انداز کیا۔ درخواست میں استدعا کی گئی کہ جب تک سپریم کورٹ درخواست پر فیصلہ نہ کردے ڈیتھ وارنٹ معطل کیا جائے۔سرکاری وکیل نے درخواست پر جواب کے لئے عدالت سے کچھ وقت مانگ لیا، جس پر عدالت نے سماعت کچھ دیر کے لئے معطل کردی ۔

ایمزٹی وی(کراچی) کمانڈر سدرن کمانڈ لیفٹیننٹ جنرل ناصر خان جنجوعہ نے کہا ہے کہ منشیات اور دہشتگردی کے خلاف جہاد کرنا ہوگا۔ جو ملک کی جڑوں کو کھوکھلا کررہی ہیں۔ کراچی میں پاکستان کوسٹ گارڈ کے 35 ویں بیچ کی پاسنگ آؤٹ پریڈ ہوئی۔ جسکے مہمان خصوصی کمانڈرسدرن کمانڈ لیفٹننٹ جنرل ناصر خان جنجوعہ بنے۔ کیڈٹس سے سلامی لینے کے بعد اپنے خطاب میں انہوں نے کہا کہ منشیات کی طرح دہشت گردی بھی ملک کو اندرونی طور پر کمزور کررہی ہے۔ جسکے خلاف کوسٹ گارڈ نے سربکف رہنا ہے۔ لیفٹننٹ جنرل ناصر جنجوعہ نے کہا کہ وسائل کی کمی کے باوجود سمندروں کی مسلسل نگرانی، منشیات و انسانی اسمگلنگ اور اسلحے کی غیر قانونی نقل و حرکت کی روک تھام کے لیے کوسٹ گارڈ کا کردار قابل تحسین ہے۔ کیڈٹس کی جانب سے شاندار پریڈ اور اعلیٰ کارکردگی کے مظاہرے پر کمانڈر سدرن کمانڈ نے انہیں مبارک باد پیش کی ۔